1 Koranar 18 - mzwDBL

Elaeja ne Obadia wa

¹ Hwel la aa cheɡa bene atoro la, Korowii bol Elaeja be ŋɔ, “Kpɔ he te ka baɡle Kooro Ahab, ásɛ n ɡel bwaala nɛ harɛ la ta.”

² Anomanta, Elaeja kpɔ o te ka baɡle Kooro Ahab. Dɛ lɔr waa chole bwɛjen Samaria kan taeh.

³ Anee Kooro Ahab yerɛ baa bɛl waa dɛ nyiŋi o koodem ta baa yerɔ Obadia. Dɛ Obadia dɛ yarada Korowii dɛɛ tomɔ kɛrɛdɛ.

⁴ Dɛ Kooro Ahab haah Jɛsɛbɛl ɡelɔ ba kpoo Korowii keamere. Asɛ Obadia kpɔ Korowii keamere lafa ka sɔh bwebɔɔne anɛ bini, dɛɛ tɛɛ ba nee ne kondikwa. O bɔne ba bini, fifraanunue ba do bɔɔ beŋkpoŋ bɛlbwa bini.

⁵ Kooro Ahab ŋɔ Obadia be ŋɔ, “Yá ka ɡaaɡe harɛ nɔ bwa ta, neerare nyuune ne fɛlembɔɔne bwa ta, ya ken ɛɛ dɔ kpɔɡaa ba tɛ ya jaɡre ne keeɡore nɔ, ásɛ ya bɛ an kpoo.”

⁶ Ba pere ba bini, Kooro Ahab chaɡɛ harɛ la baŋ bɛl, Obadia ɡe chaɡɛ baŋ bɛl.

⁷ Obadia aa dɛ kaa la, o kaa cheme Elaeja dɛ jemɔ, asɛ o ɡuŋu dɛ ŋɔ, “N dɔɔ Elaeja, henee nɔ naa?”

⁸ Anee Elaeja chaŋo ŋɔ, “Menee, la ka ŋɔ he dɔɔ kooro la be ŋɔ n lɔ bonɔ.”

⁹ Obadia ŋɔ, “Wechɔɡa besoo n ɛ asɛ he le men maa ɛ he bonɔɔ dɛɛ tɛ Kooro Ahab ó kpo mɛ nɔɔ?

¹⁰ N ŋwɛɛ Korowii haa dɛ tomɔ o do le nɔ kɛŋɔ, kooro ɡelɔ ba ka ɡaaɡe he bɔr harɛre bwa ta. Bobɛlbwa toole baa wola he bɔr ɡaaɡɛ. Bobɛlbwa nomoa ŋɔ o ta hen nae o harɛ ta naa, Kooro Ahab yon ɡel o ŋwɛɛ ntam kɛŋɔ o ta hen nae.

¹¹ Taraken he dɛ nyin ń la ka ŋɔ o be ŋɔ he lɔ bonɔ kɛɛ?

¹² Dɛ n kaalɔ Korowii Doma la kpɔe kaa bobɛl, asɛ n ka ŋɔ o be o ta hen ba nae yaa, wɛɛ kpo mɛɛ. Men maa ɛ he bonɔɔ nɔ, n bechale saŋ bwaa n yarada Korowii dɛɛ tomɔ.

¹³ N dɔɔ, he ta noɛ ɡɛ maa ɛa ɡɛ saŋ Jɛsɛbɛl aa dɛ kpoo Korowii keamere la kɛɛ? N sɔh keamere lafa bwebɔɔne anɛ bini. N pere ba bini fifraanunue bɔɔ beŋkpoŋ bɛlbwa bini, dɛɛ tɛɛ ba nee ne kondikwa.

¹⁴ Haa ŋɔa n la ka ŋɔ kooro be ŋɔ he lɔ bonɔ nɔ, waa men kpo aa?”

¹⁵ Belaa Elaeja ŋɔ, “N ŋwɛɛ Nemenɛ Korowii waa lole saŋ bɛlbwa mɛɛ tomɔ nɔ kɛŋɔ, fini mɛɛ kpɔ n tenee ka baɡle Kooro Ahab.”

¹⁶ Ate, Obadia la dɛ ka ŋɔ Kooro Ahab be, asɛ o ba dɛ ba na Elaeja.

¹⁷ Kooro Ahab aa baa na Elaeja la, Kooro ŋɔ, “Nɛn haa ba waa ne ba ta Israel harɛ ta laanee nɔ naa!”

¹⁸ Elaeja ŋɔ, “N laa ba waa ne Israel harɛ nɔ ta, he ne he mɛɛ dem nɛraa. Heyaa vɛh Korowii waa ta teŋa dɛ kaa teŋɛ voɡa Baalre nɛ.

¹⁹ Yerɛ Israel tena, ba bwa ba chem mɛ Kaamɛl Bwejen doa. Yerɛ Baal waa ɛ voɡbaa tena lafraanaarɛ fifraanue, ne voɡhaah Asera tena lafraanaarɛ, ba ne haŋkooro Jɛsɛbɛl pɛ nɔn dɛɛ di kwa o dem la.”

²⁰ Ate, Kooro Ahab tomɛ nɛra ba valɛ Israel harɛ ta bwa, ba yerɛ Israel tena ne Baal voɡ tena la bwa ba cheme Kaamɛl Bwejen doa.

²¹ Belaa Elaeja ka che Israel tena la bwa sie dɛ ŋɔ, “Saŋ besoo hɛɛ nyin he kpɔ nyiŋi webele anɛ nɔ bini nɔ? Dɛ Korowii ɡwaa Baal aa, hé tomɛ Korowii, dɛ Baal ɡe ɡwaa Korowii aa, hé tomɛ Baal.” Kɛ nɛra la ta wobɛlbwa bolɛ.

²² Elaeja ŋɔ, “N ɡboo Korowii keame waa kaa, kɛ voɡ Baal te dɔ voɡ tena lafraanaarɛ fifraanue.

²³ Hé tɛ yaa nabala anɛ, ásɛ Baal voɡ tena la kpo bɛl dɛ chɛwɔ dawɛ daa ta, dɛ bɛ nii a ta do. N ɡe ɛ onɔ la waa kaa la ɡɛ, maa niinii do.

²⁴ Ásɛ Baal voɡ tena la soŋe ba voɡ, ásɛ n ɡe soŋe Korowii maa dɛ tomɔ. Bɛl la o kon aa do nii o kwaa ta la, onee chɛ kɛŋɔ yaa tomɔ.” Ate, nɛra la bwa sɛh, dɛ ŋɔ, “Gɛ wer.”

²⁵ Elaeja yerɛ Baal voɡ tena la dɛ ŋɔ, “Haa wara nɔ, hé tɔ sie kpɔ nabal nɔ bɛl dɛ kwaaro, he bɛ nii o ta do, dɛ́ soŋe voɡ Baal.”

²⁶ Ate, ba lawɛ nao baa kpɔa tɛɛ ba la, dɛ ɛo dɛ soŋe voɡ Baal ɡwɛeh le chɔɔbɔr ka tel webaŋa wee aa baa tel nyufala. Dɛɛ ŋɔ, “N naa Baal, no yaa ɔ.” Ba sao bar kon baa dɛ ɛ saraha o ta la, ba ta wobɛlbwa nae, ba ta wobɛlbwa ɡe noɛ.

²⁷ Wee aa baa tel nyufala la, Elaeja mam ba, dɛ di ba loro ŋɔ, “Hɛ́ɛ yerɔ kohona, o ɛ voɡ kɛrɛdɛ, o ken ta dɛ lii, kɛɛ o ken kaa bobɛl. O ka lɔ ŋwɛnɛ ta. O ken ka chɔ dom, a chɛ kɛ he ka chumu.”

²⁸ Baal voɡ tena la soŋo kohona takpeɡ ne, dɛ kpɔ tokobie ne keri dɛɛ mɔne ba bwara. Dɛ ba nawee waa baa ɛa dɛɛ tomɛ ba voɡa laanee ɡɛ, asɛ chal ɛɛ pal ba.

²⁹ Ba teŋɔ soŋe ka tel kɛŋɔ webaŋa aa baa ɡarɛ, kɛ o ta ban chaŋɛ, ba ta wobɛlbwa ɡe noɛ.

³⁰ Ate, Elaeja ŋɔ nɛra la be ŋɔ, “Hé bɛn mɛ.” Asɛ ba baro cheme. O pa mun dɛɛ kwaa kon baa ɛ saraha o ta dɛɛ tɛ Korowii, ba fa aa laa chɔɡ la.

³¹ Elaeja pa bwea fi dɛ anɛ, bɛlbwa che tɛ Jekɔb bii fi dɛ banɛ baa cheɡa tɛ Israel deene la. Dɛ Korowiirii pa Jekɔb sɔn Israel.

³² O kpɔ bwea la dɛ berɛ ɛ saraha kon la Korowii sɔn ta, dɛ ɡel ba kwi bɔɔ waa won nee ɡalɔŋre atoro lɛɛ baro.

³³ O pa daa dawɛ saraha kon la ta, dɛ kpo nabal la dɛ chɛwɔ dawɛ daa la ta. Dɛ ŋɔ nɛra la be ŋɔ, “Hé dɔ nee do polviine anaarɛ bini á su, ásɛ dɛ ɛ nee la ta ola la ne daa la ta.”

³⁴ O ŋɔ ba be ŋɔ, “Hé berɛ do nee ja.” Asɛ ba ɛ ɡɛ. O berɛ ŋɔ, “Hé berɛ ɛ ɡɛ toorotena ja.” Asɛ ba ɛ ɡɛ.

³⁵ Nee la palɔ jo bɔɔ waa ɡela ba kwi bar saraha kon la o su.

³⁶ Saŋ aa tela Elaeja ɛ saraha la, o kaa che saraha kon la jwɛh dɛ soŋe Korowii ŋɔ, “N Naa Korowii Abraham ne Aesek ne Jekɔb baa ɛ ya naawa aa tomɛ, fini ɡel ba jemɛ kɛŋɔ henee Korowii Israel tena aa dɛ tomɛ la. Dɛ́ berɛ ɡel ba jemɛ kɛŋɔ he bonɔɔnee men, hen do mɛ ŋɔ ń ɛ waa nɔ bwa.

³⁷ N Naa Korowii, chaŋ mɛ ásɛ nɛra nɔ jemɛ kɛŋɔ henee Korowii, he laɡ ba dɛɛ ba he be.”

³⁸ Ate, Korowii ɡel nii ba le saraha kwaa la ta, dɛ fuh a ne daa la ne bwea dɛ harɛ la bwa, nee aa lɔ bɔɔ la bini ɡe hweeh.

³⁹ Nɛra la aa na ɡɛ la, ba cholo dɛ kpɔ sie piiɡi harɛ, dɛɛ dooɡe lɔŋɔre ŋɔ, “Korowiirii ya Dɔɔ! O ɡbosoroo chɛ toma!”

⁴⁰ Elaeja do nɛra la ŋɔ, “Hé lawɛ Baal voɡ tena la, he bɛ ɡel bɛlbwa dɔ bɔr chwa!” Ba lawɛ ba bwa asɛ Elaeja ɡel ba kpɔ ba kaa Kesɔn Fɛlembɔjen bini ka kpoo ba.

⁴¹ Elaeja ŋɔ Kooro Ahab be ŋɔ, “Kaa dɛ́ ka di kwa name, n no bwaala jiɡra kohona.”

⁴² Kooro Ahab aa kaa kwaa dii la, Elaeja berɔ teeh kaa Kaamɛl Bwejen doa dɛ ka boŋɛ dɛ kpɔ o nyu do o naa baah.

⁴³ Elaeja ŋɔ o bonɔɔ be ŋɔ, “La ka che dɛ́ nyiŋi mpo ta.” Ate, o bonɔɔ la la dɛ berɛ ba o be dɛ́ ba ŋɔ, “N ta komɛlbwa nae.” Kera anuanɛ bwaa o ŋɔ bonɔɔ la be ŋɔ ó la mpo ta ka nyiŋi.

⁴⁴ Kera anuanɛ ta la, bonɔɔ la baa ŋɔ, “N na bam jeɡaa bɛl kɛŋɔ nɛn nɔn wɛɛ le mpo ta.” Anee Elaeja ŋɔ, “La ka ŋɔ Kooro Ahab be ŋɔ, ‘Ɛ warane kpɔ he torɔɡo ha vɔwa pɛl jaaɡɔ la dɛ kaa dem, ásɛ bwaala bɛ hen ba kpo.’ ”

⁴⁵ A ta biɡre nyundua den kɔl, bwaala nɛ kohona dɛɛ ta peu, asɛ Kooro Ahab jo o torɔɡo waa vɔwa pɛl jaaɡɔ la bini dɛ kaa bwɛjen Jesreel.

⁴⁶ Korowii tɛ Elaeja kpeɡri bɛl o kwaa o yal vɔwɛ chara kɛrɛdɛ, dɛ won takapɔ chwa tɔ Kooro Ahab jaaɡɔ la sie dɛ kaa Jesreel.