1 Koranar 3 - mzwDBL

Kooro Solomɔn soŋe wejema

¹ Kooro Solomɔn ne Ijipt harɛ kooro nyoa pɛo asɛ Kooro Solomɔn mo o bihaah. O kpɔ haah la ba Kooro Devid Bwɛjen Jerusalam mɔɔ dɛ ma koodem ne Korowii Dea dɛ danjwɛɛ bar bwɛɛ la.

² Baa wola Korowii Dea mae mɔɔ la, dɛ deŋɡarere taa baa ɛ sarahare.

³ Kooro Solomɔn teŋɛ waa o mɛɛ Kooro Devid aa ŋɔa la ta, dɛ baɡle nyina waa dɛ nyin Korowii, kɛ dɛ deŋɡarere baa dɛ tomɛ voɡa doree o ɡe ɛɛ fuh konsɔɔhsoma dɛɛ ɛ sarahare.

⁴ Kooro Solomɔn la bwɛjen Gebeɔn ta, dɛ belaa kon baa dɛ ɛ saraha o ta do, nɛra bwa ɛɛ la o ta. O kaa ɛ sarahare bele kaɡboŋ o ta dɛ fuah.

⁵ Waa lɔ Gebeɔn bela la, Korowii ba o be jwaana deera ta dɛ ba ŋɔ o be ŋɔ, “Baɡle komɛlbwa haa dɛ nyin ásɛ n kpɔ tɛɛ.”

⁶ Kooro Solomɔn chaŋe ŋɔ, “He nyin n mɛɛ Kooro Devid waa ɛ he bonɔɔ kohona, dɛkalkɛŋɔ o waa dɔ kasinteŋ, o waa toɡrɔ o tea ɡe to. He teŋɛ he nyina aa wola jaɡa dɔe ta, dɛ tɛo bibaa o chiɡ o naa ta, dɛɛ di kora fini nɔ.

⁷ N Naa Korowii maa dɛ tomɛ, he ɡelɔ men maa ɛ he bonɔɔ chiɡ n mɛɛ naa ta dɛɛ di kora. Kɛ n nɔn ta kao, maa n sie ne habɔɔ jemɛ.

⁸ He bonɔɔ ja nɛndamanta haa lee ba tɛ he te baa wola nyoa dɔe bini bonɔ.

⁹ Anomanta, tɛ men maa ɛ he bonɔɔ nɔ wejema, dɛ́ ɡel n jemɛ wechɔɡa ne wedɛɛɡa. Ɛrɛɛ n ɡbo ɛɛ ba wona nyiŋi he nɛra baa wara ken nɔ nɛɔ?”

¹⁰ Kooro Solomɔn wesoŋa la too Korowii tea.

¹¹ Asɛ Korowii ŋɔ o be ŋɔ, “Waa nɔ haa soŋa haa wola mkpajaŋ kɛɛ he ɡbaɡba kondɔɔh soŋɛ kɛɛ he dɔma serewe, kɛ dɛ soŋe wejema dɛ́ kpɔ dɛɛ nyiŋi nɛra nɛɛ kasinteŋ ne nɔ,

¹² mɛɛ ɛ ɡɛ haa soŋa laanee tɛɛ. Mɛɛ tɛɛ wejema ne waa mun noe, he kpɔ dɛɛ nyiŋi nɛra nɛ, nomɛlbwa aa wola won do kɛŋɔ hen, a dɔŋa ɡe aa wola chiɡ bwa.

¹³ Mɛɛ berɔ tɛɛ anɔ la ɡe haa wola soŋɛɛ, mɛɛ tɛɛ suuɡa ne jirima kohonaa he soɡa bini bwa he dɔŋ aa wola lee do koranar bwa bini.

¹⁴ Dɛ hɛɛ dɛɛ yarada mɛɛ dɛɛ teŋɛ me Mmarare ta kɛ he mɛɛ Kooro Devid aa ɛa la aa, mɛɛ tɛɛ mkpajaŋee.”

¹⁵ Ate, Kooro Solomɔn har dom ta dɛ na kɛŋɔ deeraa o dee. Asɛ o ba Jerusalam dɛ la ka che Korowii Ne Nɛwɛnyina Fɔo Daka la sie, dɛ fuh kwaa ɛ saraha ne deŋnesɔɔhna saraha tɛ Korowii. A habɔɔ, o ɛ kondikonjena, dɛ ta nɔn yerɛ o nomonome bwa.

Kooro Solomɔn pa bole bɛl aŋwɛnɛ ta

¹⁶ Awola bɛl, hanjwamanere banɛ bane lawɛ dɔŋa ba Kooro Solomɔn be.

¹⁷ Beŋkpoŋ ŋɔ, “N naa kooro kaforachɛ, n ne n dɔŋ nɔɔ pɛa so dembeŋkpoŋ ta. N lolɛ bibaa o siwi ta.

¹⁸ Maa lola tɔpetooro wee la, o ɡe lolɛ bibaa. Nomɛlbwa ta ya nɛɛ jae dem bela, ya ɡboo.

¹⁹ Ya bwa aa chɔa jwaana la, o ɡbilo ɛɡɛ o bie nɛɛ o sewɛ.

²⁰ Jwaana la ne la, o iro dɛ ba kpɔ n bie la ka bil o jwɛh, dɛ kpɔ o kon waa sewa la ba bil n jwɛh.

²¹ Tɔɔ aa pera chɔɔ n kpɔɔ ŋɔ o ɔr dɛ o sewɔ. Maa kpɔɔ le bochaah ta dɛ peseo la, dɛ n bie la laa.”

²² Ate, hanɛɛte la ŋɔ, “Akai, n bie siwii lole la, he konee sewa la.” Sitɔ te la ɡe ŋɔ, “Akai, he konee sewa la, n kon siwii lole la.” Gɛɛ ba tɔŋle waa la kooro siwi ta.

²³ Anee Kooro Solomɔn ŋɔ, “Onɔ ŋɔ n kon siwii lole nɔ, he konee sewa la, onɔ ɡe ŋɔ he konee sewa la, n kon siwii ta lole la.”

²⁴ Kooro berɛ ŋɔ nɛra baa ja o nɛɛ la be ŋɔ, “Hé tɛ mɛ kere.” Asɛ ba kpɔ kere ba tɛo.

²⁵ Anee o ŋɔ, “Hé pere bie waa wola sewɛ la bini dɛ́ kpɔ bɛl tɛ onɔ, dɛ kpɔ bɛl tɛ onɔ ɡe.”

²⁶ Belaa haah la o bie aa ɛ onɔ la waa wola sewɛ la tea domɔ o ŋɔ, “Akai, N naa kooro, he bɛ on kpo, he kpɔɔ tɛ n dɔŋ la.” Nɛɛte la ŋɔ, “A wer ɡa, waa won ɛ he kon kɛɛ n kon, bɔne o bini tɛ yaa!”

²⁷ Ate, kooro la ŋɔ, “Hé kpɔ bie la tɛ haah waa ŋɔa ya bɛ on kpo la, bie la nyaa.”

²⁸ Israel tena bwa aa no ɡɛ Kooro Solomɔn aa pa bole la, a ɛɛ ba nyokpoa, ba na kɛŋɔ Korowiirii tɛo wejema o kpɔ pa bole aŋwɛnɛ ta la.