1 Kɔrent 14 - mzwDBL

Koŋkɛɛla ane ɡe Korowii domadɛɛɡe aa dɛ tɛ

¹ Hé ɡel he sie beɡre nɛnnyin ta, ásɛ dɛɛ nyin kpeɡri waa lɔ Korowii Domadɛɛɡe la be, dɛ́ kpɔ dɛɛ cha nɛra. Kɛ kpeɡri háa swɛɛ siwi dɛ́ nyin kohona laanee kɛŋɔ, he won che Korowii Domadɛɛɡe kpeɡri ta dɛ́ɛ bol o wa aa dɛ ba bala kerekere la,

² dɛkalkɛŋɔ naate waa dɛ bol wobofala la, nɛra laa o bol dɛɛ tɛ. Korowiirii o bol dɛɛ tɛ. O cheɡɛ Korowii kpeɡri ta dɛɛ bol waa aa sɔah. Nɛra aa a waa no.

³ Naate waa cheɡɛ Korowii Domadɛɛɡe la ta, dɛɛ bol waa la te bolɔ dɛɛ baɡle nɛra dɛɛ cha ba bá jemɛ Korowii Wa. O dɛ do ba ɡbemba dɛɛ larawe ba bwara.

⁴ Nɛn waa dɛ bol wobofala la, o bolɔ dɛɛ tɛ o ɡbaɡba. Naate waa cheɡɛ Korowii Domadɛɛɡe kpeɡri ta dɛɛ bol Korowii Waa la ɡe, asɔre tena la bwaa wɛɛ cha.

⁵ Dɛ he bwa won wobofala bola aa, n dɛ nyin ɡɛ. Kɛ dɛ he won Korowii Domadɛɛɡe kpeɡri ta cheɡa dɛ́ bol wa aa, ɡɛɛ dɛ́ do n som kohona. Naate waa dɛ bol Korowii Waa la ɡwaa nɛn waa dɛ bol wobofala, atane kɛ nomɛl won a mun baɡla dɛɛ tɛ asɔre tena á cha ba.

⁶ Yabala, dɛ n ba he be dɛ baa bol wobofala dɛ haa a mun no aa, tɔnɔ besoo he dɔ le n be nɔ? Dɛ n ta Korowii Domadɛɛɡe kpeɡri la ta cheɡɛ, dɛ dɔ waa aa sɔah dɛ baɡle heya aa, kɛɛ dɛ n ta wejema ane dɔe, kɛɛ maa Korowii nyoa wobol kɛɛ o ŋwɛnɛre baɡla jemaa, tɔnɔ besoo hé dɔ le n be nɔ?

⁷ Hé ta sie na kwaa baa dɛ hɛlɛ a ne. Dɛ a sii aa chɔ kɛrɛdɛ naa, ɛrɛɛ nɛra ɛɛ ba ɛɛ dɛ no a bini nɔ?

⁸ Dɛ ba dɛ hoh laa bɛla ásɛ nɛra no dɛ́ ka yo, dɛ baa on hoh kɛrɛdɛ naa, umee dɛ́ won jemɛ dɛ́ kpɔ o te nɔ?

⁹ Gɛɛ a do, dɛ he wobol bini noe kpeɡri aa, ɛrɛɛ baa ba ɛɛ dɛ no a mun ɔ? A do kɛŋɔ he ɡbo aa soɡa dɛɛ do ɡbɔɡa.

¹⁰ Harɛ nɔ ta wobol warɔ, a bwa ɡe ɛ nɛra bane wobol dɛ dɔ mun.

¹¹ Anomanta, nɛn dɛ bol waa maa a mun no aa, dɛ n berɛ deŋnebire te naate be. Dɛ o ɡe aa n kon no aa, o ɡe berɛ deŋnebire te n be.

¹² He siwi aa beɡra hɛɛ nyin kpeɡri Korowii Domadɛɛɡe be ó cha heyaa Korowii toma ta nɔ, hɛ́ɛ nyin anɔ la aa won cha asɔre tena kohona.

¹³ Naate waa cheɡɛ Korowii Domadɛɛɡe kpeɡri ta dɛɛ bol wobofala la, ó soŋe Korowii ásɛ o chao ó won dɛɛ baɡle a mun.

¹⁴ Dɛ n dɛ soŋe Korowii wobofale ne naa, dɛ n lilewee dɛɛ soŋo la, kɛ n liire te aa wobɛlbwa ɛ.

¹⁵ Amee jaɔ? Mɛɛ soŋe Korowii n lileo nee, ásɛ dɛɛ soŋo n liire ɡe ne. Mɛɛ kpɔ n lilewee ɡo yela, dɛ́ kpɔ n liire ɡe ɡo ja.

¹⁶ Dɛ ɡɛ laa aa, he dɛ jam Korowii he lileo ne naa, ɛrɛɛ naate waa wola yarada dɛ ɛ nɛmpɛɛ la ɛɛ ba ɛɛ dɛ́ no a mun dɛ́ sɛh he nyoa ŋɔ “Aamen” dɛ́ teŋɛ waa haa jaamo a waa la ta nɔ? Waa won no waa haa dɛ bol la mun.

¹⁷ He te jam Korowii kɛrɛdɛ kwaraa ɡba aa, a ta tɔnɔ dɔe tɛo.

¹⁸ N dɛ jam Korowii kɛrɛdɛ kɛŋɔ waa ɡela n ɡe won wobofala bola, hale dɛ won a bola ɡwaa heyaa nɔ.

¹⁹ Kɛ dɛ n lɔ asɔre, dɛ bol n bwɛɛ wobol tama asɛ nɛra won no aa, a bɔ kɛŋɔ maa kpɔ wobofala bol waa kohona nɛra ta a mun noɛ.

²⁰ Yabala, hé ɡel bechaliire. A chɛ kɛŋɔ hé dɔ nomonliire. Wechɔɡa ɛɛ te, hé ɛ he te bechasɔɔhne a bɔr. He bɛ ɡel he liire kpeɡ wechɔɡa ɛɛ ta.

²¹ Ba chwerɔ do Korowii Tɔn bini ŋɔ, “Mɛɛ ɡeloo nɛra nɔ no n waa wobofala ta. Hɔɔhraa mɛɛ ba ɡela ba bol baɡ ba, kɛ baa no. Korowiirii ŋɔa.”

²² Anomanta, Korowii ɡelɔ nɛra ɛɛ bol wobofala, dɛɛ baɡle o kpeɡri dɛɛ tɛ nɛra baa wola on yarada. Nɛra baa dɛ yaradao la waa laa. O waa baɡla Korowii Domadɛɛɡe la kpeɡri ta la, banɔ la baa dɛ yaradao la waa.

²³ Dɛ asɔre tena chemo, asɛ bɛlbwa ɛɛ bol wobofale, asɛ nɛra baa wola yarada dɛ ɛ nɛmpɛɛne ba ja he nɛ aa, baa ŋɔ he dɛ we choɡla aa?

²⁴ Kɛ dɛ he bwa chemo dɛ che Korowii Domadɛɛɡe kpeɡri la ta dɛɛ bol o wa, asɛ nɛn waa wola yarada dɛ ɛ nɛmpɛɛ ba ja aa, wɛɛ noo dɛ́ jemɛ kɛŋɔ o dɛ ɛ wechɔɡa. Waa haa dɛ bol la bwa ɛɛ jo o nyu binii, ásɛ o nyoa kpo.

²⁵ O tea bini waa bwa ɛɛ chɔ baŋee, ásɛ o ɡuŋi Korowii harɛ dɛ́ soŋo, ásɛ dɛ ŋɔ nɛra be ŋɔ Korowii ja he nɛɛ kpela.

Korowii toma aŋwɛnɛ ta

²⁶ Yabala, amee jaɔ? Saŋ bɛlbwa haa cheme la, bɛl dɛ tɛ yel, bɛl dɔ sipila waa haa dɛ hwela, bɛl ɡe dɔ waane Korowii aa baɡlo, bɛl ɡee bol wobofala, bɛl ɡee baɡle a mune. Hé ɡel waa haa dɛ ɛ la dɔ tɔnɔ tɛ nomɛlbwa.

²⁷ Nɛra baa dɛ bol wobofala la, hé ɡel ba ɛ nɛra banɛ kɛɛ batoro ɡbo. A chɛ kɛ bá bol kaa tɛ dɔŋa, ásɛ bɛl ɡee baɡle a mun ásɛ nɛra no ɡɛ waa bola.

²⁸ Dɛ nomɛlbwa toole dɛ́ won baɡle wobofale la mun aa, amɔ te náate waa ira dɛ fee bol waa la tɔ nyoa dɛ́ so. Kɛ o ne Korowii ɛɛ bol waa o bambile bini.

²⁹ Nɛra baa dɛ ba Korowii Domadɛɛɡe kpeɡri ta cheɡa dɛ́ bol o waa la, hé ɡel ba ɛ banɛ ne batoro ɡbo, ásɛ ba kar la so dɛɛ no ba be, dɛɛ pese waa la kɛrɛdɛ.

³⁰ Dɛ bɛl soɡo Korowii Domadɛɛɡe baɡlo waane aa, a chɛ kɛ naate waa dɛ bol waa la tɛo bɔr ó bol.

³¹ Hé bwa ɛɛ bol Korowii waa beŋkpoŋa beŋkpoŋa, ásɛ a dɔ tɔnɔ tɛ he bwa, dɛ́ do heyaa ɡbemba.

³² Nɛra Korowii Domadɛɛɡe aa tɛɛ ba kpeɡri bá bol o waa la, bá won ba te lawa,

³³ dɛkalkɛŋɔ Korowii aa wesaɡasaɡare nyin. Deŋnesɔɔhnaa wɛɛ nyin. Gɛ baa dɛ ɛ asɔrere ta bobɛlbwa laanee.

³⁴ He dɛ ɛ asɔre aa, hé ɡel haahna hel. A ta maɡrɛ kɛŋɔ baa bol waa bela. Gɛ Korowii Tɔn aa baɡla la, hé ŋɔ ba be ŋɔ báa no he baala la be.

³⁵ Dɛ haahna la dɛ nyin waane bɔɔra aa, bá la dem mɔɔ dɛ́ ka bɔɔ ba jaranar. A ta maɡrɛ kɛŋɔ haah bol waa asɔre dea bela.

³⁶ He bee Korowii waa la che dɛ ba naa? He ɡboo no waa la aa?

³⁷ He banɔ la haa dɛ bol ŋɔ he won Korowii kpeɡri ta cheɡa dɛ́ bol o waa la, kɛɛ he dɔ Korowii Domadɛɛɡe la, hé jemɛ kɛŋɔ waa maa chwera ba tɛ heyaa la ɛ Korowii Mmara.

³⁸ Nomɛlbwa waa wola nyin kɛŋɔ o no la, hé ɡelo.

³⁹ Yabala, hé ɡel he sie beɡre hɛɛ nyin kpeɡri Korowii be, ásɛ dɛ won kpɔ bol o wa, dɛ bɛ banɔ la baa dɛ bol wobofala la ŋwɛnɛ tɔ.

⁴⁰ Hɛ́ɛ ɛ wobɛlbwa ŋwɛnɛ aa maɡra ta dɛ bɛ wesaɡasaɡare dɛɛ ɛ.