1 Koranar 6 - mzwDBL

Kooro Solomɔn do Korowii Dea

¹ Israel tena aa ira le Ijipt harɛ ta bene lafraanaarɛ fifraanuatoro habɔɔ Kooro Solomɔn ba di kora Israel harɛ ta. Waa di kora bene anaarɛ, korobinɛɛte baa dɛ yerɔ Siv taa o ɡel ba pa mun dɛɛ ma Korowii Dea la.

² Korowii Dea la sie jaŋne lɔ naɡale fifraanuanaarɛ, o paɡri naɡale fifraatoro, asɛ o jaŋne dɛ kaa nyundua ɡe lɔ naɡale fifraanaarɛ dɛ anue.

³ Pato lɔ Dea la sie, o paɡri lɔ naɡale fi dɛ anue, asɛ o jaŋne dɛ le Dea la ta kaa sie ɡe ɛ naɡale fi dɛ anue, o ne Dea la sie bwa paɡri kɛrɛdɛ.

⁴ Tokorore aa lɔ Dea la ta la sie jeɡre o habɔɔ, asɛ o bini ɡe la, a ka do paɡri.

⁵ Ba ma deene sawɛ Korowii Dea la, ne danjwɛɛ waa lɔ o bini tenten la dɛ bar o bwa dɛ ma dejeɡre sarawa.

⁶ Deene aa lɔ harɛbɔr la paɡri lɔ naɡale anuanɛ ne tama, asɛ baah ta deene la ɡe paɡri ɛ naɡale anuanaarɛ, nyundua kwaa la ɡe paɡri ɛ naɡale fi ne tama. Gɛ aa ɛ ásɛ ba bɛ bɔɔne ba foɡre Korowii Dea la danjwɛɛ ta la, ba kpɔ doli ɡo Korowii Dea la danjwɛɛ la ta a le baŋ, dɛ do deene la chɔŋre a ta.

⁷ Ba pɛɡre bwea baa kpɔ ma Korowii Dea la dɛ kwaara bela baa dɛ kwia mɔɔ dɛ́ kpɔ ba, ɡɛ aa ɛ ba bɛ hambare ne kpanfɛre kɛɛ buni bɛlbwa ɡbɔɡa no Korowii Dea la bela.

⁸ Abrɔsane baa doa pɛl Korowii Dea la ta weekaŋle harɛbɔr pera la, doonyoa bɛl lɔ bela ba kpɔ bela teeh dɛɛ kaa nɛɛte ne toorote la ta.

⁹ Kooro Solomɔn ma Korowii Dea la tonɛ, dɛ kpɔ doli ne peleme daa tɔɔ.

¹⁰ O do deene sarawe Korowii Dea la bar, dea la bɛlbwa jaŋne dɛ́ kaa nyundua lɔ naɡale anuanɛ ne tama, asɛ peleme daa doli le Korowii Dea la ta dɛ lawa kpoŋe.

¹¹ Ate, Korowii ŋɔ Kooro Solomɔn be ŋɔ,

¹² “Dea haa dɛ ma nɔ, dɛ he no n deŋna waa dɛ teŋɛ n waa bwa ta naa, mɛɛ che he nɛɛ dɛ́ ɡel nyoa maa baɡɛ he mɛɛ Kooro Devid la maɡre.

¹³ Mɛɛ so n nɛra Israel tena baahnee Korowii Dea haa dɛ do nɔ bini, maa ban ta bwa.”

¹⁴ Gɛɛ Kooro Solomɔn ɛ dɛ do Korowii Dea la bwa tonɛ.

Korowii Dea bini kwaara wa

¹⁵ O kpɔ dadɛɛɡa ane soo siwi sam le harɛ dɛ kpɔ peleme daa marɛ danjwɛɛ le harɛ ka le o nyundua baa ɡoo la bwa.

¹⁶ O kpɔ peleme daa la ane teŋe Korowii Dea la bini, Boɡoroŋ Tenten la baah ta kɛŋɔ pateesan ken le nyundua ba chiɡ harɛ. O jaŋne lɔ naɡale fifraatoro.

¹⁷ Dea waa lɔ Boɡoroŋ Tenten la sie jaŋne lɔ naɡale fifraanumɛl.

¹⁸ Peleme daa ba kpɔ ɛ Dea la bini bwa, ba kwaa kwaa aa do ɡuleɡule kɛ loŋa ne anɔ la aa do kɛ daa fee pɛɡle danjwɛɛre la bwa ta, nɛn cheɡɔɔ waa aa, waa bwea baa kpɔa mao la na.

¹⁹ O kwaa bɔr Korowii Dea la bini tenten, o do Dea la habɔɔ, dɛ́ kpɔ Korowii Ne Nɛwɛnyina Fɔo Daka la cheɡ.

²⁰ Korowii Dea la bini tenten la paɡri lɔ naɡale fifraatoro, o jaŋne dɛ kaa nyundua lɔ naɡale fifraatoro, asɛ o jaŋne ɡe naɡale fifraatoro. Ba kpɔ suuɡaswɛm tenten kwaa o bini bwa, dɛ kpɔ peleme daa pɛɡle kon baa dɛ ɛ saraha o ta la bwa.

²¹ Kooro Solomɔn kpɔ suuɡaswɛm tenten ɛ Korowii Dea la bini, dɛ kpɔ suuɡaswɛm jɔɡrɔre teŋe o bini tenten la sie, dɛ kpɔ suuɡaswɛm ɛ o ɡe bini.

²² Korowii Dea la bini bwa ne kon baa dɛ ɛ saraha o ta o do o bini tenten bela la, o kpɔ suuɡaswɛm ɛ a bwara bwa.

²³ Kooro Solomɔn ɡelɔ ba kpɔ ɔleve daa sɛh Kerobim aa do kɛŋɔ hweera kwaa anɛ ane cheɡ Korowii Dea la bini tenten bela. Bɛlbwa jaŋne dɛ kaa nyundua lɔ naɡale fi dɛ anue.

²⁴ Kerobim la bɛlbwa dɔ kena anɛ. Keni bɛlbwa jaŋne lɔ naɡale anuanɛ ne tama, a baahna ɛ naɡale fi dɛ anue.

²⁵ A bwa kɛrɛdɛ dɛ le dɔŋa,

²⁶ bɛlbwa kpeɡa ɛɛ ɛ naɡale fi dɛ anuee.

²⁷ Kooro Solomɔn ɡelɔ ba kpɔa cheɡ dɔŋa jwɛh Boɡoroŋ Tenten bela. Ba ɛa a kena anɛ nyoo ɛɛ chuɡe danjwɛ, asɛ anɛ ɡe ba cheme dea la baah ta.

²⁸ O ɡelɔ ba kpɔ suuɡaswɛm ɛ a bwara bwa.

²⁹ Kooro Solomɔn ɡelɔ ba sɛh Kerobim ne bambie daa ne kwaa aa do kɛ daa fee dɛ dia ɡwine dawɛ Korowii Dea la ne Boɡoroŋ Tenten la danjwɛɛre ta.

³⁰ O ɡelɔ ba kpɔ suuɡaswɛm ɛ deene la harɛ ɡe bwa.

³¹ Korowii Dea la bini tenten doonyoa bela la, Kooro Solomɔn ɡelɔ ba kpɔ ɔleve daa kwaa doonyoa ɡbeni anɛ, asɛ o doonyoo daa ɡe lɔ anue.

³² Dea la ɡbeni anɛ ta, o ɡelɔ ba sɛh Kerobim ne bambie daa, dɛ kwaa kwaa aa do kɛŋɔ daa fee dɛ dia ɡwine dawɛ a ta, dɛ kpɔ suuɡaswɛm ɛ a bwara.

³³ Gɛ tentenee o ɡel ba ɛ dejen waa lɔ Boɡoroŋ Tenten la sie doonyoa ɔleve daa ne, dɛɛ yao bɔre anaarɛ.

³⁴ Kooro Solomɔn berɔ ɡel ba kpɔ dadɛɛɡe bɛl soo siwi ɛ dea la ɡbeni anɛ. Ba ɛa a pɛ dɔŋa ba won a kpɛwa.

³⁵ O ɡelɔ ba sɛh Kerobim ne bambie daa ne kwaa aa do kɛŋɔ daa fee dɛ dia ɡwine dawɛ ɡɛ ɡbeni la ta, dɛ kpɔ suuɡaswɛm ɛ a bwara kɛrɛdɛ ken.

³⁶ Korowii Dea la sie la, o ɡelɔ ba ma dembaah, dɛ ɡel ba kpɔ bwea baa sɛah ma danjwɛɛ baro. Ba kpɔ bwea atoro ma chɔŋɛ aa, dɛ ba kpɔ dola dawɛ a ta.

³⁷ Kooro Solomɔn aa di kora bennaarɛ te ta, korobinɛɛte baa dɛ yerɔ Siv taa o ɡel ba pa Korowii Dea la mae mun.

³⁸ Ba do Dea la dɛ tonɛ o wobɛlbwa, o kora dii bene fi dɛ beŋkpoŋ ta, korobinuatoro baa dɛ yerɔ Bul ta. Anomanta, bene anuanɛɛ Kooro Solomɔn kpɔ ma Dea la tonɛ.