1 Koranar 20 - mzwDBL

Kooro Bɛn Hadad kaa yo bwɛjen Samaria tena

¹ Siiria Kooro Bɛn Hadad boa o laa tena bwa nyoa, dɛ koranar fifraatoro dɛ banɛ, ne ba jaɡre ne torɔɡore baa vɔwɛ jaɡre pɛla. Ba laŋɔ ka chɔ bar Samaria tena ba ne ba yo.

² Dɛ Kooro Bɛn Hadad tomɛ toroma Israel Kooro Ahab be o bwɛjen Samaria ta ŋɔ,

³ “He suuɡapoŋa ne suuɡaswɛm ne he haahna baa wera, ne he bii ba bwara aa kpeɡa bwa ɛ n kwa.”

⁴ Anee Kooro Ahab ŋɔ, “Hé ka ŋɔ n dɔɔ Kooro Bɛn Hadad be ŋɔ n sɛoh, onee dɔ n ne n komɛlbwa.”

⁵ Kooro Ahab toroma la berɔ ba dɛ ba ŋɔ waa Kooro Bɛn Hadad aa dɛ bol laanee kɛŋɔ, “N tomɛ toroma he be ŋɔ he kpɔ he suuɡapoŋa ne suuɡaswɛm ne he haahna ne bii bwa tɛ mɛ.

⁶ Kere saŋ nɔ, mɛɛ tomɛ n nomonomee bá ba nyiŋi he koodem ne he nomonome deremi, dɛ́ pa kwaa a yoɡ aa kpeɡa bɛlbwa baa naa.”

⁷ Belaa Kooro Ahab yerɛ Israel harɛ ta nomonome bwa cheme dɛ ŋɔ, “Hé na ɡɛ Kooro Bɛn Hadad aa dɛ nyin ya ne waa ɡɛ. O tomɛ toroma n be dɛɛ lɛ n haahna ne n bii ne suuɡapoŋa ne suuɡaswɛm, asɛ n sɛh.”

⁸ Asɛ nomonome la ŋɔ, “Bɛ no, a ba ɛ kɛŋɔ hɛɛ sɛh a taa tɛo.”

⁹ Anee Kooro Ahab ŋɔ Kooro Bɛn Hadad toroma la be ŋɔ, “Hé ka ŋɔ n dɔɔ kooro be ŋɔ anɔ la o fa aa bola la n sɛoh, kɛ taraken kwaa nɔ te, maa sɛh.” Toroma la berɛ kaa dɛ ka bol Kooro Bɛn Hadad be.

¹⁰ Belaa Kooro Bɛn Hadad berɛ tomɛ nɛra Kooro Ahab be dɛ ŋɔ, “Dɛ n ta ɡelɛ ba chɔɡ Samaria kwaraa naa, voɡare la tɛr n deŋne kohona.”

¹¹ Kooro Ahab ŋɔ, “Hé ka ŋɔ o be ŋɔ laa te tenten bɛlbwa aa won maŋkura o te, nemenɛ laa la aa tona mɔɔ.”

¹² Kooro Bɛn Hadad aa no ɡɛ waa la, dɛ o ne o koranar soɡe ba tɛnte deene lɔɡre dɛ nyɔ sen dɛɛ lɛ ba sie. Asɛ o ŋɔ o laa tena la be ŋɔ, “Hé kpɔ he te dɛ́ ka yo.” Anomanta, ba iro kpɔ ba te dɛ ka yo bwɛjen Samaria.

Kooro Ahab pɔ Kooro Bɛn Hadad nɛ

¹³ Anɔ bwa la, dɛ Korowii keame bɛl ba Israel Kooro Ahab be dɛ ba ŋɔ o be ŋɔ, “Korowii ŋɔ kɛ he na laa tena baa wara nɔ kenɛ? Mɛɛ kpɔ baa do he nɔn taa fini, ásɛ he jemɛ kɛŋɔ menee Korowii.”

¹⁴ Anee Kooro Ahab ŋɔ, “Umee dɛ́ tɔ n sie ń ka yoo baɔ?” Korowii keame la ŋɔ, “Waa Korowii aa dɛ bol laanee kɛŋɔ laa tena bechale baa lɔ laa sitɔɔla lɔɡa harɛ nɔ ta nɛɛ aa ba cheɡa.” Anee Kooro Ahab berɛ ŋɔ, “Umee dɛ́ pa yoi la mun ɔ?” Korowii keame la ŋɔ, “Henee dɛ́ pa laa la mun.”

¹⁵ Anomanta, Kooro Ahab yerɛ laa tena bechale baa lɔ laa sitɔɔla lɔɡa harɛ la ta, dɛ ba lɔ nɛra lafraanɛ fifraatoro dɛ banɛ. O berɔ boa Israel harɛ laa tena kabora nyoa, dɛ ba ɡe bwa lɔ nɛra kaɡboŋa banuanɛ.

¹⁶ Laa tena la leɔ webaŋa, ɡɛ saŋ wee aa cheɡɛ nyufala. Dɛ Kooro Bɛn Hadad ne o koranar fifraatoro dɛ banɛ baa ja o nɛɛ soɡe ba tɛnte deene bini dɛ nyɔ sen dɛɛ dɛɛ.

¹⁷ Israel laa tena bechale baa lɔ laa sitɔɔla lɔɡa harɛ la ta laanee tɔ sie le. Dɛ Kooro Bɛn Hadad ɡe tomɛ nɛra ba tɔ sie ka nyiŋi, asɛ ba ba ŋɔ o be ŋɔ, “Laa tena bane le Samaria dɛɛ ba.”

¹⁸ Anee Kooro Bɛn Hadad chaŋe ŋɔ, “Dɛ hɛɛra nee baa ba naa, he bɛ ban kpoo, dɛ yoi ɡe nee baa ba naa, he bɛ ban kpoo dɛ́ laɡ ba ba.”

¹⁹ Belaa Israel laa tena bechale la tɔ sie le bwɛɛ la bini, asɛ ba kabora la ɡe teŋɛ,

²⁰ bɛlbwa kpo o dɔŋ o ne waa dɛ yo, anomanta, Siiria tena la chwao, asɛ Israel tena la kpɔ teŋɛ sibeɡra ne. Kooro Bɛn Hadad kpɔ jaaɡɔ waa soɡe o ta chwa kaa, nɛra baa soɡe jaɡre ta bane ja o nɛɛ chwa.

²¹ Israel Kooro Ahab teŋɔ dɛ ka lawɛ Siiria tena baa soɡe jaɡre ta ne torɔɡore baa vɔwa pɛl jaɡre dɛ kpoo ba kohona.

²² A habɔɔ la, Korowii keame la berɔ ba Israel kooro be dɛ ba ŋɔ, “Berɛ la ka nyin laa tena la bane ja, dɛ na ɡɛ haa ɛ dɛkalkɛ benanyoa chemaa, Siiria tena ɛɛ ba yoi ja.”

Ba baa yo Siiria tena nɛɛtena ja

²³ A habɔɔ la, Siiria Kooro nomonome baa jao ŋɔ, “Israel tena voɡare lɔ deŋɡarere ta, a waa ba won pɔ ya nɛɛ la. Kɛ dɛ ya ne ba yo harɛpɛɛ ta naa, ya bokpeɡa ɛɛ ɡwaa ba nɛɛ.

²⁴ Ir koranar fifraatoro dɛ banɛ la bwa, dɛ kpɔ laa sitɔɔla chiɡ ba buɡ ta.

²⁵ Berɛ nyin laa tena haa paŋa la dɔŋa, dɛ jaɡre ne torɔɡore baa vɔwa pɛl jaɡre la dɔŋa. Ya ne ba cheme harɛpɛɛ ta naa, ya bokpeɡa ɛɛ ɡwaa ba nɛɛ, yá pɔ ba nɛ.” Asɛ kooro sɛh ba be dɛ ɛ ɡɛ.

²⁶ Benanyoa aa chema lɔmɔɡa saŋ la, Kooro Bɛn Hadad kpɔ o laa tena la bwɛjen Afɛk, dɛ́ ka yo Israel tena.

²⁷ Kooro Ahab boa Israel laa tena nyoa, dɛ tɛɛ ba komɛlbwa baa hiah laa la ta, asɛ ba le dɛ ka pu Siiria tena la. Israel tena laa tena la kaa so ba sie chaɡɛ Siiria tena. Dɛ Israel tena bɔne ba bini kuore anɛ, dɛ do kɛŋɔ boohna tamaa ane ken, asɛ Siiria laa tena la te warɛ dɛ tɔ harɛ bwa.

²⁸ Belaa Korowii keame la la Israel Kooro Ahab be dɛ ŋɔ Korowii ŋɔ, “Siiria tena dɛ lii kɛŋɔ men Korowii lɔ deŋɡarere ta, n toole harɛre aa chɔa kaa ta nomanta, mɛɛ kpɔ laa tena damanta nɔɔ do he nɔn taa, ásɛ he jemɛ kɛŋɔ menee Korowii.”

²⁹ Laa tena la bwa kaa so ba tɛnte deene bini, ba sie chaɡɛ dɔŋa tɔpera anuanɛ. Tɔpenuanɛ wee la, ba kpɔ yoi lɔ dɔŋa, Israel tena la kpoo Siiria laa tena baa valɛ naa ta la nɛra kaɡboŋa lafa tɔpebeŋkpoŋ.

³⁰ Siiria tena baa kaa la chwao kaa bwɛjen Afɛk ta, asɛ danjwɛɛ baa maa bar bwɛɛ la chole, nɛra kaɡboŋa fifraanɛ dɛ banuanɛ nɛɛ dɛ kpoo ba. Kooro Bɛn Hadad chwao jo bwɛjen la bini dɛ ka sɔh dejeɡa bɛl bini dem bela.

³¹ Kooro Bɛn Hadad nomonome la o be dɛ ka ŋɔ, “Ya noɔ kɛŋɔ Israel koranar dɛ na nɛra sum. Gel ya kpɔ lweyale mile chara, dɛ kpɔ ɡboɡbie vɔwɛ nyuune, dɛ la kooro la be, o ken ɛɛ lɛɛ, dɛ bɛ hen kpo.”

³² Ate, ba kpɔ lweyale mile chara dɛ kpɔ ɡboɡbie vɔrɔwe nyuune, dɛ la Israel Kooro Ahab be dɛ ka ŋɔ, “He bonɔɔ Kooro Bɛn Hadad dɛ soŋe ŋɔ he ɡel ó dɔ o nyu.” Anee Israel Kooro Ahab chaŋe ŋɔ, “N lolee, o ta lole naa?”

³³ Ate, bonɔɔna la na kɛŋɔ a ɛ wedɛɛɡa, asɛ dɛ sɛh Israel Kooro waa la ta warane dɛ ŋɔ, “Ɔɔh, he lole Bɛn Hadadee.” Anee Kooro Ahab ŋɔ, “Hé ka kpɔɔ ba!” Kooro Bɛn Hadad aa lea dɛ ba o be la, o ɡelɔ o jo torɔɡo baa vɔwa pɛl jaaɡɔ bini.

³⁴ Kooro Bɛn Hadad ŋɔ Kooro Ahab be ŋɔ, “Mɛɛ berɛ bwɛjena n mɛɛ aa lɛa le he mɛɛ be laanee tɛɛ, ásɛ he ɛ he ɡbaɡba bonadibɔra Damaskɔs, ɡɛ n mɛɛ aa ɛa Samaria la.” Asɛ Kooro Ahab ŋɔ, “Dɛ he ɡelɔ ya fɔwɛ ɡɛ fɔo aa, mɛɛ kpɔe ta he kaa.” Anomanta, o ne o fɔwɛ fɔo asɛ o tao ŋwɛnɛ o kaa.

Korowii keame bɛl pwah Kooro Ahab

³⁵ Ate, Korowii do o keamere baa pɛa dɛɛ valɛ la bɛl ŋɔ, ó ŋɔ o dɔŋ be ŋɔ, “Kpɔ he tokobii ŋwɛn mɛ.” Asɛ o vɛh.

³⁶ Anee keame la ŋɔ o dɔŋ la be ŋɔ, “Haa vɛh Korowii waa nomanta, haa den le n be bonɔ dɛɛ kaa la, nyujente ɛɛ kpoe.” Waa dena le bela la, nyujente lawɔ dɛ kpoo.

³⁷ Korowii keame la berɛ na o keame dɔŋ bɛl ɡe dɛ ŋɔ, “Lɔ mɛ!” Asɛ o lɔɔ kohona dɛ doo bol.

³⁸ Keame la kpɔ kon vɔwɛ sie dɛ kpɔ o te sɔh, dɛ ka che ŋwɛnɛ ta dɛɛ kpa Israel Kooro Ahab.

³⁹ Kooro aa ba dɛ kaa la, Korowii keame la yerɔ dɛ ŋɔ, “N naa kooro, he bonɔɔ lɔ laa ta asɛ laa tena la bɛl lawɛ dɔma la bɛl ba tɛ mɛ dɛ ŋɔ, ‘Nyiŋi baa nɔ nɛɛ tɛ mɛ o bɛ chwa, dɛ o chwao waa hɛɛ kpɔ he nyuu charɛ, kɛɛ he bɔ suuɡapoŋa kilore fifraatoro dɛ anaarɛ.

⁴⁰ Kɛ n sie berɔ do waane ta mɛɛ ɛ asɛ baa la dɔ bɔr chwa.’ ” Anee Kooro Ahab chaŋe ŋɔ, “He ɡbaɡbaa baɡle ɡɛ aa chɛ kɛ ba tɛr he deŋne.”

⁴¹ Korowii keame la pur yal waa kpɔa vɔwɛ o siebɔr la, buɡ la ta, Kooro na kɛŋɔ Korowii keamere la bini bɛlee.

⁴² Belaa Korowii keame la ŋɔ o be ŋɔ, “Waa Korowii aa dɛ bol laanee kɛŋɔ, ‘Haa ɡela baa maa kpɔɔ do he nɔn ta ŋɔ o chɛ kpoe, asɛ he ɡel o dɔ bɔr chwa dɛ dɔ o nyu nomanta, hɛɛ kpɔ he nyuu charɛ o kon, ásɛ he laa tena ɡe kpɔ ba nyuune charɛ o laa tena nyuune.’ ”

⁴³ Ate, Kooro Ahab kpɔ sum ne bandia kaa o koodem Samaria.