1 Koranar 21 - mzwDBL

Nabɔt daa koo wa

¹ Awola bɛl, baa bɛl baa dɛ yerɔ Nabɔt dɛ le bwɛɛ bɛl sɔne Jesreel. Dɛ o dɔ daa koo o bɛne Samaria Kooro Ahab dem jwɛɛh Jesreel bela.

² Awola bɛl, Kooro Ahab ŋɔ Nabɔt be ŋɔ, “He bodɛɛɡe haa du daa nɔ bɛne n koodem, kpɔ tɛ mɛ ń parɛ papooni baa kpɔa dɛɛ ɛ dɔkpɔɡa dɔr ne kela ne ntoosi dɛ ŋwana. Mɛɛ tɛɛ daa koo waa wera ɡwaalo, dɛ he dɛ nyin ɡe aa, n tɛɛ suuɡa aa chɛ o yoɡ.”

³ Anee Nabɔt ŋɔ, “N naa kooro, n naawa kapɛrɛ koo, asɛ n di, Korowii ɛɛ la ane bojaŋ kɛŋɔ ń kpɔ ya kapɛrɛ kon tɛɛ.”

⁴ Ate, Kooro Ahab kpɔ sum ne bandia kaa dem, waa Nabɔt aa bola baɡlo kɛŋɔ “Maa n naawa kapɛrɛ konee kpɔ tɛɛ” la wa. Asɛ bwaawee farɔ o ka chɔ dɛ vɛh kwaa dii.

⁵ Kooro haah Jɛsɛbɛl la o be dɛ ka pɛɛro ŋɔ, “Bɔkwa waa he kpɔ sum ne bandia so, haa wola kwaa kwaraa di nɔɔ?”

⁶ Kooro chaŋe o haah ŋɔ, “Nabɔt waa lɔ Jesreel la bee n ŋɔ ó yoɡ o daa koo tɛ mɛ, dɛ ɡɛ laa ɡe aa, ń tɛo bɛl o chiɡ o kon la naa ta. Kɛ o vɛoh ŋɔ waa kpɔ tɛ mɛ.”

⁷ Anee Jɛsɛbɛl ŋɔ, “Kenii hɛɛ ba kora dii Israel tena nɛ aa? Ir dɛ ɡel he sie lɛ dɛ di kwa. Mɛɛ lɛ Nabɔt Jesreel te daa koo laanee tɛɛ.”

⁸ Jɛsɛbɛl kpɔ Kooro Ahab sɔn chwerɛ tɔne asɛ o kpɔ o noniseɡ ɛɡre a ta, dɛ tomɛ ba kpɔ ka tɛ nomonome ne banɔ la baa soɡe nomombɔra Jesreel bela Nabɔt aa lole la.

⁹ Tɔne la bini waa nɔ. “Hé bol nɛra be bá le tɔpebeŋkpoŋ cheɡ, dɛ́ cheme vɔwɛ nyoa, dɛ́ ɡel Nabɔt so nomonsobɔr.

¹⁰ Hé nyin nyosonteŋna banɛ ba so, ásɛ ba ne o sie chaɡɛ dɔŋa. Ásɛ ba haŋɛ o nyoa nɛra la baah ta kɛŋɔ o taah Korowii ne kooro, dɛ́ lawɔ le bwɛjen la ta dɛ́ ka foɡro bwea kpo.”

¹¹ Ate, nomonome ne banɔ la baa soɡe nomombɔra Jesreel la ɛ ɡɛ Jɛsɛbɛl aa chwerɛ tɔne, dɛ do ba ŋɔ bá ɛ la.

¹² Ba le tɔpebeŋkpoŋ cheɡ dɛ cheme vɔwɛ nyoa, dɛ yerɛ nɛra cheme dɛ tɛ Nabɔt nomonsobɔr.

¹³ Nyosonteŋna banɛ la baa so ba ne o sie chaɡɛ dɔŋa, ba haŋɛ o nyoa nɛra la bwa baah ta kɛŋɔ o taah Korowii ne kooro la. Anomanta, ba lawɔ le bwɛjen la ta dɛ ka foɡro bwea kpo.

¹⁴ Asɛ ba kpɔ kala tɛ ba ka ŋɔ Jɛsɛbɛl be ŋɔ, “Ba foɡre Nabɔt bwea kpo.”

¹⁵ Jɛsɛbɛl aa dena no kɛŋɔ ba foɡre Nabɔt bwea kpo la, o ŋɔ Kooro Ahab be ŋɔ, “Ir dɛ́ ka kpɔ daa koo Nabɔt aa vɛah kɛ wɛɛ yoɡu tɛɛ la. O toole kpa, o sewɔ.”

¹⁶ Kooro Ahab aa noa buɡ la ta, o den la Nabɔt daa koo la ta dɛ ka kpɔ ɛ o kon.

¹⁷ Belaa Korowii ŋɔ o keame Elaeja waa le Tisbe be ŋɔ,

¹⁸ “La Samaria Israel Kooro Ahab be, o lɔ Nabɔt daa koo ta dɛɛ ba kpɔe berɛ o kon.

¹⁹ Ŋɔ o be ŋɔ men Korowii ŋɔ, ‘Ahab, he kpo nɛn dɛ berɛ kpɔ o kwaa di aa? Bela nyootena aa kpɛle Nabɔt chal la, bela tentenee aa ba he ɡe chal kpɛla.’ ”

²⁰ Kooro Ahab na Elaeja dɛ ŋɔ o be ŋɔ, “N dɔm, he na mɛ.” Elaeja ŋɔ, “Gɛɛ, he ta he nyu dɛ ɛ wechɔɡa Korowii siwi ta.

²¹ Waa Korowii aa dɛ bol laanee kɛŋɔ, ‘Mɛɛ kpɔ wenaalee ba ta he nɛ. Mɛɛ kpo he ne bibaa bɛlbwa waa lɔ he deemii le Israel harɛ ta, yoma ne nɛra baa dɛ di ba nyu bwa.

²² Mɛɛ ɛ he demii ɡɛ maa ɛ Nɛbat bibaa Kooro Jɛroboam ne Ahija bibaa Kooro Baasa dem la. He ɡelɔ n baah di dɛ ɡel Israel tena ɛ wechɔɡa dɛ jo n nɛ.’

²³ Korowii ŋɔ Jɛsɛbɛl ɡe waa ŋɔ, ‘Nyootenaa dɛ́ di o ola bwɛjen Jesreel.’

²⁴ He lole bɛlbwa waa sewɛ bwɛjen la ta la, nyootenaa dɛ́ di o ol. Bɛlbwa ɡe waa ka sewɛ kpɔɡ bini la, jumbii di o ol.”

²⁵ Nomɛlbwa toole o siwi swɛɛ wechɔɡa ɛɛ Korowii siwi ta kɛŋɔ Kooro Ahab waa teŋɛ o haah Jɛsɛbɛl nyoa wobol ta la.

²⁶ O ɛ kii wa, teŋa waa teŋɛ voɡa ta kɛŋɔ Amɔre tena Korowii aa doŋ ba le ba harɛ ta dɛ kpɔ tɛ he Israel tena ɡɛ saŋ waa lawɛ heyaa le Ijipt harɛ ta la.

²⁷ Kooro Ahab aa no waa Korowii keame Elaeja aa bola la, o laa o ɡbaɡba laala waa doa la kɛɛ dɛ ka kpɔ lweyal tɔ. O vɔwɛ nyoa dɛ tɔ o lweyal la dɛɛ chɔ, a baɡle kɛŋɔ o dɛ di suna.

²⁸ Ate, Korowii bol waa Elaeja be ŋɔ,

²⁹ “He na ɡɛ Kooro Ahab aa pwɛr o te tɛ mɛ kenɛ? A ɡɛ nomanta, maa ɡɛ wenaale laanee kpɔ ba o nɛɛ o saŋ nɔ ta. Mɛɛ kpɔɔ ba o dem tena nɛɛ o bibaa saŋ ta.”