1 Koranar 10 - mzwDBL

Seeba kooro waa ɛ haah la Kooro Solomɔn be

¹ Seeba kooro waa ɛ haah baa no Kooro Solomɔn sɔn lee waa lea kohona. Anomanta, o la Kooro Solomɔn be Jerusalam, dɛ kpɔ wobobeela a bini aa kpeɡa dɛ́ ba daahno na.

² Seeba kooro la kpɔ nɛra baa dɛ tomɔ dɛ warɛ ja o nɛ, ne nyoɡmare aa cheɡɛ konsɔɔhsoma ne suuɡaswɛm kohona, ne bwedɛɛɡa a yoɡ aa kpeɡa kohona, dɛ la Kooro Solomɔn be. Waa laŋa o ne o ka cheme la, o bɔɔ Kooro Solomɔn waa aa lɔ o nyu bini bwa.

³ Kooro Solomɔn chaŋe waa waa bɔɔro bwa kɛrɛdɛ ken tɛo, wobɛlbwa toole dɛ do kpeɡri waa wola wone baɡle a bini.

⁴ Seeba kooro la aa na wejema Kooro Solomɔn aa dɔa ne koodem waa doa,

⁵ ne kondikwaa aa cheɡɛ o kondikondibɔr, ne o nomonome sobɔr, ne o bonɔɔna baa dɛ tomɔ, ne ba laala baa doa, ne bonɔɔna baa do batakaani dɛɛ doo sen, dɛ kwaa waa kpoora dɛ fuah dɛɛ ɛ sarahare Korowii Dea la, a ɛo nyokpoa.

⁶ Anee o ŋɔ Kooro Solomɔn be ŋɔ, “Waa haa ɛa ne wejema haa dɔa n do n harɛ ta dɛ no la ɛ kpela.

⁷ N ta ɡɛ baa bola la yaradae, atane n ɡbabir aa baa naa siwi ne nɔ. Waa la baa bola la ta waa nɔ bɛne kwara. He wejema ne he kondɔɔh ɡwaa anɔ la maa noa la kohona.

⁸ He nɛra nyu som, he nomonome baa dɛ che he jwɛɛh saŋ bɛlbwa dɛɛ no he wejemwaa la ɡe na som.

⁹ Korowii haa dɛ tomɔ laanee dɔ jam. O sie lɛ he nɛ, dɛ cheɡe kora ta Israel. Korowii nyina aa wola jaɡa dɔe bwa o kpɔ dɛɛ nyin o nɛra Israel tena la nomanta, o cheɡe kora ŋɔ he nyiŋi ba nɛɛ kasinteŋ ne waa aa toɡra ne.”

¹⁰ O kpɔ suuɡaswɛm a tɔɡre aa ɡwaa kilore kaɡboŋa anaarɛ, ne konsɔɔhsoma aa wara pirim, dɛ bwedɛɛɡa a yoɡ aa kpeɡa tɛ Kooro Solomɔn. Seeba kooro waa ɛ haah konsɔɔhsoma waa kpɔa ka tɛ Kooro Solomɔn kan aa doa la, nomɛlbwa ta a dɔŋa ne balɛ ɡɛ bwa.

¹¹ Kooro Hiram stiimaere la Ofir harɛ ta, dɛ ka kpɔ suuɡaswɛm, dɛ kpɔ dadɛɛɡa ane, ne bwedɛɛɡa a bwa yoɡ aa kpeɡa ba.

¹² Kooro Solomɔn kpɔ dadɛɛɡa la ɛ bela waa kpɔa teeh dɛɛ kaa Korowii Dea la ta ne koodem bela, dɛ kpɔ ane ɛ janjelare ne kwaa bwa soo siwi baa dɛ ɛ ane yela. Ba ta ɡɛ daa la dɔŋa ne Israel harɛ ta balɛ kpa bwa, hale ba le fini.

¹³ Kooro Solomɔn berɔ tɛ Seeba kooro waa ɛ haah komɛlbwa waa dɛ nyin, anɔ la bwa aa chɛ kɛ ó tɛo bwa la habɔɔ. Ate, kooro la ne o nɛra baa ja o nɛɛ berɛ kaa Seeba harɛ ta.

Kooro Solomɔn kondɔɔh wa

¹⁴ Suuɡaswɛm Kooro Solomɔn aa dɛ dɔ benanyoa bɛlbwa la tɔɡre ɛɛ ɛ kilore kaɡboŋa fifraanɛ dɛ anɛ, lafraanumɛl fifraanaarɛ dɛ anaarɛɛ.

¹⁵ Anɔ la waa dɔa dɛɛ le bonadiire ne kon-yoɡra ne Arab harɛ koranar dɛ nomonome baa chɔ harɛre nyoo be te ta jae.

¹⁶ Kooro Solomɔn loɡɛ kwaa baa kpɔa dɛɛ tɔ ɡbemɡbe laa ta anjena lafraanɛ. Suuɡaswɛm aa bɔle bɛlbwa ta tɔɡre lɔ kilore anuanɛ.

¹⁷ O berɔ ɛ kwaa baa kpɔa dɛɛ tɔ ɡbemɡbe laa ta anjeɡre lafraatoro, suuɡaswɛm aa bɔle bɛlbwa ta tɔɡre lɔ kilore atoro. Asɛ o ɡel ba kpɔ kwaa la ka do o koodem dejen bɛl baa dɛ yerɔ Lɛbanɔn Kɔr Bini Koodem bini.

¹⁸ Kooro Solomɔn berɔ ɡel ba kwaa kookara waa kana. Ba kpɔ bala nyen ɛ o pera, asɛ o kabora ɛ suuɡaswɛm tenten ba ɛ dawɛ o ta.

¹⁹ Ba ɛ bɔre anumɛl, bela waa che teeh kaa so kookara la ta. Ba ɛ kara la habɔɔ ɡuleɡule ken. Dɛ ɛ bela waa kpɔ nɔɔra dɛɛ dawɛ kara la ta, baŋne anɛ. Dɛ berɛ ɛ kwaane aa le nyujentena anɛ a che kara la jwɛh.

²⁰ Ba ɛ nyujentena fi dɛ anɛ chɔŋre kwaa waa cheɡɛ a ta teeh kaa so kookara la ta. Ba ta ɡɛ kookara nɔ dɔŋ bɛlbwa ɛɛ ken tɛ koojen bɛlbwa harɛ nɔ ta bwa.

²¹ Kooro Solomɔn numoli bwa, suuɡaswɛmee ba kpɔ ɛa. Laala aa lɔ Lɛbanɔn Kɔr Bini Koodem ɡe, suuɡaswɛm tenten nee ba ɛ a bwa. Ba ta suuɡapoŋa kpɔe ɛ komɛlbwa dɛkalkɛŋɔ, Kooro Solomɔn bere saŋ la, dɛ suuɡapoŋa ta komɛlbwa ɛɛ, dɛ baa a ne wobɛlbwa ɛ.

²² Dɛ kooro dɔ stiimaere baa kpɔa dɛɛ di bona mpo ta a ja Kooro Hiram kwaa baa kpɔa dɛɛ ɛ toma la ta. Bene atoro bɛlbwa a dɛ ba suuɡaswɛm ne suuɡapoŋa ne bala nyena, dɛ ɡbɛɛne bwa soo siwi ne.

²³ Dɛ Kooro Solomɔn dɔ suuɡa ne wejema dɛ ɡwaa kooro bɛlbwa harɛ nɔ ta.

²⁴ Nɛra bwa yon dɛɛ nyin o be bala dɛ́ ba no wejemwaa Korowii aa tɛo la.

²⁵ Benanyoa bɛlbwa ba dɛ ba o be naa, koŋkɛɛla aa ɛ kwaa baa kpɔ suuɡapoŋa ne suuɡaswɛm ɛa, ne batakaani ne dɔmkwa ne konsɔɔhsoma ne jaɡre, dɛ keeɡoree ba kpɔ baa tɛo.

²⁶ Kooro Solomɔn dɔ kwaa aa do kɛ torɔɡore kaɡboŋ lafraanaarɛ ba kpɔ dɛɛ la laa. O dɔ jaɡre ɡe kaɡboŋa fi dɛ anɛ. O kpɔ ane ka do bwɛjena ane ta, ane ɡe do o be Jerusalam.

²⁷ O bere saŋ dɛ suuɡapoŋa ta nyae Jerusalam kɛŋɔ bwea aa wola nyae nɔ. Peleme daa baa kpɔa dɛɛ do deene ɡe bu kɛŋɔ, fiɡ daa aa cheɡɛ Juda harɛ deŋɡarere lɔɡre ken.

²⁸ Kooro Solomɔn bonadiire yon ka yawɛ o jaɡre a yoɡ aa wera dɛɛ le Ijipt harɛ ne Kue.

²⁹ Ba le kwaa aa do kɛ torɔɡore le Ijipt harɛ ta dɛɛ ba. Beŋkpoŋ yoɡ lɔ suuɡapoŋa lafraanumɛl, jaɡre la ɡe beŋkpoŋ lɔ suuɡapoŋa lafa fifraanue. Ba le ane bela baa tɛ Hiti ne Siiria koranar bwa.