1 Samoɛl 1 - mzwDBL

Samoɛl lola wa

¹ Baa bɛlee fa lole baa yerɔ Ɛlkana, o le Efrem dea. Dɛ o soɡe Rama waa lɔ Efrem deŋɡarere harɛ ta. O mɛɛ sɔne Jɛroham, o nabaa ɡe sɔne Elihu. Elihu ɡe mɛɛ Tohu, asɛ Tohu ɡe mɛɛ sɔne Suf.

² Dɛ Ɛlkana mo haahna banɛ. Bɛl sɔne Hana, asɛ nɛɛte ɡe Pɛnena. Pɛnena dɔ bii, asɛ Hana te ta bie dɔe.

³ Bena bɛlbwaa Ɛlkana yon le o bwɛɛ Rama kaa bwɛjen Silo, dɛ́ ka tomɛ Korowii Waa Ɛ Koranar Bwa Kooro dɛ kpoo kwaa ɛ saraha tɛo. Dɛ Eli ɛ sɔfo, dɛ dɔ bibaala banɛ bane ba ɡe aa ɛ sɔfore. Bɛl sɔne Hofni nɛɛte ɡe Fenehas.

⁴ Saŋ bɛlbwa waa ka kpoo kwaa ɛ saraha la, o yon kpɔ o ola waa dɔa la ane ba tɛ Pɛnena, dɛ kpɔ ane ɡe tɛ bii la bɛlbwa.

⁵ A lole kɛŋɔ dɛ Korowii ta ɡelɛ Hana dɔ bii te, dɛ Ɛlkana dɛ nyinu taeh, anomanta, o yon tɛo bɔre anɛ.

⁶ Waa wola bii dɔe nomanta, Penina waa ɛ o toŋre la yon dɛɛ ɛo sisawa dɛɛ muɡli o baah.

⁷ Bena bɛlbwaa Penina na dɛɛ ɛo ɡɛ waa nɔ. Saŋ bɛlbwa baa la Korowii Dea kaa tomɔ la, o yon muɡli o baah ó wi, hale dɛ́ vɛh kondikwaa kwaraa dii.

⁸ O jaa yon bɔɔro ŋɔ, “Ɛrɛɛ hɛɛ wiɔ? Bɔkwa waa he ŋɔ haa kwaa diɔ? Saŋ bɛlbwa he bambile yon chɔɡ kohona ɡɛ nɔ wer aa? N ne he soɡa nɔ ta ɡwaalɛ kɛ he fe aa lolɛ bibaala fi aa?”

⁹ Awola bɛl, ba di saraha kondikwaa bwɛjen Silo bela tonɛ, asɛ Hana ir dɛ kaa soŋe Korowii. Dɛ sɔfo Eli soɡe kara ta Korowii Dea doonyoa la jwɛh.

¹⁰ Dɛ o bambile chɔɡɔ kɛrɛdɛ, o wi dɛɛ soŋe Korowii.

¹¹ Belaa Hana baɡɛ Korowii nyoa ŋɔ, “Nemenɛ Korowii, na n sum, bɛ n waa soh. No he tolo wa, dɛ́ tɛ mɛ bibaa, ásɛ n leo cheɡ tɛɛ o soɡa bini bwa, baa o nyumpon beŋkpoŋ kwaraa fonɛ bwa.”

¹² Hana teŋɔ soŋe Korowii la sie taeh, asɛ sɔfo Eli ɛɛ nyiŋi a bwa.

¹³ Dɛ o pili nyoa dɛɛ soŋe Korowii, kɛ dɛ wobol la aa baŋ le. A ɡelɔ sɔfo Eli lii kɛŋɔ o ken nyɔ sen dɛɛ,

¹⁴ dɛ bɔɔro ŋɔ, “Haa won teŋɛ dɛ dɛɛ dɛɛ la ken. Gel sen nyɔe, dɛ́ ɡel he sie chɔ harɛ.”

¹⁵ Belaa o chaŋe ŋɔ, “Nomoa, n ta dɛɛrɛ, maa sen nyɔ, n bambilee chɔɡa mɛɛ soŋe Korowii saŋ bɛlbwa, dɛ kpɔ n waa dɛɛ bil o sie.

¹⁶ Dɛɛ berɛ he tolo liira kɛŋɔ n ɛ hansala. Korowii soŋa taa n do, dɛkalkɛ n waa sum.”

¹⁷ Ate, sɔfo Eli ŋɔ, “Kaa deŋnesɔɔhna ne, Korowii Israel tena aa dɛ tomɔ la tɛɛ komɛlbwa haa dɛ nyin.”

¹⁸ Hana chaŋe ŋɔ, “N dɔɔ, ɡel he sie lɛ he bitolo nɛ.” Asɛ o le bela kaa, dɛ ka nyin kondikwaa di, asɛ bambichɔɡ la bwa kaa.

¹⁹ Tɔɔ aa pera chɔmbibii la, Ɛlkana ne o haahna ne bii iro dɛ ka tomɛ Korowii dɛ berɛ ba kaa Rama bela baa soɡa. Ɛlkana ne Hana chɔɔ, asɛ Korowii no o wesoŋa la.

²⁰ Gɛɛ a do o kpoŋe tea, dɛ lolɛ bibaa dɛ pa o sɔn Samoɛl, dɛ ŋɔ, “Korowiirii n soŋe o tɛ mɛ.”

²¹ Bena bɛl telo ja kɛŋɔ Ɛlkana ne o haahna ne bii kaa bwɛjen Silo ka ɛ benanyoa saraha tɛ Korowii, ásɛ dɛ ka chuɡri o nyobaɡa la ɡe.

²² Baa dɛ kaa la, Hana te ta bɛl jae dɛ́ la. Dɛ o tɔ sie ŋɔ o jaa be ŋɔ, “N baa teŋe bie la el aa, mɛɛ kpɔɔ kaa Korowii Dea ó den ka so bela kwaraa.”

²³ Anee sɔfo Ɛlkana chaŋo ŋɔ, “A wer, ɛ ɡɛ bwa aa too he tea. So dem ka tel kɛŋɔ haa teŋe bie la el. Korowii sɛh he nyobaɡa la ta tɛɛ.” Anomanta, Hana soɡe dem ka tel kɛ waa baa teŋe bie la el.

²⁴ Hana aa teŋe bie la el la, o lawɛ nabal waa di bene atoro, dɛ ɛ men aa kpera kɛrɛdɛ kuruware fi, dɛ sen oltɔn pur del, asɛ o ne o jaa kpɔ bie la ja kaa Korowii Dea waa lɔ Silo la.

²⁵ Baa kpo nabal la tonɛ la, ba kpɔ bie la do sɔfo Eli nɔn ta,

²⁶ asɛ Hana bɔɔ sɔfo Eli ŋɔ, “N poori, n dɔɔ, he dɛ lii mɛ naa? Menee he faa na n che bonɔ dɛɛ soŋe Korowii la.

²⁷ N kpɔɔ bil Korowii sie ŋɔ ó tɛ mɛ bie nɔ, asɛ o sɛh n nyoa dɛ tɛ mɛ.

²⁸ Le fini dɛɛ kaa, n leo cheɡ tɛ Korowii, wɛɛ ɛ Korowii konee o soɡa bini bwa.” Asɛ ba tomɛ Korowii bela.