1 Kɔrent 5 - mzwDBL

Jwamane bɔe asɔre ta wa

¹ N dɛ no kɛ he bini bane dɛ bɔ jwamane aa wola were, hale nɛra baa wola Korowii tomɛ kwara aa wola ɡɛɛ ɛ. Ba ŋɔ he bini bɛl lawɛ o mɛɛ haah kwaraa dɛɛ chɔ.

² A fe chɛ kɛŋɔ he ɡel he tea bini chɔɡ waa nɔ wa, asɛ hɛɛ maŋkura he te la. Aa were kɛŋɔ ɡɛ nɛn la ta ja he bini kpa!

³ N ɡbabir toole he be bela, kɛ n liire te lɔ he be. N dɔɔ pa naate waa ɛ ɡɛ waa nɔ bolchɔɡe kɛŋɔ n ɡbaɡba aa lɔ bela ken.

⁴ Dɛ he baa cheme ya Dɔɔ Yeesu sɔn ta, o kpeɡri do he nɛ, n ɡe liire do he bini naa,

⁵ hé kpɔ naate bwadabii do Bɔnsam nɔn ta ó chɔɡo, ásɛ awola tɔpere ya Dɔɔ aa ba la, ó ɡe ba lɛ o doma te.

⁶ Aa were kɛŋɔ hɛɛ maŋkura he te. Haa jemɛ kɛŋɔ iisi tama wono ɡel men damanta ɛɛ uɡe aa?

⁷ Anomanta, hé laa ɡɛ wechɔɡ-ɛɛ la kpɔ he bini, ásɛ o wechɔɡa aa do kɛŋɔ iisi la bɛ heyaa bu, ásɛ he do wer kɛŋɔ paanoo baa wola iisi a ta doe, dɛ di Galekaa Tɔpejen la. He do ɡɛ kpela. Yeesu Kristo koh ya waa dɛ sewɛ kɛŋɔ baa kpo peebie Galekaa tɔpere ta la.

⁸ Anomanta, hé ɡel ya kpɔ ya te kɛŋɔ yaa dɛ ba Galekaa kondikwaa dii ken, anee kɛŋɔ yá laa meesɔɔh ne wechɔɡa bɛlbwa soo siwi kpɔ ya bini, ɡɛ baa laa iisi kpɔ paanoo baa kpɔa dɛɛ di Galekaa ta la. Hé ɡel ya kpɔ kasinteŋ ne tepoŋ dɛ́ teŋɛ Korowii nɛ.

⁹ N tɔn n fa aa chwerɛ heyaa la, n baɡlɔ kɛ he ne nɛra jwamane aa lɔ ba sie ta la bɛ pɛ.

¹⁰ Banɔ la baa wola Korowii tomɛ dɛɛ bɔ jwamane, ba sie ɛɛ beɡre kwa, baa tomɛ voɡa la, ba te laa n ŋɔ hé laa he te kpɔ ba nɛɛ nɔ, dɛkalkɛ ba te lɔ bobɛlbwa. Haa lɔ harɛ nɔ ta nɔ, haa won laa he te kpɔ ba nɛ!

¹¹ Nɛra maa dɛ bol ba waa laanee nɛra baa ŋɔa ba ja yabala asɔre tena nɛ, kɛ dɛɛ bɔ jwamane, dɛ kpɔ suuɡa ɡwaa komɛlbwa, dɛɛ tomɛ voɡa, dɛɛ bol nɛra bwara wechɔɡa, dɛ nyɔ sen dɛɛ dɛɛ, dɛɛ ŋwɛ la. Ba ŋɔ ba ɛ asɔre tena dɛ berɛ dɛɛ ɛ waa aa do ken nɔ la, he ne ɡɛ nɛra nɔ te bɛlbwa bɛ pɛ, a ba ɛ kɛ hɛɛ pɛ nɔnee di kwa.

¹² Nɛra baa wola asɔre tena ɛɛ la te, n ta ŋwɛnɛ dɔe kɛ n bol ba waa dɛ́ pa bole. Korowiirii dɛ́ bol ba waa dɛ́ pa bole.

¹³ Nɛra baa ɛ asɔre tena la te, heyaa chɛ kɛŋɔ hé bol ba waa dɛ́ pa bole. Korowii Tɔn baɡlɔ kɛŋɔ “Hé doŋi wechɔɡ-ɛɛ le he bini.”