1 Kɔrent 4 - mzwDBL

Yeesu Kristo toroma wa

¹ A wer kɛ hɛɛ yerɛ yaa Yeesu Kristo bonɔɔna. Korowii baɡle yaa o wesɔɔhla dɛ kpɔ do ya nɔn ta ŋɔ yáa baɡle nɛra.

² Waa aa chɛ nɛn baa kpɔ waa do o nɔn ta laanee kɛŋɔ o ɡel o waa dɔ kasinteŋ.

³ Dɛ he dɛ kpɛɛ mɛ kɛɛ he dɛ chɔɡ mɛ noo, n waane laa. Nɛwɛnyini laa dɛ won bol n waa dɛ pa mɛ bole. N ɡbabir aa won kpɛɛ n te dɛ́ chɔɡ n te.

⁴ N ta wechɔɡa bɛlbwa nae n waa bini te, kɛ a ta baɡlɛ kɛ mɛɛ di bolee. N Dɔɔ Yeesu Kristoo dɛɛ ba n waa bola dɛ́ pa bole.

⁵ Anomanta, he bɛ nomɛlbwa kpɛɛ kɛɛ dɛ chɔɡo ka tel kɛŋɔ Yeesu Kristo aa ba. Dɛ o balaa, wobɛlbwa aa sɔah la ɛɛ le bochaahnee, wedɛɛɡa oo, wechɔɡa oo, a bwa ɛɛ leo, ásɛ wobɛlbwa aa sɔah dɛ do nɛwɛnyini bambile bini la chɔ baŋ, ásɛ Korowii kpɛɛ nomɛlbwa ɡɛ aa chɛo.

⁶ Yabala, n kpɔ toma n ne Apolos aa ɛa la dɛ che a ta dɛ baɡle waa nɔ, ásɛ he no a mun dɛ́ jemɛ waa aa wera kɛŋɔ he ɛ. Ba chwerɛ Korowii Tɔn bini ŋɔ, He bɛ ɛ ɡarɛ ɡɛ baa chwera Korowii Tɔn bini la. He bɛ bane kpɔ ɡwaa bane dɛ́ɛ maŋkura he te.

⁷ Umee ŋɔ he be ŋɔ he ɡwaa bane ɔ? Wobɛlbwa haa jema la, Korowiirii tɛɛ. Bɛ nyoa dɛɛ ta a do kɛŋɔ Korowii laa kpɔ waa haa jema la kɛɛ.

⁸ He dɛ lii kɛŋɔ he dɔ komɛlbwa a maɡre he ne, he ɛ dɔɔhna. He berɔ ɡarɛ yaa dɛɛ di kora. Dɛ he fe dɛ di kora kpela te naa, a fe bɔ. Ya ne he bwa fe ɛ koranar.

⁹ N te be, Korowii ɡelɔ ya banɔ nɔ yaa ɛ Yeesu toroma nɔ ka mun, dɛ do kɛŋɔ nɛra baa laɡ ba dɛɛ la ka kpoo ba, asɛ nɛra bwa ɛɛ nyiŋ ba, dɛkalkɛŋɔ nyundua toroma ne nɛra bwa dɛ nyiŋi yaa.

¹⁰ Yeesu Kristo nomanta, ya ɛ ɡɛna nɛra be, kɛ he dɛ yerɛ he te wejerema o waa ta. Ya ɛ nɛŋɡwɛɡra nɛra be, kɛ he ɛ he te o kpeɡnɛra. Ba dɛ duu heya, dɛ lawɛ ya te sie dɛɛ teɡɛ harɛ.

¹¹ Lɔr ne nyɔɡre dɛ kpo yaa, yakwanee yaa tɔ, nɛra ɛɛ lɔɔ yaa, ya ta sobɔr dɔe dɛ kpoŋe ba le fini.

¹² Ya bokpeɡa taa yaa di. Nɛra hah yaa dɛɛ chɛɡre yaa, kɛ ya te soŋe andɛɛɡa dɛɛ tɛɛ ba. Ba dɛ ɛ yaa hɔhɔrɔwa, kɛ ya te sɔɔh bwara dɛɛ tɛɛ ba.

¹³ Nɛra dɛ chɔɡ ya sɔn, kɛ ya te dɛ kwaa ba sɔn. Ya do kɛŋɔ puldoa haahra nɛra be, hale ba le fini.

¹⁴ N ta ɡɛ waa nɔ chwerɛ ba tɛ heyaa dɛ́ ɡel sihiih kpo heya, kɛ jae mɛɛ ja heya, haa ɛ n bidɛɛɡa maa dɛ nyin heyaa la nomanta.

¹⁵ Dɛ he dɔ nɛra ba warɛ pirim, dɛ won cha heyaa Yeesu Kristo ŋwɛnɛ ta naa, n ɡboo ta he mɛɛ. Menee tɔ sie bol Amanesoma la he be. A taa n che ɛ he mɛɛ Yeesu Kristo waa ta.

¹⁶ Anomanta, n dɛ soŋe heya, hé kpɔ n da.

¹⁷ A waa ɡela n tomɛ Timoti he be la. O ɛ n bie maa dɛ nyinu, wɛɛ no n deŋna waa Yeesu Kristo toma nɔ ta. Wɛɛ lii heyaa ɡɛ maa dɛ teŋɛ Yeesu Kristo waa la ta. Gɛ maa dɛ baɡle asɔrere ta bobɛlbwa laanee wɛɛ ba heyaa liira.

¹⁸ He bane dɛ baɡle he te dɛɛ lii kɛŋɔ maa ba dɛ ba na heyaa kpa.

¹⁹ Dɛ Korowii sɛoh waa, aa biɡri mɛɛ ba he bee, dɛ ɡbaɡba ba na kpeɡri nɛra baa dɛ baɡle ba te la aa dɔa. Ba wobol ɡbo ta laa n ŋɔ.

²⁰ Korowii Kora bini doe ta nyoa wobol pɛɛpɛɛ ɛɛ. O kpeɡri dɔe waa.

²¹ Ɛrɛ balaa hɛɛ nyin kɛ n ba he be nɔ? Hɛɛ charɛ he daa, ásɛ n nyin he waa dɛ́ ba bambisɔn ne kɛɛ, ń kpɔ chweema ba, dɛ́ ba tɛr he deŋne ɔ?