Yahudi 8 - Nyaa Shɔɔ Ɓɔɔ Laa a Ɓɛɛ

Yeesɔ Kpanti zang ɓɔɔ ri dɔɔ vuu ka Gãa Laa, ka Nyaa Shɔɔ ɓɔɔ Laa a ɓɛɛ

¹ Gbãng gbãng ruu ɓɔɔ ruu kɔɔrɔ ɓɛɛ keɓe. Kpanti zang ɓɔɔ ri dɔɔ Laa vuu, ɓɔɔ ɓuru kagn naa weɓe, ɓɔɔ nwang ka nakn laa nwannang Kpanti Laa ɓɔɔ bannang piti ɓi ɓɔɔ ɓiɓɛ ɓɛɛ, ka lapa.

² A palɛ shonang ka nɔng ɓɔɔ shi kpang ɓi kagn kpang tingkiring ɓɛɛ, nɔng Laa bannang ɓɔɔ niizang ɓɔɔ Laa palɛ nɛɛ yuu ɓiɓɛ, wu shɔnzang palɛ kpang ɓɛɛ.

³ Ka ruu ɓɔɔ, zang zɔ̃ng kpanti zang ɓɔɔ ri dɔɔ vuu ka Gãa Laa, ɓu nɛɛ wu a Laa vuu ɓɔɔ zang alɛ wu, a wu ti dɔɔ ɓɔɔ. Doo nɔngkɔ, daa naa katɔ zang ɓɔɔ dɔɔ Laa vuu keɓe, wu walɛ vuu ɓɔɔ wu a Laa ɓɛɛ jong.

⁴ Naa Yeesɔ nɛ̀ɛ́ ka koo, nɛɛ nwàng zang ɓɔɔ dɔ̀ɔ Laa vuu kpang tingkiring, ka ruu ɓɔɔ, zang ɓɔɔ ri kagn, ɓɔɔ ri a Laa vuu naa ɓɔɔ nyaa dannang zang Yahudi kɔɔyi ɓɛɛ.

⁵ Ri palɛ shonang ɓarɛ ka koo, nɔng ɓɔɔ zang gãsɛ ɓi nɛɛ ɓɔɔ ka lapa ɓɛɛ. Nwang ɓi naa jasuru nɔng keɓe ɓɔɔ ka lapa ɓɛɛ. Ka ruu nɔngkɔ, ka ɓɔɔ Musa bɛ̀ɛ́ nɛɛ wu ɓàá Laa kaa putali ɓɔɔ zang bang wu kagn ɓɛɛ, Laa shaarɛ wu nyaa tɔɔ, “Shing jĩng kagn, mɔɔ palɛ vuu piti ka doo naa ɓɔɔ zang tusu mɔɔ ka yuu kɔpɔ ɓɛɛ.”

⁶ A shonang ɓɔɔ Yeesɔ ta keɓe, ɓa ɓɔɔ ɓarɛ ɓi katɔ, naa ɓɔɔ nyaa ɓɔɔ Yeesɔ shingnɛ Laa mã nɛɛ shɔnzang, ɓa nyaa ɓɔɔ gbaala katɔ ɓɛɛ. Ka ruu ɓɔɔ, nyaa ɓɔɔ Laa a ruu, atɛ zang vuu tɔ̃ɔ, ɓa nyaa gbaala ɓɔɔ wu mã keɓe katɔ ɓɛɛ.

⁷ Ka ruu ɓɔɔ, naa nyaa ɓɔɔ Laa mã tĩng shɔɔnang nɛ̀ɛ́ nyaa kiiri, Laa nɛɛ tɔɔ kpang nɛɛ wu mã nyaa ɓɔɔgn kpang.

⁸ A Laa zi vuu shi kpang ɓarɛ ɓɔɔ ri palɛ ɓɛɛ tɔ a kɔɔyi tɔɔ, “Diki a kana ɓɔɔ n naa mã nyaa shɔɔ nɛɛ zang Isirela a ɓɔɔ nɛɛ zɔ̃ng zang Yahuda.

⁹ Ɓi naa nyaa ɓɔɔ n mã nɛɛ rɛɛ dabang dabang ɓarɛ kpang. Ka diki ɓɔɔ n yi ri ka naa, n nwangsɛ ri nɛɛ tipi Masara ɓɛɛ kpang. Ka ruu ɓɔɔ, ri palɛ vuu ɓɔɔ nyaa kaɓa kɔɔ ri nɛɛ ri palɛ nɛɛ yeti gbete kpang, a n raa ri yuu knti kati.

¹⁰ Laa ti kɔɔyi tɔɔ, Wee nyaa ɓɔɔ n naa mã nɛɛ zang Isirela ka rɛɛ diki ɓɔɔ naa a ɓɛɛ kɔ. N naa shǐng ri rɛɛ nyaa dannang mɛɛ ka yeti ɓarɛ a n beere ka ɓoro ɓarɛ. N naa nwáng Laa ɓarɛ, a ri nwang ɓarɛ kaa zang mɛɛ.

¹¹ Zang ɓu naa kasɛ nɛɛ wu tùsù zang nyaa gãa ɓiɓɛ nɛɛ ɓeezung vuu ɓɔɔ, a wu ti kɔɔyi nɛɛ, ‘Kpɛ̃ɛrɛ gbalang Laa ta,’ kpang. Ka ruu ɓɔɔ, ri nandon ri zi gbalang mɛɛ ditɔ ɓɛɛ. Vuu ɓɔɔ yi nɛɛ yuu wujɛ, daa nɔng ka yuu zang bang ɓɛɛ.

¹² N naa kɔsɔ ri vuu shi kpang ɓɔɔ ri palɛ ɓɛɛ katɔ, a ǹ ti kpaa danggn vuu shi kpang ɓarɛ takpang tingkiring.”

¹³ Ka ɓɔɔ Laa rang yee, ka yuu nyaa shɔɔ keɓe, risi ɓɔɔ tĩng shɔɔnang nwàng kaa ɓɔɔ gbaala. Vuu ɓɔɔ nɛɛ ri gbaala tɔ, nɛɛ kpɛ̃ɛ kana, bɛ̀ɛ́ ning ɓi kaa tɔ.