1 Kɔrent 6 - mzwDBL

Asɔre tena ɡbo ɛɛ bol ba ne ba bala baah wa

¹ Umee ŋɔ he be ŋɔ dɛ he bini bɛl ne o dɔŋ asɔre te dɔ waane aa, ó ɡel Korowii nɛra ba wa aa toɡra, dɛ́ kpɔɔ la nɛra baa wola Korowii tomɛ be bá ka bola ɔ? Korowii nɛra laa dɛ bola aa?

² Haa jemɛ kɛŋɔ kerekere Korowii nɛraa dɛɛ ba harɛ nɔ ta nɛra waa bola dɛ́ pa bole kɛɛ? Dɛ heyaa dɛ́ ba bol ba waa te naa, ɛrɛɛ haa wola won bol wejeɡre aa do ken nɔɔ?

³ Haa jemɛ kɛŋɔ yan dɛ́ ba bol nyundua toroma waa dɛ́ pa bole kɛɛ? Harɛ nɔ ta nɛra waa yaa wola won bol aa?

⁴ Dɛ he ne he dɔŋ dɔ waane aa, ɛrɛɛ he kpɔ dɛɛ do nɛra asɔre tena aa wola ban kpɔe dɛɛ ɛ wobɛlbwa la nɔn ta ŋɔ bá bola ɔ?

⁵ A dɔ sihiih tɛ heya. Amɔ wejereme beŋkpoŋ kwaraa toole he bini dɛ́ won bol he baah wa,

⁶ asɛ hɛɛ samane dɔŋa dɛ ɡel nɛra baa wola asɔre tena ɛɛ kaa bol he waa nɔ naa? A ta ɡɛ chɛɛ.

⁷ Haa dɛ samane dɔŋa nɔ ɡba kwara baɡlɔ kɛŋɔ he dɔɔ di bolchɔɡe. Dɛ he ne he dɔŋ dɔ waane aa, lawɛ bambile. Dɛ o ŋwɛɛ kwaraa naa, kpɔ kɛo. A wer ɡwaa kɛŋɔ haa samano.

⁸ Kɛ haa ɡɛ ɛ. Heyaa dɛɛ ɛ dɔŋa wechɔɡa, dɛɛ faah dɔŋa, hale he bala asɔre tena.

⁹ Haa jemɛ kɛŋɔ wechɔɡ-ɛɛra aa Korowii Kora la taa ja kɛɛ? He bɛ he nyu neɡre. Nɛra baa dɛ ɛ sɛnwa, ne voɡtoroma, ne nɛra baa dɛ bɔ jwamane, ne baala ba ne ba bandɔŋa aa dɛ chɔ haah ne baa,

¹⁰ ne ŋwɛɛra, ne nɛra ba sie aa dɛ beɡre ba dɔŋa kwa, ne sennyɔdɛɛra, ne nɛra baa dɛ bol dɔŋa wobochɔɡa, dɛ nɛra baa dɛ faah nɛra, nɛn waa dɛ ɛ a ɡɛ waa nɔ te bɛlbwa la, waa Korowii Kora la taa ja.

¹¹ He bini bane fa kpoŋe ɡɛ da nɔ. Kɛ taraken Korowii koh ya Dɔɔ Yeesu Kristo ne Korowii Domadɛɛɡe la toma la waa dɛ sɔ he wechɔɡa bwa ta, dɛ ɡel he ɛ nɛndɛɛɡa he waa su o siwi.

Jwamane bɔe wa

¹² Nomɛl te kompɛɛ, “N dɔ ŋwɛnɛ kɛ n ɛ wobɛlbwa.” Kpelaa, kɛ a bwa laa wera tɛ yaa. N fe jemɔ kɛ maa komɛlbwa ki, kɛ maa ɡel komɛlbwa ɡwaa n nɛ.

¹³ Bɛl ɡee ŋɔɔ, “Tea waa kondikwaa do le, asɛ kondikwaa ɡe che dɛ tɛ tea.” Kpelaa, kɛ Korowii ɡelɔ a bwa dɔ jaɡa dɛ chɔɡ. O ta nɛn bwadabii ɛɛ tɛo ŋɔ ó kpɔ ɛ jwamanwa, kɛ o ɛo tɛo kɛŋɔ ó kpɔ tomɔ. Anomanta, nɛn bwadabii ɛ Korowii kon, wɛɛ tɛo komɛlbwa.

¹⁴ Gɛ Korowii aa kpɔ o kpeɡri ir ya Dɔɔ Yeesu Kristo seo ta la, ɡɛɛ wɛɛ ba o kpeɡri la kpɔe dɛ́ ir ya ɡe seo ta.

¹⁵ Haa jemɛ kɛŋɔ he bwadabii ɛ Yeesu Kristo bwadabii pera kɛɛ? Dɛ ɡɛɛ a do te naa, amɔ a chɛ kɛŋɔ ń kpɔ n bwadabii waa ɛ Yeesu bwadabii pera la ka bɔ jwamane aa? Akai! He bɛ ɡel a ba ɡɛ.

¹⁶ Haa jemɛ kɛŋɔ nomɛlbwa waa bɔ jwamane la, o ne haah la pɛo dɛ ɛ bwadabii beŋkpoŋ aa? Korowii Tɔnee baɡla ŋɔ, “Nɛra banɛ la ɛ beŋkpoŋ.”

¹⁷ Nomɛlbwa waa kpɔ o te pɛl ya Dɔɔ la ɡe, o ne o bwa dɔ Doma beŋkpoŋ.

¹⁸ Anomanta, hé laa he te dɛɛ kpɔ jwamane ta. Wechɔɡa bɛlbwa nɛn aa dɛ ɛ la, aa o bwara bini so. Kɛ nɛn waa dɛ bɔ jwamane la, o ɡbaɡba bwadabii wɛɛ do wechɔɡa ta.

¹⁹ Haa jemɛ kɛŋɔ he bwadabii ɛ Korowii Domadɛɛɡe la sobɔr kɛɛ? Korowii kpɔɔ tɛ heya, o so he nɛ. Anomanta, he laa dɔ he te. Korowiirii dɔ heya,

²⁰ dɛkalkɛŋɔ o kpɔ Yeesu Kristo chal yawɛ heya. Anomanta, hé nyiŋi he bwadabii ta kɛrɛdɛ, dɛ́ kpɔ tomɛ Korowii dɛ́ tɛo sɔn.