1 Pita 3 - mzwDBL

Haahna ne ba jaranar

¹ He haahna ɡe, hé pwɛr he te dɛɛ tɛ he jaranar. Dɛ he dɛ ɛ ɡɛ naa, he banɔ la he jaranar aa wola Korowii waa yaradae la, he we-ɛɛla ɛɛ ɡeloo bá yarada. Haa nyoa kwaraa pili bol wa,

² dɛkalkɛ baa na ɡɛ he we-ɛɛla aa wera doŋa bɛlbwa aa wola toole a ta, ne ɡɛ haa dɛ ɔmɛ Korowii.

³ Gɛ haa dɛ ɛ he nyumpona, ne suuɡaswɛm koŋkwaare kɛŋɔ baŋa kwaa ne deŋna kwaa doe, ne laala haa dɛ do laa dɛ ɡel he do wer toli.

⁴ Hé ɡel nɛra na he wer waa aa lɔ bambile bini siwi aa wola an na la ta. Hé do pwɛre, dɛɛ ɛ waa bɔeh. Anee wera aa wola tu bwa, dɛ do wer kohona Korowii be.

⁵ A saŋ la haahna ba fa aa dɛ tomɛ Korowii kasinteŋ ne dɛɛ yaradao la, dɛ ba pwɛr ba te dɛɛ tɛ ba jaranar. Anee ba ɡe wer.

⁶ Dɛ ɡɛɛ Abraham haah Saara ɡe do. O pwɛr o te tɛ o jaa dɛ faa yerɔ o dɔɔ. He waa toɡrɔ, haa ɔmɛ ɡe aa, ate Saara biirii heya.

⁷ Baala ɡe, ɡɛɛ a chɛ kɛ he dɔ liire he ne he haahna soɡa bini, dɛ́ jemɛ kɛŋɔ baa kpeɡe kɛŋɔ heya. Hɛ́ɛ duu ba, dɛkalkɛŋɔ he ne ba bwaa dɛɛ ba Korowii mkpa waa cha heyaa hɛɛ ba dɔe la dɔe. Hɛ́ɛ ɛ ken ásɛ wobɛlbwa bɛ he Korowii soŋa ŋwɛnɛ tɔ.

Wenaale nae wedɛɛɡa ɛɛ ta

⁸ Waa maa dɛ nyin n bol laanee kɛŋɔ hé ɡel he nyoa pɛ, hé dɔ dɔŋa chal, hɛ́ɛ nyin dɔŋa kɛŋɔ nyabii. Hé dɔ tedoma dɛɛ tɛ dɔŋa, dɛ pwɛr he te dɛɛ tɛ dɔŋa.

⁹ He bɛ wechɔɡa kpɔ dɛɛ bɔ wechɔɡa kem. He bɛ wobochɔɡa kpɔ dɛɛ bɔ wobochɔɡa kem. Nɛn ɛɛ wechɔɡa aa, soŋe andɛɛɡa tɛo. Korowii aa le heyaa la, dɛ hɛ́ɛ ɛ ɡɛ ásɛ o tɛ heyaa hɛɛra.

¹⁰ Ba chwerɔ do Korowii Tɔn bini ŋɔ, “Nomɛlbwa waa dɛ nyin mkpajaŋ, dɛɛ nyin kɛ o bwara sɔɔhno la, wɛ́ɛ nyiŋi o nyoa kɛrɛdɛ. O bɛ wobochɔɡa dɛɛ bol, o bɛ nyosone dɛɛ teŋe.

¹¹ Wɛ́ɛ ke o te wechɔɡa ta, dɛɛ ɛ wedɛɛɡa. Ó swɛɛ siwi dɛɛ ɛ waa aa dɛ ba nyopɛo ne.

¹² A do ɡɛ, dɛkalkɛ nɛra ba wa aa toɡra dɛɛ su Korowii siwi la, Korowii dɛ nyiŋ ba, dɛɛ no ba wesoŋa. Kɛ nɛra baa dɛ ɛ wechɔɡa te, o ne baa jo.”

¹³ He siwi swɛɛ wedɛɛɡa ɛɛ ta naa, umee dɛɛ ba he hae yɔ?

¹⁴ He dɛ ɛ wedɛɛɡa a che a ta hɛɛ na waa kwara naa, dɛ he ta som nae yaa? A ba ɡɛ naa, bɛ nɛra baa dɛ hae la ɔmɛ. Bɛ ɡel a hae.

¹⁵ Hɛ́ɛ duu Yeesu Kristo dɛɛ ɔmɔ he bambile bini kɛŋɔ he Dɔɔree on. Hé kpɔ he te saŋ bɛlbwa, ásɛ nomɛlbwa bɔɔ heyaa he hwɛɡa haa dɔa nɔ wa aa, he won baɡlo a bini.

¹⁶ He dɛ baɡla aa, hé kpɔ sisɔna ne taa dɛɛ baɡla. A chɛ kɛ he tea to he jemɛ kɛŋɔ nomɛlbwa aa he wobɛlbwaa dɔ dɛ bol. He dɛ ɛ ɡɛ naa, nɛra baa koh he teŋa haa dɛ teŋɛ Yeesu Kristo nɛ, ne he wedɛɛɡa haa dɛ ɛ waa dɛ bol wobochɔɡa dɛɛ yaɡɛ heyaa la, sihiih ɛɛ kpo baa.

¹⁷ He dɛ ɛ wedɛɛɡa dɛɛ na wa aa, an wera kɛ haa dɛ ɛ wechɔɡa dɛɛ na wa. Dɛ Korowii tetooraa kɛ he koh he wedɛɛɡa ɛɛ waa dɛɛ na wa aa, a wer.

¹⁸ Yeesu Kristo ɡbaɡba sewɔ tɛ heyaa dɛ bɔ wechɔɡa kem. Kerabeŋkpoŋii o sewɛ, waa wola berɛ sewɛ kpa. O ta wechɔɡa ɛɛ bwa, kɛ o sewɔ tɛ wechɔɡ-ɛɛra. Gɛ waa ɛ ya ne Korowii pɛ waa o ɛ ɡɛ. Baa kpoo la, o bwadabii sewa, kɛ o lileo te dɔ mkpafale.

¹⁹ O lileo la lala baa vɔɡ ba Lalabwɛɛ la be, dɛ ka bol Korowii Waa ba be.

²⁰ A saŋ la tena baa ɛ deŋnekpeɡ dɛ vɛh Korowii Waa noe ɡɛ saŋ Nowa fa aa dɛ kwaa o daka la, ba lalaa o bol Korowii Waa baɡle la. Korowii fa lawɛ bambile ba nɛɛ biɡri, dɛ ka tel kɛŋɔ Nowa aa kwaa o daka la tonɛ. Nɛra tama baa lɔ o bini laanee Korowii lɛ nee la ta. Dɛ ba lɔ nɛra banuatoro.

²¹ A ɡɛ nee nɔ cheɡɔ tɛ Korowii nee baa dɛ sɔ yaa aa lɛ yaa la. Korowii nee sɔe ta bwara doŋa yaɡla ɛɛ. Korowii nee sɔe munii kɛ ya soŋe Korowii ó tɛ yaa tepoŋ. A cheɡɛ Yeesu Kristo seo ta ira ta, asɛ nee sɔe la won dɛɛ lɛ yaa.

²² O kaa Korowii be nyundua, dɛ ka so nomombɔr o diɡ ta, dɛɛ di kora nyundua toroma ne konchɔɡa aa bea yaa wola an na bwa soo siwi nɛ.