1 Koranar 1 - mzwDBL

Adonija cheɡ o te kora ta

¹ A balɔ kɛŋɔ Kooro Devid baa hwɛɛh, dɛ o biɡro ɡe kɛrɛdɛ, dɛ ka kalaŋ ta. Ba kpɔ yale tɔɔ ɡɛ bɛlbwa kwaraa naa, dɛ waa ta dɛ kpoo.

² Anomanta, o bonɔɔna ŋɔ o be ŋɔ, “N naa kooro, ɡel ya ka nyin bechatolo waa wola baa bɛlbwa jemɛ mɔɔ ba tɛɛ, ásɛ wɛɛ nyiŋi he nɛ. Wɛɛ dɛɛ chɔ he habɔɔ dɛ́ ɡel hɛɛ wɔrɔbe.”

³ Ate, ba ɡaaɡe Israel harɛ ta bwa dɛɛ nyin bechatolo waa wera tolo, asɛ dɛ ka dɔ bɛl bwɛɛ bɛl baa dɛ yerɔ Sunem ta baa yerɔ Abisaɡ, dɛ kpɔɔ ba tɛ Kooro Devid.

⁴ O wer tolo kɛrɛdɛ, dɛ so kooro be dɛ nyiŋu taeh, kɛ o ne o ta baa ne haah chɔe bwa.

Adonija le o te kɛŋɔ kooro sibeɡra ne

⁵ Asɛ Kooro Devid ne o haah bɛl baa dɛ yerɔ Haɡit bibaa Adonija ɛ karamani kɛŋɔ, wɛɛ chiɡ o mɛɛ naa taa dɛ́ di kora. Anomanta, o nyin kwaa aa do kɛ torɔɡo ba vɔwɛ dɛɛ pɛl jaɡre ne jaɡre dɛ baala fifraanue ba tɔ o sie.

⁶ O mɛɛ Kooro Devid ta wobɛlbwa bolɛ baɡlo, dɛ bɔɔro ŋɔ, “Ɛrɛɛ hɛɛ ɛ waa ɡɛ nɔɔ?” Dɛ Adonijaa teŋɛ o dɔɔ bɛl waa sewa baa yerɔ Absalɔm la nɛ, dɛ o wer bonɔɔ kɛrɛdɛ.

⁷ Adonija ne Joab waa ɛ Seruya bibaa, dɛ Abiata waa ɛ sɔfo la ɛ nyoa beŋkpoŋ asɛ ba teŋɛ o nɛɛ dɛ chao.

⁸ Kɛ Sadɔk waa ɛ sɔfo ne Jehoiada bibaa Bɛnaya, ne Korowii keame Netan ne Simee ne Rei, dɛ Kooro Devid bonɔɔna baa dɛ daahno te ta Adonija nɛɛ jae.

⁹ Awola bɛl, Adonija laŋɔ dɛ ka kpo peera ne nae dɛ nabiiri aa jea kohona ɛ saraha Sohelɛt Bwe ta, o bɛne Ɛn Roɡel bule ta. O yerɛ o mɛɛ Kooro Devid bibaala baa ɛ o nimanar dɛ Juda baala ba ɡe aa ɛ kooro nomonome bwa.

¹⁰ Kɛ o ta Korowii keame Netan kɛɛ Bɛnaya, kɛɛ laa tena baa dɛ daah kooro, kɛɛ o nime Solomɔn te bɛlbwa yerɛ.

Ba cheɡ Solomɔn kora ta

¹¹ Belaa Korowii keame Netan la Batsiiba waa ɛ Solomɔn nya be dɛ ka ŋɔ, “Jamɔ he ta noɛ kɛŋɔ Haɡit bibaa Adonija cheɡ o te kora ta ya naa Kooro Devid aa wola jemaa?

¹² Taraken n dɛ jae kɛŋɔ, dɛ he dɛ nyin he ne he bie nyu tenaa, amɔ te no waa maa dɛ ba he be bola nɔ.

¹³ La Kooro Devid be dɛ́ ka bɔɔro ŋɔ, ‘N naa kooro, he laa baɡ mɛ nyoa ŋɔ he bibaa Solomɔnee dɛ́ di he kwa dɛ́ ɛ kooro la aa, aah ɛrɛɛ Adonija berɛ ba ɛ kooro nɔɔ?’

¹⁴ He taa lɔ o be dɛɛ bol waa la, mɛɛ bao dɛ ba dalawe a ɡɛ waa la ta.”

¹⁵ Ate, Batsiiba la Kooro Devid waa hwɛɛhra kɛrɛdɛ la be o chɔɔbɔr, dɛ Sunem tolo Abisaɡ la lɔ bela dɛɛ nyiŋu.

¹⁶ Belaa Batsiiba ɡuŋi kooro, asɛ kooro bɔɔro ŋɔ, “Bɔkwaa hɛɛ nyin ɔ?”

¹⁷ O chaŋo ŋɔ, “N naa kooro, he ŋwɛɛ Korowii haa dɛ tomɔ sɔn ta ŋɔ n bie Solomɔnee dɛ́ ba ɛ kooro dɛ́ chiɡ he naa ta.

¹⁸ Kɛ taraken Adonija dɛ di kora haa wola jemɛ.

¹⁹ O kaa kpoo peera ne nabala ne nabiiri aa jea kohona, dɛ ta nɔn yerɛ he bibaala ne sɔfo Abiata dɛ Joab waa dɛ tɔ laa tena sie. Kɛ o ta he bibaa Solomɔn te yerɛ.

²⁰ N naa, Israel tena bwa dɛ nyiŋi he siwi ta, kɛ he baɡle nɛn waa di kora he habɔɔ.

²¹ Dɛ ɡɛ laa aa, he seo habɔɔ la, baa ɛ n ne n bie Solomɔnee kɛŋɔ nɛnchɔɡa ken.”

²² Batsiiba nyoa taa lɔ waa la ta wɛɛ bol kooro be la, dɛ Korowii keame Netan tel ba be.

²³ Asɛ ba ka ŋɔ kooro be ŋɔ, “Korowii keame Netan balɔ.” Asɛ o la kooro be dɛ ka ɡuŋu.

²⁴ Belaa Netan ŋɔ, “N naa kooro, he bolɔ ŋɔ he habɔɔ Adonijaa dɛ́ di kora kɛɛ?

²⁵ Fini o iro dɛ la ka kpoo nae ne nabiiri aa jea, dɛ peera aa wara. O ta nɔn yerɛ he bibaala bwa, ne Joab waa chɔ he laa tena nyoa dɛ sɔfo Abiata. Maa dɛ bol nɔ, taraken ba ne o pɛo dɛɛ di kondikonjena, dɛ nyɔ sen dɛɛ lɛ ba sie, dɛɛ do lɔŋɔre ŋɔ, ‘Kórowii tɛ Kooro Adonija mkpajaŋ!’

²⁶ Kɛ o ta men Netan maa ɛ he bonɔɔ, ne sɔfo Sadɔk ne Jehoiada bibaa Bɛnaya kɛɛ Solomɔn te bɛlbwa yerɛ.

²⁷ Kpelaa kɛŋɔ n naa kooro, he ɛ waa aa do ken asɛ he ta ɡelɛ he bonɔɔna bini bɛlbwa jemɛ naate waa ba di kora he habɔɔ nɔ naa?”

Kooro Devid cheɡ Solomɔn kora ta

²⁸ Anee Kooro Devid ŋɔ, “Hé yerɛ Batsiiba tɛ mɛ bonɔ.” Asɛ o ba dɛ ba che o sie.

²⁹ Asɛ Kooro Devid ŋɔ, “N ŋwɛɛ Korowii waa lole dɛ lɛɛ mɛ le wekpeɡa bɛlbwa ta nɔ,

³⁰ fini n ta cheɡɛ Korowii Israel tena aa dɛ tomɔ sɔn ta, dɛ ŋwɛɛ dɛɛ baɡle kɛŋɔ he bie Solomɔnee dɛ́ ɛ kooro n habɔɔ dɛ́ di kora.”

³¹ Asɛ Batsiiba ba ɡuŋi Kooro Devid sie dɛ ŋɔ, “Kórowii tɛ Kooro Devid mkpajaŋ!”

³² Ate, Kooro Devid ŋɔ, “Hé yerɛ sɔfo Sadɔk ne Korowii keame Netan dɛ Jehoiada bibaa Bɛnaya tɛ mɛ.” Baa ba o be la,

³³ o ŋɔ ba be ŋɔ, “Hé kpɔ n koodem nomonome, dɛ n bie Solomɔn so n keeɡo la ta ja kaa Gehɔn bule ta.

³⁴ Hé tel Gehɔn bela aa, hé ɡel sɔfo Sadɔk ne Korowii keame Netan fuɡe noo do Solomɔn nyu ta, dɛ́ cheɡo Israel harɛ bwa kooro. Hé ɡel nomɛl hoh bɛla ásɛ hɛɛ moo ŋɔ, ‘Korowii tɛ Kooro Solomɔn mkpajaŋ!’

³⁵ Ásɛ he ne o berɛ ba, ó ba so n kookara ta dɛ́ chiɡ n naa ta dɛɛ di kora. N leo ŋɔ ó di kora Israel ne Juda bwa ta.”

³⁶ Anee Jehoiada bibaa Bɛnaya ŋɔ, “A ɛ ɡɛ! Korowii n naa kooro aa dɛ tomɔ la sɛh a ta.

³⁷ Gɛ Korowii aa cheɡɛ hen n naa kooro mun ta la, ó che Solomɔn ɡe mun ta ɡɛ, dɛ́ ɡel o kora do kan ɡwaa n naa Kooro Devid kwara.”

³⁸ Ate, sɔfo Sadɔk ne Korowii keame Netan ne Jehoiada bibaa Bɛnaya, dɛ nɛra baa dɛ daah kooro la la ka kpɔ Solomɔn so Kooro Devid keeɡo ta, dɛ teŋɛ o nɛɛ kaa o ne Gehɔn.

³⁹ Asɛ sɔfo Sadɔk kpɔ nyeɡle bɛl noo aa lɔ o bini le Korowii Dea Cheremibɔr, dɛ ba fuɡe do Solomɔn nyu ta. Ba hoh bɛla la, asɛ nɛra baa teŋɛ o nɛɛ bwa ɛɛ moo kohona ŋɔ, “Korowii tɛ Kooro Solomɔn mkpajaŋ!”

⁴⁰ Nɛra la bwa teŋɛ o nɛ dɛɛ hoh kalipere dɛɛ hɛɡre kohona, asɛ harɛ bwa ɛɛ jiɡri kohona.

⁴¹ Dɛ Adonija ne nɛra waa ta nɔn yer ba baa di kwaa dɛɛ lɛ ba sie la, deno dɛɛ tonɛ dɛ no ɡbɔɡa la. Baa dɛ no bɛla la sii la, Joab bɔɔrɔ ŋɔ, “Gbɔɡa aa dɛ le bwɛjen nɔ ta nɔ munii ɛrɔɔ?”

⁴² O nyoa taa lɔ waa la ta la, dɛ sɔfo Abiata bibaa Jonatan deno ba jo ba be. Asɛ Adonija ŋɔ, “Ba, he ɛ nɛndɛɛɡe, jamɔ he ba amanesoma ne.”

⁴³ Jonatan chaŋe ŋɔ, “Akai, ya naa Kooro Devid cheɡ Solomɔn kora ta.

⁴⁴ Kooro ɡelɔ sɔfo Sadɔk ne Korowii keame Netan, ne Jehoiada bibaa Bɛnaya, dɛ o nɛra baa dɛ daahno, kpɔ Solomɔn so o ɡbaɡba kooro keeɡo la ta,

⁴⁵ asɛ sɔfo Sadɔk ne Korowii keame Netan ka fuɡe noo do o nyu ta dɛ cheɡo kora Gehɔn bule ta, dɛ berɛ baa kaa asɛ bwɛɛ bwa ɛɛ moo ɡɛ la.

⁴⁶ Hale taraken Solomɔn soɡe kookara la ta.

⁴⁷ Anɔ la aa jaa ɡee kɛŋɔ, Kooro Devid nomonome ɡe la o be dɛ kaa jaamo ŋɔ, ‘Korowii haa dɛ tomɔ la ɡel Solomɔn sɔn le ɡwaale, ásɛ o kora ɡe do kan ɡwaa he kon!’ Asɛ Kooro Devid ir so o chɔɔbɔr dɛ soŋe ŋɔ,

⁴⁸ ‘Korowii Israel tena aa dɛ tomɔ laanee chɛ kpɛɛra kɛŋɔ waa ɡela n na n bibaa Solomɔn o ba chiɡ n naa ta dɛɛ di kora fini nɔ.’ ”

⁴⁹ Belaa nɛra Adonija aa ta nɔn yer ba la ɔmɛ dɛ bwa ir peɡre, bɛlbwa kaa o dem.

⁵⁰ Dɛ Adonija ɡbabir dɛ ɔmɛ Kooro Solomɔn, anomanta, o iro jo Korowii Dea Cheremibɔr la bini, dɛ ka lawɛ kwaa aa paaɡe saraha kon la loŋkoni ta kɛŋɔ nyeɡlare la kpoŋe.

⁵¹ Ate, ba ka ŋɔ Kooro Solomɔn be ŋɔ, “Adonija dɛ ɔmɛ, dɛ ka lawɛ kwaa aa paaɡe saraha kon la ta kɛŋɔ nyeɡlare la kpoŋe dɛɛ soŋe kɛŋɔ, ‘Kooro Solomɔn ŋwɛɛ baɡ mɛ fini kɛŋɔ waa men kpo.’ ”

⁵² Anee Kooro Solomɔn chaŋe ŋɔ, “Dɛ wɛɛ kpɔ o tenee do n lɔɡa aa, wɛɛ dɔ o nyuu. Dɛ ɡɛ laa tenaa, wɛɛ sewɔɔ.”

⁵³ Belaa Kooro Solomɔn tomɛ nɛra ba ka lawɛ Adonija le saraha kon la ta dɛ kpɔɔ ba, asɛ o ba ɡuŋi Kooro Solomɔn sie, asɛ o ŋɔ Adonija be ŋɔ, “Kaa he dem.”