1 Kɔrent 15 - mzwDBL

Yeesu seo ta ira

¹ Yabala, hé ɡel n lii heyaa Amanesoma la n fa aa bola baɡle heyaa asɛ he no dɛ taa teŋɛ a ta,

² asɛ a lɛ heyaa la wa. Dɛ yarada haa dɔa Amanesoma la ta la ɛ kpela, he ta an vɛɛh dɛ kpoŋe a bini kɛrɛdɛ ɡɛ maa baɡle heyaa la te naa, amɔ te a lɛ heya. Dɛ ɡɛ laa te naa, amɔ dɛ he yarada la ɛ pɛɛpɛɛ.

³ Gɛ Korowii aa baɡ mɛ laanee n baɡle heyaa la. O baɡle waane aa ɛ wejena kɛŋɔ ɡɛ Yeesu Kristo aa koh ya wechɔɡa waa dɛ sewɛ ɡɛ Korowii Tɔn aa baɡle o waa mɔɔ a ɛ la.

⁴ Ba huɡo, asɛ a tɔpetooro wee la Korowii iru seo ta. Gɛɛ Korowii Tɔn baɡle mɔɔ a ɛ.

⁵ Pitaa tɔ sie nao, mɔɔ o habɔteŋra fi dɛ banɛ la bwa nao,

⁶ mɔɔ o habɔɔ nɛra lafraanue la ɡe nao kerabeŋkpoŋ. Ba ɡalɡa ta lole ba le fini, bane ɡe serewe.

⁷ A habɔɔ la, Jems nao, asɛ Yeesu toroma bwa nao.

⁸ Menee ka mun nao. N do kɛŋɔ bechala o nya aa kpoŋe o tea o ta beɛ kɛrɛdɛ mɔɔ ba lolɔ la.

⁹ Menee Yeesu toroma la bwa bechala n waa aa wola hiaih. N ta chɛɛ kwaraa kɛ ba yer mɛ o torome, dɛkalkɛ ɡɛ n fa aa hah asɔre tena dɛ ɛɛ ba hɔhɔrɔwa la aa were.

¹⁰ Kɛ Korowii sune n nɛ, dɛ cha mɛ. Chae waa cha mɛ laanee ɡela n do ɡɛ maa doa nɔ la. O suna waa sune n nɛɛ la ta pɛɛ ɛɛ. N iro, asɛ dɛɛ ɛ o toma la kohona hale dɛ ɡwaa n bala toroma la kwara. N ɡbaɡba kpeɡri ne laa mɛɛ ɛ toma nɔ. Korowiirii sune n nɛɛ dɛ cha mɛ, asɛ mɛɛ ɛa ɡɛ la.

¹¹ Dɛ menee bol Amanesoma la baɡle heya o, nɛra banee yoo, webeŋkpoŋii ya bwa ɛɛ baɡle, anee he ɡee yarada.

Nɛra seo ta ira

¹² Dɛ ya baɡle Yeesu Kristo waa ŋɔ Korowiirii iru seo ta naa, ɛrɛɛ he bini bane berɛ dɛɛ ŋɔ Korowii aa nɛraa ir seo ta nɔɔ?

¹³ Dɛ Korowii aa nɛraa ir seo ta naa, amɔ te Yeesu Kristo ɡba ta seo ta ire.

¹⁴ Dɛ Korowii ta Yeesu Kristo ire seo ta te naa, amɔ te waa yaa dɛ baɡle heyaa la, ne yarada haa dɛ yarada Yeesu Kristo la bwa ɛ pɛɛpɛɛ.

¹⁵ Dɛ ɡɛɛ te naa, amɔ te Korowii danseɛ yaa dɛ di la ta kasinteŋ ɛɛ, dɛkalkɛŋɔ ya dɛ baɡle heyaa ŋɔ Korowiirii ir Yeesu Kristo le seo ta. Dɛ nɛra aa seo taa ir te naa, amɔ ya teŋe nyosone.

¹⁶ Dɛ nɛra aa seo taa ir aa, amɔ te Korowii ta on ire seo ta.

¹⁷ Dɛ Korowii ta Yeesu Kristo ire seo ta naa, amɔ te he dɛ yaradao pɛɛpɛɛ, dɛ he wechɔɡa ta lɔ he nɛ.

¹⁸ A berɔ dɛɛ baɡle kɛŋɔ nɛra ba fa aa dɛ yarada Yeesu Kristo mɔɔ dɛ serewe la, Korowii aa ban lɛ.

¹⁹ Dɛ ya soɡa yaa soɡa nɔ ɡbo taa ya dɔ hwɛɡa Yeesu Kristo be naa, amɔ te ya waa sum ɡwaa nɛra bwa wa.

²⁰ Kɛ ɡɛ laa a do. Korowiirii ir Yeesu Kristo seo ta. Onee tɔ sie ir seo ta nɛra baa serewa la nɛɛ mɔɔ ba ɡe baa ir.

²¹ Nɛmbeŋkpoŋii ba seo ne. Nɛmbeŋkpoŋ ɡee ba seo ta ira ne.

²² Ya ne Adam bwa aa ɛ beŋkpoŋ la waa yaa serewe la. Gɛɛ a do ya banɔ la ɡe ne Yeesu Kristo aa ɛ beŋkpoŋ la ɛɛ ir seo taa dɛ́ dɔ mkpa.

²³ Kɛ ya bwa ne ya tɔperaa ya ir. Yeesu Kristoo tɔ sie ir mɔɔ, ásɛ ya banɔ la ya ne waa ɛ beŋkpoŋ la ɡe ir ɡɛ saŋ waa ba ja la.

²⁴ Belaa wobɛlbwa ɛɛ ba a jaɡa bala. A taa Yeesu Kristo ɛɛ ba kpeɡri dɔe, dɛ́ pɔ konchɔɡa aa bea yaa wola an na bwa soo siwi nɛ, dɛ́ kpɔ kora la do o Mɛɛ Korowii nɔn ta ó di.

²⁵ Yeesu Kristo chɛ kɛŋɔ ó di kpeɡri komɛlbwa waa lɔ harɛ nɔ ta nɛɛ ka tel kɛŋɔ waa pɔ o dɔma bwa nɛ.

²⁶ Dɛ o baa pɔ ba bwa nɛɛ tonaa, o dɔm muŋkaa waa pɔ o nɛɛ laanee seo.

²⁷ Ba chwerɛ Korowii Tɔn bini ŋɔ, “Korowii ɡelɔ o dɔ komɛlbwa kpeɡri.” Dɛ ba ŋɔ, “O ɡelɔ o dɔ komɛlbwa kpeɡri” aa, a ta baɡlɛ kɛŋɔ o dɔ o Korowii waa dɔ kpeɡri la dɛ kpɔ tɛo o di la ɡe kpeɡri.

²⁸ Dɛ Korowii baa ɛ ɡɛ tonaa, o Bie ɡee kpɔ o tenee do o Mɛɛ Korowii waa kpɔ komɛlbwa kpeɡri tɛo la lɔɡa, ásɛ Korowii ɡbo ɛ Kpeɡri Bwa Dɔɔ.

²⁹ Nɛra bane cheɡɛ lala naa ta dɛ ɡel baa sɔ ba Korowii ne. Bɔkwa waa baa ɛ ɡɛ nɔɔ? Dɛ lala aa seo taa ir aa, bɔkwa waa ɡela ba ɡel ba ɛ ɡɛ dɛɛ tɛɛ baɔ?

³⁰ Bɔkwa waa ya ɡee jo siswɛm waa ta saŋ bɛlbwa nɔɔ?

³¹ Yabala, kpelaa mɛɛ ŋɔ, dɛ maa siswɛm ta jo tɔpere bɛlbwa naa, amɔ te dɛ n laa yon dɛɛ kpɛɛ heyaa ya Dɔɔ Yeesu Kristo nɛɛ teŋa ta la.

³² Gɛ nɛra fa aa ɛɛ mɛ Ɛfesos la do kɛŋɔ n ne kpɔɡ bini ola aa yoa ken. Dɛ harɛ nɔ ta waa ɡbo waa n ne ba yo aa, bɔkwa tɔnɔɔ n dɔ a ta nɔ? Dɛ nɛra aa seo taa iraa, ya fe ɛɛ ŋɔɔ, “Hé ɡel ya ir dɛ́ di kwaa dɛ́ lɛ sie, dɛkalkɛŋɔ tɔpebɛl yaa sewɔɔ.”

³³ He bɛ ɡel nɛra ɛɛ neɡre heya. Danchɔɡe kpɔe dɛ chɔɡ dadɛɛɡe.

³⁴ Anomanta, hé ir dɛ́ ɡel he sie chɔ harɛ hɛɛ ɛ kɛrɛdɛ, dɛ bɛ wechɔɡa dɛɛ ɛ. He bini bane aa Korowii waa jemɛ kɛrɛdɛ. A ta sihiih ɛɛ tɛ heya aa?

Gɛ ya bwadabi aa dɛ ba doe seo ta ira habɔɔ

³⁵ He bini bɛl ɛɛ bɔɔroo ŋɔ, “Ɛrɛɛ lala ɛɛ ba wona ir seo ta nɔ? Ɛrɛɛ ba bwara ɛɛ ba doe yɔ?”

³⁶ Gɛne! Komɛlbwa haa du la, o dɛ pɔh mɔɔ dɛ́ le.

³⁷ Komɛlbwa haa du la, dɛ mea yoo, kon waa dɔ bii yoo, o papooni laa hɛɛ du. O bii hɛɛ du, ásɛ o yon ɛ papooni dɛ́ le baŋ.

³⁸ Korowiirii dɛɛ beɡra ɡɛ a bwa soo siwi aa doa ɡɛ waa dɛ nyin.

³⁹ Bwadabii bwa ta beŋkpoŋ ɛɛ. A bwa ne a soo siwii. Nɛwɛnyini bwadabii korɛ ola kwaa ta. Asɛ pɛŋa ɡe kwaa korɛ jumbii kwaa ta.

⁴⁰ Korowii doa kwaa lole, asɛ harɛ ta ɡe kwaa do le, kɛ a wer korɛ dɔŋa ta.

⁴¹ Wee wer korɛ korobie wer ta. Weweela ɡe wer korɔ. Hale weweela bini kwara, ane dɛ chaah ɡwaa ane.

⁴² Gɛɛ nɛra seo ta ira ɛɛ ba doe. Bwadabii yaa dɔa nɔ, dɛ ya baa serewe aa, o bwa ɛɛ chɔɡoo, kɛ bwadabii yaa dɔ dɛ ir seo ta la, o te aa chɔɡ bwa.

⁴³ Bwadabii yaa dɔa mɔɔ dɛ serewe la ɛɛ chɔɡoo. O ɛ kompɛɛ baa huɡo, kɛ Korowii ɛɛ leo seo taa, ásɛ o ɛ kondɛɛɡe. Kon baa huɡo la aa kpeɡri bɛlbwa dɔ, kɛ Korowii ɛɛ iruu ásɛ o do kpeɡri.

⁴⁴ Bwadabii yaa dɔɔ harɛ nɔ ta laanee baa ba huɡa, kɛ onɔ la Korowii aa dɛ ba ira seo ta la te ɛɛ korɔɔ. Gɛ harɛ nɔ ta bwadabii aa lole la, ɡɛɛ Korowii doa kon ɡe do le.

⁴⁵ Ba chwerɔ do Korowii Tɔn bini ŋɔ, “Korowii ta nɛnloɡle, dɛ yerɔ Adam, asɛ o dɔ mkpa dɛ do le.” Kɛ muŋkaa Adam la te ɛ Korowii doa nɛn dɛɛ tɛ mkpa. Onee Yeesu Kristo.

⁴⁶ Korowii doa bwadabii laa ya tɔ sie dɔ. Harɛ nɔ ta konee ya tɔ sie dɔ mɔɔ dɛ dɔ Korowii doa kon la.

⁴⁷ Nɛnloɡle la, ba mao tee ne o ɛ harɛ nɛn. Asɛ nɛɛte la ɡe le nyundua.

⁴⁸ Gɛ onɔ la baa mao tee ne fa aa doa la, ɡɛɛ o nɛra ɡe do. Asɛ ɡɛ onɔ la waa le nyundua aa doa la, ɡɛɛ o ɡe nɛra do.

⁴⁹ Gɛ yaa le onɔ la waa le harɛ nɔ ta la, ɡɛɛ yaa ba onɔ la waa le nyundua la ɡe lee.

⁵⁰ Yabala, hé ɡel n ŋɔ he be, harɛ nɔ ta bwadabii aa won la Korowii be. Kon waa dɛ pɔh la ne onɔ la waa wola pɔh aa won pɛ.

⁵¹ Hɛ́ɛ no, mɛɛ baɡle heyaa wesɔɔhle bɛlee. Ya bwa laa dɛɛ ba serewa. Hale dɛ ya serewɔ oo, ya ta serewɛ oo, Korowii ɛɛ beɡre ya bwa bwadabii kerabeŋkpoŋii.

⁵² Aa ɛo wɔrɔbe nɛɛ kilo, ɡɛ saŋ Korowii bɛla aa ba si, dɛ́ baɡle waa bwa jaɡa la. Dɛ o sio waa, Korowii ɛɛ ir serewa laanee seo ta, ásɛ ba dɔ bwadabii waa wola pɔh, dɛ beɡre ya banɔ la yaa wola sewɛ dɛ ta so le la bwara,

⁵³ dɛkalkɛŋɔ a ɛ kpela kɛŋɔ bwadabii waa wola pɔh la chɛ kɛŋɔ ó chiɡ onɔ la waa dɛ pɔh la naa ta. A chɛ kɛŋɔ bwadabii waa wola sewɛ la chiɡ onɔ la waa dɛ sewɛ la naa ta.

⁵⁴ Dɛ onɔ la waa wola sewɛ, waa wola pɔh la baa chiɡ onɔ la waa dɛ sewɛ, dɛɛ pɔh la naa ta naa, belaa waa baa chwera do Korowii Tɔn bini la ɛɛ ba kpela ɛɛ. Ba chwerɔ ŋɔ, “O kpɔ kpeɡri pɔ seo nɛ.”

⁵⁵ “Seo, lee he kpeɡri dɔɔ jaɔ? Ɛrɛɛ hɛɛ ba ɛɛ dɛ́ won do yaa weweele ta nɔ?”

⁵⁶ Wechɔɡaa ɡela seo ɛɛ do yaa weweele ta. Mmara yaa wola o ta teŋɛ la ɡe ɡelɔ seo dɔ kpeɡri ya nɛ.

⁵⁷ Korowii chɛ jam kohona. O tɛ yaa kpeɡri dɛ le ya Dɔɔ Yeesu Kristo be ásɛ ya pɔ seo nɛ.

⁵⁸ Anomanta, yabala maa dɛ nyin he wa, hé lawɛ waa la bini kiŋkiŋ, dɛ bɛ ɡel wobɛlbwa ha heyaa ásɛ he berɛ habɔɔ. Hé lawɛ ya Dɔɔ toma bini bambile bwa ne, dɛkalkɛŋɔ he koeh aa pɛɛ ɛɛ ba.