1 Koranar 12 - mzwDBL

Israel tena ɛ Kooro Rɛhoboam deŋnekpeɡ

¹ Kooro Rɛhoboam la bwɛjen Sɛkem, dɛ Israel tena bwa cheme bela, dɛ́ chiɡu kora ta.

² Nɛbat bibaa Jɛroboam o fa aa chwaa le Kooro Solomɔn be dɛ kaa Ijipt harɛ ta aa no ɡɛ waa la, o le Ijipt bela dɛ ba.

³ Ba tomɛ nɛra ba ka yerɛ Jɛroboam, asɛ o ne Israel tena la baa lɔ weekaŋle nyunduabɔr la bwa la ka ŋɔ Kooro Rɛhoboam be ŋɔ,

⁴ “He mɛɛ fa ɡelɔ ya ɛ tomkpeɡa. Taraken yaa sɛh dɛɛ ɛ a ɡɛ tomkpeɡa la dɔŋa kpa. Gel a do korokoro ásɛ yaa tomɛ.”

⁵ Kooro Rɛhoboam ŋɔ ba be ŋɔ, “Hé kaa n kpɔ a liire, ásɛ tɔpetooro wee he berɛ ba.” Asɛ ba bwa kaa.

⁶ Ate, Kooro Rɛhoboam cheme nomonome ba ne o mɛɛ Kooro Solomɔn fa aa lole baa jao la, dɛ kpɔ bil ba sie dɛ ŋɔ, “Wejaala besoo he dɔ tɛ mɛ ń bol baɡle nɛra nɔɔ?”

⁷ Anee ba ŋɔ, “Dɛ he sɛoh kɛŋɔ hɛɛ dɛɛ tom baa dɛ sɛh dɛɛ bol wedɛɛɡa ba be tenaa, ate baa tomɛɛ saŋ bɛlbwaa.”

⁸ Kooro Rɛhoboam ta nomonome la jae baa jao la noɛ, dɛ ka no o bala o ne baa ira baa tomɔ la wa.

⁹ Kooro Rɛhoboam kpɔɔ bil ba sie ŋɔ, “Ɛrɛɛ hɛɛ lii kɛŋɔ ń chaŋe nɛra nɔ baa ŋɔ n be ŋɔ ń ɡel ba toma do korokoro nɔ waɔ?”

¹⁰ O bala o ne baa ira la chaŋe ŋɔ, “Waa aa chɛ kɛ he bol ba be laanee kɛŋɔ, n nonikekela kwaraa bare ɡwaa n mɛɛ chara.

¹¹ N mɛɛ ɡelɔ he ɛ tomkpeɡa, n te ɛɛ ɡeloo he ɛ ɡwaa ɡɛ. Chweema nee n mɛɛ tɛr he deŋne, kɛ n te ɛɛ kpɔ balansoo tɛr he deŋne.”

¹² Tɔpera atoro habɔɔ la, Jɛroboam ne nɛra baa ja o nɛɛ la bwa berɔ ba Kooro Rɛhoboam be ɡɛ waa ŋɔ ba be la.

¹³ Kooro Rɛhoboam vɛh nomonome la jae baa jao la, dɛ kpɔ nyɛɡa bol waa nɛra la be.

¹⁴ O kpɔ o bala o ne baa ira la jae la dɛ ŋɔ, “N mɛɛ ɡelɔ he ɛ tomkpeɡa, kɛ n te ɛɛ ɡeloo a ɡwaa ɡɛ. Chweremi nee o tɛr he deŋne, kɛ n te ɛɛ kpɔ balansoo tɛr he deŋne!”

¹⁵ Kooro la ta nɛra la waa la ta noɛ tɛɛ ba. Dɛ Korowiirii ɛa ɡɛ, dɛ ɡel waa waa cheɡɛ Silo te Ahija nɛɛ dɛ bol Nɛbat bibaa Jɛroboam be la ɛ kpela.

¹⁶ Nɛra baa ja Kooro Jɛroboam nɛ aa naa kɛŋɔ kooro la ta ba waa la ta noɛ la, ba ŋɔ o be ŋɔ, “Ya ne Kooro Devid naanar toole wobɛlbwa bini. Bɔkwaa ba ɛ tɛ yaa bwa nɔ? Ya bala Israel tena, hé ɡel ya kaa dem. Hé ɡel Kooro Rɛhoboam di o kora.” Gɛɛ a do Israel tena pa mun ɛo deŋnekpeɡ, dɛ bwa kaa ba deremi.

¹⁷ Kɛ, Israel tena baa lɔ Juda harɛ bwɛɛre ta la te, dɛ Kooro Rɛhoboam dɛ́ di kora ba nɛ.

¹⁸ Belaa Kooro Rɛhoboam tomɛ Adoniram waa chɔ tomkpeɡa ɛɛ nyoa ŋɔ o la Israel tena be. Asɛ ba bwa foɡro bwea kpo. Kooro Rɛhoboam dɔ warane dɛ jo o kon waa do kɛ torɔɡo bini, dɛ chwa ka sɔh Jerusalam.

¹⁹ Le a ɡɛ saŋee Israel tena baa lɔ weekaŋle nyunduabɔr ɛ Kooro Devid dem tena deŋnekpeɡ, dɛ pere ba te le ba nɛɛ dɛ ba le fini.

²⁰ Baa noa kɛŋɔ Jɛroboam berɔ le Ijipt harɛ ta ba la, ba tomɛ nɛra ba ka kpɔɔ ba ba baah ta, dɛ ba cheɡo Israel harɛ ta bwa kooro. Juda dea tena ɡboo teŋɛ Kooro Devid luɡe tena nɛ.

²¹ Kooro Rɛhoboam aa tel Jerusalam la, o boa Juda ne Bɛnjamen deene tena baala baa jemɛ yoi nyoa, nɛra kaɡboŋa lafa fifraanuatoro ŋɔ, bá ka yo Israel deene aa lɔ weekaŋle nyunduabɔr, ásɛ o won di kora harɛ la bwa ta.

²² Dɛ Korowii bol o keame Sɛmaya be ŋɔ,

²³ “Ŋɔ Kooro Solomɔn bibaa Kooro Rɛhoboam, ne Juda dea kooro la ne Juda dea tena ne Bɛnjamen dea tena nɛra baa jaa la be ŋɔ,

²⁴ ‘He bɛ he bala Israel tena la ka pu yo. Bɛlbwa berɛ kaa o dem, menee ɛa ɡɛ.’ ” Ate ba no, ba ta Jɛroboam ka yoi kpa, ate dɛ bwa berɛ kaa ɡɛ Korowii aa ŋɔa la.

Kooro Jɛroboam charɛ o liire le Korowii be

²⁵ Kooro Jɛroboam ɡelɔ ba ma danjwɛkpeɡ bar bwɛjen Sɛkem waa chɔ Efrem deŋɡarere ta dɛ lɛo cheɡ. O le bela dɛ berɛ ka ma danjwɛkpeɡ bar Pɛnoɛl ɡe.

²⁶ Kooro Jɛroboam liiro ŋɔ, “Name te, kora la ɛɛ berɔ ba Kooro Devid dem.

²⁷ Dɛ n nɛra la Jerusalam dɛ ka ɛ sarahare Korowii Dea aa, baa charɛ ba liiree, dɛ́ ka teŋɛ ba dɔɔ Juda Kooro Rɛhoboam la nɛ. Baa kpo mɛɛ dɛ́ berɛ kaa Kooro Rɛhoboam be.”

²⁸ O ja o te, dɛ kpɔ suuɡaswɛm ɛ nabali anɛ. Dɛ ŋɔ Israel tena la be ŋɔ, “He bɛ he te koh dɛɛ la Jerusalam kpa. He voɡa aa cha heyaa he won le Ijipt harɛ ta he naawa bere saŋ ba laanee la.”

²⁹ O kpɔ bɛl ka cheɡ Bɛtel waa bɛne Jerusalam ta, asɛ dɛ kpɔ bɛl ɡe ka cheɡ Dan waa lɔ weekaŋle nyundua pera.

³⁰ Gɛ waa nɔ ɡelɔ nɛra ɛ wechɔɡa, ba la Dan ne Bɛtel kaa toma.

³¹ Kooro Jɛroboam ɛ voɡa deŋɡarere doa dɛ le kerekpoŋra harɛ la ta, hale banɔ la baa wola Lewi dea leɛ ba so a ta.

³² O le tɔpejen cheɡ korobinuatoro o tɔpera fi dɛ anue ta, kɛŋɔ anɔ la baa dɛ dia Juda la ken, dɛ ɛ sarahare kon baa dɛ fuh kwaa o ta. O ɛ saraha kon Bɛtel, ba kpɔ nabali ɛ sarahare beŋkpoŋ waa kpɔ suuɡaswɛm ɛo la ta. Bɛtel bela la, o kpɔ kerekpoŋra so voɡa waa ɛa deŋɡarere ta la ta.

³³ Korobinuatoro, tɔpera fi dɛ anue waa lea cheɡ ta la, o la Bɛtel ka kpoo kwaa saraha kon la ta. Gɛɛ o cheɡ tɔpejen tɛ Israel tena dɛ la kaa ɛ sarahare bela.