1 Koranar 17 - mzwDBL

Elaeja ne hwel wa

¹ Korowii keame bɛl fa lole baa yerɔ Elaeja, o ɛ Tisbe te dɛ le Gelead harɛ ta. Awola bɛl, o la Kooro Ahab be dɛ ka ŋɔ, “N cheɡɛ Korowii waa lole saŋ bɛlbwa Israel tena ɛɛ tomɔ sɔn ta dɛɛ ŋɔ he be ŋɔ mɛn aa ta, bwaala ɡe aa nɛɛ ba bene aa lɔ sie dɛɛ ba nɔ ta, nemenɛ a le n nyoa mɔɔ.”

² Anee Korowii ŋɔ Elaeja be ŋɔ,

³ “Ir le bonɔ kaa Kerit Fɛlembɔjen waa lɔ Jɔɔdan Moo wee leebɔr ka sɔh.

⁴ Hɛɛ dɔ nee dɛɛ nyɔ. N do ɡaahɡaahre ŋɔ á baa tɛɛ kondikwa.”

⁵ Asɛ Elaeja ɛ waa Korowii aa doo a ta la, dɛ ka so bɛne Kerit Fɛlembɔjen waa lɔ Jɔɔdan Moo wee leebɔr bela.

⁶ Gaahɡaahre kpɔ paanoo ne ola kaa tɛo chɔɔ ne jwaana. Dɛ o dɔ nee ɡe dɛɛ nyɔ fɛlembɔjen la bini.

⁷ Aa dɛ biɡri bwaala aa wola nɛ la, nee la hweehrɔ.

Elaeja ne Sarefat luhaah bɛl wa

⁸ Korowii ŋɔ Elaeja be ŋɔ,

⁹ “Ir kaa Sarefat, o bɛne bwɛjen Sidon dɛ́ ka so bela. Luhaah bɛl lɔ bela, n doo ŋɔ wɛɛ tɛɛ kondikwa.”

¹⁰ Asɛ o ir kaa Sarefat. Waa dɛ tel bwɛɛ la doonyoa la, dɛ luhaah bɛl lɔ bela dɛɛ nyin damara. Anee Elaeja ŋɔ o be ŋɔ, “N dɛ soŋe, ka ɛ nee tama ba tɛ mɛ ń nyɔ.”

¹¹ Haah la aa dɛ kaa ka ɛ nee la, Elaeja berɛ ŋɔ, “Mɔn paanoo tama ja ba tɛ mɛ.”

¹² Anee haah la ŋɔ, “N ŋwɛɛ Korowii haa dɛ tomɔ o do le saŋ bɛlbwa kɛŋɔ n ta paanoo dɔe, men tama ne noo tama anee ka vii bini, n ba dɛɛ ba ba nyin daa dɛ́ ka ɛ n ne n bie di. A habɔɔ dɛ́ so lɔr sewɛ.”

¹³ Anee Elaeja ŋɔ, “Bɛ ɡel a we he nɛ, he te kaa dɛ́ ka ɛ he kondikwaa la. Kɛ tɔ sie ɛ ane ba tɛ mɛ mɔɔ, dɛ́ ɛ he ne he bie la kwa.

¹⁴ Korowii Israel tena aa dɛ tomɔ la ŋɔ, ‘Men aa lɔ vii la bini la aa tonɛ bwa, ɡɛɛ noo la ɡe aa wola tonɛ, ka tel saŋ maa dɛ ba ɡela bwaala nɛ kondikwaa ba.’ ”

¹⁵ Luhaah la kaa ɛ ɡɛ Elaeja aa bola la, ate ba ne Elaeja dɔ kondikwaa dem bela dɛɛ di tɔpere bɛlbwa.

¹⁶ Gɛ Korowii aa bol Elaeja be la, men la ta vii la bini tonɛ bwa, ɡɛɛ noo la ɡe aa wola tonɛ.

¹⁷ A baa tel saŋ bɛl luhaah la bibaa bwara ɛɛ weo. A baa ɡwaa asɛ o sewɛ.

¹⁸ Anee luhaah la ŋɔ Elaeja be ŋɔ, “Korowii keame, bɔkwa waa he ɛɛ mɛ ken? He balɔ dɛ́ ba lii mɛ n wechɔɡa maa ɛa wa dɛ́ kpo n bie kɛɛ?”

¹⁹ Elaeja ŋɔ, “Kpɔ he bie la ba tɛ mɛ,” dɛ lɛ bie la o be, dɛ kpɔɔ kaa abrɔsane doa dea o ɡbaɡba Elaeja aa soɡa la, dɛ kpɔɔ ka bil mpa ta.

²⁰ Elaeja kpɔ takpeɡ soŋe Korowii ŋɔ, “Korowii maa dɛ tomɛ, bɔkwa sibeɡraa he kpɔ ba ta luhaah maa baa so o be nɔ dɛ ɡel o bie sewɛ ken?”

²¹ Belaa Elaeja ka pi bie la nɛɛ kera atoro, dɛ kpɔ takpeɡ ŋɔ, “Korowii maa dɛ tomɛ, n poori ɡel bie nɔ berɛ dɔ mkpa.”

²² Asɛ Korowii no Elaeja wesoŋa la, bie la ir, dɛ berɛ dɔ mkpa.

²³ Elaeja kpɔ bie la tu ba o nya be, dɛ ŋɔ, “Nyiŋi na, he bie la iro.” Dɛ kpɔɔ tɛo.

²⁴ Luhaah la chaŋe Elaeja ŋɔ, “Anɔ taa n jemɛ kɛŋɔ Korowii keamee hen, Korowii waa aa dɛ le he nyoa la ɛ kpela.”