1 Kɔrent 16 - mzwDBL

Suuɡa baa ta tɛ Korowii nɛra

¹ A ka suuɡa yaa dɛ nyin ya ta tɛ Korowii nɛra la. Hɛ́ɛ ɛ ɡɛ n fa aa ŋɔ asɔre tena baa lɔ Galaasia harɛ ta be ŋɔ báa ɛ la.

² Kwasiara bɛlbwa, hé bini bɛlbwa ɛɛ kpɔ suuɡa, ɡɛ bɛlbwa waa wona dɛ le anɔ la Korowii aa chao o dɔ la ta, dɛ́ kpɔ cheɡ. Hɛ́ɛ ɛ ɡɛ, ásɛ n balaa, he bɛ suuɡa dɛɛ ta kpa.

³ Dɛ n balaa, mɛɛ chwerɛ tɔn aa dɛ baɡle n waa, he kpɔ ka tɛ nɛra haa dɛ yarada ba, dɛ́ tom ba bá kpɔ a ne kwaa haa tɛ Korowii nɛra la la Jerusalam.

⁴ Dɛ a chɛ kɛ n ne ba la naa, mɛɛ tɔ ba siee ya la.

Pɔɔl baɡle ɡɛ waa berɛ ba Makidoonia tena be

⁵ N dɛ nyin kɛŋɔ n la Makidoonia harɛ ta. Dɛ n baa le bela aa, mɛɛ ba he bee,

⁶ dɛ́ ba so he be dɛ́ biɡri tama. N ken ɛɛ so he bee alalawo saŋ, ásɛ alalawo saŋ kaa mɔɔ he ta mɛ ŋwɛnɛ ń kaa bela bwa maa dɛ nyin.

⁷ Dɛ n ŋɔ mɛɛ ba na heyaa tarakenii yaa, maa won biɡri he be. Kɛ dɛ Korowii sɛoh n ba won ba naa, mɛɛ biɡri he bee.

⁸ Mɛɛ so Ɛfesos bonɔɔ ka tel kɛŋɔ Pɛntekɔs Tɔpejen la aa tel,

⁹ dɛkalkɛŋɔ n dɔ bɔr bonɔ dɛ́ won ɛ Korowii toma kohona, ásɛ a le tɔnɔ dɛ tɛo. Nɛra baa dɛ nyin ba tɔ n toma ŋwɛnɛ la warɔ te.

¹⁰ Timoti ba he be naa, hé lɛo kɛrɛdɛ ásɛ o sie lɛ. Korowii toma maa dɛ ɛ la, anee o ɡee ɛ.

¹¹ Anomanta, he bɛ o sie lawɛ teɡɛ harɛ. Hé doo ŋwɛnɛ ásɛ o kpɔ bambisɔɔhna dɛ berɛ ba n be. N dɛ nyiŋi o ne yabala la ŋwɛnɛ.

¹² N soŋe ya dɔŋ Apolos ŋɔ ó ja yabala la nɛɛ ba ba he be, kɛ a ta o som doe kɛ ó la bela taraken. Dɛ o baa dɔ bɔr aa, wɛɛ bao.

¹³ Hɛ́ɛ nyiŋi he te kɛrɛdɛ ásɛ dɛ ta lawɛ waa la bini kiŋkiŋ. Hé dɔ bambile ásɛ dɛ ɡel lawa haa lawɛ waa la bini la do kpeɡri.

¹⁴ Hé kpɔ nɛnnyin dɛɛ ɛ wobɛlbwa dɛɛ tɛ nɛra.

¹⁵ Yabala, he jemɔ kɛŋɔ Stɛfanas ne o dem tenaa tɔ sie yarada Yeesu waa la Akaya harɛ nɛra la bwa bini, dɛ kpɔ ba te tɛo dɛ swɛɛ siwi dɛ ɛ toma dɛɛ tɛ Korowii nɛra ba wa aa toɡra.

¹⁶ Anomanta, n dɛ soŋe heya, hɛ́ɛ no nomɛlbwa waa do ken ne nɛra baa ja ba nɛɛ dɛɛ koh toma nɔ ta la deŋna wa.

¹⁷ Stɛfanas ne Fɔtonaatos ne Akaekus balɔ, asɛ a do n som taeh, dɛkalkɛŋɔ he ɡbabir ta wone ba ásɛ n na heya, kɛ ba chiɡ he naa ta dɛ ba,

¹⁸ dɛ ba do mɛ ɡbemba taeh, dɛ do he ɡe ɡbemba. Hɛ́ɛ duu nɛra baa do ken nɔ.

¹⁹ Asɔre tena baa lɔ Eesia harɛ la dɛ na heyaa taeh. Akwela ne Presela ne asɔre tena baa dɛ cheme ba dem la ɡe dɛ na heyaa Yeesu sɔn ta.

²⁰ Yabala bwa baa lɔ bonɔ dɛ na heya. Hɛ́ɛ lea dɔŋa kɛrɛdɛ kɛŋɔ nyabii.

²¹ Men Pɔɔl ɡbaɡbaa bol waa nɔ ba chwerɛ, asɛ n ɡbabir ɡe chwerɛ anɔ aa kaa nɔ. N dɛ na heya.

²² Nomɛlbwa waa wola ya Dɔɔ nyin la, Korowii nyotaahna lɔ o nɛ. Ya Dɔɔ, ba!

²³ Yá Dɔɔ Yeesu Kristo waa dɛ na nɛra sum la cha he bwa sekwaraa.

²⁴ He nɛra he ne Yeesu Kristo aa pɛa la, n dɛ na heyaa n bambile bwa ne. Aamen.