1 Pita 4 - mzwDBL

Wesaɡasaɡare ɛɛ ɡela dɛ so tɛ Korowii wa

¹ Yeesu Kristo aa baa ɛ nɛwɛnyini la, o na bonyɛɡa. Anomanta, a chɛ kɛ he kpɔ he te, dɛ́ jemɛ kɛ ɡɛɛ he ɡe bwara ɛɛ ba nyɛɡa. Nomɛlbwa waa wona lawɛ bambile dɛ na bonyɛɡa ka la, waa wechɔɡa ɛ.

² Le fini dɛɛ kaa, hé kpɔ Korowii tetoora dɛɛ tɔ sie he soɡa bini harɛ bonɔ. He bɛ kwaa nɛwɛnyina aa dɛ pɛlɛ a ta la nɛɛ dɛɛ teŋɛ kpa.

³ Waa nɛra baa wola Korowii tomɛ aa dɛ ɛa asɛ he fa aa ɛa la, he ta a nyoa nae yaa? Dɛ he sie dɛ lɛ jwamane ne pɛlchɔɡa we-ɛɛla ta. Dɛ he dɛ sɔ sen, dɛɛ ɛ saɡasaɡa, dɛ lawɛ dɔŋa dɛɛ nyɔ sennyɔbala. Dɛ he dɛ tomɛ voɡa dɛɛ jo Korowii kii nɛ.

⁴ Nɛra baa wola Korowii tomɛ la, a dɛ ɛɛ ba anebɛlbwa kɛŋɔ he ne baa wola pɛɛ dɛɛ ɛ wedoŋa ne wesaɡasaɡare baa dɛ ɛ la. A waa baa chɛɡre heyaa la.

⁵ Anɔ bwa baa dɛ ɛ nɔ, baa ba tɔh ba nyoa Korowii siee. O kpɔ o te dɛɛ ba weera ne lala bwa waa bola dɛ́ pa bole.

⁶ Nɛra baa serewa la, ba bol Amanesoma nɔ baɡle ba ɡe, dɛkalkɛŋɔ Korowii ɛɛ bol ba ɡe waa dɛ́ pa bole ɡɛ waa dɛ ba weera ɛɛ la. Waa ba fa aa dɛ ɛ ɡɛ saŋ baa wola sewɛ mɔɔ la, anee wɛɛ ba nyiŋa dɛ́ pa ba bole. Korowii dɛ nyin kɛ ba dɔ mkpa ɡɛ waa dɔ mkpa la, a waa o ɡel Yeesu bol Amanesoma la chaɡ ba la.

⁷ Wobɛlbwa jaɡa tɔpere la telo. Anomanta, hé nyiŋi kɛrɛdɛ, dɛ́ ɡel he sie chɔ harɛ, ásɛ dɛ won dɛɛ soŋe Korowii kɛrɛdɛ.

⁸ Waa aa ɛ wehiah kohonaa kɛ hɛ́ɛ nyin dɔŋa bambile bwa ne, dɛkalkɛŋɔ dɔŋa nyina dɛ tɔ wechɔɡa kɛrɛdɛ ta.

⁹ He dɔŋ baa choɡe naa, lɛo, bɛ waa dɛɛ naɡre.

¹⁰ Kpeɡri bɛlbwa nomɛlbwa aa dɔa la, Korowiirii kpɔa chao ŋɔ ó kpɔ dɛɛ ɛ o Korowii toma. Anomanta, bɛ́lbwa nyiŋi o toma ta kɛrɛdɛ, dɛ́ kpɔ dɛɛ cha o bala.

¹¹ Nomɛlbwa Korowii aa chao o won dɛɛ bol o Waa la, wɛ́ɛ bola dɛ jemɛ kɛŋɔ Korowii Waa wɛɛ bol la. Nomɛlbwa Korowii aa chao o won dɛɛ tomɛ o dɔŋ la, wɛ́ɛ tomɔ bokpeɡa Korowii aa tɛo bwa ne, ásɛ wobɛlbwa ta la, Korowii che Yeesu Kristo nɛɛ dɛ́ dɔ sɔn. On chɛ kpeɡri ne jirima aa wola jaɡa dɔe bwa. Aamen.

Kristo te ɛɛ wenaale

¹² N dandɛɛɡa, he bɛ ɡel nii haa dɛ na taraken nɔ kpo he nyoa. Daahnaa Korowii kpɔa dɛɛ daah he yarada. He bɛ ɡel a ɛ heyaa wehɔɔhra.

¹³ Hé ɡel he sie lɛ kɛŋɔ haa dɛ na Yeesu Kristo wenaale dɔŋa nɔ, ásɛ awola haa ba na o jirima waa dɔa la, he sie lɛ, he bwara sɔɔh heyaa kohona.

¹⁴ Dɛ ba koh he teŋa haa teŋɛ Yeesu Kristo nɛɛ la waa dɛɛ chɛɡre heya aa, he na som. A ba ɡɛ naa, a dɛ baɡle kɛŋɔ Korowii Domadɛɛɡe o wa aa dɔ jirima la soɡe he nɛ.

¹⁵ Dɛ he bini bɛl dɛ na wahala aa, a bɛ ɛ kɛŋɔ nɛnee o kpo, kɛɛ ŋwɛɛ o ŋwɛ, kɛɛ nɛnchɔɡee on, kɛɛ nyoaa o kpɔ do nɛra waa ta.

¹⁶ Dɛ a cheɡɛ he Kristo te ɛɛ ta, asɛ hɛɛ na wahala aa, bɛ ɡel a ɛɛ sihiih. Jam Korowii kɛŋɔ Yeesu Kristo sɔn aa dawɛ he nɛ.

¹⁷ Tɔpere telo kɛŋɔ Korowii bol nɛwɛnyina waa dɛ́ pa bole. Korowii nɛra nɛɛ wɛɛ ba mun pae. Waa dɛ ba ya kwaraa kpɔe pa mun nɔ, dɛ ɛrɛɛ nɛra baa wola Amanesoma la yaradae waa ɛɛ ba doe yɔ?

¹⁸ Korowii Tɔn bolɔ ŋɔ, “Nɛra baa ɛ nɛndɛɛɡa ba waa su Korowii siwi kwaraa la, dɛ a kpeɡri kɛŋɔ ba dɔ ba nyu aa, dɛ wechɔɡ-ɛɛra baa wola Korowii ɔmɛ la, ɛrɛɛ ba waa ɛɛ ba doe yɔ?”

¹⁹ Anomanta, he nɛra aa ɛ Korowii tetoora kɛ he na wahala la, hɛ́ɛ ɛ wedɛɛɡa, dɛ kpɔ he te do Korowii waa ta heyaa la nɔn ta. O waa dɔ kasinteŋ.