Yahudi 6 - Nyaa Shɔɔ Ɓɔɔ Laa a Ɓɛɛ

¹ Ka ruu nɔngkɔ, ruu ɓa nɔɔ vuu tĩng shɔɔnang ɓɔɔ zang tusu ruu ka yuu Kirisi ɓɛɛ, ruu kpɛ̃ɛrɛ kaa vuu ɓɔɔ kpãa katɔ ɓɛɛ, tɔ̀ɔ, ruu zũng danggn kati. Ruu gàa nɔɔ yuu tusunang tɔkn nɛɛ, zang ri kɔ̃sɔ yeti, zang yaa vuu shi kpang palɛnang ɓɔɔ raa zang vɔrɔ, zang ri shing danggn ka bii Laa ɓɛɛ kpang.

² Nɛɛ vuu tusunang, ka yuu batizima, nɛɛ naa shinnang ka yuu zang, nɛɛ naa ɓɔɔ zang wisi zang paa nɛɛ sàa ɓɛɛ, nɛɛ ɓɔɔ ruu ɓɔɔ Laa naa jɛ̃ɛ zang, ka ɓɔɔ koo naa waa nyaa ɓɛɛ.

³ Rùu zi rɛɛ vuu keɓe ɓi tɔ, rúu ɓa ri, ruu daa kaa tĩng. Laa nɛɛ kasɛ tɔ ɓɛɛ.

⁴ Ka ruu ɓɔɔ, naa zang ɓɔɔ ri a tɔ kagn ri zi gbalang Laa tɔ, Laa ti a ri vuu ɓɔɔ wu a zang nɛɛ lapa tɔ, a ri ti walɛ Suru Laa tɔ jong,

⁵ ri ti tãa tɔ̃ɔ Ruu Laa tɔ, a ri ti zi naa ɓɔɔ naa vuu palɛnang koo ɓɔɔ naa a ɓɛɛ nwang ɓɛɛ tɔ.

⁶ Naa ri yaa gbalang Laa doo nɛɛ mani, naa zang tɔɔ zang sɔ́ɔrɔ̀ ri tɔkn, ri kɔ̃sɔ yeti, zang zunung takpang. Ka ruu ɓɔɔ, nwang naa ri ɓaa Jaa Laa naa kaa laa tɔkn, a ri shingnɛ, yusɛ̃ɛ tuu wu, ka jĩng zang piti ɓɛɛ.

⁷ Tipi ɓɔɔ ɓoo mii lapa, ɓɔɔ a ka yuu ɓiɓɛ diki diki, a pàlɛ́ zang ɓɔɔ ri lang wu, vuu shaanang ɓɔɔ tɔ̃ɔ. Zang kɔɔ katɔ nɛɛ, Laa pàlɛ́ tipi keɓe tɔ̃ɔ.

⁸ A tipi keɓe naa ɓi kɔkɔ nɛɛ wisi kɔ takɛ kagn shɛ̃ɛning, vuu ɓɔɔ zang palɛ nɛɛ mani kpang. Zang ku tipi keɓe nyaa katɔ, a zang naa dɔɔ katɔ nɛɛ waa. Laa palɛ doo nɔngkɔ nɛɛ zang ɓɔɔ wu alɛ ri rɛɛ vuu keɓe, ri nɛɛ bɛ̃ɛ tɔ̃ɔ palɛnang ɓiɓɛ katɔ.

⁹ Masang ɓɔɔ, n kasɛ nɔɔ dɔɔli ɓɛɛ, naa ruu ràng yee doo nɔngkɔ, ruu zi tɔ, ɓɔɔ manɛ, nɔɔ shìi manɛ ka vuu tɔ̃ɔ ɓɔɔ shingnɛ, Laa ta yuu manɛ ɓɛɛ.

¹⁰ Ka ruu ɓɔɔ, Laa ɓi zang ɓɔɔ palɛ vuu gn dang gbete kpang, danggn ning wu shonang manɛ kpang. Nɛɛ naa ɓɔɔ nɔɔ tusu nɛɛ nɔɔ kasɛ wu katɔ, ka ɓɔɔ nɔɔ yí zang ɓiɓɛ naa ka bii, a nɔɔ ti yi ri doo naa ɓɛɛ.

¹¹ Rùu kasɛ zang ɓu ka teteng manɛ wu shing yuu kagn, diki ɓɔɔ koo waa nyaa wu a nɛɛ mani. Tɔ̀ɔ, wu wàlɛ̀ vuu ɓɔɔ wu shing gn kagn ɓɛɛ kati.

¹² Ruu kasɛ, nɔɔ si rang kpang, nɔɔ màsɛ̀ rɛɛ zang ɓɔɔ, ka ruu danggn ɓɔɔ ri shingnɛ, nɛɛ danggn ɓɔɔ ri mã ɓɛɛ, rikɔ naa walɛ vuu ɓɔɔ Laa a nyaa ɓɛɛ.

Nyaa ɓɔɔ Laa arɛ, Laa naa palɛ katɔ

¹³ Ka ɓɔɔ Laa a Ibirayi nyaa, ka ruu ɓɔɔ zang ɓɔɔ ɓa Laa katɔ kagn kpang, Laa tũng vuu nɛɛ yuu ɓiɓɛ.

¹⁴ Kɔɔyi tɔɔ, “Niizang, n shing mɔɔ mɔ́ɔ tãa tĩnang, n a mɔɔ zɔ̃ng dɔɔli.”

¹⁵ A ka knti ɓɔɔ Ibirayi mã danggn, gã tɔ, Laa a wu vuu ɓɔɔ wu a wu nyaa ɓɛɛ.

¹⁶ Shɔnzang ri tũng vuu nɛɛ zang ɓɔɔ ɓa ri katɔ ɓɛɛ. Vuu tũnnang kɔ shingnɛ vuu ɓɔɔ zang kɔ̀ɔ ɓɛɛ, wu nwang niizang. Wu shingnɛ, nyaa ɓɔɔ zang làá ɓɛɛ wu di nyaa.

¹⁷ Laa kasɛ nɛɛ wu shingnɛ zang ɓɔɔ ri ta nyaa ɓɔɔ Laa a keɓe ri zirɛ, nɛɛ wu kɔ̃sɔ vuu ɓɔɔ wu kasɛ ɓɛɛ ɓi kpang. Ka ruu nɔngkɔ, tũng vuu tɔ̀ɔ, wu tusu kati nɛɛ, vuu ɓɔɔ wu a nyaa, wu naa palɛ katɔ.

¹⁸ Vuu keɓe ziti, vuu ɓɔɔ Laa tũng, nɛɛ nyaa ɓɔɔ wu a ɓɛɛ, ri kɔ̃sɔ kpang, a Laa ti suu sèé ka yuu ɓarɛ kpang. Ka ruu nɔngkɔ, rùu ɓɔɔ rùu yurɛ, ruu walɛ nɔng waanang, zang mã ruu danggn gbãng gbãng nɛɛ ruu yiti gn vuu ɓɔɔ zang shing ruu ka tĩng keɓe gbatagbata.

¹⁹ Gn ɓɔɔ ruu shing keɓe kɔ yiti ruu gbatagbata, vuu ɓɔɔ lee ruu naa ka bii kpang. Ka ruu nɔngkɔ, ruu dàa ka nɔng ɓɔɔ Laa kagn. Ruu ɓa fɔ̃ɔrɔ ɓɔɔ zang ku nyaa gãa Nɔng ɓɔɔ shi kpang kagn kpang, nɛɛ mani ɓɛɛ.

²⁰ Nɔng ɓɔɔ Yeesɔ kɔ daa tĩng shɔɔnang, ka nung ɓɔɔ ruu nɛɛ dàa ɓɛɛ. Ka knti ɓɔɔ nwang kpanti zang ɓɔɔ ri dɔɔ vuu ka Gãa Laa tɔ dòndòng, naa ɓɔɔ Malakisadak nwang ɓɛɛ.