1 Kɔrent 7 - mzwDBL

Hahmor ne yal wepɛɛre

¹ He fa chwerɛ tɔn dɛ ba bɔɔ mɛ ŋɔ, dɛ baa ŋɔ waa haahnee mo aa, a wer aa? Baa ŋɔ waa haahnee mo aa, a wer.

² Kɛ jwamane aa wara la nomanta, a chɛ kɛŋɔ baa bɛlbwa dɔ o haah, ásɛ haah bɛlbwa ɡe dɔ o jaa.

³ Baa bɛlbwa bɛ ŋɔ o ne o haah naa chɔ, ɡɛɛ haah ɡe bɛ ŋɔ waa sɛh o ne o jaa chɔ.

⁴ Haah ta o bwadabii kpeɡri dɔe chɔe bɔr, o jaaree dɔ kpeɡri. Gɛɛ baa ɡe aa wola o bwadabii kpeɡri dɔe, o haahnee dɔ kpeɡri.

⁵ Anomanta, bɛlbwa bɛ o te kpɔ sɔh o dɔŋ chɔe be pera, atane kɛŋɔ he bwa sɛoh kɛŋɔ he dɛ nyin kɛ hé kpɔ bambibeŋkpoŋ soŋe Korowii tɔpere bɛl tama mɔɔ. Gɛ te wer. Kɛ dɛ he ɛ ɡɛ tonaa, hé berɛ pɛ ja. Dɛ he ta pɛɛ yaa, haa wola won lawɛ he te la, Bɔnsam ɛɛ ɡeloo hé ɛ wechɔɡa.

⁶ Waa nɔ maa baɡla nɔ ta denɛ dɛɛ do heyaa ŋɔ a chɛ kɛŋɔ hé mo haahna. Kɛ n dɛ baɡle kɛŋɔ, dɛ he mo haah naa, a ta wechɔɡa ɛɛ.

⁷ N te fe dɛ nyin kɛŋɔ nomɛlbwa fee bɛ haah mo, dɛ́ so ɡɛ maa soɡa nɔ. Kɛ nomɛlbwa laa Korowii ta ŋɔ ó ɡbo so dɛ bɛ haah mo. O dɛ tɛ nomɛlbwa o we-ɛɛla waa dɛ ɛ la kpeɡri, bɛl yon do kpeɡri anɔ ta, bɛl ɡe do kpeɡri anɔ ta.

⁸ Waa maa dɔa dɛ tɛ nɛra baa wola haahna dɔe, ne haahna baa wola jaranar dɔe, ne nɛra ba jaranar aa serewa laanee kɛ, bá fee so ɡɛ n ɡbo aa soɡa nɔ.

⁹ Dɛ bɛlbwa nao kɛŋɔ waa won haŋre dɛ́ ɡbo so te naa, amɔ ó mo haah kɛɛ ó yalɛ. A bɔ kɛŋɔ haah kɛɛ baa pɛla aa dɔe aa we he nɛɛ kohona.

¹⁰ Anɔ la maa bera dɔ dɛɛ tɛ hahmoola ne jadɔɔhnaa nɔ. N ɡbaɡba laa dɛɛ bol. Ya Dɔɔree ŋɔa ŋɔ haah bɛ o jaa vɛh.

¹¹ Kɛ dɛ o vɛh o jaa aa, o bɛ baa bɛlbwa yalɛ kpa, atane kɛŋɔ o berɛ la o jaa la be, ásɛ ba ka pɛ dɛ́ so ja. Baa ɡe bɛ o haah vɛh.

¹² N ɡbaɡbaa dɛɛ bol anɔ te dɛɛ tɛ he kar la. Ya Dɔɔ laa bola. Dɛ he ɛ asɔre te dɛ mo haah waa wola asɔre te ɛɛ, a too o tea o ŋɔ wɛɛ soo waa, bɛ on vɛh.

¹³ Dɛ haah ɡe ɛ asɔre te dɛ yalɛ baa waa wola asɔre te ɛɛ, dɛ o tea toorɔ kɛŋɔ o ne wɛɛ soo waa, haah la bɛ on vɛh.

¹⁴ Baa waa wola asɔre te ɛɛ la, o mo haah waa ɛ asɔre te aa, pɛɛ o ne haah la aa pɛa la nomanta, Korowii kpɔ baa la dɛɛ ɛ o nɛn. Gɛɛ a do, haah ɡe ta asɔre te ɛɛ dɛ yalɛ baa waa ɛ asɔre te aa, pɛɛ o ne waa pɛa la nomanta, Korowii kpɔ haah la ɡe dɛɛ ɛ o nɛn. Dɛ ɡɛ laa aa, ba bii fe ta Korowii bii ɛɛ, kɛ taraken ba ɛ o kwa.

¹⁵ Dɛ onɔ la waa wola asɔre te ɛɛ ŋɔ wɛɛ vɛh o dɔŋ waa ɛ asɔre tee yaa, tɛo ŋwɛnɛ wɛɛ la. A ba ɡɛ naa, a ta wechɔɡa ɛɛ. Korowii dɛ nyin kɛŋɔ ya so deŋnesɔɔhna ta.

¹⁶ Dɛ Korowii ɛɛ che haah haa ɛ asɔre te nɛɛ dɛ́ lɛ he jaa aa, he jemaa? Gɛɛ a do baa haa ɛ asɔre te la, dɛ Korowii ɛɛ che he nɛɛ dɛ́ lɛ he haah naa, he jemaa?

¹⁷ Korowiirii tɛ bɛlbwa o we-ɛɛla wɛɛ ɛ. Anomanta, a chɛ kɛŋɔ bɛlbwa ɛ ɡɛ Korowii aa leo dɛ tɛo ŋɔ wɛ́ɛ ɛ la. Gɛɛ mɛɛ bol asɔre tena baa lɔ bobɛlbwa la be.

¹⁸ Dɛ ba kpɔ kere chɔɡɛ nomɛl mɔɔ Korowii leo o ba ɛ asɔre te aa, o bɛ kpɔ sɔh. Korowii le nomɛl ɡe, dɛ ba ta kere kpɔe chɔɡɔ waa, o bɛ ɡel ba kpɔ kere chɔɡɔ.

¹⁹ Ba kpɔ kere chɔɡɛ noo, a ta waane ɛɛ, ba ta kere kpɔe chɔɡɛ noo, a ta waane ɛɛ. Kɛ Korowii Waa la ta teŋaa ɛ kasinteŋ.

²⁰ Anomanta, do ɡɛ haa doa mɔɔ Korowii lee he ba ɛ asɔre te la.

²¹ Dɛ he ɛ yom dɛ ba ɛ asɔre te aa, bɛ ɡel a we he nɛ. Kɛ dɛ ba tɛɛ ŋwɛnɛ ŋɔ hé le he yom ɛɛ la ta naa, bɛ vɛh.

²² Nomɛlbwa waa ɛ yom dɛ ɛ asɔre te la, o dɔ o te Korowii be. Gɛɛ a do, nomɛlbwa waa dɔ o te dɛ ba ɛ asɔre te la, o ɛ Yeesu Kristo yom.

²³ Korowiirii kpɔ Yeesu Kristo chal la yawɛ heya, anomanta, he bɛ lii kɛŋɔ nɛraa dɔ heya.

²⁴ Yabala, ɡɛ he fa aa doa mɔɔ Korowii le heyaa he ba ɛ asɔre tena la, hé ta do ɡɛ, ásɛ he ne Korowii do le.

²⁵ Korowii ta men nɛra baa wola yalɛ la waa baɡlɛ, kɛ o dɛ cha mɛ asɛ mɛɛ ɛ o toma kɛrɛdɛ. Anomanta, mɛɛ baɡle ɡɛ maa jemaa.

²⁶ Waa lole dɛ dawɛ ya nɛɛ kɛrɛdɛ, anomanta, n te be te, a wer kɛ ɡɛ haa soɡa la, hé ta so ɡɛ.

²⁷ Dɛ he dɔ haah naa, bɛ ŋɔ hɛɛ vɛoh. Dɛ he ta bɛl dɔe ɡe aa, bɛ ŋɔ hɛɛ nyin bɛlee.

²⁸ He mo haah naa, a ta wechɔɡa ɛɛ. Dɛ haah ɡe yalaa, a ta wechɔɡa ɛɛ. Kɛ waa lɔ a ta he soɡa bini, a waa mɛɛ nyin n lɛ heyaa le a ta la.

²⁹ Maa ŋɔ ɡɛ nɔ, yabala, yaa harɛ nɔ taa biɡri bɛlbwa. Anomanta, le fini dɛɛ kaa, a chɛ kɛŋɔ he banɔ la haa dɔ haahna la ɛ kɛŋɔ he ta haahna dɔe ken,

³⁰ he banɔ la haa dɛ wi ɛ kɛŋɔ he waa aa sume ken, he banɔ la ɡe haa dɛ mamɛ ɛ kɛŋɔ he sie ta lɛɛ ken, he banɔ la ɡe aa dɛ yawɛ la ɛ kɛŋɔ kwaa haa yawa la ta he kwaa ɛɛ ken.

³¹ Asɛ he banɔ la ɡe haa dɛ ɛ wobɛlbwa harɛ nɔ ta la bɛ ɛ a ɡwaa kohona, dɛkalkɛŋɔ harɛ nɔ ne o waa dɔ jaɡa. Waa biɡri bɛlbwa.

³² N dɛ nyin kɛŋɔ harɛ nɔ ta waa bɛ heyaa ha kohona. Baa waa wola haah dɔe la, o siwi dɛ swɛɛ Korowii toma ta, wɛɛ nyin kɛŋɔ Korowii sie lɛ o nɛ.

³³ Kɛ baa waa dɔ haah la te sie dɛ beɡre harɛ nɔ ta kwaa ta, ásɛ o haah sie ɛɛ lɛ o nɛ. Webele anɛɛ yon do o baŋa.

³⁴ Haah waa wola yalɛ, kɛɛ tolo waa wola baa jemɛ mɔɔ la, o sie dɛ beɡre Korowii toma ta, o kpɔ o te ne o liire bwa dɛɛ tɛ Korowii toma. Asɛ haah waa yala la ɡe sie ɛɛ beɡre harɛ nɔ ta kwaa ta, ásɛ o jaa sie lɛ o nɛ.

³⁵ N dɛ nyin kɛ n cha heya, a waa ɡela mɛɛ bol waa ɡɛ la. Maa nyin kɛŋɔ he ŋwɛnɛ tɔ. N dɛ nyin kɛŋɔ he ɛ anɔ la aa wera, ásɛ he liire bwa won do Korowii toma ta.

³⁶ Dɛ baa bɛlbwa dɔ o bihaah waa kpeɡa ne yala, o ŋɔ waa ɡel o yalɛ, dɛ berɛ na kɛŋɔ a wer kɛŋɔ bie la yalaa, ó ɛ ɡɛ bwa waa dɛ nyin. Ó ɡel o yalɛ. A ta wechɔɡa ɛɛ.

³⁷ Dɛ baa bɛlbwa nyiŋi ɡɛ waa nɔ kɛrɛdɛ, dɛ ŋɔ waa o bihaahnee kpɔ tɛ baa bɛlbwa ó mo aa, dɛ nomɛl laa hɛo, dɛ o ɡbaɡba bambile binii a le, asɛ o ta on kpɔe tɛ baa laa, o ɛ wa.

³⁸ Anomanta, dɛ nomɛl lawɛ o bihaah tɛ baa o mo aa, o ɛ kɛrɛdɛ. Kɛ naate waa wola o bihaah lawɛ tɛ baa ó mo la ɛa kɛrɛdɛ ɡwaa o dɔŋ waa lawɛ o bihaah tɛ yal la.

³⁹ Dɛ haah yalɔ, o jaa ta do le naa, baa laanee dɔ haah la kpeɡri. Kɛ dɛ baa la sewaa, o ta haah la kpeɡri dɔe kpa. Haah la won kaala, dɛ́ ka yalɛ baa waa dɛ nyinu ja. Kɛ o bɛ baa waa wola asɔre te ɛɛ yalɛ.

⁴⁰ A ka n waa aa, dɛ o fe ta yalɛ kpa kwaraa fe wer tɛo ɡwaa kɛŋɔ waa yala. N ɡbaɡba liire te, kɛ Korowii Domadɛɛɡe la soɡe n nɛ.