1 Koranar 9 - mzwDBL

Korowii kpɔ o te baɡle Solomɔn deera ta

¹ Kooro Solomɔn aa do Korowii Dea la ne o koodem dɛ tonɛ ne anɔ la waa dɛ nyin bwa la,

² Korowii ba o be ja, ɡɛ waa la o be Gebeɔn la.

³ Korowii ŋɔ o be ŋɔ, “N no he wesoŋa ne waa haa kpɔa bil n sie la. N le Dea haa doa tɛ mɛ cheɡ dɛ ɡel o do ɡoroŋ tɛ mɛ ŋɔ baa tom mɛ o ta saŋ bɛlbwa dɛɛ la. Mɛɛ ɡeloo n sie ne n bambile do bela mɛɛ daahno saŋ bɛlbwa.

⁴ Dɛ hen Solomɔn tom mɛ kɛrɛdɛ, dɛ teŋɛ me Mmarare ne waa maa doe a ta ɡɛ he mɛɛ Devid aa ɛa la aa,

⁵ amɔ te, mɛɛ ɡeloo kora haa dɛ di Israel tena nɛɛ la che kiŋkiŋ saŋ bɛlbwa, ɡɛ maa baɡɛ he mɛɛ Devid nyoa ŋɔ, ‘He naanaree dɛɛ ba Israel tena nɛɛ nyiŋa saŋ bɛlbwa’ la.

⁶ Kɛ dɛ he ne he nɛra berɛ habɔɔ kpo mɛ, dɛ vɛh me Mmarare ta teŋa, dɛ kaa tomɛ voɡa ane dɛɛ ɡuŋa aa,

⁷ ate, mɛɛ le Israel tenaa le harɛ maa kpɔa tɛɛ ba nɔ ta, dɛ́ vɛh n Dea maa lea cheɡ dɛ ɡel o do ɡoroŋ ŋɔ ó ɛ bela baa dɛɛ tom mɛ nɔ ta. Ásɛ Israel tena berɛ wesoma nɛra, harɛ nɔ ta bwa.

⁸ Dea nɔ dɛ ba kuuɡa chɔ, ásɛ nomɛlbwa waa teŋe ba kaa la nyoa kpo o bwara yɔr ó ŋɔ, ‘Bɔkwa waa ɡela Korowii ɛ harɛ nɔ ne Dea nɔ ken?’

⁹ Ásɛ nɛra chaŋe ŋɔ, ‘Baa le Korowii baa dɛ tomɔ, o le ba naawa ne Ijipt harɛ ta habɔɔ, dɛ berɛ kaa yarada voɡa ane dɛɛ toma la waa Korowii kpɔ ɡɛ wekpeɡa nɔ ta ba nɛɛ la.’ ”

Kooro Solomɔn ne Kooro Hiram fɔo fɔwa

¹⁰ Bene fifraanɛɛ Kooro Solomɔn kpɔ do Korowii Dea ne o koodem la.

¹¹ Taaya Kooro Hiram kpɔ peleme daa ne dadɛɛɡa ane soo siwi dɛ suuɡaswɛm Kooro Solomɔn aa dɛ nyin dɛ kpɔ ɛ o toma la bwa ba tɛo. Anomanta, Kooro Solomɔn kpɔ Galilia harɛ ta bwɛɛre fifraanɛ tɛ Kooro Hiram.

¹² Kooro Hiram aa laŋa ka nyiŋi bwɛɛre Kooro Solomɔn aa kpɔa tɛo la, o sie ta a ta lɛɛ.

¹³ Asɛ o ŋɔ, “N dam, bwɛ besooree he kpɔ tɛ mɛ ken?” Anomanta, o pa baah bela bwɛɛre la sɔn Kabul Harɛ. Gɛ sɔn la ta lole ba le fini.

¹⁴ Dɛ Kooro Hiram tɛ Kooro Solomɔn suuɡaswɛm tenten a tɔɡre aa ɛ kilore kaɡboŋa anaarɛ fifraanuatoro.

Kooro Solomɔn waa waa bera ɛa ja

¹⁵ Ŋwɛnɛ Kooro Solomɔn aa kpɔa ɛɡre nɛra ba ma Korowii Dea ne o ɡbaɡba koodem, ne bwea waa ɡela ba che su bwɛjen Jerusalam wee leebɔr pera waa ɛ bɔɔ la bini o su, ne danjwɛjen waa baro, ne bwɛjena Hasɔ ne Meɡido dɛ Gɛsa laanee la.

¹⁶ Ijipt kooro yo Gɛsa tena dɛ fuh bwɛɛ la, dɛ kpoo Keenan tena baa lɔ bela, dɛ kpɔ bwɛɛ la kɛ o bihaah Kooro Solomɔn aa moo la, kɛŋɔ kon waa kpɔa kɛo ó kpɔ ka yalɛ.

¹⁷ Kooro Solomɔn kwaarɔ vɔrɔwe Gɛsa, dɛ kwaa vɔrɔwe Bɛt Hɔrɔn harɛbɔr pera,

¹⁸ ne bwɛjena ane baa dɛ yera Baalat ne Tadmɔ aa lɔ pua hɛŋle ɡbo harɛ ta Juda harɛ ta,

¹⁹ ne bwɛjena baa do deene dɛɛ cheɡ kwaa a bini ne bwɛɛre kwaa baa vɔwa pɛl jaɡre ne o jaɡre aa dɛ do, ne komɛlbwa o pɛla aa dɔa kɛŋɔ ó ma Jerusalam, ne Lɛbanɔn ne harɛ la bobɛlbwa waa dɛ di o ta kora.

²⁰ Amɔre ne Hiti ne Pɛrɛs ne Hivi dɛ Jebus tena baa kaa baa wola Israel tena ɛɛ la,

²¹ ba naanaree kaa Israel tena aa wola wone kpoo ba. Banee Kooro Solomɔn ɛɛ ba yoma baa ɛ tomkpeɡa Israel harɛ ta ba le fini.

²² Kɛ Israel tena la te, Kooro Solomɔn ta bɛlbwa kpɔe ɛ yom. Bane ɛ laa tena dɛ yo dɛɛ tɛo, ne nomonnyuune ne laa sitɔɔla ne nomonome baa chɔ kwaa aa do kɛ torɔɡo ba vɔwɛ dɛɛ pɛl jaɡre, dɛ banɔ la baa dɛ so jaɡre ta bwa nyoa.

²³ Kooro Solomɔn nomonome baa dɛ nyiŋi nɛra baa dɛ ɛ tomkpeɡa nɛɛ la lɔ lafraanue fifraanue.

²⁴ Ijipt kooro bihaah Kooro Solomɔn aa moo la, le Jerusalam waa ɛ Kooro Devid Bwɛjen la ta dɛ ba koodemfale o jaa Kooro Solomɔn aa doa tɛo la ta. O berɔ ɡel nɛra che bwea su bwɛjen Jerusalam wee leebɔr pera waa ɛ bɔɔ la bini.

²⁵ Kooro Solomɔn dɛ ɛ sarahare kera atoro bena bɛlbwa, saraha kon waa ɛa tɛ Korowii la ta. Sarahare baa dɛ fuah ne deŋnesɔɔhna sarahare bwaa o ɛ. O fuh daawiile a sɔɔh aa soma ja a ta Korowii sie. Gɛɛ a do o tonɛ Korowii Dea la doe.

²⁶ Kooro Solomɔn berɔ ɛ stiimaere bwɛɛ bɛl baa dɛ yerɔ Eseɔn Gɛba ta, o bɛne Elat waa lɔ Edom harɛ ta, Mposwɛm nyoa.

²⁷ Kooro Hiram tomɛ o nɛra baa jemɛ mpo nee toma wa ba ne Kooro Solomɔn nɛra pɛ dɛɛ ɛ toma mpo ta.

²⁸ Ba la harɛ bɛl baa dɛ yerɔ Ofir ta, dɛ ka lɛ suuɡaswɛm a tɔɡre aa ɛ kilore kaɡboŋa fi dɛ anaarɛ lafraanɛ fifraanuatoro ba tɛ Kooro Solomɔn.