1 Koranar 7 - mzwDBL

Kooro Solomɔn do o ɡbaɡba koodem

¹ Kooro Solomɔn do o ɡbaɡba koodem, kɛ a di bene fi dɛ atoro mɔɔ o won do tonɛ.

² Dea bɛl lɔ koodem bela baa yerɔ Lɛbanɔn Kɔr Bini Koodem. O jaŋne lɔ naɡale lafa fifraanue, o paɡri ɡe ɛ naɡale fifraanuanɛ dɛ anue, asɛ o jaŋne dɛ́ kaa nyundua ɡe naɡale fifraanaarɛ dɛ anue. Ba paaɡe peleme dachiɡri a teŋɛ dɔŋa nɛɛ bele anaarɛ dɛ lawɛ peleme dabaŋa aa ɛ doli kpoŋe.

³ Ba kpɔ peleme daa ɡoo dawɛ doli aa dawɛ pilare baa paaɡa a teŋɛ dɔŋa nɛɛ la ta. Doli la lɔ fifraanaarɛ dɛ anue, fi dɛ anue dawɛ pilare baa paaɡa a teŋɛ dɔŋa nɛɛ la bɛlbwa ta.

⁴ Tokorore aa lɔ o ta teŋɛ dɔŋa nɛ bele atoro a sie chaɡɛ dɔŋa.

⁵ Dea la doonyoa ɡbeni lɔ bele atoro dɛ ɛ fɔɔskwɛɛ a sie chaɡɛ dɔŋa.

⁶ Dea bɛl o jaŋne aa ɛ naɡale fifraanuanɛ dɛ anue, o paɡri ɡe ɛ naɡale fifraanaarɛ dɛ anue lɔ bela, pato do o sie ba tɔɔ, asɛ pilare lawɔ kpoŋe.

⁷ Dea bɛl lole baa yerɔ Kookara Dea, ba berɔ dɛɛ yerɔ Waa Bola Aŋwɛnɛ Ta Dea. Belaa Kooro Solomɔn so bol nɛra waa dɛɛ pa bole. O kpɔ peleme daa sam dea la bini le harɛ kaa o saldoa bwa.

⁸ Kooro Solomɔn dem waa soɡe o ta bɛne Kookara Dea la, a bwa le dɔŋa. O ma dem tɛ Ijipt Kooro bihaah waa moo la kɛŋɔ o kon la ken.

⁹ A ɡɛ deene la bwa, bwea aa wera a yoɡ do kpeɡri kohona nee ba maa le Dea la mumpar dɛ kaa nyundua. Ba sɛah bela baa pɛɡra la fɔɔskwɛɛ, saradaa ba kpɔ sɛh a sie ne habɔɔ.

¹⁰ Bwea aa kana dɛ do wer kohona nee ba kpɔ pa o mun. Ane lɔ naɡale fi dɛ anue, ane ɡe naɡale fi dɛ anɛ.

¹¹ Bwea baa kpɔa ma chɔŋɛ mumpar kwaa la ta la ɡe wer kɛrɛdɛ, ba sɛah fɔɔskwɛɛ dɛ kpɔ peleme daa doli ja a ta.

¹² Koodem la dembaah ne Korowii Dea dembaah, dɛ pato baa cheɡɛ o ta dɛɛ jo Korowii Dea la, ba kpɔ bwea baa kwaara la ma sola atoro dɛ kpɔ peleme daa a teŋɛ dɔŋa nɛɛ dawɛ a ta.

Hiram toma wa

¹³ Kooro Solomɔn tomɔ ba ka kpɔ Hiram waa soɡe bwɛjen Taaya, dɛ dɔ ayaawa kpɔe dɛ ɛ kwaa wejema.

¹⁴ A ɡɛ Hiram nɔ, luhaah bɛl waa le Naftale dea biee on. Dɛ o mɛɛ le bwɛjen Taaya, dɛ dɔ ayaawa kpɔe dɛ́ ɛ kwaa wejema. O wejema ne liire waa dɔa dɛ kpɔ dɛɛ ɛ ayaawa kwaa bwa soo siwi kan taeh. O la Kooro Solomɔn yer la, dɛ ka ɛ toma bwa waa ŋɔa o ɛ.

¹⁵ Hiram kpɔ ayaawa ɛ pilare anɛ, beŋkpoŋ bɛlbwa jaŋne dɛ́ kaa nyundua lɔ naɡale fifraanɛ dɛ anɛ, asɛ a bare ɡe naɡale fi dɛ anuatoro dɛ bar.

¹⁶ O berɔ kpɔ ayaawa la ane ɛ pilare tɔre anɛ chɔŋɛ a ta, bɛlbwa jaŋne dɛ́ kaa nyundua lɔ naɡale anuanɛ ne tama.

¹⁷ Pilare la tɔre la, Hiram kpɔ ayaawa ɛ kwaane aa do kɛ jɔɡrɔre dawɛ a ta. O ɛ jɔɡrɔre anuanɛ dawɛ bɛlbwa ta.

¹⁸ O kpɔ ayaawa la ane aa do ɡuleɡule kɛŋɔ daa nɔna ane baa dɛ yera pɔmeɡranet dawɛ pilare tɔ la ta, dɛ bar jɔɡrɔre la waa ɛa dawɛ a bɛlbwa ta la.

¹⁹ Pilare la aa lɔ pato la bini tɔre la do kɛŋɔ daa fee ken, a jaŋne dɛ́ kaa nyundua lɔ naɡale anumɛl.

²⁰ Pilare tɔre la bwa la, kwaa baa ɛa ɡuleɡule dawɛ jɔɡrɔre la ta la lɔ lafraanɛ teŋɛ dɔŋa nɛɛ dɛ bar a bwa.

²¹ Hiram kpɔ pilare la paaɡe Korowii Dea pato la ta. Pila waa pa weekaŋle harɛbɔr la, o pa o sɔn Jakin. Asɛ bɛl waa lɔ weekaŋle nyunduabɔr ɡe sɔne Boas.

²² Pilare la tɔre la, ba ɛa kɛŋɔ daa fee ken. Gɛɛ ba ɛa dɛ kpɔ tonɛ pilare la toma.

²³ Kooro Solomɔn ɡelɔ Hiram kpɔ ayaawa ɛ komɛl waa do ɡuleɡule kɛ loɡbajen baa yerɔ Mpo. O paɡri sie lɔ naɡale fi dɛ anue, o jaŋne dɛ́ kaa nyundua ɡe ɛ naɡale anuanɛ ne tama, asɛ he valɔ baro ɡe aa, o lɔ naɡale fifraanaarɛ dɛ anue.

²⁴ Loɡ la nyoa dɛ́ bar la, ba kpɔ ayaawa ɛ kwaane kɛ lukoli ken bar o bwa. Ayaawa baa kpɔa loɡɛ Mpo la, o tenten nee ba kpɔ ɛ lukoli la ɡe.

²⁵ Ayaawa loɡ baa dɛ yerɔ Mpo la chɔŋɛ ayaawa waa kpɔa ɛ nabala fi dɛ anɛ nɛ, atoro sie chaɡɛ weekaŋle nyunduabɔr pera, atoro sie chaɡɛ wee cholibɔr, ta atoro sie chaɡɛ weekaŋle harɛbɔr, asɛ atoro ɡe sie chaɡɛ wee leebɔr. Loɡ la chɔŋɛ a nɛ a habɔɔ, asɛ a sie chaɡɛ baŋ.

²⁶ Loɡ la pipiripi do kɛŋɔ nɔmpaa del, asɛ o nyoa la ɡe do kɛŋɔ numol nyoa dɛ paɡri kɛŋɔ daa fee yon pili la ken. O won nee ɡalɔŋre kaɡboŋa fi lɛɛ.

²⁷ O berɔ ɡel Hiram kpɔ ayaawa ɛ kwaane aa do kɛŋɔ torɔɡore fi ane baa won a taɡa. Bɛlbwa jaŋne ne o paɡri lɔ naɡale anumɛl, a jaŋne dɛ́ kaa nyundua ɡe naɡale anaarɛ ne tama.

²⁸ Ayaawaa ba kpɔ ɛ kwaa dɛ kpɔ maɡre o keŋkeŋni bwa,

²⁹ ba di kwaane kɛŋɔ nyujentena ne nabala dɛ kena kwaa ɡwine dawɛ a ta.

³⁰ Kwaa aa do kɛŋɔ torɔɡo la bɛlbwa dɔ nakpale anaarɛ baa kpɔ ayaawa ɛa, asɛ ba won a taɡa. Ayaawa la ane ɡee ba kpɔ kwaa kon a nakpale suuɡi a ta. Kwaa la bɛlbwa dɔ komɛl kɛŋɔ loɡ ken o chɔŋɛ o ta, asɛ dɛ dɔ kwaa anaarɛ loɡ la ɡe aa chɔŋɛ a ta.

³¹ Kwaa la bɛlbwa loɡ la aa chɔŋɛ o ta la, ba kpɔ ayaawa ɛ komɛl waa do ɡuleɡule ken do o bini, le bela dɛ kaa o nyundua ɛ naɡale beŋkpoŋ ne tama. O luŋri ɡe ɡwaa naɡale anɛ ne tama, ba di ɡwine dawɛ o nyundua.

³² A nakpale anaarɛ la lɔ kwaa baa kpɔa marɛ kon la lɔɡa, asɛ kwaa a nakpale la aa suuɡi a ta la lawɛ kon la. Nakpala la bɛlbwa bini paɡri ka tama á ɡwaa naɡale anɛ.

³³ A nakpale do kɛŋɔ kon waa do kɛ torɔɡo baa vɔwa dɛɛ pɛl jaɡre la nakpale ken, kwaa a nakpale aa dɛ suuɡi a ta, ne a nakpala la ɡbaɡba ne spokire dɛ hɔpore, ayaawaa ba mwɛɛ ɛ a bwa.

³⁴ Kwaa aa do kɛŋɔ torɔɡo la bɛlbwa dɔ nɔɔra anaarɛ, o loŋkoni bɛlbwa dɔ nɔn beŋkpoŋ, dɛ paaɡe o ta.

³⁵ Ba ɛ kon ɡuleɡule bar kon la doa. A ka tama ó ɛ naɡale beŋkpoŋ, o lawɛ kwaa baa kpɔa maɡre kon la kpoŋe.

³⁶ Kerobim ne nyujentena ne bambie daa nee ba di ɡwine dawɛ kwaa aa do kɛ torɔɡo la bobɛlbwa bar cheme.

³⁷ Gɛɛ ba ɛ kwaa fi aa do kɛ torɔɡore baa taɡa la bwa, kombeŋkpoŋii ba kpɔ ɛ a bwa, dɛ bwa ɛ kɛrɛdɛ dɛ le dɔŋa.

³⁸ Hiram berɔ kpɔ ayaawa ɛ loɡa fi, bɛlbwa dɛ lɛ nee ɡalɔŋre lafraanɛ, asɛ a bɛlbwa paɡri sie ɡe lɔ naɡale anumɛl. Loɡ la bɛlbwa dɛ chɔŋɛ kwaa aa do kɛ torɔɡo la bɛlbwa ta.

³⁹ O kpɔ kwaa aa do kɛ torɔɡore anue cheɡ Korowii Dea la weekaŋle harɛbɔr pera, dɛ kpɔ anue ɡe cheɡ weekaŋle nyunduabɔr. Dɛ kpɔ loɡbaa baa dɛ yerɔ Mpo la cheɡ Dea la weekaŋle harɛbɔr dɛɛ kaa wee leebɔr loŋkora bobɛl.

⁴⁰ Kooro Solomɔn ɡelɔ Hiram berɛ ɛ loɡa ne soofire, dɛ loɡa báa do nee kɛɛ chal a bini dɛ ɛ dɛɛ merɛ. Gɛɛ Hiram ɛ dɛ tonɛ Korowii Dea bela toma bwa ɡɛ waa baɡɛ Kooro Solomɔn nyoa la.

⁴¹ Kwaa waa ɛa laanee, pilare anɛ dɛ a tɔre aa do kɛ loɡa dɛ chɔŋre a ta, dɛ ɡwine waa dia dawɛ tɔre aa chɔŋre pilare la ta,

⁴² ne kwaane aa do ɡuleɡule kɛŋɔ daa nɔna baa yera pɔmeɡranet lafraanaarɛ baa bila teŋɛ dɔŋa nɛɛ bele anɛ a do pilare la dor,

⁴³ ne kwaa aa do kɛ torɔɡore fi baa taɡa, bɛlbwa dɔ a loɡa,

⁴⁴ ne loɡbajen waa chɔŋɛ nabala fi dɛ anɛ nɛɛ baa yerɔ Mpo,

⁴⁵ ne loɡa ne soofire ne loɡa báa do chal kɛɛ nee a bini dɛ ɛ dɛɛ merɛ. Kwaa Kooro Solomɔn aa ɡela Hiram Abi ɛ tɛo ó kpɔ cheɡ Korowii Dea la, ayaawa aa dɛ nyɛɡlee ba kpɔ ɛa.

⁴⁶ Jɔɔdan Moo deŋɡarere dor harɛ waa chɔa kaa dɛ do Sukot ne Saretan baah ta chooh ba kpɔ, dɛ charama ɛ komɛlbwa baa dɛ nyin dɛ fora bɔɔ, asɛ dɛ kpɔ ayaawa ɛ a bini.

⁴⁷ Kooro Solomɔn ta kwaa waa kpɔ ayaawa ɛa nɔ tɔɡre maɡɛ, dɛkalkɛ dɛ a warɔ kohona. Gɛɛ a do baa wola a tɔɡre ɡe jemɛ.

⁴⁸ Kooro Solomɔn berɔ kpɔ suuɡaswɛm ɛ Korowii Dea la bini laala. Anee, suuɡaswɛm kon baa dɛ ɛ saraha o ta, ne teeburre baa kpɔ paanoo baa bil o ta Korowii sie,

⁴⁹ kandea daa baa kpɔ suuɡaswɛm tenten ɛa la, kandere anue chɔŋɛ diɡ pera, anue ɡe chɔŋɛ ɡal pera Korowii Dea la bini tenten la sie, ne kwaa baa kpɔa dɛɛ nyɛwɛ kandea ŋwɛn doŋa, ne kwaa ane kɛŋɔ daa fee, dɛ kandere. Suuɡaswɛm tenten nee o ɛ a bwa.

⁵⁰ O berɔ ɛ suuɡaswɛm tenten loɡbaala, ne kon baa kpɔa dɛɛ fee kandea ŋwɛn la doŋa, ne loɡa baa do nee kɛɛ chal a bini dɛ ɛ dɛɛ merɛ, ne loɡa ne kwaa baa kpɔa dɛɛ buh nii, ne dea la ɡbeni baa kpɔ suuɡaswɛm ɛa, ne ɡbeni aa lɔ Boɡoroŋ Tenten bela ɡbeni, dɛ ɡbeni aa lɔ Dea la nyoa bwa.

⁵¹ Kooro Solomɔn aa ɛ Korowii Dea la toma bɛlbwa tonɛ la, o kpɔ suuɡapoŋa ne suuɡaswɛm ne laala bwa o mɛɛ Kooro Devid aa kpɔa tɛ Korowii la ka cheɡ dea baa dɛ cheɡ laala o bini Korowii Dea la bini.