1 Koranar 5 - mzwDBL

Kooro Solomɔn pa mun dɛ́ ma Korowii Dea

¹ Dɛ Taaya Kooro Hiram chamenatee Kooro Devid, anomanta, waa noa kɛŋɔ ba cheɡ Solomɔn kora o so o mɛɛ Kooro Devid buɡ ta la, o tomɛ o nomonome ba ba na Kooro Solomɔn.

² Asɛ Kooro Solomɔn kpɔ kala tɛɛ ba ba ka ŋɔ o be ŋɔ,

³ “He na ɡɛ n mɛɛ fe aa dɛ nyin kɛŋɔ o fee do Korowii Dea, kɛ dɔma baa baro cheme kpɔ yoi puu o ta wone do ka tel kɛŋɔ Korowii aa ɡela o pɔ ba bwa nɛɛ mɔɔ.

⁴ Taraken, Korowii maa dɛ tomɔ alaworomɛ, o tɛ mɛ deŋnesɔɔhna, wechɔɡa kɛɛ dɔm bɛlbwa toole n harɛ ta kpa.

⁵ N ɛ n liire kɛŋɔ ń do dea tɛ Korowii, ɡɛ waa ŋɔ n mɛɛ Kooro Devid be ŋɔ, ‘He bie maa ba ɡel o so he buɡ ta dɛ́ di kora laanee dɛ́ do n Dea tɛ mɛ’ la.

⁶ Anomanta, cha mɛ dɛ́ ɡel he nɛra ka teŋe peleme daa le Lɛbanɔn harɛ ta tɛ mɛ. Mɛɛ ɡeloo n nɛra ba ja he nɛra nɛ, ásɛ n bɔ he nɛra la kem ɡɛ bwa haa baɡle. He ɡbabir nao kɛŋɔ nomɛlbwa ta daa teŋa wejema dɔe ka ja he nɛra baa le bwɛjen Sidon ta nɔ nɛ.”

⁷ Kooro Hiram aa no Kooro Solomɔn kala nɔ la, o sie lɛo kohona o ŋɔ, “Fini, Korowii chɛ kpɛɛra kɛŋɔ waa tɛ Kooro Devid bibaa waa jemɛ waa ŋɔ ó nyiŋi Israel harɛ damanta nɔ ta nɔ.”

⁸ Asɛ dɛ ɡe tomɛ nɛra Kooro Solomɔn be ŋɔ, “N no he wesoŋa la, mɛɛ ɛ ɡɛ haa dɛ nyin la bwaa dɛ tɛɛ peleme daa ne dadɛɛɡe te bɛlbwa.

⁹ Mɛɛ ɡeloo n nɛra le a ne Lɛbanɔn harɛ dɛ́ ba a ne mpo nyoa, dɛ́ ba vɔrɔwa pɛ dɛ́ taɡɛ do nee ta ba tɛɛ bela haa dɛ nyin, ásɛ dɛ pura he nɛra ba kpɔ kaa. Waa n ɡe aa dɛ nyin laanee kɛŋɔ he ɡe ba tɛ mɛ kondikwa ń tɛ n dem tena.”

¹⁰ Gɛ ŋwɛnɛ nɔ taa Kooro Hiram kpɔ dɛ tɛ Kooro Solomɔn daa te bɛlbwa waa dɛ nyin,

¹¹ asɛ Kooro Solomɔn tɛ Hiram ne o koodem nɛra jaaɡe bɔɡtɔre kaɡboŋa lafa, dɛ ɔleve noo ɡalɔŋre kaɡboŋa lafa benanyoa bɛlbwa o ne o dem tena ɛɛ di.

¹² Korowii tɛ Kooro Solomɔn wejema ɡɛ waa bola la. O ne Kooro Hiram baah do wer, asɛ ba fɔwɛ deŋnesɔɔhna fɔo.

¹³ Kooro Solomɔn kpɔ tom-ɛɛra kaɡboŋa fifraatoro le Israel harɛ ta bwa,

¹⁴ dɛ kpɔ Adoniram chɔ ba nyoa. O bɔne ba bini kuore atoro, kaɡboŋa fifi. Nɛra kaɡboŋa fi la Lɛbanɔn ka ɛ toma korobie aa, dɛ ba berɔ ba dɛ ba di korobie anɛ Israel harɛ. Gɛɛ ba la dɛɛ beɡre.

¹⁵ Dɛ Kooro Solomɔn dɔ tom-ɛɛra kaɡboŋa fifraanuatoro ɡe ba do deŋɡarere harɛre ta dɛɛ pɛɡre bwea, asɛ nɛra kaɡboŋa fifraanuanɛ ɡe ɛɛ chea.

¹⁶ O kpɔ nɛra kaɡboŋa batoro lafraatoro baa nyiŋi toma la ta ne tom-ɛɛra la nɛ.

¹⁷ Kooro do tom-ɛɛra la ba pɛɡre bwedɛɛɡa dɛ kwaa a bwara dɛ́ kpɔ pa Korowii Dea la mun.

¹⁸ Kooro Solomɔn ne Kooro Hiram, dɛ nɛra baa le bwɛjen Gebal, dɛ dɔ kwaa sɛɛh wejema kwaa bwea ne daa baa kpɔ do Korowii Dea la.