1 Kɔrent 9 - mzwDBL

Waa aa chɛ Yeesu torome kɛ wɛɛ ɛ

¹ N ta n te dɔe dɛɛ di n nyu aa? N ta Yeesu torome ɛɛ yaa? N ta ya Dɔɔ Yeesu nae yaa? He teŋa haa dɛ teŋɛ Yeesu nɛɛ nɔ le toma maa ɛa he bini ya Dɔɔ kpeɡri ta la.

² Dɛ bane ta sɛɛh kɛŋɔ Yeesu toromee men aa, he te jemɔ kɛrɛdɛ kɛŋɔ n ɛ o torome, dɛkalkɛŋɔ pɛɛ he ne waa pɛa la dɛ baɡle kɛŋɔ n ɛ o torome kpela.

³ Dɛ nɛra dɛ pwaah mɛ naa, kenii mɛɛ ŋɔ.

⁴ Nɛra dɛ cha yaa kondikwaa ta naa, dɛ aŋwɛnɛ ta laa aa?

⁵ Yeesu Kristo nimanar ne Pita ne Yeesu toroma la bwa mo haahna ba ne baa valɛ. Ya te ta ɡɛ ŋwɛnɛ dɔe kɛ ya mo haahna baa ɛ asɔre tena ya ne baa valaa?

⁶ Kɛɛ n ne Banabas ɡboo chɛ kɛ ya koh mɔɔ dɛɛ di?

⁷ Dɛ he ɛ sooja dɛɛ kaa laa laa, toma la ta laa hɛɛ di aa? He parɛ koo aa, haa koo la kondikwaa di aa? Nateɡre besoo wola o nae elnee nyɔɔ?

⁸ Nɛwɛnyini waa ɡbo laa dɛɛ baɡle ɡɛ. Mosis Mmara ɡba baɡle ɡɛ.

⁹ Mosis chwerɔ ŋɔ, “He bɛ nabal waa dɛ ɛ toma he koo ta la nyoa vɔwɛ dɛ́ ŋɔ o bɛ kwaa di.” Korowii ŋɔ ken aa, kondɛɛra ɡboo o ŋɔ aa?

¹⁰ Nɛwɛnyini waa o koh ŋɔ ɡɛ, ɡɛ aa cha yaa la waa o chwera, ásɛ nomɛlbwa waa dɛ parɛ, ne nomɛlbwa waa dɛ komɛ kwaa la dɔ hwɛɡa kɛŋɔ wɛɛ dɔ kwaa la anee.

¹¹ Dɛ ya bol Korowii Waa he be asɛ he dɔ Korowii mkpa aa, dɛ a ta maɡrɛ kɛ ya lɛ kondikwaa le he be, dɛ́ won dɔ harɛ nɔ ta bokpeɡa aa?

¹² He dɛ tɛ bane ɡɛ. Dɛ ɡɛ nɛra la dɔ ɡɛ ŋwɛnɛ aa, amɔ dɛ ya te ta pɔeh yaa? Kɛ ya te aa ɡɛ kpeɡri la baɡle he nɛ, dɛ dɔ bambile wobɛlbwa ta dɛ bɛ Yeesu Kristo Amanesoma la ŋwɛnɛ tɔ.

¹³ Haa jemɛ kɛŋɔ nɛra baa dɛ ɛ toma Korowii Dea la, a taa ba dɔ kwaa dɛɛ di, asɛ banɔ la ɡe baa dɛ kpoo kwaa baa kpɔa baa tɛ Korowii o Dea bini la, a taa ba ɡee di kɛɛ?

¹⁴ Gɛ tentenee ya Dɔɔ ɛ tɛ nɛra baa dɛ bol Amanesoma la dɛ ŋɔ báa di a ta.

¹⁵ N dɔ ŋwɛnɛ kɛ n ɛ a bwa, kɛ n ta nomɛlbwa be ŋɔe ŋɔ ó tɛ mɛ komɛlbwa bwa. Maa chwerɛ dɛɛ nyin kɛ he tɛ mɛ a ɡɛ kwaa nɔ. N sewɔ bɔ n be kɛŋɔ waa maa koh a waa maŋkura n te la le n nɔn ta.

¹⁶ Maa won koh Amanesoma nɔ bola waa dɛɛ baɡle n te, dɛkalkɛŋɔ Korowiirii dɛɛ do mɛ asɛ mɛɛ bol. Dɛ n ta bolaa, mɛɛ dɔ waa.

¹⁷ Dɛ n tetoora nee mɛɛ ɛa aa, a fe maɡrɔ kɛ n fe ɛɛ lɛ a kembɔr. Kɛ Korowiirii kpɔ o Amanesoma la do n nɔn ta ŋɔ ń bol nɛra be. Anomanta, n ɡbaɡba tetoora laa mɛɛ ɛa.

¹⁸ Kembɔr besoo mɛɛ dɔɔ? N kembɔree kɛŋɔ ń won bol Amanesoma la baɡle nɛra pɛɛpɛɛ dɛ bɛ kpeɡri maa dɔa la baɡle ba nɛ.

¹⁹ N fe dɛ di n nyu, nomɛlbwa laa dɔɔ mɛ, kɛ n ɛ n te yom dɛɛ ɛ toma dɛɛ tɛ nomɛlbwa, dɛ́ fee dɔ nɛra kɛrɛdɛ tɛ Korowii.

²⁰ Maa dɛ ɛ toma Juu tena bini la, n ɛ n te kɛŋɔ Juu te ásɛ dɛ dɔɔ ba tɛ Korowii. N ta Mosis Mmara la ta jae te, kɛ dɛ n koo nɛra baa dɛ teŋɛ a ta la nɛ aa, n dɛ ɛ n te kɛ ba bini bɛl, ásɛ dɛ yon dɛɛ teŋɛ ba mmarare la ta ɡɛ ba yon dɛɛ ɛ la, ásɛ dɛ dɔɔ ba tɛ Korowii.

²¹ Gɛ tentenee dɛ n koo nɛŋhɔɔhra baa wola Mosis Mmara la ta teŋɛ nɛ aa, n yon ɛ n te kɛ ban, ásɛ dɛ dɔɔ ba tɛ Korowii. Kɛ aa baɡle kɛ n dɛ vɛh Korowii nyoa wobol. N dɛ teŋɛ ɡɛ Yeesu Kristo aa ŋɔa yá teŋɛ la ta.

²² Dɛ n kaa koo nɛra bini, dɛ ba yarada aa kanɛ Yeesu Kristo waa ta naa, n ɡe dɛ ɛ n te kɛŋɔ ba bini bɛl, ásɛ dɛ won dɔɔ ba. Gɛ nomɛlbwa aa doa la, ɡɛɛ mɛɛ ɛ n te, ásɛ dɛ che ŋwɛnɛ bɛl ta, dɛ́ won dɔ bane, ásɛ Korowii lɛɛ ba.

²³ Amanesoma nɔ waa mɛɛ teŋɛ anɔ bwa ta la, ásɛ dɛ won na som maa dɛ bol a waa la ane.

²⁴ Dɛ nɛra dɛ ba chwae dɛ lɛ komɛl aa, ba bwa dɛ chwa te, kɛ ba bini beŋkpoŋii dɛɛ dɔ kon la. Anomanta, hé chwa kɛrɛdɛ dɛ́ dɔ kon la.

²⁵ Nomɛlbwa waa jemɛ chwae, dɛɛ tɛɡre o te dɛ́ chwa lɛ komɛl la, o dɛ dɔ haŋra kwaa bwa ta dɛ́ ka chwa dɛ́ tɔ sie ásɛ ba kpɔ ɡbɛrɛ piu. Kpɔɡa nee ba sɔh ɡɛ ɡbɛrɛ la, waa biɡri dɛ o chɔɡɔ. Kɛ ya te chwae yaa dɛ chwa la, ya dɛ nyin ɡbɛrɛ waa wola chɔɡ bwa.

²⁶ Anomanta, n dɛ chwa n sie dawɛ komɛl ta. Maa chwa pɛɛ. N do kɛŋɔ nɛn waa dɛ yo, maa nɔɔra ta pɛɛpɛɛ.

²⁷ N dɛ lawɛ n te, dɛɛ haŋre kɛrɛdɛ kɛ, n ɡbaɡba maa dɛ bol Amanesoma nɔ dɛɛ baɡle nɛra nɔ, n bɛ ba koni dɛ́ horɛ.