1 Koranar 8 - mzwDBL

Korowii Ne Nɛwɛnyina Fɔo Daka ne Korowii Dea bala

¹ Ate, Kooro Solomɔn yerɛ Israel nomonome, ne nomonome baa chɔ ba deene nyoo, ne nomonome baa chɔ ba lolanar nyoo bwa ba cheme o sie Jerusalam, kɛŋɔ bá la ka kpɔ Korowii Ne Nɛwɛnyina Fɔo Daka la le Jerusalam waa ɛ Kooro Devid Bwɛjen ta ba cheɡ Korowii Dea.

² Ba bwa balɔ dɛ ba cheme Kooro Solomɔn sie, Kukure Tɔpejen dii saŋ, korobinuanɛ waa ɛ Etanim ta.

³ Israel nomonome la bwa aa baa cheme la, sɔfore la kaa kpɔ Korowii Ne Nɛwɛnyina Fɔo Daka la,

⁴ dɛ kpɔ o ne kwaa aa do ɡoroŋ dɛ do o bini la bwa ba cheɡ Korowii Dea Cheremibɔr la bini. Sɔfore la ne Lewi dea tenaa la a ne,

⁵ asɛ Kooro Solomɔn ne Israel tena baa chema la bwa che Fɔo Daka la sie, dɛ kpoo peera ne nae baa wola won kura ɛ saraha.

⁶ Asɛ sɔfore la kpɔ Korowii Ne Nɛwɛnyina Fɔo Daka la ka cheɡ Korowii Dea la bini, Boɡoroŋ Tenten bela Kerobim la kena lɔɡre.

⁷ Kerobim la kena bɔle bela Fɔo Daka la aa cheɡa la bwa, dɛ tɔ o ne daa baa kpɔa dɛɛ cheo bwa ta.

⁸ Daa aa suuɡi o ta la jaŋne nomanta, dɛ nɛn cheɡɛ Korowii Dea la bini Boɡoroŋ Tenten bela aa, o dɛ naa. Haa won che bobɛlbwa ɡe dɛ naa. A ta lɔ bela ba le fini.

⁹ Komɛlbwa toole Korowii Ne Nɛwɛnyina Fɔo Daka la bini ka ja bwepɛle anɛ Mosis aa kpɔa teɡli o bini Sinai Bwejen ta, bela Korowii ne Israel tena aa fɔwɛ fɔo ɡɛ saŋ baa le Ijipt harɛ ta la.

¹⁰ Sɔfore la aa dɛ le Korowii Dea bela la, bam den ba tɔ Korowii Dea la bwa ta.

¹¹ Bam la nomanta, sɔfore la ta wone ɛ ba toma Korowii Dea bela, dɛ Korowii jirima su o bini bwa.

¹² Anee Kooro Solomɔn soŋe Korowii ŋɔ, “N Naa Korowii, he ŋɔ hɛɛ so baama biŋere binii.

¹³ N do Dedɛɛɡe tenten waa kana tɛɛ, bela haa so saŋ bɛlbwa dɛɛ la.”

¹⁴ Israel tena la bwa taa cheɡɛ Kooro Solomɔn sie bela la, o berɛ sie chaɡ ba, dɛ swee Korowii be andɛɛɡa tɛɛ ba.

¹⁵ Asɛ o ŋɔ, “Hé kpɛɛ Korowii ya Israel tena aa dɛ tomɔ! O teŋɛ nyoa waa baɡɛ n mɛɛ Kooro Devid la ta dɛ ŋɔ,

¹⁶ ‘Le awola tɔpere maa kpɔ n nɛra Israel tena le Ijipt harɛ ta la, n ta ŋɔe bá do Dea n sɔn ta Israel harɛ bwɛjen bɛlbwa ta dɛɛ tom mɛ bela. Kɛ n le hen Kooro Devid ŋɔ hɛɛ nyiŋi n nɛra Israel tena nɛ.’ ”

¹⁷ Anee Kooro Solomɔn berɛ ŋɔ, “N mɛɛ Kooro Devid lii o nyu bini dɛ fee ŋɔ wɛɛ do Dea Korowii sɔn taa, ásɛ ya Israel tena ɛɛ tomɛ Korowii yaa dɛ tomɔ la bela.

¹⁸ Asɛ Korowii ŋɔ Kooro Devid be ŋɔ, ‘Haa dɔ liire kɛŋɔ hɛɛ do Dea n sɔn taa nɔ, he ɛ waa kɛŋɔ haa lii ɡɛ,

¹⁹ kɛ ane a bwa, he laa dɛ́ do Dea la, he ɡbaɡba bilolee dɛ́ do Dea la n sɔn ta.’ ”

²⁰ Ate, Kooro Solomɔn ŋɔ, “Korowii teŋɛ o nyobaɡa ta. N baa chiɡ n mɛɛ Kooro Devid naa ta, dɛ berɛ ɛ Israel kooro. N do Dea Korowii yaa dɛ tomɔ la sɔn ta, ya Israel tena ɛɛ tomɔ o bini.

²¹ Korowii ne ya naawa fɔo baa fɔwa ɡɛ saŋ waa le ba ne Ijipt harɛ ta la nomanta, n kwaa bɔr Dea la bini tɛ Korowii Ne Nɛwɛnyina Fɔo Daka bwepɛle anɛ aa teɡli o bini la o ba che o bini.”

Kooro Solomɔn wesoŋa

²² Asɛ Kooro Solomɔn ir ka che kon baa dɛ ɛ saraha o ta dɛɛ tɛ Korowii la sie Israel tena baa chema la bwa sie, dɛ paɡri o nɔɔra nyundua soŋe Korowii,

²³ dɛ ŋɔ, “N Naa Korowii Israel tena aa dɛ tomɛ, voɡa nɛra aa dɛ tomɛ ta kpeɡri dɔe nyundua kɛɛ harɛ kɛ hen! He dɛ teŋɛ fɔo he ne he nɛra aa fɔwa ta, dɛɛ nyin nomɛlbwa waa dɛ teŋɛ he waa ta bambile bwa ne.

²⁴ He teŋɛ nyoa haa baɡɛ n mɛɛ Kooro Devid la ta, he ɡelɔ wobɛlbwa ɛ ɡɛ fini.

²⁵ Name, n Naa Korowii Israel tena aa dɛ tomɛ, teŋɛ nyoa haa baɡɛ n mɛɛ Kooro Devid waa ɛ he bonɔɔ la ta, ɡɛ haa ŋɔa ŋɔ dɛ o bii do sie dɛɛ teŋɛ he waa ta, ɡɛ he Mmarare aa dɛ baɡle la aa, o naanar bini bɛlee dɛ́ so Israel tena kora ta he sie.

²⁶ N Naa Korowii Israel tena aa dɛ tomɛ, ɡel wobɛlbwa haa baɡɛ n mɛɛ Kooro Devid waa ɛ he bonɔɔ nyoa la ɛ kpela.

²⁷ N Naa Korowii, a ɛ kpela kɛŋɔ hɛɛ won ba so harɛ nɔ ta naa? Hale nyundua ɡba aa kanɛ tɛɛ kɛŋɔ he so. Maa lii kɛŋɔ hɛɛ won ba so Dea waa do jeɡa maa doa tɛɛ nɔ ta.

²⁸ Korowii maa dɛ tomɛ, he bonɔɔnee men, no n wesoŋa dɛ́ ɛ waa maa dɛ soŋe nɔ tɛ mɛ fini.

²⁹ Dɛɛ daah Dea nɔ chɔɔ ne jwaana, bonɔɔ he le cheɡ ŋɔ baa tomɛ. Dɛ n kpɔ sie chaɡɛ Dea nɔ ta dɛɛ soŋe naa, no n be.

³⁰ No men maa ɛ he bonɔɔ wesoŋa, ne he nɛra Israel tena wesoŋa, ɡɛ saŋ báa kpɔ sie chaɡɛ Dea nɔ ta dɛɛ soŋe. Che nyundua bela haa lole dɛ́ no, ásɛ dɛ kpɔ ya wechɔɡa kɛ yaa.

³¹ Dɛ a balɔ kɛŋɔ nomɛl kpɔ wechɔɡa dɛɛ dawɛ o dɔŋ, asɛ a ba kɛŋɔ o ba he Dea nɔ bini dɛ ba che saraha kon la sie dɛ ŋwɛɛraa,

³² noa nyundua bela, dɛ́ pa bole, dɛ́ tɛr onɔ la waa di bolchɔɡe la deŋne dɛ́ ɡel boldɛɛɡe te la.

³³ Dɛ ya Israel tena yaa ɛ he nɛra nɔ ɛ wechɔɡa dɛ jo he nɛ, a che a ta ya dɔma pɔ ya nɛ, ya berɛ ba he be Dea nɔ bini dɛ ba soŋe ya wechɔɡa aa,

³⁴ noa nyundua bela, ásɛ dɛ kpɔ he nɛra Israel tena wechɔɡa kɛ ba. Dɛ berɛ ba ba ne harɛ haa kpɔa tɛ ba naawa la ta.”

³⁵ Kooro Solomɔn berɔ ŋɔ, “Dɛ ya Israel tena yaa ɛ he nɛra ɛ wechɔɡa dɛ jo he nɛ, asɛ he koh a waa dɛ lawɛ bwaala kpoŋe, asɛ ya charɛ ya liire dɛ kpɔ sie chaɡɛ he Dea nɔ bini dɛɛ soŋe naa,

³⁶ noa nyundua bela haa soɡa la, dɛ́ kpɔ he bonɔɔna yaa ɛ he nɛra wechɔɡa kɛ yaa, dɛ́ baɡle yaa ɡɛ yaa so sodɛɛɡa. Ásɛ he nɛ bwaala harɛ haa kpɔa tɛ yaa o ɛ ya kapɛrɛ kon la ta.

³⁷ Dɛ lɔr chole harɛ la ta, kɛɛ weechɔɡa kɛɛ peuchɔɡe tao dɛ chɔɡ harɛ la kondikwa, kɛɛ tontombɛ fuɡo le harɛ la ta, kɛɛ dɔma balɔ ba lɔ tɔ he nɛra nɛɛ ba bwɛjena la bɛlbwa ta, harɛchɔɡ kɛɛ weela ba ba nɛɛ kwaraa naa,

³⁸ nɛra yaa ɛ he nɛra nɔ bini bɛlbwa koh a waa le o bambile ta dɛ ir nɔɔra nyundua chaɡɛ he Dea nɔ dɛ soŋe naa,

³⁹ noa nyundua bela haa soɡa la, dɛ́ kpɔ kɛ ba. He ɡboo jemɛ nɛn bambile bini wa, che waa bɛlbwa aa ɛa ta dɛ́ tɛr o deŋne.

⁴⁰ Anee dɛ́ ɡel ya ɔmɛ, dɛɛ tomɛ saŋ bɛlbwa harɛ la haa kpɔa tɛ ya naawa la ta.

⁴¹ Hɔɔhra baa wola Israel tena ɛɛ ɛɛ le bojaŋ harɛ bɛl taa dɛ́ ba tomɛ he Dea nɔ bini,

⁴² dɛkalkɛŋɔ, ba no kpeɡri haa dɔa ne he sɔn ne wejena haa ɛa wa. Dɛ ba bini bɛlbwa kpɔ sie chaɡɛ he Dea nɔ dɛ soŋe naa,

⁴³ noa nyundua bela haa soɡa la, ásɛ dɛ ɛ wobɛlbwa baa bɔɔra dɛɛ le he be la, ásɛ harɛ nɔ ta nɛra jemɛ dɛ́ kpɔ duure dɛɛ tɛɛ, ɡɛ Israel tena yaa ɛ he nɛra aa dɛ ɛ la. Ásɛ ba jemɛ kɛŋɔ Dea maa doa tɛɛ nɔ ɛ bela nɛra aa dɛɛ tomɛ.”

⁴⁴ Kooro Solomɔn berɔ ŋɔ, “Dɛ he do he nɛra bobɛlbwa ŋɔ bá ka yo ba dɔma, asɛ ba berɛ sie chaɡɛ he bwɛjen ne he Dea maa doa he sɔn ta dɛ soŋe naa,

⁴⁵ noa nyundua bela haa soɡa, dɛ́ ɡel bá pɔ ba dɔma nɛ.

⁴⁶ Dɛ ba ɛ wechɔɡa dɛ jo he nɛ, a lole kɛŋɔ nomɛlbwa toole waa wola wechɔɡa ɛ, asɛ he baah di ba nɛ, dɛ ɡel ba dɔma pɔ ba nɛ, dɛ laɡ ba kaa bojaŋ kɛɛ boboraa yoo,

⁴⁷ hale ba lɔ ba dɔma la harɛ ta, dɛ charɛ ba liire dɛ sɛh ba wechɔɡa dɛ ŋɔ, ‘Ya ɛ wechɔɡa, dɛ ɛ waa aa wola were.’

⁴⁸ Dɛ ba berɔ ba he be ba bambile ne ba liire bwa ne dɛ kpɔ sie chaɡɛ harɛ haa kpɔa tɛ ba naawa bwɛjen haa lea cheɡ, asɛ n do he Dea tɛɛ he sɔn ta nɔ naa,

⁴⁹ noa nyundua bela haa soɡa la, ásɛ dɛ na ba sum.

⁵⁰ Kpɔ he nɛra wechɔɡa baa ɛa bwa ne deŋnekpeɡ kɛ ba, dɛ́ ɡel ba dɔma nyiŋi ba nɛɛ kɛrɛdɛ.

⁵¹ Ya ɛ he nɛra, he kapɛrɛ diile haa kpɔ yaa le Ijipt harɛ ta yaa na bonyɛɡa kohona la.

⁵² N Naa Korowii, no he bonɔɔna yaa ɛ he nɛra Israel tena wesoŋa. Dɛɛ no ya wesoŋa saŋ bɛlbwa yaa wi dɛɛ noe.

⁵³ Henee le yaa le harɛre bwa nɛra bini dɛ kpɔ yaa ɛ he kapɛrɛ diile. Nemenɛ Korowii, ɡɛɛ he che he bonɔɔ Mosis nɛɛ dɛ bol ɡɛ saŋ haa le ya naawa le Ijipt harɛ ta la.”

Kooro Solomɔn wesoŋa aa ka mun

⁵⁴ Kooro Solomɔn aa ir nɔɔra nyundua dɛ soŋe Korowii tonɛ la, o iro ka che saraha kon la sie,

⁵⁵ dɛ kpɔ takpeɡ swee andɛɛɡa tɛ Israel tena baa chema la bwa dɛ ŋɔ,

⁵⁶ “Hé ɡel ya kpɛɛ Korowii kɛŋɔ waa ɡela o nɛra Israel tena dɔ deŋnesɔɔhna ɡɛ waa baɡɛ yaa nyoa la. Wedɛɛɡa waa cheɡɛ o bonɔɔ Mosis nɛɛ dɛ kpɔ baɡɛ yaa nyoa la, o ta o wobɛlbwa waa bola vɛɛh.

⁵⁷ Ya dɛ soŋe Korowii yaa dɛ tomɛ kɛ o ja ya nɛɛ ɡɛ o fa aa ja ya naawa nɛɛ la. O bɛ yaa ɡel, o bɛ yaa ta.

⁵⁸ O ɡel ya bambili lawɔ, ásɛ ya do ɡɛ waa dɛ nyin, ásɛ dɛɛ teŋɛ o Mmarare ne waa waa do ya naawa la bwa ta.

⁵⁹ Korowii yaa dɛ tomɛ, lii n waa maa dɛ soŋe nɔ saŋ bɛlbwa, ásɛ dɛɛ na he bonɔɔ ne n harɛ Israel tena bwa sum tɔpere bɛlbwa,

⁶⁰ ásɛ harɛre nɛra bwa jemɛ kɛŋɔ he ɡboo Korowii.

⁶¹ N dɛ soŋe kɛ he nɛra haa dɛ tomɛ Korowii ɛɛ di kasinteŋ dɛɛ valɛ o Mmarare ne waa waa do heyaa la ta ɡɛ aa doa fini nɔ.”

Korowii Dea kpɔe dɛ́ do o nɔn ta wa

⁶² Belaa Kooro Solomɔn ne Israel tena baa ja o nɛɛ la bwa ɛ deŋnesɔɔhna sarahare Korowii sie bela.

⁶³ Kooro Solomɔn kpɔ nae kaɡboŋa fifraanɛ dɛ anɛ, ne peera dɛ boohna kaɡboŋa lafa fifraanɛ ɛ deŋnesɔɔhna sarahare tɛ Korowii. Gɛɛ Kooro Solomɔn ne Israel tena bwa ɛ dɛ kpɔ Dea la do Korowii nɔn ta.

⁶⁴ Awola tenten la, Kooro Solomɔn le dembaah waa lɔ Korowii Dea sie la cheɡ o do ɡoroŋ tɛ Korowii. Belaa o kpo kwaa dɛ fuah, dɛ ɛ mea sarahare, dɛ fuh ola la noorare ɛ deŋnesɔɔhna sarahare, dɛkalkɛŋɔ saraha kon baa kpɔ ayaawa ɛo la aa kanɛ kɛ a ɡɛ kwaa la bwa won jo o ta.

⁶⁵ Korowii Dea belaa Kooro Solomɔn ne Israel tena la bwa di Kukure Tɔpejen la tɔpera anuanɛ. Nɛnlaa tenten le ŋwɛnɛ bɛl waa chɔa kaa bwɛjen Hamat waa lɔ weekaŋle nyunduabɔr, ne Ijipt harɛ jwɛh ta weekaŋle harɛbɔr dɛ ba.

⁶⁶ Tɔ aa pera la, Kooro Solomɔn tɛ bɛlbwa ŋwɛnɛ o kaa o bwɛ. Ba sie lɛ andɛɛɡa Korowii aa sweera tɛ o nɛra Israel tena ne Kooro Devid dɛ Solomɔn la wa.