1 Koranar 11 - mzwDBL

Kooro Solomɔn charɛ o liire le Korowii be

¹ Ijipt Kooro bihaah Kooro Solomɔn aa moo la habɔɔ, o berɔ nyin Moab ne Amɔn ne Edom ne Sidon dɛ Hiti tena bihaahna.

² Ba ɛ nɛra Korowii aa bol ba waa Israel tena be ŋɔ, “He bɛ ban mo ásɛ ba ba berɛ he liire kaa ba voɡare ta.” Kɛ ane a bwa, ɡɛ nɛra laanee Kooro Solomɔn ka mo.

³ O mo haahna baa ɛ koobii lafraanuanɛ, o sɛnanar ɡe lafraatoro. O haahna la ɡelɔ o liire charɛ le Korowii be.

⁴ Waa baa hwɛɛh la, haahna la berɛ o liire kaa voɡare toma ta. Dɛ o bambile toole Korowii waa dɛ tomɔ nɛɛ kpa kɛŋɔ o mɛɛ Kooro Devid fa aa ɛa la.

⁵ Kooro Solomɔn kaa teŋɛ Sidon voɡhaah Astɔrɛt dɛ Amɔn tena voɡ Molɛk aa ɛ kii kwaa la nɛ.

⁶ A cheɡɛ a ta Kooro Solomɔn ɛ Korowii wechɔɡa dɛ jo o nɛ, o waa ta kasinteŋ dɔe tɛo kɛŋɔ o mɛɛ Kooro Devid.

⁷ Kooro Solomɔn do dea bwe bɛl ta Jerusalam wee leebɔr, dɛ kwaa bɔr baa dɛɛ tomɛ Moab tena voɡ Kemɔs ne Amɔn tena voɡ Molɛk aa ɛ kii kwaa la.

⁸ O do voɡa deene tɛ o haahna la bwa, asɛ ba kaa fuh daawiile a sɔɔh aa soma dɛɛ ɛ sarahare a ta.

⁹ Korowii baah di Kooro Solomɔn nɛ, dɛkalkɛŋɔ dɛ o bambile le on Korowii Israel tena aa dɛ tomɔ o kpɔ o te baɡlo kera anɛ bwa la nɛ.

¹⁰ Korowii fe kaoh ŋɔ o bɛ voɡ bɛlbwa tomɛ, kɛ o ta waa waa doo a ta la ta teŋɛ.

¹¹ Anomanta, Korowii ŋɔ o be ŋɔ, “Haa saahna chɔɡ n ne he fɔo yaa fɔwa dɛ ɛ deŋnekpeɡ waa maa doe a ta nomanta, mɛɛ laa kora laanee lɛ he be, dɛ́ kpɔ tɛ nomonome baa lɔ he lɔɡa la bini bɛl.

¹² He mɛɛ Kooro Devid nomanta, he saŋ ta laa mɛɛ ba ɡela a chiɡ, he bibaa bɛl waa ba di kora saŋ bɛl taa mɛɛ ba ɡela a ɛ.

¹³ Kɛ mɛɛ koh n bonɔɔ Kooro Devid ne bwɛjen Jerusalam maa kpɔa ɛ n bwɛɛ la waa, maa kora la bwaa lɛ. Mɛɛ ɡel dea beŋkpoŋ nɛraa tɛ he bie.”

Kooro Solomɔn dɔma wa

¹⁴ Belaa Korowii ɡel Hadad ɛ Kooro Solomɔn dɔm. Edom tee Hadad nɔ, o le Edom koranar dea.

¹⁵ Kooro Devid ne Edom tena fa yoo, asɛ Joab waa ɛ laa sitɔɔ la ka huɡe nɛra baa serewe laa ta la bela. O ne o laa tena kaa kpoo Edom baala bwa.

¹⁶ Joab ne Israel tena la bwa soɡe Edom korobie anumɛl ka tel kɛŋɔ baa kpoo bela baala bwa.

¹⁷ Hadad ne o mɛɛ bonɔɔna baa ɛ Edom tena bane ɡboo wona dɔ bɔr chwa kaa Ijipt harɛ ta. Gɛ saŋ dɛ Hadad ɛ bechala.

¹⁸ Ba le Midian dɛ kaa Paran, dɛ ka kpɔ baala bane ja ba nɛɛ ba kaa Ijipt Kooro be. Asɛ Kooro la tɛ Hadad dem ne harɛ, dɛɛ tɛo kondikwaa ɡe.

¹⁹ Kooro la tea too Hadad nɛ, asɛ o lawɛ o ɡbaɡba haah waa ɛ haŋkooro baa yerɔ Tapenes nime bihaah tɛ Hadad o mo.

²⁰ Tapenes nime lolɛ bibaa asɛ ba pa o sɔn Genubat, asɛ Tapenes kpɔ bie la kaa koodem dɛ ka dɛɛro o ne kooro bii do bela.

²¹ Hadad baa no kɛŋɔ Kooro Devid sewɔ, Joab waa ɛ o laa sitɔɔ ɡe sewɛ. Belaa o ŋɔ Ijipt Kooro be ŋɔ, “N naa, n poori tɛ mɛ ŋwɛnɛ ń berɛ kaa n harɛ ta.”

²² Anee Ijipt Kooro bɔɔro ŋɔ, “Bɔkwaa hɛɛ nyin n ta hen tɛɛ hɛɛ nyin he berɛ kaa he harɛ ta nɔ?” Hadad chaŋe ŋɔ, “Wobɛlbwa laa, he te tɛ mɛ ŋwɛnɛ ásɛ n berɛ kaa.”

²³ Korowii berɔ ɡel Eliada bibaa Resɔn ɛ Kooro Solomɔn dɔm. Dɛ o fa ɛ Soba Kooro Hadadesa bonɔɔ, dɛ chwa le o be.

²⁴ Resɔn nɔɔ fa boa baala bane nyoa dɛ ɛ ba nomoa ɡɛ saŋ Kooro Devid aa kpoo Soba tena la. Asɛ ɡɛ dɔm la kaa bwɛjen Damaskɔs, dɛ ka lɛ bela dɔɔh dɛɛ di bela kora.

²⁵ Kooro Solomɔn saŋ bwa dɛ Resɔn ɛ Israel tena dɔm, dɛ ja anɔ la Kooro Hadad aa ɛa la ta dɛ hah Israel tena. Anomanta, Resɔn di kora Aram harɛ ta dɛ ɛ Israel dɔm.

Jɛroboam ɛ Kooro Solomɔn deŋnekpeɡ

²⁶ Dɛ baa bɛl sɔne Jɛroboam, o mɛɛ sɔne Nɛbat, Efrem tee on o le Sɛrɛda. O nya ɡe sɔne Sɛroa dɛ ɛ luhaah. Dɛ Jɛroboam ɛ Kooro Solomɔn nomonome la bini bɛl dɛ do o lɔɡa, dɛ ɛ Kooro dɔm.

²⁷ Gɛ aa ɛa o ɛ Kooro Solomɔn deŋnekpeɡ laanee nɔ. Gɛ saŋ Kooro Solomɔn ɡelɔ ba che bwea su Jerusalam wee leebɔr pera waa ɛ bɔɔ dɛ ma o danjwɛɛre o mɛɛ Kooro Devid aa maa la.

²⁸ Dɛ Jɛroboam ɛ bonɔɔ he kpɔ toma do o nɔn ta naa, ó won ɛa kɛrɛdɛ, Kooro la aa na ɡɛ o toma ɛɛ aa doa la, o kpɔɔ chɔ Manasɛ ne Efrem deene tom-ɛɛra baa dɛ ɛ tomkpeɡa nyoa.

²⁹ Awola bɛl, Jɛroboam le Jerusalam dɛɛ kaa, asɛ Korowii keame bɛl baa dɛ yerɔ Ahija, o le Silo leɔ dɛ ka chemo ŋwɛnɛ ta kpɔɡ bini. Dɛ Korowii keame la do o batakaare onfale. Dɛ ba nɛra banɛ la ɡboo ŋwɛnɛ baah ta bela.

³⁰ Belaa Korowii keame Ahija laa batakaare waa doa la foo, dɛ laa peeɡe bɔre fi dɛ anɛ,

³¹ dɛ ŋɔ Jɛroboam be ŋɔ, “Kpɔ a bini bɔre fi dɛkalkɛ, Korowii Israel tena aa dɛ tomɔ la ŋɔ, ‘Na, n dɛ ba Kooro Solomɔn kora laa lɛ o nɔn ta, dɛ́ kpɔ deene fi nɛra tɛɛ.

³² N bonɔɔ Kooro Devid ne bwɛjen Jerusalam maa lea le Israel deene bwa bini la nomanta, dea beŋkpoŋ nɛraa dɛ́ ɛ o nɛra.

³³ Gɛɛ mɛɛ ba ɛɛ, dɛkalkɛ ba vɛɛh mɛ dɛ kaa tomɛ Sidon tena voɡhaah Astɔrɛt, ne Moab tena voɡ Kemɔs, dɛ Amɔn tena voɡ Molɛk. Ba ta n ŋwɛnɛre ta kpɔe, ba ta waa aa wera n be ɛɛ, kɛɛ dɛ teŋɛ me Mmarare ta kɛŋɔ Kooro Solomɔn mɛɛ Devid aa ɛa la.

³⁴ Kɛ maa kora la bwaa lɛ le Kooro Solomɔn be. Mɛɛ koh Kooro Devid maa leo cheɡ tɛ n te wɛɛ teŋɛ me Mmarare ta la waa, dɛ́ ɛo harɛ la ta nomoa o soɡa bini bwa.

³⁵ Mɛɛ laa kora laanee lɛ Kooro Solomɔn bibaa la nɔn taa, dɛ́ kpɔ deene fi nɛra do he nɔn ta.

³⁶ Mɛɛ kpɔ dea beŋkpoŋ nɛraa do o nɔn ta, ɡɛ aa ɛ ásɛ n dɔ n bonɔɔ Devid naa saŋ bɛlbwa wɛɛ di kora Jerusalam, bwɛjen maa lea cheɡ ŋɔ baa tom mɛ la ta.

³⁷ Jɛroboam, henee mɛɛ ba kpɔe he di kora dɛɛ nyiŋi Israel harɛ ta, hɛɛ di kora bobɛlbwa haa dɛ nyin.

³⁸ Dɛ he noɔ dɛ ɛ waa maa doe a ta bwa, dɛɛ ɛ waa aa toɡra n be, dɛɛ teŋɛ me Mmarare ta kɛŋɔ n bonɔɔ Devid aa ɛa la aa, n fe ɛɛ che he mun taa. Mɛɛ ɡeloo he kora che kiŋkiŋ kɛŋɔ maa ɛa tɛ Kooro Devid la, dɛ́ kpɔ Israel harɛ tɛɛ.

³⁹ Kooro Solomɔn wechɔɡa nomanta, mɛɛ ba Kooro Devid naanar ne harɛɛ, kɛ dɛɛ la saŋ bɛlbwa laa.’ ”

⁴⁰ Kooro Solomɔn takapɔ kɛŋɔ ó kpo Jɛroboam, asɛ o chwa kaa Ijipt harɛ ta Kooro Sisak be ka tel kɛŋɔ Kooro Solomɔn aa sewa.

Kooro Solomɔn seo wa

⁴¹ Kooro Solomɔn kora waa ne anɔ la waa ɛa bwa ne o wejemwaa waa ɛa, ba chwerɛ a waa do o tɔn bini.

⁴² Kooro Solomɔn di kora Israel harɛ ta Jerusalam bene fifraanaarɛ.

⁴³ A habɔɔ, Kooro Solomɔn sewɔ ka pu o naawa, asɛ ba huɡo Jerusalam, o mɛɛ Kooro Devid bwɛjen ta, asɛ o bibaa Rɛhoboam ba chiɡ o naa ta di kora.