1 Pita 1 - mzwDBL

¹ Men Pita maa ɛ Yeesu Kristo torome la, men chwerɛ tɔn nɔ dɛɛ tɛ he Korowii nɛra haa peɡra dɛ ka ɛ hɔɔhra Pɔntos, ne Galaasia, ne Kapadoosia, ne Eesia dɛ Bitiinia harɛre ta la.

² Korowii waa ɛ ya Mɛɛ cheɡɛ jema waa jemɛ heyaa wubwa la ta, dɛ le heyaa kɛŋɔ o nɛra dɛ tɛ o te. O Domadɛɛɡe laanee ɡela he do ɡoroŋ, dɛ ɡel hɛɛ teŋɛ Yeesu Kristo waa ta, asɛ o chal yaɡle he doŋa he nɛ. Kórowii cha heyaa dɛ tɛ heyaa bosɔɔhna kohona.

Ya kpɛɛ Korowii hwɛɡa waa kpɔa tɛ yaa

³ Hé ɡel ya kpɛɛ Ya Dɔɔ Yeesu Kristo Mɛɛ Korowii. Waa dɛ sune ya nɛɛ kohona nomanta, o cheɡɛ ira waa ir Yeesu Kristo seo ta la ta dɛ ɡel ya ɛ nɛnfala. Anɔ ɡelɔ ya dɔ hwɛɡa aa wola jaɡa dɔe bwa.

⁴ Ya dɛ hwɛɡɛ kondɔɔh waa kwaara cheɡ yaa la ta kɛŋɔ aa ɛ ya kwaa. O kwaa a bwa cheɡ heyaa Korowii doa, belaa aa wola pɔh, aa wola chɔɡ, aa wola tu bwa.

⁵ He cheɡaa a che. He yarada nomanta, Korowii kpɔ o kpeɡri tɔ he nɛ, wobɛlbwa aa wola won ɛ heyaa ka tel kɛŋɔ waa ba lɛ heya. O ɛ lɛɛ waa ba lɛ heyaa la wobɛlbwa tonɛ, dɛ lɛ heyaa waa bwa jaɡa saŋ.

⁶ Anomanta, he dɔ silɛɛ kohona, kɛ he tea bini ɛɛ chɔɡoo tama te, dɛkalkɛŋɔ Bɔnsam ɛɛ daah heyaa daahna bwa soo siwii na.

⁷ A bwa dɛ baɡle kɛŋɔ he yarada la ɛ yarada kasinteŋ. Suuɡaswɛm kwaraa nɔ, nii nee baa jemɛ a kasinteŋ, kɛ a dɛ chɔɡ. He yarada la ɡwaa suuɡaswɛm, anomanta, a chɛ kɛ ba daah heyaa na ásɛ he won che kiŋkiŋ. Belaa baa ba heyaa kpɛɛra, ásɛ he dɔ jirima, dɛ́ dɔ sɔn awola Yeesu Kristo aa ba ya nao la.

⁸ He ta on nae ka, kɛ he dɛ nyinu. Taraken ɡba, haa on na, kɛ he dɛ yaradao. Anomanta, he sie dɛ lɛ kohona nɛn aa wola won baɡle a wa.

⁹ He yarada dɔ mun. A ɡelɔ Korowii ɛɛ lɛ heya, wɛɛ lɛ heyaa ka tonɛ.

¹⁰ He lɛɛ nɔ, Korowii keamere fa dɛ baɡle ɡɛ Korowii aa dɛ ba he nɛɛ suna dɛ lɛ heyaa la wa, asɛ dɛ swɛɛ siwi dɛ pese Korowii waa waa bola la dɛ jemɛ a bini kɛrɛdɛ.

¹¹ Dɛ Kristo Doma soɡe ba nɛɛ dɛɛ baɡle wahala Kristo aa dɛ ba nae, dɛ baɡle jirima aa dɛ ba bala wahala la habɔɔ. Ba takapɔ kɛŋɔ bá fee won jemɛ tɔpere aa dɛ ba chiɡa, ne ɡɛ aa dɛ ba ɛɛ.

¹² Korowii ɡelɔ a ɡɛ keamere la jemɛ kɛŋɔ ba koeh baa dɛ koh la, ba laa dɛ́ di a tɔnɔ, heyaa ba koh dɛɛ tɛ. Waa haa noa taraken dɛ le Amanesoma baa bola he be la ta la, ban fa bola. Korowii Domadɛɛɡe waa tomɔ ya be laanee cha ba ba bola he be la. Korowii nyundua toroma kwaraa dɛ nyin a ɡɛ waa nɔ dɛ́ jemɛ.

Goroŋ doe wa

¹³ Anomanta, hé ir nyu ne dɛ́ ɡel he sie chɔ harɛ. Hé kpɔ he hwɛɡa bwa do chae Yeesu Kristo aa cha heyaa awola waa ba nɛra bwa nao la ta.

¹⁴ Haa ɛ Korowii bii dɛɛ no o deŋna waa nomanta, he bɛ he pɛlchɔɡa waa he fa aa lɔ biro ta dɛɛ teŋɛ a ta la dɛɛ ɛ.

¹⁵ Gɛ Korowii waa le heyaa tɛ o te aa do ɡoroŋ la, hé ɡe do ɡoroŋ ɡɛ he we-ɛɛla bwa ta,

¹⁶ dɛkalkɛŋɔ ba chwerɛ Korowii Tɔn bini ŋɔ, “Hé do ɡoroŋ, dɛkalkɛ n do ɡoroŋ.”

¹⁷ Korowii waa wola nɛn siebɔr nyiŋi dɛ bol waa dɛɛ pa bole la, onee he wi dɛɛ yerɔ he Mɛɛ la. Anomanta, hé kpɔ he te kɛ hɔɔhra he soɡa bini harɛ bonɔ, dɛɛ tɛo duure, dɛɛ ɔmɔ.

¹⁸ He jemɔ kɛŋɔ Korowii aa lɛ heyaa le he naawa wesale he fa aa lɔ a ta la ta la, harɛ bonɔ kwaa aa dɛ chɔɡ kɛŋɔ suuɡapoŋ kɛɛ suuɡaswɛm ne laa o yawɛ heya.

¹⁹ Yeesu Kristo waa do kɛ saraha pebie doŋa bɛlbwa aa wola toole o nɛ, waa wola kirihiah bobɛlbwa dii la, o ɡbaɡba chal nee Korowii yawɛ heya.

²⁰ Korowii aa leo ŋɔ ó ɛ a ɡɛ toma nɔ, dɛ ba ta nyundua ne harɛ tae mɔɔ. Kɛ he waa o koh dɛ ɡel o ba harɛ nɛra nao, tɔpera aa ka mun nɔ ta la.

²¹ O nɛɛ a che he yarada Korowii. Korowii ɡee iru seo ta dɛ tɛo jirima. Anomanta, he yarada ne he hwɛɡa haa dɛ hwɛɡɛ la, Korowii nɛɛ a bwa do.

²² Taraken nɔ haa sɛh kasinteŋ la ta teŋa, asɛ a che a ta he doŋa le he nɛɛ hɛɛ nyin dɔŋa kɛrɛdɛ nɔ, hé den dɛɛ nyin dɔŋa kohona bambile bwa ne,

²³ dɛkalkɛ ba berɔ kwaa lolɛ heyaa nɛnfala. Nɛn waa dɛ sewɛ la dwee laa heyaa kpa, Korowii waa wola sewɛ bwa la dweee heya. Korowii Waa aa dɛ tɛ mkpa dɛ do le saŋ bɛlbwa la taa a che ba kwaa lolɛ heya.

²⁴ Korowii Tɔn bolɔ ŋɔ, “Nɛwɛnyini bwa do kɛ kpɔɡa fee, ba jirima ɡe do kɛ kpɔɡa fee. Kpɔɡa dɛ sewɛ, a fee ɡe ɛɛ lee.

²⁵ Kɛ Korowii Waa te lole saŋ bɛlbwa.” A ɡɛ waa nɔɔ Amanesoma baa bola baɡle heyaa la.