1 Jɔn 1 - mzwDBL

Korowii nyoa wobol dɔ mkpa

¹ Waa yaa dɛ ba a waa he be bola nɔ ɛ nɛn waa ɛ Korowii Nyoa Wobol dɛ dɔ mkpa dɛ do le le mumpar la bwa wa. Ya no o waa dɛ nao. Ya nyiŋu dɛ kpɔ ya nɔɔra leɡo.

² O fa lɔ Korowii be dɛ berɛ ba ɛ nɛn, asɛ ya nao. Anomanta, ya dɛ bol o waa he be kɛŋɔ Yeesu Kristo waa ɛ saŋ bɛlbwa mkpa dɛ faa do o Mɛɛ be la, o ba ya be ya jemɔ.

³ Anɔ la yaa naa dɛ no laanee yaa bol he ɡe be, ásɛ he no dɛ́ ba ja ya Mɛɛ waa lɔ nyundua ne o bie Yeesu Kristo beŋkpoŋri ɛɛ la ta.

⁴ Ya dɛ nyin kɛ ya bwa bwara sɔɔh yaa kɛrɛdɛ. A waa ya chwerɛ tɔn nɔ baa tɛ heyaa la.

Korowii chaahnɔ kɛ kandea ken

⁵ Waa yaa noa le Yeesu be dɛɛ bol he be laanee kɛŋɔ, Korowii do kɛŋɔ kon waa chaahna ken. Wechɔɡa bɛlbwa toole o nɛ.

⁶ Anomanta, dɛ ya ŋɔ ya ne o ɛ beŋkpoŋ, kɛ dɛ berɛ dɛɛ ɛ biro bini wa aa, ya teŋe nyosone. Ya we-ɛɛla dɛ baɡle kɛ ya waa ta kasinteŋ dɔe.

⁷ Korowii waa aa chaahna la, dɛ ya dɛ ɛ ya waa bwa a chaah kɛ on aa, dɛ ya ne yabala pɛo dɛ ɛ beŋkpoŋ. Dɛ Korowii Bie Yeesu chal la laa ya wechɔɡa bɛlbwa dɛɛ kpɔ ya nɛ.

⁸ Dɛ ya ŋɔ wechɔɡa toole ya nɛ aa, ya dɛ neɡre ya nyuune. Dɛ yaa kasinteŋ bol.

⁹ Dɛ ya bol ya wechɔɡa baɡle Korowii aa, o ɛ nɛndɛɛɡe dɛ ɛ kasinteŋ te dɛɛ teŋɛ o nyobaɡa ta. Wɛɛ kpɔɔ kɛ yaa, dɛ́ laa doŋa bwa kpɔ ya nɛ.

¹⁰ Dɛ ya ŋɔ ya ta wechɔɡa ɛɛ te naa, dɛ ya yerɛ Korowii nyosonteŋni. O waa la ɡe toole ya bini.