1 Koranar 15 - mzwDBL

Juda Kooro Abija

¹ Nɛbat bibaa Kooro Jɛroboam aa di kora Israel harɛ ta bene fi dɛ anuatoro taa Abija di kora Juda harɛ ta.

² Kooro Abija di kora Jerusalam bene atoro. Abesalɔm bihaah Maaka biee Kooro Abija.

³ O ɡe ɛ o mɛɛ wechɔɡa la dɔŋa. O ta o bambile bwa kpɔe tɛ Korowii waa dɛ tomɔ kɛŋɔ o nabaa Kooro Devid aa ɛa la.

⁴ Kɛ Korowii waa dɛ tomɔ koh Kooro Devid wa ɡɛ waa tomɔ nomanta, dɛ tɛo bibaa waa chiɡ o naa ta di kora Jerusalam, ásɛ Jerusalam won che.

⁵ Kooro Devid ɛ waa aa wera Korowii be, o ta wobɛlbwa Korowii aa doo a ta kone o soɡa bini bwa. Atane Uria Hiti te la ɡbo waa ta.

⁶ Yoi chɔ Kooro Rɛhoboam ne Kooro Jɛroboam baah Kooro Abija kora dii saŋ bwa.

⁷ Ba chwerɛ Kooro Abija bwara waa bwa do Juda Koranar Waa Tɔne bini. Dɛ yoi lɔ o ne Kooro Jɛroboam baah ta.

⁸ Kooro Abija sewɔ ba huɡo o naawa huɡribɔr Jerusalam waa ɛ Kooro Devid Bwɛjen ta. Asɛ o bibaa Asa chiɡ o naa ta dɛ di kora.

Juda Kooro Asa

⁹ Kooro Jɛroboam aa di kora Israel harɛ ta bene fifraanɛ taa Kooro Asa di kora Juda harɛ ta.

¹⁰ Kooro Asa di kora Jerusalam bene fifraanaarɛ dɛ beŋkpoŋ. O naaa Maaka, Abesalɔm bihaah la.

¹¹ Kooro Asa ɛ waa aa wera Korowii be, ɡɛ o nabaa Kooro Devid aa ɛa la.

¹² O doŋi nɛra baa dɛ bɔ jwamane voɡare mun harɛ la ta, dɛ huɡri voɡa o naawa aa ɛa la bwa ta.

¹³ O ir o naa Maaka haŋkora ta, dɛkalkɛŋɔ, o ɛ voɡ Asera daa aa ɛ kii kwaa la. Kooro Asa teŋni daa la dɛ fuah Kedrɔn Fɛlembɔjen ta.

¹⁴ A lole kɛŋɔ Kooro Asa ta bela voɡtoroma aa soɡa dɛɛ tomɛ ba voɡa bwa chɔɡɛ le Israel harɛ ta te, kɛ dɛ o bambile cheɡɛ Korowii nɛɛ o soɡa bini bwa.

¹⁵ O kpɔ suuɡapoŋ ne suuɡaswɛm ne kwaa bwa o ne o mɛɛ aa dɔa dɛ kpɔ do Korowii nɔn ta la ba Korowii Dea.

¹⁶ Dɛ yoi lɔ Kooro Asa ne Israel Kooro Baasa baah ba kora dii saŋ bwa ta.

¹⁷ Kooro Baasa kpɔ laa tena ka lɔ tɔ Juda Kooro Asa nɛ dɛ pɔ o nɛ, dɛ ma danjwɛkpeɡ bar bwɛɛ bɛl baa dɛ yerɔ Rama, ásɛ bɛlbwa bɛ won le Juda harɛ ta kaa kɛɛ dɛ́ ba jo bela.

¹⁸ Kooro Asa kpɔ suuɡapoŋa ne suuɡaswɛm bwa aa kaa, dɛ do deene baa kpɔ kwaa a yoɡ aa kpeɡa dɛɛ cheɡ koodem bela, dɛ Korowii Dea la tomɛ nomonome ba kpɔ ka tɛ Kooro Bɛn Hadad. Dɛ Kooro Hadad mɛɛ sɔne Tabrimɔn, o nabaa ɡe ɛ Aram Kooro Heseɔn dɛɛ di kora Damaskɔs.

¹⁹ Kooro Asa ŋɔ, “N dɛ nyin kɛ n ne he fɔwɛ fɔo, ɡɛ ya naawa fa aa ɛa la. N kpɔ koŋkɛɛla aa ɛ suuɡapoŋa ne suuɡaswɛm nɔ dɛɛ tɛɛ, á ɛ fɔo dɛ́ chɔɡ he ne Israel Kooro Baasa fɔo la taraken, ásɛ o ne he laa tena le n harɛ nɔ ta kaa.”

²⁰ Kooro Bɛn Hadad no Kooro Asa be, dɛ tomɛ o laa sitɔɔla ba ka yo Israel harɛ bwɛɛre. Ba pɔ bwɛɛre baa dɛ yera Ijon ne Dan dɛ Ebel Bɛt Maaka ne harɛ waa chɔa kaa Galilia Moo bwa dɛ Naftale dea harɛ bwɛɛre bwa ta.

²¹ Kooro Baasa aa no ɡɛ la, o ɡel danjwɛɛ la mae dɛ bar Rama dɛ ka so Tirsa.

²² Belaa Kooro Asa do Juda tena bwa ŋɔ bá la, dɛ́ ka che bwea ne daa Kooro Baasa aa kpɔa dɛɛ ma danjwɛɛ Rama la. Anee Kooro Asa kpɔ ma danjwɛkpeɡ bar bwɛjena Geba ne Mispa aa lɔ Bɛnjamen dea harɛ ta. O ta nomɛlbwa ɡelɛ Juda harɛ, bɛlbwa laŋɔ ka pa daa la ane.

²³ Waa Kooro Asa aa ɛa o kora dii ta, ne bwɛɛre waa ma danjwɛɛ bara, ne laa waa yoa dɛ pɔ nɛra nɛɛ la, ba chwera do Juda Koranar Waa Tɔne bini. O hwɛɛhra bini la, o we nakpaweela ane soo siwi.

²⁴ Kooro Asa sewɔ ba huɡo o naawa hoɡa ta Kooro Devid Bwɛjen ta. Asɛ o bibaa Jehosafat chiɡ o naa ta, dɛ di kora.

Israel Kooro Nadab

²⁵ Gɛ saŋ Kooro Asa aa di kora Juda harɛ ta bene anɛ taa Kooro Jɛroboam bibaa Nadab di kora Israel harɛ ta. O di kora bene anɛ.

²⁶ Gɛ o mɛɛ aa ɛa laanee o ɡe ɛ, o ɛ wechɔɡa dɛ jo Korowii nɛ, dɛ ɡel Israel tena bwa ɛ wechɔɡa.

²⁷ Dɛ Kooro Ahija bibaa Kooro Baasa le Isaaka dea, o vɔrɔwe Kooro Nadab vɔrɔwa, dɛ kpoo Filisti tena bwɛɛ baa dɛ yerɔ Gebɛtɔn ta. Dɛ Kooro Nadab ne Israel tena kaa bar Gebɛtɔn tena dɛ tɔ ba do.

²⁸ Kooro Asa aa di kora Juda harɛ bene atoro taa Kooro Baasa kpo Kooro Nadab, dɛ chiɡ o naa ta di kora.

²⁹ Kooro Baasa aa baa di kora la, o kpoo Kooro Jɛroboam dem tena bwa. O ta Kooro Jɛroboam nɛn bɛlbwa ɡelɛ o so le, o kpoo ba bwa, ɡɛ Korowii aa cheɡɛ o keame Ahija waa ɛ Silo te nɛɛ dɛ bol la.

³⁰ Gɛ waa nɔ chiɡo dɛkalkɛ Kooro Jɛroboam ɛ wechɔɡa dɛ ɡel Israel tena ɡe ɛ wechɔɡa, dɛ muɡli Korowii Israel tena aa dɛ tomɔ la baah.

³¹ Waa Kooro Nadab aa ɛa o kora dii ta ne anɔ la waa ɛa la, ba chwera do Israel Koranar Waa Tɔne bini.

³² Dɛ yoi lɔ Kooro Asa ne Israel Kooro Baasa baah ta ba kora dii saŋ bwa.

Israel Kooro Baasa

³³ Bentooro te ta Kooro Asa aa di kora Juda harɛ taa Ahija bibaa Baasa di Israel kora dɛ so Tirsa. O di kora bene fifraanɛ dɛ anaarɛ.

³⁴ O ɛ wechɔɡa dɛ jo Korowii nɛ, o kpɔ Kooro Jɛroboam ŋwɛnɛ la ta, ɡɛ waa ɡela Israel tena ɛ wechɔɡa la.