1 Pita 5 - mzwDBL

Waa aa kaala dɛɛ tɛ nomonome ne bonɔɔna

¹ N dɛ nyin n bol waane he asɔre nomonome baa dɛ tɔ he sie la be. Asɔre nomoa la bɛlee n ɡe. N ɡbaɡba kpɔ siwi na wahala la soo Yeesu Kristo aa naa. Awola waa dɛ ba ɡela nɛra na o jirima la, n ɡe ɛɛ dɔ o jirima la bɛlee. N dɛ soŋe heyaa kɛŋɔ

² hɛ́ɛ nyiŋi Korowii nɛra baa ɛ o peera waa kpɔ ba tɛ heyaa ŋɔ hɛ́ɛ nyiŋi ba nɛɛ la kɛrɛdɛ. He bɛ ɡel ba do heyaa mɔɔ hɛɛ nyiŋ ba kɛrɛdɛ, hé ɡel a ɛ he ɡbaɡba tetoowa. He bɛ suuɡa sibeɡra waa koh dɛɛ ɛ ɡɛ toma nɔ, hé nyiŋi nyina haa dɛ nyin kɛ toma la kaa kɛrɛdɛ la dɛɛ ɛa.

³ He bɛ kpeɡri dɛɛ di nɛra baa kpɔ ba do he nɔn ta la nɛ. Hé ɡel he we-ɛɛla do wer ásɛ ba nyiŋa dɛɛ chaara.

⁴ He dɛ ɛ ɡɛ naa, Peteɡra Bwa Dɔɔ la balaa, wɛɛ tɛ heyaa jirima kon o wer aa wola tu bwa, o ɛ kompoŋ haa yoa dɛ le ba vɔwɛ heya.

⁵ He bonɔɔna ɡe la, hɛ́ɛ tɛ he nomonome duure. Hé bwa pwɛr he te dɛɛ tɛ dɔŋa, dɛɛ cha dɔŋa, dɛkalkɛŋɔ Korowii Tɔn bolɔ ŋɔ, “Korowii ne mbarafo tena aa jo, kɛ o dɛ sune nɛra baa dɛ pwɛr ba te nɛɛ dɛɛ cha ba.”

⁶ Anomanta, hé pwɛr he te dɛɛ no Korowii waa dɔ kpeɡri bwa la wa, ásɛ o ɡɔɔ heyaa ir tɔpere waa wera o be ta.

⁷ Wobɛlbwa aa dɛ ha heyaa la, hé kpɔa bil Korowii sie, dɛkalkɛŋɔ he waa lɔ o bambile ta.

⁸ Hé ɡel he sie chɔ harɛ, hɛɛ nyiŋi kɛrɛdɛ, dɛkalkɛŋɔ he dɔm Bɔnsam lole. Gɛ nyujente yon dɛɛ kɔɡre, dɛ́ ɡaaɡe dɛɛ nyin ola dɛ́ lawɛ la, ɡɛɛ o ɡe ɡaaɡe dɛɛ nyin nɛra dɛ́ lawɛ.

⁹ Anomanta, hé che kiŋkiŋ he yarada ta. He bɛ Bɔnsam ŋwɛnɛ tɛ. Hé jemɛ kɛ he bala baa dɛ yarada Yeesu bobɛlbwa la dɛ na a ɡɛ waa nɔ haa dɛ na nɔ dɔŋa.

¹⁰ Kɛ he baa na waa tama aa, Korowii waa dɛ na nɛra sum dɛɛ cha ba kohona la, o ɡbaɡba ɛɛ kwaa he wobɛlbwaa, dɛ́ ɡel he che kiŋkiŋ, dɛ́ do kpeɡri, dɛ́ lawɛ heyaa he bɛ chole. Onee le heyaa hé won che pɛɛ he ne Yeesu Kristo aa pɛa la ta, dɛ dɔ o jirima aa wola jaɡa dɔe bwa la.

¹¹ On chɛ kpeɡri aa wola jaɡa dɔe bwa. Aamen.

Lea aa ka mun

¹² Silasee cha mɛ n chwerɛ heyaa tɔmbora nɔ la. N jemɔ kɛ o waa dɔ kasinteŋ ya teŋa yaa dɛ teŋɛ Yeesu Kristo nɛɛ nɔ ta. N dɛ nyin he jemɛ ɡɛ aa chɛ kɛ hɛɛ ɛ, dɛ́ jemɛ kɛŋɔ ɡɛ n fa aa baɡle heyaa chae Korowii aa sune ya nɛɛ dɛ cha yaa la, a ɛ kasinteŋ. Hé den lawɛ a bini kiŋkiŋ.

¹³ Asɔre tena baa lɔ Babelɔn, Korowii aa lee ba ɡɛ waa le heyaa la, ba dɛ na heya. N bie Mak ɡe dɛ na heya.

¹⁴ Hɛ́ɛ lea dɔŋa nɛnnyin ne. He nɛra he ne Yeesu Kristo aa pɛa la, Kórowii tɛ he bwa bosɔɔhna.