1 Koranar 4 - mzwDBL

Kooro Solomɔn nomonome

¹ Kooro Solomɔn di kora Israel harɛ ta bwa.

² Dɛ nomonome baa ja o nɛɛ laanee nɔ. Sadɔk bibaa Asaria ɛ sɔfo,

³ Sisa bibaala Elihoref ne Ahija ɛ karakere dɛɛ chwerɛ, Ahilud bibaa Jehosafat ɛɛ cheɡ webena baa chwera bil.

⁴ Jehoiada bibaa Bɛnaya ɛ laa sitɔɔ, Sadɔk ne Abiata ɛ sɔfore,

⁵ Netan bibaa Asaria chɔ harɛre nomonome nyoa. Netan bibaa Sabud ɛ sɔfo dɛ berɛ bol waa dɛɛ baɡle kooro,

⁶ Ahisa ɛɛ nyiŋi koodem wobɛlbwa ta, Abda bibaa Adoniram chɔ nɛra baa kpɔ ba dɛɛ ɛ tomkpeɡa nyoa.

⁷ Kooro Solomɔn le nomonome fi dɛ banɛ ba chɔ harɛre nyoo Israel bwa. Ba tomaa kɛŋɔ bá lɛ kondikwaa le nɛra be baa tɛ kooro ne o dem tena. Nomonome la bɛlbwa dɔ korobie beŋkpoŋ dɛ́ kpɔ kondikwa ba tɛ kooro benanyoa bɛlbwa.

⁸ Gɛ nɛra la sɔnaa teŋa nɔ, Bɛn Hur chɔ a ɡɛ kondikwaa la waa ta deŋɡarere harɛ bwɛɛre aa lɔ Efrem harɛ.

⁹ Bɛn Deka chɔ bwɛjena ane baa dɛ yera Makas ne Saalabim ne Bɛt Sɛmɛs dɛ Ɛlɔn Bɛt Hanan nyoa.

¹⁰ Bɛn Hɛsɛd chɔ bwɛjena ane baa dɛ yera Arubot ne Soko dɛ Hɛfa harɛre bwa nyoa.

¹¹ Bɛn Abinadab chɔ Nafɔt Dɔr harɛ bwa nyoa, dɛ o mo Kooro Solomɔn bihaah baa dɛ yerɔ Tafat.

¹² Ahilud bibaa Baana chɔ bwɛjena Taanak ne Meɡido nyoa, dɛ berɛ kpoŋe ka le Bɛt San harɛ waa bɛne Saretan Jesreel weekaŋle harɛbɔr, dɛ le Bɛt San dɛɛ kaa bwɛjen Ebel Mehola, dɛ ka le bwɛjen Jokmeam baŋ.

¹³ Bɛn Gɛba chɔ bwɛjen Ramɔt waa lɔ Gelead harɛ ta nyoa, dɛ Jɛɛ dea tena, o ɛ Manasɛ naa, bwɛɛre aa lɔ bela, ne Aaɡob harɛ waa lɔ Basan. A bwa lɔ bwɛjena fifraanumɛl baa ma danjwɛjena bara, dɛ kpɔ ayaawa kwaa a doonyoo bune.

¹⁴ Ido bibaa Ahinadab chɔ Mahanaim harɛ nyoa.

¹⁵ Ahimas chɔ Naftale harɛ nyoa. Dɛ o mo Kooro Solomɔn bihaah baa dɛ yerɔ Basemat.

¹⁶ Husai bibaa Baana chɔ Aasa harɛ ne bwɛɛ bɛl baa dɛ yerɔ Bealɔt nyoa.

¹⁷ Parua bibaa Jehosafat chɔ Isaaka dea harɛ nyoa.

¹⁸ Ela bibaa Simei chɔ Bɛnjamen dea harɛ nyoa.

¹⁹ Uri bibaa Gɛba chɔ Gelead harɛ nyoa. Bela fa ɛ Amɔre tena Kooro Sihon ne Basan Kooro Ɔɡ harɛre. Dɛ Gɛba ɡboo dɛɛ nyiŋi harɛ la ta.

Kooro Solomɔn kondɔɔh ne o kora dii

²⁰ Kooro Solomɔn bere saŋ dɛ Juda ne Israel tena warɔ kɛŋɔ mpo nyoa hɛŋle ken. Kɛ dɛ bɛlbwa dɔɔ dɛɛ di dɛɛ nyɔ, ba sie ɛɛ lɛ.

²¹ Kooro Solomɔn harɛ waa di kora o ta la le Yufretis Moo ta, dɛ kaa Filisti tena harɛ, dɛ ka le Ijipt harɛ jwɛh ta. Dɛ ɡɛ harɛre la bwa nɛra kpɔ harɛ la ta kwaa baa tɛo, dɛ kpɔ ba te do o lɔɡa ɡɛ saŋ waa di kora bwa.

²² Kondikwa aa chɛ kɛ aa ba kooro dem tɔpere bɛlbwa laanee nɔ, loɡ baa kpɔa dɛɛ maɡɛ kwa, mendɛɛɡa bɔɡtɔre lafa fifraanue, ne jule bɔɡtɔre lafraatoro,

²³ ne nae aa do bwara fi, ne nae baa dɛ la ane dibɔr ɡe fifraanɛ, ne peera ne boohna lafa, ne kweɡli ne nampoŋa ne ahre, dɛ jala bwa.

²⁴ Yufretis Moo wee cholibɔr harɛ bwa taa Solomɔn di kora. Le Tifsa teŋe kaa wee cholibɔr ka tel Bwɛjen Gasa, dɛ deŋnesɔɔhna lɔ harɛ la bwa ta.

²⁵ O ta aa soɡe le la, dɛ nɛra baa soɡe Juda ne Israel harɛ bwa ta ɡɛ saŋ lɔ bosɔɔhna ta. Le Dan dea harɛ waa lɔ weekaŋle nyundua, dɛ́ ba kaa Beɛseeba o ɡe aa lɔ weekaŋle harɛbɔr. Dɛ dea bɛlbwa nɛra dɔ bosɔɔhna, dɛ dɔ fiɡ ne ɡrepo daa kooni.

²⁶ Kooro Solomɔn dɔ jaɡre kaɡboŋa fifraanaarɛ baa vɔwɛ kwaa aa do kɛ torɔɡo pɛla chɔɔbɔra, dɛ jaɡre kaɡboŋa fi dɛ anɛ ɡe nɛra aa dɛ so a ta.

²⁷ Nomonome fi dɛ banɛ baa lɛ kondikwaa baa tɛ Kooro Solomɔn ne o dem tena korobie bɛlbwa la, ba a ne baa tɛ o ne nɛra baa ba o be baa di kondikwaa bwa. Ba ta ɡelɛ kondikwa ɛɛ paŋɔ.

²⁸ Bɛlbwa kpɔ jaaɡe ne kpɔɡa baa tɛ jaɡre baa kpɔ torɔɡore vɔwa ne mea aa kaa la bwa.

Kooro Solomɔn wejema waa dɔa

²⁹ Korowii tɛ Kooro Solomɔn wejema ne waa mun noe kohona aa wola nyoa dɔe kɛŋɔ mpo nyoa hɛŋle ken.

³⁰ Kasinteŋ, dɛ o dɔŋ toole wejema dɔe ta wee leebɔr harɛre ta ba kaa Ijipt harɛ bwa ta.

³¹ Dɛ o jemɛ waa ɡwaa nomɛlbwa. O ɡwaa Etan waa ɛ Esera te ne Mahɔl bibaala Heman ne Kalkol dɛ Daada. O sɔn leɔ kohona harɛre aa bar ba la bwa ta.

³² Kooro Solomɔn sɛɡlɔ beŋkpoŋa beŋkpoŋa ɡɛ kaɡboŋa atoro, dɛ ɡo yela ɡe kaɡboŋ dɛ anue.

³³ Dɛ o jemɛ daa ne kpɔɡa waa kɛrɛdɛ, hale o baɡle peleme daa aa lɔ Lɛbanɔn dɛ hesɔp aa moɡa tɔ danjwɛɛre ta, ne ola ne jumbii ne kwaa aa dɛ tuuɡi tea ta ne anɔ la aa dɛ huuh dɛ pɛŋa bwa wa.

³⁴ Harɛ nɔ ta koranar bwa no o wejema waa dɔa wa, dɛ tomɛ nɛra ba la o be kaa no.