1 Koranar 14 - mzwDBL

Kooro Jɛroboam bibaa seo wa

¹ A ɡɛ saŋ dɛ Kooro Jɛroboam bibaa Abija bwara dɛ weo,

² asɛ Kooro Jɛroboam ŋɔ o haah be ŋɔ, “Ir dɛ la Silo Korowii keame Ahija be, o lɔ bela. Ka beɡre he te ásɛ ba bɛ jemɛ kɛŋɔ men Kooro Jɛroboam haahnee hen. Onee ŋɔ n be ŋɔ mɛɛ di kora Israel harɛ nɔ taa.

³ Kpɔ paanoo fi, ne kwaa baa kpɔ noo koo a ta dɛ wɔɔra la ane, ne tooh loŋ del la o be, ɡɛ bwa aa dɛ ba bie la chiɡa la, wɛɛ baɡlee.”

⁴ Ate, Kooro haah la ir dɛ ɛ ɡɛ kooro aa bola la, dɛ chiɡ ŋwɛnɛ ta la Silo Korowii keame Ahija be o dem. Dɛ Ahija hwɛɛhrɔ, waa na kɛrɛdɛ kpa.

⁵ Dɛ Korowii ŋɔ Ahija be ŋɔ, “Kooro Jɛroboam haah dɛ ba he be, o bie bwara dɛ weo wɛɛ ba dɛ́ ba bɔɔre a wa.” Asɛ Korowii baɡlo waa bwa waa bol o be. Kooro Jɛroboam haah la aa bala la, o beɡre o te kɛŋɔ nɛmpɛɛ bɛl ken.

⁶ Korowii keame Ahija aa no Kooro Jɛroboam haah la nakpale sii o doonyoa la, o ŋɔ, “Kooro Jɛroboam haah dɛ ba. Ɛrɛɛ he beɡre he te ɡɛ nɔɔ? N dɔ waane dɛ bol he be, kɛ a ta amanesoma ɛɛ.

⁷ La ka ŋɔ Kooro Jɛroboam be ŋɔ Korowii Israel tena aa dɛ tomɔ la ŋɔ, ‘Menee lee le n nɛra Israel tena bini dɛ ŋɔ hɛɛ tɔ ba sie.

⁸ Menee laa Kooro Devid dem kora la pere dɛ kpɔ tɛɛ, kɛ he ta doe kɛŋɔ n bonɔɔ Kooro Devid waa teŋɛ men Mmarare ta, dɛɛ teŋɛ n nɛɛ o bambile bwa ne dɛɛ ɛ waa aa dɛ too n tea ɡbo la.

⁹ He ɛ wechɔɡa kohona dɛ ɡwaa banɔ la baa tɔ he sie bwa. He ɛ voɡa, dɛ kpɔ kwaa ɛ voɡa muɡli n baah, dɛ berɛ habɔɔ kpo mɛ.

¹⁰ Anomanta, mɛɛ chɔɡ he koraa dɛ́ kpoo he bibaala, ne bechale ne nomonome baa lɔ Israel harɛ ta bwa, yoma ne banɔ la baa dɛ di ba nyuune bwa. Mɛɛ fuh he demii kɛŋɔ baa dɛ fuh kondoŋa a bwa yon tonɛ la ken.

¹¹ He dem nɛra baa serewe bwɛjena ta la, nyootenaa dɛ́ di ba ola, ásɛ jumbii ɡe di banɔ la baa serewe chɔ kpɔɡ bini la. Men Korowiirii bola.’ ”

¹² Korowii keame Ahija berɔ ŋɔ Kooro Jɛroboam haah la be ŋɔ, “Ir kaa, he nakpala aa dɛɛ tire he bwɛɛ la ta la, dɛ bie la dɛ sewɛ.

¹³ Israel tena bwa ɛɛ ɛ o lwee dɛ́ huɡo. O ɡboo ɛ Kooro Jɛroboam nɛn baa dɛ ba huɡa, dɛkalkɛ Kooro Jɛroboam dem nɛra bwa bini, o ɡbo nɛɛ Korowii Israel tena aa dɛ tomɔ la sie ɛɛ lɛ.

¹⁴ Korowii dɛ ba kooro lee Israel tena bini dɛ́ tɛ o te fini, dɛ chɔɡ Kooro Jɛroboam kora.

¹⁵ Korowii ɛɛ tɛr Israel tena deŋnee, ba do kɛŋɔ kpɔɡa aa pa nee ta dɛɛ yiiɡi la ken. Wɛɛ chuɡri baa le harɛdɛɛɡe nɔ waa kpɔa tɛ ba naawa nɔ taa, dɛ́ lɔ ba peɡre Yufretis Moo baŋ le. Ba kpɔ voɡhaah Asera dajaŋa paaɡe dɛ kpɔ muɡli o baah.

¹⁶ Kooro Jɛroboam wechɔɡa waa ɛa dɛ ɡel Israel tena ɡe ɛa nomanta, Korowii ɛɛ vɛɛh baa.”

¹⁷ Ate, Kooro Jɛroboam haah la ir dɛ le kaa o bwɛɛ Tirsa. Waa dena dɛɛ tel dem dɛ bie la dɛ sewɛ.

¹⁸ Israel tena bwa ɛ o lwe dɛ huɡo ɡɛ Korowii aa cheɡɛ o bonɔɔ keame Ahija nɛɛ bol la.

¹⁹ Ba chwerɛ Kooro Jɛroboam bwara waa bwa, ne ɡɛ waa yoa, ne o kora dii waa bwa do Israel Koranar Waa Tɔne bini.

²⁰ Kooro Jɛroboam di kora bene fifraanɛ dɛ anɛ. O sewɔ ba huɡo, asɛ o bibaa Nadab chiɡ o naa ta dɛ di kora.

Juda Kooro Rɛhoboam

²¹ Kooro Solomɔn bibaa Kooro Rɛhoboam di kora Juda harɛ ta, dɛ o di bene fifraanaarɛ dɛ beŋkpoŋ. O di kora bene fi dɛ anuanɛ Jerusalam, bwɛjen Korowii aa lea le Israel deene bwɛɛre bini baa tomɔ bela la. Kooro Rɛhoboam nya sɔne Naama, Amɔn tee.

²² Juda harɛ ta nɛra ɛ wechɔɡa dɛ jo Korowii nɛ, a che a ta Korowii bandia ir ba nɛ. Dɛ ba kwaa la ɡwaa anɔ la ba naawa aa ɛa la kwara.

²³ Ba ɡe cheɡ voɡa deŋɡarere ta, dɛ paaɡe bwea, dɛ kpɔ voɡ Asera dajaŋa paaɡe deŋɡare bɛlbwa ta ne dajen bɛlbwa mun.

²⁴ Hale dɛ baala dɛ bɔ jwamane voɡare mune harɛ la ta. Juda harɛ ta tena jo kii we-ɛɛla bwa soo siwi nɛra ba fa aa lɔ bela dɛɛ ɛa mɔɔ Korowii doŋ ba le dɛ kpɔ tɛ Israel tena la ta.

²⁵ Kooro Rɛhoboam aa di kora bene anue ta la, Ijipt Kooro baa dɛ yerɔ Sisak baa yo Jerusalam tena.

²⁶ O pa kwaa aa lɔ deene baa dɛ cheɡ laala a yoɡ aa kpeɡa a bini Korowii Dea, ne anɔ la aa lɔ koodem bwa kaa. Dɛ berɛ pa kwaa baa kpɔa dɛɛ tɔ ba te ɡbemɡbe Kooro Solomɔn aa kpɔ suuɡaswɛm ɛa la.

²⁷ Anomanta, Kooro Rɛhoboam kpɔ ayaawa dɛ ɛ ane chiɡ suuɡaswɛm kwaa la naa ta, dɛ kpɔ do nɛra baa dɛ so koodem la doonyoa dɛɛ daah bela la nomonome nɔn ta ŋɔ báa nyiŋi a ta.

²⁸ Saŋ bɛlbwa kooro aa la Korowii Dea la, nɛra baa dɛ daah bela yon kpɔ kwaa baa kpɔa dɛɛ tɔ ɡbemɡbe la kpoŋe, ásɛ a habɔɔ ba yon kpɔ ka cheɡ dea baa dɛ cheɡa a bini la ta.

²⁹ Kooro Rɛhoboam kora dii saŋ waa aa bera chiɡ la, ba chwera do Juda Koranar Waa Tɔne bini.

³⁰ Dɛ yoi ta chɔ Kooro Rɛhoboam ne Kooro Jɛroboam baah ta.

³¹ Kooro Rɛhoboam sewɔ asɛ ba huɡo o naawa hoɡa ta Jerusalam waa ɛ Kooro Devid Bwɛjen ta. O nya sɔne Naama, dɛ Amɔn tee. Asɛ o bibaa Abija ba chiɡ o mɛɛ naa ta dɛ di kora.