1 Jɔn 2 - mzwDBL

Yeesu waa dɛ cha yaa

¹ N bidɛɛɡa, n chwerɛ waa nɔ dɛɛ tɛ heya, ásɛ he bɛ wechɔɡa dɛɛ ɛ. Kɛ dɛ nomɛlbwa ɡarɔ ɛ wechɔɡa aa, ya dɔ nomɛl o do ya Mɛɛ waa lɔ nyundua la be, dɛ́ soŋe ya wechɔɡa dɛɛ tɛ yaa. Onee Yeesu Kristo la. O Waa Toɡrɔ.

² Onee koh ya wechɔɡa waa dɛ sewɛ tɛ yaa dɛ kwaa ya ne Korowii baah. Ya ɡbo wechɔɡa waa laa o sewɛ. Nomɛlbwa waa lɔ harɛ nɔ ta bwa jao.

³ Ya teŋɛ o waa ta naa, anee dɛɛ ba yaa baɡla kɛ ya jemɔ.

⁴ Dɛ nomɛlbwa ŋɔ o jemɛ Korowii, dɛ waa o waa ta teŋaa, ɡɛ nɛn la ɛ nyosonteŋni, dɛ kasinteŋ toole o be.

⁵ Nomɛlbwa waa dɛ teŋɛ Korowii waa ta la, onee dɛɛ nyin Korowii waa kɛrɛdɛ. Anɔ taa yaa ba cheɡa dɛ́ jemɛ kɛ ya ne Korowii pɛo.

⁶ Nomɛlbwa waa ŋɔa o ne Korowii pɛo la, a chɛ kɛŋɔ ó kpɔ Yeesu Kristo da la.

⁷ Yabala, waa nɔ maa dɛ chwerɛ heyaa nɔ ta wefala ɛɛ. Webena la yaa baɡle heyaa le mumpar la, anee ta.

⁸ Kɛ ŋwɛnɛ bɛl ɡe ta la, a ɛ wefala, dɛkalkɛ biro dɛ kaa. Bochaah tenten balɔ, asɛ bɔr ɛɛ chaah kɛrɛdɛ. Yeesu we-ɛɛla ne he ɡbaɡba we-ɛɛla baɡle a ɡɛ waa nɔ mun.

⁹ Nomɛlbwa waa ŋɔa o lɔ bochaah ta, kɛ dɛ hah o dɔŋ la, naate ta lɔ biro tenten ta.

¹⁰ Nomɛlbwa waa dɛ nyin o dɔŋ la do kɛŋɔ nɛn waa lɔ bochaah ta. Bochaah la nomanta, komɛlbwa toole dɛ́ ɡel ó lɔ nakpala dɛ́ chole.

¹¹ Nomɛlbwa waa hah o dɔŋ la do kɛŋɔ nɛn waa lɔ biro ta. O dɛ valɛ, kɛ waa jemɛ bela waa dɛ kaa, dɛkalkɛŋɔ biro la ɡelɔ o nyoŋe.

¹² N bidɛɛɡa, n chwerɛ waa nɔ dɛɛ tɛ heya, dɛkalkɛ Korowii koh Yeesu waa dɛ kpɔ he wechɔɡa kɛ heya.

¹³ Nomonome, n chwerɛ waa nɔ dɛɛ tɛ heya, dɛkalkɛ heyaa jemɛ naate waa lole le mumpar bwa la. Bonɔɔna, n chwerɛ waa nɔ dɛɛ tɛ he ɡe, dɛkalkɛ he pɔ Bɔnsam nɛ.

¹⁴ N bidɛɛɡa, n chwerɔ dɛɛ tɛ heya, dɛkalkɛ he jemɛ ya Mɛɛ waa lɔ nyundua la. Nomonome, n chwerɔ dɛɛ tɛ heya, dɛkalkɛ he jemɛ naate waa lole le mumpar bwa la. Bonɔɔna, n chwerɔ dɛɛ tɛ heya, dɛkalkɛ he bwaraa kpeɡa, Korowii waa la do he bambile bini. Heyaa wona pɔ Bɔnsam nɛ.

He bɛ ɡel he sie lɛ harɛ nɔ ta kwaa ta

¹⁵ He bɛ ɡel he sie lɛ waa aa dɛ lɛ nɛra baa dɔ harɛ nɔ ta ɡbo liire sie la, ne harɛ nɔ ta kwaa ta. Dɛ he sie dɛ lɛ a ɡɛ kwaa la ta naa, dɛ haa he Mɛɛ waa lɔ nyundua la waa nyin.

¹⁶ Bwadabii pɛlchɔɡa kwa, ne anɔ la aa ɛ siwi pɛla kwa, ne waa yaa nyina dɛ kpɔa dɛɛ maŋkura ya te la ɛ harɛ nɔ ta wa. A ta ya Mɛɛ waa lɔ nyundua la be leɛ.

¹⁷ Harɛ nɔ ne o pɛla kwaa bwa sekwaraa dɔ jaɡa. Naate waa dɛ ɛ anɔ la Korowii aa dɛ nyin la ɡbosoo dɛɛ ba le doe saŋ bɛlbwa.

Yeesu Kristo dɔm la wa

¹⁸ N bidɛɛɡa, wobɛlbwa jaɡa saŋ telo. He noɔ kɛŋɔ Yeesu Kristo dɔm tenten la ɛɛ bao. Hale taraken o dɔma dɔɔ warɛ dɛ ba. Anomanta, ya jemɔ kɛŋɔ wobɛlbwa jaɡa saŋ telo.

¹⁹ Dɛ bane fa ja ya nɛ, kɛ dɛ ba ta denɛ ɛ ya bini bane, dɛkalkɛ ba chwao. Dɛ ba fe ja ya nɛ aa, ya ne ba fe ta pɛo. Kɛ ba chwao, asɛ a den baɡle kɛŋɔ ba bini bɛlbwa ta ya nɛɛ jae.

²⁰ He te dɔ Korowii Domadɛɛɡe la he nɛɛ dɛ le Korowii Biɡoroŋ la be, dɛ jemɛ o kasinteŋ waa la bwa.

²¹ Kasinteŋ bɛ jema waa laa n chwerɛ tɔn nɔ baa tɛ heya. He jemɛ kasinteŋ la, dɛ jemɛ kɛŋɔ nyosone ne kasinteŋ aa valɛ bwa.

²² Amɔ umee ɛ nyosonteŋni ɔ? Nyosonteŋnii naate waa ŋɔa Yeesu laa Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la. A ɡɛ nɛn la, onee Yeesu Kristo dɔm tenten. Onee vɛh ya Mɛɛ waa lɔ nyundua ne o Bie bwa.

²³ Nomɛlbwa waa dɛ tɔŋle kɛŋɔ Yeesu Kristo laa Korowii Bie la, waa won yerɛ Korowii o Mɛɛ. Gɛɛ a do, nomɛlbwa waa sɛah ŋɔ Yeesuu Korowii Bie la, o Mɛɛɛ Korowii.

²⁴ Hé kpoŋe anɔ la haa noa dɛ le mumpar la bini. Dɛ he ɛ ɡɛ naa, saŋ bɛlbwa he ne Yeesu ne o Mɛɛ bwa ɛɛ wonoo pɛ bá kpoŋe heya.

²⁵ Dɛ ya ne Yeesu ne o Mɛɛ wono pɛ aa, a taa yaa ba cheɡa, dɛ́ dɔ Korowii mkpa aa wola jaɡa dɔe Yeesu aa baɡɛ yaa nyoa la.

²⁶ Nɛra baa dɛ ba dɛ fee baa neɡre heyaa la waa n chwerɛ ɡɛ waa nɔ dɛɛ tɛ heyaa la, ba bɛ won neɡre heya.

²⁷ Yeesu Kristo aa dɔa tɛ heyaa Korowii Domadɛɛɡe o do he bini nɔ, haa nomɛlbwa nyin o baɡle heyaa waa kpa. O Doma la dɛ baɡle heyaa wobɛlbwa. O ɛ kasinteŋ te, waa nyosone teŋe. Hé no anɔ la waa dɛ baɡle heyaa la, ásɛ dɛ kpɔ he te pɛ Yeesu Kristo nɛ.

Korowii bii

²⁸ N bidɛɛɡa, hé ɡel he ne Yeesu Kristo pɛ, ásɛ o baa forɛ le awola aa, ya bɛ ɔmɛ, ásɛ sihiih bɛ yaa kpo o sie awola waa ba la.

²⁹ He nao kɛŋɔ Korowii waa toɡrɔ, anomanta, nomɛlbwa waa dɛ ɛ wedɛɛɡa aa su Korowii siwi la ɛ Korowii bie.