Yahudi 7 - Nyaa Shɔɔ Ɓɔɔ Laa a Ɓɛɛ

Malakisadak, zang ɓɔɔ dɔɔ vuu ka Gãa Laa ɓɛɛ

¹ Malakisadak keɓe, bɛ̀ɛ́ wukɔ kpanti nɔng ɓɔɔ zang ɓaa nɛɛ Salama ɓɛɛ, a ti zang ɓɔɔ dɔɔ vuu ka Gãa Laa, Laa ɓɔɔ ɓa zang piti ɓɛɛ. Kpisi Ibirayi yuu, ka ɓɔɔ Ibirayi gbãayu nɛɛ nɔng ɓɔɔ wu shaa rɛɛ kpanti ka sĩiri ɓɛɛ, a gàa Ibirayi Laa nɛɛ Laa shingnɛ Ibirayi wu tãa tĩnang.

² A Ibirayi basɛ vuu ɓɔɔ wu see ka nyaa sĩiri vàa kopi á a wu vàa gbete. Dĩiri nung Malakisadak ɓɔɔ tĩng shɔɔnang ɓi, “Kpanti zang ɓɔɔ ri zang tɔ̃ɔ ka tĩng Laa ɓɛɛ” a ɓɔɔ kaa, “Kpanti Salama” ɓi kaa, “Kpanti ɓɔɔ shingnɛ zang ri nwang ka nyaa zɔɔ” ɓɛɛ.

³ Daa ɓiɓɛ kagn kpang, nàá ɓiɓɛ ti kpang, zang zi dĩiri zɔ̃ng ɓiɓɛ kpang. Zang ti zi diki ɓɔɔ zang yi wu kagn ɓɛɛ kpang, a ɓɔɔ diki ɓɔɔ wu vɔ kagn ɓɛɛ kpang. Nwáng ɓi naa Jaa Laa, ka ruu ɓɔɔ, ɓi zang ɓɔɔ dɔɔ Laa vuu ɓɛɛ dòndòng.

⁴ Nɔɔ zi bannang Malakisadak karɛ. Ibirayi dabang dabang ɓuru, basɛ vuu ɓɔɔ wu ta ka nyaa sĩiri vàa kopi, a á wu vàa gbete.

⁵ Nyaa dannang Laa kɔɔyi tɔ, zɔ̃ng Leevi ɓɔɔ ri nwang zang ɓɔɔ ri dɔɔ vuu ka Gãa Laa, ri ta vàa gbete, ka teteng vuu zang ɓɔɔ zang basɛ vàa kopi ɓɛɛ. Zang Leevi keɓe, ɓi rɛɛ ɓeezung, ka wee rɛɛ ɓeezung bìí, ri doo zɔ̃ng Ibirayi kɔ ɓee.

⁶ Yɔɔ keɓe dũ̀ng dĩiri zɔ̃ng ɓiɓɛ ka zɔ̃ng Leevi kpang, a ta vuu vàa gbete keɓe doo nɛɛ mani ka naa Ibirayi, a gàa wu Laa nɛɛ Laa wu shingnɛ wu tãa tĩnang. Ibirayi ɓɔɔ Laa a wu nyaa ɓɛɛ.

⁷ Wu vuu nyaa laanang kpang, zang ɓɔɔ gaa Laa, wukɔ zang bang ka yuu zang ɓɔɔ zang gaa wu Laa nɛɛ Laa pàlɛ̀ wu tɔ̃ɔ ɓɛɛ.

⁸ Zang Leevi ɓɔɔ ri ta vuu vàa gbete keɓe, ri ɓarɛ shɔnzang ɓɔɔ ri vɔ̀lɔ́ katɔ ɓɛɛ. A Malakisadak ɓɔɔ ta vuu vàa gbete, ɓi zang ɓɔɔ ɓi doo ningkãari, naa ɓɔɔ labeenang Laa kɔɔyi ɓɛɛ.

⁹ Zang kɔ̀ɔ́ katɔ nɛɛ, Leevi ɓɔɔ tá vuu vàa gbete keɓe, wukɔ a vuu keɓe kaa jong nɛɛ bii Ibirayi.

¹⁰ Ka ruu ɓɔɔ, ka ɓɔɔ Malakisadak kpisi Ibirayi yuu bɛ̀ɛ́ Leevi doo ka sãng dabang, dabang ɓiɓɛ Ibirayi ɓɛɛ.

¹¹ Laa a zang Isirela nyaa dannang ɓiɓɛ, ka ɓɔɔ bɛ̀ɛ́ zɔ̃ng Leevi rikɔ dɔɔ Laa vuu ka Gãa Laa ɓɛɛ. A shonang zɔ̃ng Leevi zunung ɓɔɔ kɔsɔ zang vuu shi kpang ɓɔɔ zang palɛ ɓɛɛ kaa takpang. Naa nɛ̀ɛ́ zunung katɔ, Laa nɛ̀ɛ́ shong Yeesɔ takpang. Yeesɔ ɓi zang ɓɔɔ dɔɔ vuu ka Gãa Laa naa Malakisadak, ɓi ka zɔ̃ng Haruna kpang.

¹² Ka ruu ɓɔɔ, zang nɛɛ kɔ̃sɔ zɔ̃ng zang ɓɔɔ ri nwang zang ɓɔɔ ri dɔɔ vuu ka Gãa Laa tɔ, zang kɔ̃sɔ nyaa dannang kaa doo katɔ kɔ ɓɛɛ.

¹³ Yeesɔ kɔ zang kɔɔrɔ ruu keɓe ka yuu ɓiɓɛ ɓee, ɓi ka zɔ̃ng zang ɓɔɔgn. Zang gbete ka zɔ̃ng kaɓa dɔ̀ɔ Laa vuu ɓi gngn doo gbete kpang.

¹⁴ Zang zi tɔ piti nɛɛ Kpanti ɓuru Yeesɔ nwáng ɓi nɛɛ zɔ̃ng Yahuda. Musa kɔɔ vuu ɓɔɔ katɔ ka yuu zɔ̃ng zang keɓe, nɛɛ zang gbete ka teteng ɓarɛ naa nwang zang ɓɔɔ dɔɔ vuu ka Gãa Laa kpang. Ka ɓɔɔ wu rang yee ka yuu zang ɓɔɔ ri dɔ̀ɔ́ Laa vuu ɓɛɛ.

Yeesɔ ɓi naa Malakisadak

¹⁵ Vuu kɔ ruu kɔɔ ɓee, nwángsɛ́ bìí tɔ kaa biling tɔ̃ɔ tɔ̃ɔ, ka wee Yeesɔ ɓɔɔ dɔɔ Laa vuu, nwang nyaa tɔ, naa ɓɔɔ Malakisadak nwang ɓɛɛ.

¹⁶ Nwang tɔ zang ɓɔɔ dɔɔ Laa vuu ka Gãa Laa, wu ka doo vuu ɓɔɔ shɔnzang ri tusu ɓɛɛ kpang, ɓi ka doo naa vuu palɛnang suru bii ɓiɓɛ ɓɔɔ waa nyaa kpang ɓɛɛ.

¹⁷ Ka ruu ɓɔɔ, labeenang Laa kɔɔyi nɛɛ, “Mɔɔ ɓáa zang ɓɔɔ dɔɔ vuu ka Gãa Laa ɓɛɛ dòndòng, naa ɓɔɔ Malakisadak nwáng ɓɛɛ”.

¹⁸ Nyaa dannang ɓɔɔ tĩng, zang kɔsɔ tɔ dang gbete, ka ruu ɓɔɔ, naa vuu palɛnang ɓiɓɛ kagn kpang, a ti pàlɛ̀ zang vuu ɓɔɔ kpang ɓɛɛ.

¹⁹ Ka ruu ɓɔɔ, nyaa dannang Musa shing vuu ɓɔɔ ɓi jong wu nwang nyaa kiiri kpang ɓɛɛ. A kãntang keɓe, Laa atɛ vuu ɓɔɔ waasɛ̃ tɔ, ɓɔɔ ri shíng gn kagn ɓɛɛ, tɔ̀ɔ, ruu a kaa bii ɓiɓɛ naabm.

²⁰ Laa tũng vuu kagn. Ka ɓɔɔ zɔ̃ng zang Leevi ri nwang zang ɓɔɔ ri dɔɔ vuu ka Gãa Laa, zang tũng vuu kagn kpang.

²¹ A Yeesɔ nwang zang ɓɔɔ dɔɔ vuu ka Gãa Laa, ka ɓɔɔ Laa tũng vuu ɓɛɛ, Laa kɔɔ wu nɛɛ, “Kpanti Laa tũng vuu tɔ, kɔ̃sɔ yeti ɓiɓɛ takpang. ‘Mɔɔ ɓaa zang ɓɔɔ dɔɔ vuu ka Gãa Laa dòndòng.’ ”

²² Ka ruu vuu kɔ Laa tũng ɓee kɔ, Yeesɔ nwang kaa zang ɓɔɔ shingnɛ Laa mã ruu nyaa ɓɔɔ ɓa ɓɔɔ tĩng katɔ ɓɛɛ.

²³ Rɛɛ zang ɓɔɔ ri dɔɔ vuu ka Gãa Laa, ri ɓarɛ dɔɔli, ka ruu ɓɔɔ vɔrɔ zãa ri nwannang katɔ, ri dɔɔ Laa vuu dòndòng kpang.

²⁴ A ka ruu ɓɔɔ Yeesɔ nwang ɓi ningkãari dòndòng, nwang zang ɓɔɔ dɔɔ vuu ka Gãa Laa ɓi gbinggbing.

²⁵ Ka ruu nɔngkɔ, zunung katɔ, wu ta yuu zang ɓɔɔ ri a ka bii Laa nɛɛ bii ɓiɓɛ katɔ, ka laa kiya piti. Ka ruu ɓɔɔ, wu ɓi ningkãari, diki diki bakɛ Laa ka ruu ɓarɛ ɓɛɛ.

²⁶ Zɔ̃ng kpanti zang ɓɔɔ ri dɔɔ vuu ka Gãa Laa keɓe, ɓɔɔ ruu kasɛ ɓɛɛ kɔ. Zang ɓɔɔ shi kpang ka bii ɓiɓɛ kpang, ɓɔɔ zang dãa wu kpang, ɓɔɔ ɓi kankalang ɓɛɛ, a zang zɔ̃ng wu katɔ nɛɛ teteng zang ɓɔɔ ri palɛ vuu shi kpang, zang shing wu dang gbete, ɓɔɔ zang a wu nɔng nwannang ka lapa kpala kpala.

²⁷ Ɓi naa rɛɛ kpanti zang ɓɔɔ ri dɔɔ vuu ka Gãa Laa, ɓɔɔ kpang. Vuu ɓɔɔ kagn ɓɔɔ shing wu, wu dɔ́ɔ vuu diki diki, ka ruu vuu shi kpang ɓiɓɛ kɔ shɔɔnang, a wu ti naa dɔ́ɔ ka ruu vuu shi kpang zang ɓɛɛ kpang. Dɔ́ɔ vuu ɓi tɔ doo gbete kak, paasɛ takpang, ka ɓɔɔ wu a yuu ɓiɓɛ ɓɛɛ.

²⁸ Ka ruu ɓɔɔ, nyaa dannang Musa zɔ̃ng ɓi zang ɓɔɔ ri palɛ vuu shi kpang katɔ, ri nwang kpanti zang ɓɔɔ ri dɔɔ vuu ka Gãa Laa ɓɛɛ. A zang ɓɔɔ Laa zɔ̃ng wu nɛɛ knti, a tũng vuu kagn, zang keɓe, palɛ vuu shi kpang ɓi gngn kpang tingkiring.