1 Koranar 19 - mzwDBL

Elaeja aa lɔ Sinai Bwejen doa

¹ Kooro Ahab bol o haah Jɛsɛbɛl be ɡɛ Elaeja aa ɛa bwa, ne ɡɛ waa kpɔ tokobii kpo Baal voɡ tena la.

² Anee o haah la tomɛ torome Elaeja be ŋɔ, “N ŋwɛɛrɔ kɛŋɔ kere saŋ nɔ dɛ n ta hen kpoe kɛŋɔ haa kpoo voɡ tena la aa, voɡare la kpo mɛ.”

³ Elaeja ɔmɔ, dɛ kpɔ o bonɔɔ chwa kaa Beɛseeba waa lɔ Juda harɛ ta, ásɛ dɛ dɔ o nyu. O baa ɡel o bonɔɔ la bela,

⁴ dɛ valɛ tɔpebir kaa pua hɛŋle ɡbo harɛ ta. O kaa so chunchule ta daa bɛl mun, dɛ soŋe seo tɛ o te kɛŋɔ o fee sewɛ. O soŋe Korowii ŋɔ, “N Naa Korowii, name te a maɡre ɡɛ, ɡel ń sewɛ. N ta n naawa baa serewa la ɡwaalɛ.”

⁵ O chɔ daa la mun chɔ dom. Buɡ la ta, nyundua torome den ba leɡo dɛ ŋɔ o be ŋɔ, “Ir dɛ di kwa.”

⁶ Elaeja iro nyiŋi dɛ na paanoo ne loŋ bɛl ne nee o nyu bɔr, dɛ kpɔ di dɛ nyɔ nee la, dɛ berɛ kwaa chɔ ja.

⁷ Korowii nyundua torome la berɔ ba chumu nɛɛtena dɛ ŋɔ, “Ir dɛ di kwa, ŋwɛnɛ haa valɛ la jaŋne taeh.”

⁸ Asɛ o ir di kwaa la, dɛ nyɔ ne. Kondikwaa la chao dɛ tɛo bokpeɡa o won valɛ tɔpera fifraanaarɛ chɔɔ ne jwaana, dɛ kaa Korowii Sinai Bwejen waa do ɡoroŋ la bɔr.

⁹ Waa tel bela la, o kaa jo bwebɔɔ bini chɔ jwaana. Belaa Korowii bol waa Elaeja be ŋɔ, “Elaeja, bɔkwaa hɛɛ ɛ bonɔ nɔ?”

Korowii ba Elaeja be

¹⁰ O chaŋe ŋɔ, “Korowii Haa Ɛ Koranar Bwa Kooro, he ɡboo mɛɛ tomɛ saŋ bɛlbwa, kɛ Israel tena chɔɡ he ne ba fɔo la, dɛ paɡre kwaa baa ɛ saraha a ta dɛɛ tɛɛ la, dɛ berɛ kpoo he keamere bwa tokobie ne. N ɡboo kaa baa nyin n ɡe dɛ́ kpo.”

¹¹ Asɛ Korowii ŋɔ, “Le ka che bwe la doa n sie. Asɛ men Korowii teŋe ba kaa.” Asɛ peu o nyoa aa kpeɡa tɔ o sie, dɛ paɡre deŋɡarere, dɛ peɡri bweɡuŋe. Kɛ dɛ Korowii toole peu la bini. Peu la aa taa tonɛ la, harɛ jiɡro, kɛ dɛ Korowii toole harɛ waa jiɡra la ta.

¹² Harɛ jiɡra la ɡe habɔɔ la, nii balɔ. Kɛ dɛ Korowii toole nii la ta. Nii la ɡe habɔɔ, taa bɛl leɔ bɔeeh ken.

¹³ Elaeja aa no taa la la, o kpɔ batakaare tɔ sie dɛ le bwebɔɔ la bini ba che o nyoa. Asɛ taa bɛl le dɛ pɛɛro ŋɔ, “Elaeja, bɔkwaa hɛɛ ɛ bonɔ nɔ?”

¹⁴ Anee o chaŋe ŋɔ, “Korowii waa ɛ Koranar Bwa Kooro, he ɡboo mɛɛ tomɛ saŋ bɛlbwa, kɛ Israel tena chɔɡ he ne ba fɔo la, dɛ paɡre kwaa baa ɛ saraha a ta dɛɛ tɛɛ la, dɛ berɛ kpoo he keamere bwa tokobie ne. N ɡboo kaa, baa nyin n ɡe dɛ́ kpo.”

¹⁵ Anee Korowii ŋɔ, “Berɛ kpɔ ŋwɛnɛ haa kpɔ o ta ba la, dɛ́ kaa Damaskɔs pua hɛŋle ɡbo harɛ la ta. He tel bela aa, kpɔ noo fuɡe do Hasael nyu ta, dɛ́ cheɡo Siiria harɛ ta kooro.

¹⁶ Berɛ la Israel harɛ ta, dɛ́ kpɔ ane fuɡe do Nimsi bibaa Jehu ɡe nyu ta, dɛ́ cheɡo Israel harɛ ta kooro, ásɛ dɛ fuɡe ane do Safat bibaa Elaesa waa le Ebel Mehola la ɡe nyu ta, ásɛ o ɛ keame chiɡ he naa ta.

¹⁷ Nomɛlbwa waa chwa le Hasael kpoe nyoa la, Jehuu dɛ́ kpoo. Elaesa ɡee dɛ́ kpo banɔ la Jehu aa wola ban dɔ kpo la.

¹⁸ Nɛra kaɡboŋa banuanɛ lɔ Israel harɛ ta baa wola voɡ Baal ɡuŋe bwa, mɛɛ ɡel baa, maa ba tenee kpoo.”

Elaesa yera wa

¹⁹ Ate, Elaeja le bela dɛɛ kaa, waa dɛ kaa la, o kaa na Safat bibaa Elaesa ne nɛra baa kpɔ daa dawɛ nae nɛɛ aa parɛ. Dɛ a lɔ bele fi dɛ anɛ, asɛ o teŋɛ fi dɛ anɛ te la nɛ. Asɛ Elaeja la Elaesa be dɛ ka foo o batakaare ta o nɛ.

²⁰ Elaesa ɡel nae la dɛ chwa teŋɛ Elaeja nɛɛ dɛ ŋɔ, “Gel ń ka kal n nya ne n mɛɛ dɛ́ ba n ne he kaa.” Anee Elaeja ŋɔ, “Hɛɛ won berɛ kaa, kɛ lii anɔ la bwa maa ɛa tɛɛ.”

²¹ Asɛ Elaesa laa berɛ dɛ kpoo nae waa teŋɛ a nɛɛ la, dɛ fuh daa waa kpɔa dawɛ nae anɛ nɛɛ aa parɛ la, dɛ daa ola la tɛ nɛra la ba chwe. Asɛ o ka teŋɛ Elaeja nɛɛ dɛɛ chao.