Yahudi 4 - Nyaa Shɔɔ Ɓɔɔ Laa a Ɓɛɛ

¹ Ka ruu nɔngkɔ, wee nyaa ɓɔɔ Laa arɛ ka yuu daanang ka nɔng ɔ̃sɔnang ɓiɓɛ doo kagn ɓee, ruu palɛ waasɛ̃ zang ɓɔɔ ka teteng ɓuru nɛ̀ɛ́ dàa nɔng ɔ̃sɔnang kaɓa kpang.

² Ka ruu ɓɔɔ, zang kɔɔ ruu Ruu Tɔ̃ɔ Laa tɔ jong, naa ɓɔɔ zang kɔɔ ri ɓɛɛ. A rúu ɓɔɔ ri tãayi nwàng ri vuu ɓɔɔ kaa takpang, ka ruu ɓɔɔ, zang ɓɔɔ ri tãayi, ri shing danggn kpang ɓɛɛ.

³ Rùu ɓɔɔ ruu shing danggn tɔ ɓɛɛ, rùu daa ka nɔng ɓɔɔ Laa kagn ruu ɔ̃sɔ nɛɛ wu. Naa ɓɔɔ Laa kɔɔyi ɓɛɛ nɛɛ, “A n tũng vuu ka ɓɔɔ bɛ̀ɛ́ gnvɔ shàa m ɓɛɛ nɛɛ, ‘Ri daa nɔng ɔ̃sɔnang mɛɛ kpang dòndòng.’ ” A kɔɔ ruu keɓe, bɛ̀ɛ́ hangsɛ shonang ɓiɓɛ tɔ, doo ka ɓɔɔ wu mã̀a koo ɓɛɛ.

⁴ Zang kɔɔ ruu ɓɔɔ kagn, ka yeti labeenang Laa ka yuu diki manziti nɛɛ, “A ka lee ɓɔɔ diki daa manziti, Laa ɔ̃sɔ ka shonang ɓɔɔ wu pálɛ́ ɓɛɛ nandon.”

⁵ Zang kɔ̀ɔ ka nɔng ɓɔɔ tɔkn nɛɛ, “Ri daa nɔng ɔ̃sɔnang mɛɛ kpang dòndòng.”

⁶ A zang yàa kaa zang ɓɔɔ gbalang, nɛɛ ri daa ɔ̃sɔ nɛɛ Laa. Zang ɓɔɔ rikɔ tãa Ruu Tɔ̃ɔ Laa shɔɔnang, ri daa ɔ̃sɔ nɛɛ Laa kpang, ka ruu ɓɔɔ, ri shing danggn kpang ɓɛɛ.

⁷ Ka ruu nɔngkɔ, Laa shing diki ɓɔɔgn tɔkn ɓɔɔ ɓaayi nɛɛ, “Lɛɛkɔ”. Saa naa ɓa tɔ dɔɔli, Laa naa kɔɔ ruu ka yuu diki keɓe nɛɛ nyaa Dawuda. Ruu ɓɔɔ ruu bee nɔɔ tɔ ɓɛɛ nɛɛ, “Naa nɔɔ tãa yee ɓiɓɛ lɛ̀ɛ́kɔ, nɔ́ɔ bɛ̃ɛ shoo ɓaanang kpang.”

⁸ Naa Jashuwa nɛ̀ɛ́ daa katɔ, a zang nɛɛ ti daa ka nɔng ɔ̃sɔnang Laa katɔ, Laa nɛɛ rang yee nɛɛ knti ka yuu diki ɓɔɔgn kpang.

⁹ Ka ruu nɔngkɔ, zang Laa ri ɔ̃sɔ ditɔ naa ɓɔɔ ka lee ɓɔɔ diki daa manziti ɓɔɔ Laa ɔ̃sɔ kagn ɓɛɛ.

¹⁰ Ka ruu ɓɔɔ, zang ɓɔɔ nɛɛ daa nɔng ɔ̃sɔnang Laa tɔ, ɔ̃sɔ ɓi tɔ jong ka shonang ɓiɓɛ naa ɓɔɔ Laa ɔ̃sɔ ka ɓɔɔ wu hangsɛ shonang ɓiɓɛ ɓɛɛ.

¹¹ Ka ruu nɔngkɔ, ruu palɛ vuu ɓɔɔ ruu zunung katɔ ɓɛɛ, ruu daa nɔɔ nɔng ɔ̃sɔnang kaɓa. Zang ɓɔɔ ka teteng ɓuru wu ta nyaa Laa naa ɓɔɔ ri palɛ, a ri daa nɔng ɔ̃sɔnang Laa kpang ɓɛɛ kpang.

¹² Ruu Laa palɛ shonang katɔ. Wɔng nyaa ɓa yere bang ɓɔɔ nyaa ziti katɔ. Basɛ suru bii katɔ nɛɛ suru. Wu ti basɛ rɛɛ gboko nɛɛ sɛ̃ɛting kaka. Ti dɔng ruu katɔ ka yuu vuu ɓɔɔ zang rɛ̃rɛ nɛɛ vuu ɓɔɔ zang mang ka yeti ɓɛɛ.

¹³ Vuu ɓɔɔ Laa mãayi kagn gbete, ɓɔɔ wayi, Laa zi wu kpang ɓɛɛ kpang. Vuu piti ɓi ka dalɛ, zang larɛ ri ɓi katɔ ka jĩng Laa ɓɔɔ ruu naa shii ka tĩng ɓiɓɛ, ruu kɔɔ wu vuu piti ɓɔɔ ruu palɛ ɓɛɛ.

Yeesɔ, kpanti zang ɓɔɔ ri dɔɔ vuu ka Gãa Laa ɓɛɛ

¹⁴ Wee kpanti zang ɓɔɔ ri dɔɔ vuu ka gãa Laa, ɓɔɔ ɓuru kagn, ɓɔɔ zang a wu bannang dɔɔli ɓee. Kpanti keɓe wukɔ Yeesɔ Jaa Laa, ɓɔɔ daa tɔ ka lapa ɓee. Rúu yiti nɔɔ danggn, ɓɔɔ ruu shingnɛ, rùu kɔɔ zang ruu ka yuu ɓiɓɛ keɓe gbãng gbãng.

¹⁵ Ka ruu ɓɔɔ, kpanti zang ɓɔɔ ri dɔɔ vuu ka gãa Laa, ɓɔɔ ɓuru, gn ɓuru kɔng wu katɔ, ka ɓɔɔ ruu lakɛ naa ka bii kpang ɓɛɛ. Kpanti ɓuru keɓe ɓi zang ɓɔɔ zang gãsɛ wu katɔ ka gbalang náabm̀ náabm̀, naa ɓɔɔ zang gãsɛ ruu ɓɛɛ. A palɛ vuu shi kpang ɓi kaa takpang.

¹⁶ Ka ruu nɔngkɔ, rúu a ka bii Laa, ruu yaa gn naa kpang. Laa ɓɔɔ palɛ zang tɔ̃ɔ waati ɓɛɛ. Tɔ̀ɔ, gn ɓuru wu kɔng wu, wu ti palɛ ruu tɔ̃ɔ ɓɔɔ yi ruu naa ka bii, ka diki ɓɔɔ ruu kasɛ nɛɛ wu yi ruu naa ka bii ɓɛɛ.