1 Kɔrent 8 - mzwDBL

Kondikwa baa kpɔa tɛ voɡa wepɛɛre

¹ A ka kwaa baa kpoora dɛɛ tɛ voɡa wa. A waa jema te, ya bwa jemɛ a wa. Kɛ nɛwɛnyini wejema ɡelɔ wɛɛ nyin sɔn. Asɛ nɛnnyin ɡe ɛ chae.

² Nomɛlbwa waa dɛ lii kɛŋɔ o ɛ wejereme la, o ta wejema aa chɛ kɛ o jemɛ la dɔe mɔɔ.

³ Naate waa dɛ nyin Korowii la te, Korowii ɡba jemɔ.

⁴ Anomanta, voɡ kwaa dii maa dɛ bol a waa nɔ, ya jemɔ kɛ voɡa ta komɛlbwa ɛɛ harɛ nɔ ta, Korowii beŋkpoŋii lole.

⁵ Kwaa nɛra aa kpɔa ɛ Korowii dɛɛ yera ba dɔɔranar la warɔ, dɛ do nyundua ne harɛ.

⁶ Kɛ ya te be, Korowii lɔ beŋkpoŋ. Onee N Naa Korowii waa ta komɛlbwa, asɛ ya do le dɛɛ tomɔ la. Ya Dɔɔ ɡe lɔ beŋkpoŋ. Onee ya Dɔɔ Yeesu Kristo. O nɛɛ Korowii che dɛ ta komɛlbwa, asɛ ya ɡe che o nɛɛ dɛ dɔ mkpa.

⁷ Nomɛlbwa laa jemɛ ɡɛ. Bane duu ɡɛ voɡa nɔ biɡri a man ba. Hale ba le fini, dɛ ba di kwaa baa kpoora tɛ voɡa nɔ naa, dɛ ba liire dɛ ɛɛ ba kɛŋɔ voɡa laanee dɔ kwaa la. Ba yarada aa wola kanɛ Yeesu waa la ta nomanta, dɛ ba dɛ lii kɛŋɔ ba ɛ wechɔɡa.

⁸ Ya kondikwaa yaa dɛ dia laa dɛ́ ɡel ya ɛ nɛndɛɛɡa Korowii be. Dɛ ya dɛ dia oo, ya dɛ kia oo, aa wobɛlbwa baɡle.

⁹ Kɛ ane abwa, hɛ́ɛ nyiŋi kɛrɛdɛ, kɛ dɛ he ta an kie, he dɛ dia aa, he bɛ ɡel he we-ɛɛla neɡre nɛra ba yarada aa wola kanɛ Yeesu waa ta ba kia la.

¹⁰ Nɛn o yarada aa wola kanɛ Yeesu waa ta la, o na he nɛn haa jemɛ Yeesu waa la kɛrɛdɛ soɡe voɡ mun dɛɛ di kwa aa, aa ɡeloo o ɡe di.

¹¹ He ɡelɔ he dɔŋ waa wola kiŋkiŋ cheɡɛ, Yeesu Kristo aa koh o waa sewɛ, ɛɛ ba he wejema ne daŋra dɛ́ nyoɡre aa?

¹² Dɛ he dɛ ɛ he bala ba yarada aa wola kanɛ Yeesu waa ta la wechɔɡa ken asɛ ba tea bini chɔɡ aa, Yeesu Kristoo hɛɛ ɛ wechɔɡa la.

¹³ Dɛ n nao kɛ kondikwaa maa dɛ di la ɛɛ ɡeloo n dɔŋ ɡe di a kaa o ne wechɔɡa ta naa, amɔ te mɛɛ ɡel a dii, ásɛ n dɔŋ ɡe bɛ di dɛ́ ba kaa wechɔɡa ta.