1 Koranar 16 - mzwDBL

¹ Ate, Korowii bol waa o keame bɛl baa dɛ yerɔ Jehu be, o mɛɛ sɔne Hanani ŋɔ ó bol Kooro Baasa be ŋɔ,

² “He fa toole wobɛlbwa bini, n lawɛ ba ŋɔ he baa nyiŋi n nɛra Israel tena nɛ, kɛ he kpɔ Kooro Jɛroboam ŋwɛnɛre la ta dɛ ɡel n nɛra Israel tena ɛ wechɔɡa dɛ jo n nɛ, dɛ ɛ wechɔɡa dɛɛ muɡli n baah.

³ Gɛ maa ɛ Nɛbat bibaa Kooro Jɛroboam dem la, ɡɛɛ mɛɛ ba hen Kooro Baasa ne he dem tena chɔɡa.

⁴ He nɛnnɔn te bɛlbwa waa sewɛ bwɛjen la bini la, nyootenaa dɛ́ di ba ola, ásɛ jumbii di banɔ la ɡe baa serewe kpɔɡ bini la ola.”

⁵ Waa Kooro Baasa aa di kora a chiɡ, ne anɔ la waa ɛa la, ba chwera do Israel Koranar Waa Tɔne bini.

⁶ Kooro Baasa sewɔ ba huɡo o naawa hoɡa ta Tirsa, asɛ o bibaa Ɛla chiɡ o naa ta, dɛ di kora.

⁷ Anɔ bwa habɔɔ la, dɛ Korowii cheɡɛ o keame bɛl baa dɛ yerɔ Jehu nɛɛ bol wa, Hanani bibaalee on. Keame Jehu baa bol Korowii wa Kooro Baasa ne o dem tena be, wechɔɡa waa ɛa dɛ muɡli on Korowii baah kɛŋɔ Kooro Jɛroboam aa ɛa, ne kpoe waa kpo o ne o dem tena bwa la wa.

Israel Kooro Ɛla

⁸ Kooro Asa aa di kora Juda harɛ ta bene fifraanɛ dɛ anumɛl taa Kooro Baasa bibaa Ɛla di kora Israel harɛ ta. O soɡe Tirsa bene anɛ.

⁹ Kooro Ɛla bonɔɔ bɛl baa dɛ yerɔ Simri, dɛ onee dɛɛ nyiŋi kooro kwaa aa do kɛŋɔ torɔɡore ba vɔwɛ dɛɛ pɛl jaɡre ane ta. O ɛ kooro dɔm. Dɛ Kooro Ɛla lɔ nomoa bɛl baa dɛ yerɔ Arsa dem dɛ nyɔ sen dɛɛ. Dɛ Aasaa dɛɛ nyiŋi koodem waa lɔ bwɛjen Tirsa ta.

¹⁰ Ate, Simri ka jo koodem bela dɛ lɔ Kooro Ɛla kpo, dɛ kpɔ kora la di. Bene fifraanɛ dɛ anuanɛ ta Kooro Asa aa di kora Juda harɛ taa o kpoo.

¹¹ Waa dena ba di kora la, o kpoo Kooro Baasa dem tena bwa. O ta baa bɛlbwa ɡelɛ, hale o lole kɛɛ o dam.

¹² Gɛ Korowii aa cheɡɛ o keame Jehu nɛɛ bol Kooro Baasa waa la, Simri kpo Kooro Baasa ne o dem tena bwa,

¹³ dɛkalkɛ, Kooro Baasa ne o bibaa Ɛla wechɔɡa baa ɛa dɛ jo Korowii nɛɛ laanee ɡela Israel tena ɛ wechɔɡa. Ba ɛ voɡa aa wola tɔnɔ bɛlbwa dɔe, dɛ kpɔ muɡli Korowii Israel tena aa dɛ tomɔ la baah.

¹⁴ Waa Kooro Ɛla aa ɛa o kora dii ta bwa la, ba chwera do Israel Koranar Waa Tɔne bini.

Israel Kooro Simri

¹⁵ Kooro Asa aa di kora Juda harɛ ta bene fifraanɛ dɛ anuanɛ taa Kooro Simri di kora Israel harɛ ta. Tɔpera anuanɛ ɡboo o di kora dɛ so Tirsa. Dɛ Israel laa tena vɔrɔwe laa dɛ ba so bɛne Filisti tena bwɛjen bɛl baa dɛ yerɔ Gebɛtɔn.

¹⁶ Israel laa tena la aa noa kɛŋɔ Kooro Simri ɛ Kooro Ɛla dɔm dɛ kpoo la, ba bwa kpɔ ba laa sitɔɔ baa dɛ yerɔ Omri cheɡ Israel harɛ ta kooro awola tenten, bela baa soɡa la.

¹⁷ Asɛ Kooro Omri ne Israel laa tena baa ja o nɛɛ bwa le Gebɛtɔn dɛ ba lɛ Tirsa dɔɔh.

¹⁸ Kooro Simri aa naa kɛ ba kpɔ bwɛjen la, o kaa jo dekpeɡ waa lɔ koodem bela dɛ kpaa nii do o ta, o ne o dem la bwa fuh kwaraa,

¹⁹ wechɔɡa waa ɛa dɛ jo Korowii nɛɛ kɛŋɔ waa kpɔ Kooro Jɛroboam ŋwɛnɛ la dɔŋ ta dɛ ɛ wechɔɡa, a che a ta Israel tena ɛ wechɔɡa la wa.

²⁰ Kooro Simri bwara waa ne dɔm waa ɛa bwa, ba chwera do Israel Koranar Waa Tɔne bini.

Israel Kooro Omri

²¹ Israel tena bini pero anɛ, bane teŋɛ Ginat bibaa Tibni nɛ, dɛ fe ɛɛ chiɡu kora. Banɔ la baa kaa la ɡe teŋɛ Kooro Omri nɛ.

²² Dɛ banɔ la baa teŋɛ Kooro Omri nɛɛ kpeɡri ɡwaa Tibni nɛra baa teŋɛ o nɛɛ la. Anomanta, Tibni baa sewɛ, asɛ Kooro Omri di o kora.

²³ Kooro Asa aa di kora Juda harɛ ta bene fifraatoro dɛ beŋkpoŋ taa Kooro Omri di kora Israel harɛ ta. O di kora bene fi dɛ anɛ. O soɡe Tirsa bene anumɛl o kara la ta.

²⁴ Kooro Omri yawɛ deŋɡare bɛl, taraken baa dɛ yerɔ Samaria, dɛ le Sɛma be. O yawɔ suuɡapoŋa a tɔɡre aa ɛ kilore fifraanumɛl dɛ anuatoro, asɛ dɛ vɔrɔwe bwɛɛ bela dɛ ma danjwɛɛ baro, dɛ kpɔ Sɛma sɔn pao dɛɛ yerɔ Samaria.

²⁵ Kooro Omri ɛ wechɔɡa dɛ jo Korowii nɛɛ ɡwaa koranar baa tɔ sie la bwa.

²⁶ Ŋwɛnɛ Nɛbat bibaa Kooro Jɛroboam aa kpɔ o ta, ne wechɔɡa waa ɛa dɛ jo Korowii nɛɛ dɛ ɡel Israel tena ɡe ɛ wechɔɡa, ba ɛ voɡa aa wola tɔnɔ bɛlbwa dɔe a di Korowii baa dɛ tomɔ baah la, ɡɛɛ Kooro Omri ɛ Korowii.

²⁷ Waa aa chiɡ Kooro Omri kora dii saŋ ne waa waa ɛa bwa, ba chwera do Israel Koranar Waa Tɔne bini.

²⁸ Kooro Omri sewɔ ba huɡo Samaria, asɛ o bibaa Ahab chiɡ o naa ta, dɛ di kora.

Israel Kooro Ahab

²⁹ Kooro Asa aa di kora Juda harɛ ta bene fifraatoro dɛ anuatoro taa Kooro Omri bibaa Kooro Ahab di kora Israel harɛ ta. O di kora Israel harɛ, dɛ so Samaria bene fifraanɛ dɛ anɛ.

³⁰ Kooro Ahab ɛ wechɔɡa dɛ jo Korowii nɛɛ ɡwaa koranar baa tɔ sie la.

³¹ O ta ɡelɛ a jaɡɛ bela dɛ ɡe ɛ Nɛbat bibaa Kooro Jɛroboam wechɔɡa la dɔŋa. O berɔ mo Sidon Kooro Etbaal bihaah Jɛsɛbɛl dɛ pa mun dɛɛ tomɛ voɡ Baal.

³² Kooro Ahab ma voɡ Baal dea Samaria, dɛ ɛ kon baa fuh saraha o ta dea la bini tɛo.

³³ O pa voɡ Asera dajaŋ. O ɛ wechɔɡa dɛ muɡli Korowii Israel tena aa dɛ tomɔ la baah ɡwaa ɡɛ Israel koranar baa tɔ sie la aa ɛa.

³⁴ Kooro Ahab saŋee baa bɛl waa le Bɛtel baa yerɔ Heɛl kwaa ma danjwɛɛ waa bar bwɛjen Jeriko. O bibanloɡle baa dɛ yerɔ Abiramee o kpɔ pa danjwɛɛ la mun, dɛ kpɔ o bibaa bechala Seɡub ɡe ma bwɛɛ la doonyoo, ɡɛ Korowii aa cheɡɛ Nun bibaa Josua nɛɛ bola la.