Yahudi 9 - Nyaa Shɔɔ Ɓɔɔ Laa a Ɓɛɛ

Nyaa shɔɔ ɓɔɔ Laa mã ɓɛɛ, ta nɔng ɓɔɔ gbaala tɔ

¹ Nyaa ɓɔɔ Laa mã tĩng shɔɔnang kaɓa, tusu zang gbalang naa ɓɔɔ zang bang Laa katɔ. A nɔng ɓɔɔ shi kpang kagn kpang, ɓɔɔ shɔnzang ri bang Laa ti kagn ka koo keɓe.

² Zang ɓáa putali, a zang basɛ yeti ɓiɓɛ nɛɛ fɔ̃ɔrɔ nyaa pɛɛrɛ. Ka yeti ɓiɓɛ, ɓɔɔ waa nyaa biling, zang tɛ̃ɛ vuu ɓɔɔ zang shĩili waa zàáng sɔɔ ka yuu ɓarɛ ɓɛɛ, nɛɛ teeburu ɓɔ̀ɔ́ borodi ɓɔɔ zang a Laa ka yuu ɓiɓɛ ɓɛɛ. Nɔng keɓe zang ɓaa nɛɛ “Nɔng ɓɔɔ shi kpang kagn kpang ɓɛɛ”.

³ Yeti putali ɓɔɔ tĩng, nɔng ɓɔɔ kagn, zang ku nyaa ɓiɓɛ nɛɛ fɔ̃ɔrɔ nyaa pɛɛrɛ. Zang ɓaa ɓi nɛɛ, “Nɔng ɓɔɔ shi kpang kagn kpang tingkiring” ɓɛɛ.

⁴ Ka nihn, zang shing vuu ɓɔɔ zang palɛ nɛɛ zinariya, zang dɔ̀ɔ́ Laa vuu ɓɔɔ á sɛ̃ɛ tɔ̃ɔ ka yuu ɓiɓɛ, nɛɛ akpaati ɓɔɔ zang shing nyaa ɓɔɔ Laa mã ɓɛɛ. Zang zuu bii akpaati keɓe dɔ̃ɔ gbete nɛɛ zinariya. Ka yeti ɓiɓɛ, zang shing ɓari ɓɔɔ zang palɛ nɛɛ zinariya, a zang tɛ̃ɛ vuu shaanang ɓɔɔ zang ɓaa nɛɛ Maanaa ka yeti ɓiɓɛ. A zang shing ɓɔɔ laa naa yitinang Haruna ɓɔɔ lusu katɔ ɓɛɛ, a rɛɛ tari pɛkɛtɛ ɓɔɔ Laa béeré nyaa ɓɔɔ wu dang ɓɛɛ kagn.

⁵ Ka yuu akpaati bìí, zang palɛ jasuru zang nyaa shonang Laa ɓɔɔ ri ka lapa ziti, nasãng ɓarɛ kagn. Vuu keɓe ri tusu bannang Laa. Ri wàa putali kaa yuu nyaa kunang akpaati nɛɛ nasãng ɓarɛ. Vuu nyaa kunang akpaati keɓe, zang ɓaa nɛɛ, “Nɔng ɓɔɔ Laa kɔsɔ vuu shi kpang kagn ɓɛɛ.” Ruu kɔ̀ɔ nɔɔ ruu gn dɔɔli ka yuu rɛɛ vuu keɓe kãntang kpang.

⁶ Zang nɛɛ shĩili vuu keɓe tɔ nandon naa weɓe, rɛɛ zang ɓɔɔ ri dɔɔ vuu ka Gãa Laa ri daarɛ kaa yeti putali ɓɔɔ biling, ri palɛ shonang ɓarɛ diki diki.

⁷ A ɓi kaa kpanti zang ɓɔɔ ri dɔɔ vuu ka Gãa Laa kɔ daa yeti nɔng ɓɔɔ tĩng ka bm, ti daa ɓi doo gbete kɔ nwani ka saa gbete. Daa naa waati kpang, tuu zĩi vuu vaa ɓɔɔ zang yee ɓɛɛ ka naa ning, ɓɔɔ wu a Laa ka ruu vuu shi kpang ɓiɓɛ nɛɛ ka ruu rɛɛ vuu shi kpang zang, ɓɔɔ zang palɛ, ri zi kpang ɓɛɛ.

⁸ Suru Laa tusu zang nɛɛ naa putali ɓɔɔ shɔnzang ri palɛ, nɛɛ doo ka nɔng, gbalang ɓɔɔ zang daa nɔng ɓɔɔ shi kpang kagn kpang, puu gn kpang tingkiring.

⁹ Zang tusu ɓi zang koo jaa knti vuu nɛɛ vuu keɓe. Zang tusu ri nɛɛ vuu ɓɔɔ zang a Laa, nɛɛ vuu ɓɔɔ zang dɔɔ ɓɛɛ, shingnɛ rɛ̃rɛnang zang ɓɔɔ ri bang Laa, wu nwang tɔ̃ɔ kpang.

¹⁰ Rɛɛ vuu keɓe, ɓi ka yuu vuu shaanang nɛɛ vuu ɓoonang nɛɛ rɛɛ vuu sɔ̀ɔrɔ̀nang kɔ shɛ̃ɛning ka zɔ̃ng zɔ̃ng. Wee ɓi nyaa dannang ka ruu vuu ɓɔɔ zang palɛ ka bii biling kɔ shɛ̃ɛning, tɔ̀ɔ laa ɓɔɔ Laa naa kɔ̃sɔ vuu piti, wu a nɛɛ mani.

¹¹ A wee Kirisi a ɓi tɔ, wukɔ kaa kpanti zang ɓɔɔ ri dɔɔ vuu ka Gãa Laa, ka yuu rɛɛ vuu tɔ̃ɔ ɓɔɔ ri ɓarɛ kaa nihn kɔ nwani ɓɛɛ. Putali ɓɔɔ Kirisi palɛ shonang ka yeti ɓiɓɛ, ɓa weɓe katɔ, a ɓi ti nyaa kiiri. Ɓi shɔnzang palɛ kpang, a ɓi ti ka koo keɓe kpang.

¹² Kirisi daa yeti nɔng ɓɔɔ shi kpang kagn kpang keɓe doo gbete kak, paasɛ kpang. Ti daa ɓi nɛɛ zĩi rɛɛ jàa nɛɛ napo kpang, daa ɓi nɛɛ zĩi bìí ɓiɓɛ. A ta yuu ɓuru kaa gbinggbing.

¹³ Zĩi rɛɛ jàa nɛɛ napo, a ɓɔɔ pũngku mɔ́kɔ́ napo ɓɔɔ zang dɔɔ ɓɛɛ, ɓɔɔ zang ɓisi zang ɓɔɔ ka gbalang zang Yahudi, ri palɛ vuu shi kpang tɔ nɛɛ mani ɓɛɛ, risi ri, ri nwáng zang tɔ̃ɔ ɓi ka bii biling kɔ shɛ̃ɛning.

¹⁴ Zĩi Kirisi palɛ vuu ɓɔɔ ɓa weɓe kpang ya? Kirisi ɓɔɔ shi kpang ka bii kpang, a Laa yuu ɓiɓɛ nɛɛ naa vuu palɛnang Suru Laa ɓɔɔ nwang ɓi dòndòng ɓɛɛ. Zĩi ɓiɓɛ shing katɔ rɛ̃rɛnang ɓɔɔ nɔɔ rɛ̃rɛ ka yuu vuu shi kpang palɛnang, wu nwang tɔ̃ɔ, tɔ̀ɔ, ruu pàlɛ̀ Laa ɓɔɔ ɓi ningkãari shonang kati.

¹⁵ Ka ruu ruu keɓe kɔ, Kirisi shing tɔ, Laa mã nyaa shɔɔ nɛɛ ruu. Tɔ̀ɔ, zang ɓɔɔ Laa ɓaa ri nyaa, ri walɛ vuu ɓɔɔ Laa a ri nyaa ka yuu ɓiɓɛ ɓɛɛ, gbinggbing. Ka ruu ɓɔɔ, Kirisi ɓɔɔ vɔ tɔ, ta ri tɔ nɛɛ jĩng ɓɔɔ zang nɛɛ dang ri, ka ruu vuu shi kpang ɓɔɔ ri palɛ, bɛ̀ɛ́ ri dũng doo nyaa tĩng shɔɔnang ɓɔɔ Laa mã́ nɛɛ ri ɓɛɛ.

¹⁶ Zang ɓɔɔ nɛɛ yaa nyavɔ, zang ri shi ka gbongkarɛ, zang ɓɔɔ yaa nyaa keɓe nɛɛ vɔ tɔ niizang, tɔ̀ɔ, zang palɛ vuu nɛɛ nyaa nyavɔ ɓiɓɛ.

¹⁷ Ka ruu ɓɔɔ, zang ɓɔɔ yaa nyavɔ nɛɛ doo ningkãari, zang palɛ shonang ɓi nɛɛ nyavɔ keɓe kpang. Zang palɛ shonang ɓi nɛɛ nyavɔ ka knti ɓɔɔ zang ɓɔɔ yaa nyavɔ vɔ tɔ ɓɛɛ.

¹⁸ Ka ruu nɔngkɔ, zang yée vuu vaa, zang tɛ̃ɛ zĩi ɓiɓɛ ka gbongkarɛ, a zang palɛ shonang kaa nɛɛ nyaa tĩng shɔɔnang ɓɔɔ Laa mã ɓɛɛ.

¹⁹ Ka ɓɔɔ Musa kɔɔ zang vuu ɓɔɔ Laa dang nyaa ɓɛɛ nandon, a tuu zĩi mɔ́kɔ́ napo nɛɛ ɓɔɔ jàa ɓɔɔ zang dɔɔ Laa, a nwɛ̃ɛtɛ nɛɛ mii, a ɓisi ka labeenang nyaa dannang nɛɛ zang ɓɔɔ ka nɔng ɓɛɛ nandon. Ɓìsi nɛɛ gɔpɔ, a ɓɔɔ shãngti mɛ̀ɛrɛ́ ɓɔɔ zang nwãa kpaa kagn ɓɛɛ.

²⁰ Kɔɔ zang tɔɔ, “Wee zĩi ɓɔɔ Laa mã nyaa nɛɛ nɔɔ nɛɛ mani kɔ, a dang nɔɔ nyaa nɛɛ nɔɔ dũngnɛ ɓɛɛ.”

²¹ A ɓisi putali kaa doo nɔngkɔ nɛɛ vuu ɓɔɔ ka yeti putali piti nɛɛ zĩi.

²² Niizang, nyaa dannang Laa kasɛ nɛɛ zang shing vuu piti wu nwang tɔ̃ɔ nɛɛ zĩi ɓɔɔ zang ɓisi kagn ɓɛɛ. Naa zĩi nɛɛ tɛ̃ɛ kpang, Laa kɔsɔ zang vuu shi kpang zang kpang.

Kirisi a yuu ɓiɓɛ doo gbete kak

²³ Dàa naa ɓɔɔ zang shing rɛɛ vuu ɓɔɔ ri ɓarɛ jasuru vuu ɓɔɔ niizang ɓɔɔ ri ka lapa keɓe, ri nwang tɔ̃ɔ nɛɛ zĩi vuu ɓɔɔ zang dɔɔ Laa naa weɓe tɔ. A vuu ɓɔɔ ri ka lapa, ɓɔɔ ɓi kaa rikɔ ɓɔɔ niizang ɓɛɛ, zang shing ri, ri nwang tɔ̃ɔ ɓi kaa nɛɛ vuu ɓɔɔ zang dɔɔ Laa ɓɔɔ ɓa weɓe katɔ ɓɛɛ.

²⁴ Kirisi dàa ka yeti putali ɓɔɔ shɔnzang palɛ nɛɛ naa, ɓɔɔ ɓi jasuru ɓɔɔ niizang ɓɛɛ kpang. Daa ɓi ka lapa dɔ̃ɔ gbete, nɔng ɓɔɔ wu shii kagn, ka tĩng Laa, ka nung ɓuru ɓɛɛ.

²⁵ Ti daa wu ka lapa nɛɛ tɔɔ wu daa a Laa yuu ɓiɓɛ tɔkn kpãngkpãng kpang. Naa ɓɔɔ kpanti zang ɓɔɔ ri dɔɔ vuu ka Gãa Laa, palɛ ka saa saa ɓɛɛ. Dàá ka nɔng ɓɔɔ shi kpang kagn kpang, ɓɔɔ ka yeti Gãa Laa ɓɛɛ, nɛɛ zĩi ɓɔɔ ɓi ɓɔɔ ɓiɓɛ kpang ɓɛɛ.

²⁶ Naa nɛɛ nɔngkɔ, Kirisi nɛ̀ɛ́ dàng jĩng tɔ, ka yuu zɔɔ, yuu zɔɔ, ɓu doo ɓɔɔ koo gaayu ɓɛɛ. A kaa tɔ̀ɔ́ nɔngkɔ kpang. Kirisi nwang nyaa kaa doo gbete kak, paasɛ takpang, ka wee koo waa nyaa kaa tɔ ɓee, nɛɛ tɔ̀ɔ, wu kɔsɔ vuu shi kpang nɛɛ yuu ɓiɓɛ ɓɔɔ wu a ɓɛɛ.

²⁷ Naa ɓɔɔ Laa shingnɛ nɛɛ shɔnzang wu vɔ doo gbete, nɛɛ knti wu naa jɛ̃ɛ zang ruu kati ɓɛɛ.

²⁸ Kirisi dòo nɔngkɔ, á zang yuu ɓiɓɛ nɛɛ zang nyɔ wu vɔrɔ doo gbete kak, nɛɛ tɔ̀ɔ, wu kɔsɔ zang dɔɔli vuu shi kpang ɓarɛ kati. Nwang nyaa ditɔ tɔkn, daa kaa doo ziti. Wu ka ruu ɓɔɔ wu naa kɔsɔ zang vuu shi kpang ɓarɛ kpang, nɛɛ tɔɔ wu ta ɓi kaa yuu zang ɓɔɔ ri gã wu ɓɛɛ.