1 Kɔrent 2 - mzwDBL

¹ Yabala, a ɡɛ saŋ n fa aa ba he be dɛ ba di Korowii waa danseɛ he be la, nyotor ne nɛwɛnyini wejema laa n kpɔ bol waa baɡle heya.

² Maa lɔ he be la, dɛ maa nyin kɛ n kpɔ wejema ane ja n wobol ta, nemenɛ Yeesu Kristo seo waa sewa daɡaɡre la ta la wa.

³ N fa aa lɔ he be la, n ta kpeɡri dii he nɛ. Ɔmee ne bochela nee n ɛ toma he bini.

⁴ N webaɡla bini la, n ta wejema kpɔe bol waa baɡle heyaa ásɛ he sie lɛ. Kɛ Korowii Domadɛɛɡe laanee di n wobol la danseɛ dɛ ɡel a do kpeɡri.

⁵ Anomanta, nɛn wejema ta laa a che hɛɛ yarada Yeesu Kristo dɛɛ teŋɛ o nɛ. Korowii kpeɡri la taa a che.

Wejema aa le Korowii Domadɛɛɡe be

⁶ Ya dɛ bol wejema waa te dɛɛ baɡle nɛra ba sie aa chaah Korowii waa ta kɛrɛdɛ. Wejema yaa dɛ baɡle a waa nɔ ta harɛ nɔ ta nɛra ne ba nɛnjena wejema ɛɛ. Ba te, ɛɛ baa ɛ pɛɛpɛɛ.

⁷ Korowii wejema waa yaa baɡle. A fa sɔɔh, nɛwɛnyini fa aa wola a waa jemɛ. A ɛ waa Korowii aa ɛa cheɡ yaa mɔɔ dɛ ta harɛ nɔ, ásɛ a ba cha yaa ya dɔ jirima.

⁸ Harɛ nɔ ta nomonjena fa ta a ɡɛ wejema nɔ mun noɛ. Dɛ ba fe no a mun aa, ba fe ta ɡelɛ ba kpo ya Dɔɔ la waa dɔ jirima la daɡaɡre ta.

⁹ A ɡɛ waa nɔ waa ba faa chwerɛ dɛ ŋɔ, “Waa nomɛlbwa aa wola a dɔŋa nae, nomɛlbwa aa wola a waa noɛ, nomɛlbwa ɡe aa wola an liire laanee Korowii ɛ cheɡ nɛra baa dɛ nyin o wa.”

¹⁰ Kɛ Korowii cheɡɛ o Domadɛɛɡe la ta dɛɛ baɡle yaa a waa ásɛ ya won no a mun. O Domadɛɛɡe la dɛ na wobɛlbwa bini kɛrɛdɛ, hale dɛ jemɛ Korowii wesɔɔhla ɡba.

¹¹ Nomɛlbwa aa o dɔŋ nyu bini jemɛ, nemenɛ naate ɡbaɡba. Gɛɛ a do nɛwɛnyini aa wola waa aa lɔ Korowii be jemɛ. O Domadɛɛɡe ɡbosoroo jemɛ o nyu bini.

¹² Ya te, liire yaa dɔa ta harɛ nɔ ta liire ɛɛ. Korowiirii kpɔa tɛ yaa. O kpɔ o Domadɛɛɡe tɛ yaa o do ya nɛ. Anee ɡela ya jemɛ kwaa waa tɛ yaa la.

¹³ Yaa dɛ bol waa nɔ, yaa nɛwɛnyini wejema ta cheɡɛ dɛɛ bola. Korowii Domadɛɛɡe laanee dɛɛ baɡle yaa waa yaa bol. Anɔ la waa bol la, anee ya ɡe kpɔ dɛɛ baɡle o wa.

¹⁴ Nomɛlbwa Korowii Domadɛɛɡe aa wola toole o nɛɛ la, o dɛ vɛh o Domadɛɛɡe la wa. A ɛ wesale tɛ naate, waa a mun no, dɛkalkɛŋɔ Korowii Domadɛɛɡe ɡboo ɡela nɛn ɛɛ no Korowii waa mun.

¹⁵ Nɛn Korowii Domadɛɛɡe aa lɔ o nɛɛ la jemɛ wobɛlbwa ŋwɛnɛre. Kɛ nɛn waa wola toole o nɛɛ la aa won jemɛ naate waa lɔ o nɛɛ la ŋwɛnɛre.

¹⁶ Korowii Tɔn bini ba pɛɛrɔ ŋɔ, “Nɛn besoo dɛ won jemɛ Korowii liire o? Umee dɛ won baɡlo waɔ?” Kɛ ya te dɔ Yeesu Kristo liire.