1 Kɔrent 3 - mzwDBL

Asɔre tena dɔŋa baah peɡra wa

¹ Yabala, n fa ta wone bol waa baɡle heyaa kɛrɛdɛ ɡɛ maa dɛ baɡle nɛra Korowii Domadɛɛɡe aa chaah ba sie la. N bola tɛ heyaa kɛ nɛra ba taa dɛ teŋɛ ba nɛwɛnyini mar waa ta, dɛkalkɛŋɔ he do kɛŋɔ bechale ken Yeesu Kristo waa la ta.

² Wobopwɛra nee n faa baɡle heyaa waa kɛŋɔ baa dɛ ɔr bechala waa wola tele ne kondikwaa dii la. Hale taraken kwara he ta tele mɔɔ,

³ dɛkalkɛŋɔ he ta dɛ teŋɛ nɛwɛnyini mar waa ta. Bɔweela ne naɡra aa lɔ he baah ta nɔ, nɛwɛnyini mar nɛɛ laa hɛɛ teŋɛ nɔ naa? Haa jemɛ kɛŋɔ dɛ he dɔ ɡɛ da nɔ naa, he ja nɛra baa dɔ harɛ nɔ ta liire nɛɛ kɛɛ?

⁴ Dɛ he bane ŋɔ he dɛ teŋɛ men Pɔɔl nɛ, asɛ he bane ɡe ŋɔ ba dɛ teŋɛ Apolos nɛ aa, amɔ dɛ he ne nɛra baa dɛ teŋɛ ba nɛwɛnyini mar ta la da beŋkpoŋ.

⁵ Bamewaa Apolos ne Pɔɔl hɛɛ maŋkura ba ɡɛ nɔɔ? Tom-ɛɛra ɡboo yaa. Korowiirii tomɛ yaa he be, ásɛ he no Yeesu waa dɛ́ yaradaa dɛ́ kpɔ he te tɛo. Toma Korowii aa kpɔa tɛ ya bini bɛlbwa laanee yaa ɛ.

⁶ Ya fa do kɛŋɔ nɛra baa dɛ du kwaa dɛ do he bini. Menee dua, asɛ Apolos ɡe ka ba, dɛ ba do nee a ta. Korowiirii ɡela kwaa la le dɛ kpeɡ.

⁷ Anomanta, nɛn waa dɛ du kwaa ne onɔ la waa dɛ do nee a ta la te bɛlbwa aa won waane ɛ. Korowii ɡbosoroo won waa ɛɛ, dɛkalkɛŋɔ onee ɡela kwaa won lee, dɛɛ kpeɡ.

⁸ Nɛn waa dɛ du kwaa ne onɔ la waa dɛ do nee a ta la te bɛlbwa ta korɛ. Korowii dɛ bɔ bɛlbwa kem ɡɛ aa chɛa.

⁹ Korowiirii dɔ yaa, ya ne o pɛ dɛɛ ɛ toma. Asɛ he ɡe do kɛŋɔ o koo waa dɛ parɛ, ne o dea waa dɛ do.

¹⁰ Korowiirii cha mɛ n won ɛ toma kɛŋɔ nɛn waa jemɛ dea mae kɛrɛdɛ la, dɛ pa dea la mun, asɛ nomɛl ɡe ba ma dɛɛ chɔŋɛ. Kɛ bɛlbwa nyiŋi kɛrɛdɛ ɡɛ waa maa dɛɛ chɔŋɛ.

¹¹ Yeesu Kristo ɡboo Korowii den kpɔ cheɡ kɛ dea mumpar. Dɛ Yeesu laa aa, nomɛlbwa toole yá che o nɛɛ ó lɛ yaa.

¹² A do kɛŋɔ bane aa kpɔ suuɡaswɛm, bane kpɔ suuɡapoŋa, bane kpɔ bwedɛɛɡa, dɛ ma chɔŋɛ dea la mumpar la ta, asɛ bane ɡe kpɔ daa ne kpɔɡa ne jaaɡe sɛɛh dɛ ma chɔŋɛ.

¹³ Dɛ Korowii Tɔpere waa dɛ ba nɛra bwa waa bola dɛ́ pa bole la telaa, belaa baa ba nae ɡɛ bɛlbwa toma aa doa. Awola tɔpere la, niinii dɛɛ ba toma nomɛlbwa aa ɛa la wer bini baɡla.

¹⁴ Dɛ nii la jo toma haa ɛa chɔŋɛ dea la mumpar la ta dɛ a ta fueh yaa, Korowii ɛɛ bɔe a kemee.

¹⁵ Kɛ dɛ nomɛl toma fuoh waa, Korowii ɛɛ lɛ naatee, kɛ wɛɛ paŋɛ komɛlbwaa. Wɛɛ ɛo kɛŋɔ kon baa keeru le nii ta ken.

¹⁶ Haa jemɛ kɛŋɔ he cheɡɔ tɛ Korowii Dea asɛ o Domadɛɛɡe la so he bini kɛɛ?

¹⁷ Anomanta, nomɛlbwa waa chɔɡ Korowii Dea la, Korowii ɛɛ chɔɡ naatee, dɛkalkɛŋɔ o Dea la waa doa la ɛ dea doŋa bɛlbwa aa wola toole o ta. Heyaa o Dea la.

¹⁸ He bɛ he te dɛɛ neɡre. Dɛ he bini bɛl lole dɛɛ lii kɛŋɔ o dɔ harɛ nɔ ta wejema aa, ó ɛ o te ɡɛne ásɛ dɛ dɔ Korowii wejema tenten.

¹⁹ Harɛ nɔ ta wejema ɛ wesale Korowii be. Ba chwerɛ Korowii Tɔn bini dɛ ŋɔ, “Nɛra kpɔ wejema ŋwɛnɛ ta dɛɛ ɛ wechɔɡa, kɛ Korowii dɛ laɡ ba.”

²⁰ Ba chwerɛ o bobɛl ɡe ŋɔ, “Korowii jemɛ harɛ nɔ ta wejerema liire kɛŋɔ a ɛ wepuu.”

²¹ Anomanta, he bɛ bane kpɔ dɛɛ ta nyoa. Komɛlbwa chɔ le dɛ tɛ heya.

²² Pɔɔl ne Apolos ne Pita, nyundua ne harɛ, mkpa ne seo, kwaa aa lole fini ne kerekere oo, heyaa dɔ a bwa.

²³ Yeesu Kristo ɡee dɔ heya, asɛ Korowii ɡe dɔ Yeesu Kristo.