Yahudi 3 - Nyaa Shɔɔ Ɓɔɔ Laa a Ɓɛɛ

Yeesɔ ɓa Musa bannang katɔ

¹ Ka ruu nɔngkɔ, rɛɛ manzung ɓɔɔ nɔɔ doo zang Laa kɔ ɓɛɛ, ɓɔɔ Laa ɓáa nɔɔ nyaa tɔ jong ɓɛɛ. Nɔɔ shing rɛ̃rɛnang manɛ ka bii Yeesɔ, ɓɔɔ wukɔ zang shonang nɛɛ kpanti zang ɓɔɔ ri dɔɔ vuu ka Gãa Laa ɓɔ̀ɔ́ danggn kɔ ruu shing ɓee.

² Yeesɔ nwáng zang ɓɔɔ zang shing gn katɔ ka bii ɓiɓɛ ɓɛɛ, ka bii Laa ɓɔɔ zɔ̃ng wu ɓɛɛ, naa ɓɔɔ Musa nwáng zang ɓɔɔ zang shing gn katɔ ka bii ɓiɓɛ ka shonang ɓɔɔ wu pàlɛ̀ zang Laa nandon ɓɛɛ.

³ A zang zirɛ, Yeesɔ dàa ɓɔɔ zang a wu bannang ɓa ɓɔɔ Musa katɔ, tɔ. Naa ɓɔɔ, bannang ɓɔɔ zang a zang ɓɔɔ mãa gãa ɓa ɓɔɔ gãa ɓɔɔ wu mãayi katɔ ɓɛɛ.

⁴ Niizang, gãa piti zang ɓɔɔ mãayi kagn, a ɓi kaa Laa kɔ mãa vuu piti.

⁵ Musa nwáng zang ɓɔɔ zang shing gn katɔ ka bii ɓiɓɛ ɓɛɛ, ka gãa Laa nandon ka shonang ɓɔɔ wu palɛ ɓɛɛ, tɔ̀ɔ, wu kɔɔ ruu kaa yuu vuu ɓɔɔ Laa naa kɔɔ ka tĩng ɓɛɛ. A wu ɓi kaa zang ɓɔɔ palɛ shonang waati.

⁶ A Yeesɔ nwáng zang ɓɔɔ zang shing gn katɔ ka bii ɓiɓɛ ka Gãa Laa nandon, ka ruu ɓɔɔ, wu ɓi Jaa ɓɛɛ. Rukɔ Gãa keɓe, ruu nɛɛ yiti danggn ɓɔɔ ruu mãrɛ gbãng gbãng, nɛɛ gn ɓɔɔ ruu shingnɛ kɔ, ruu dɔɔ bii nɛɛ mani ɓee ɓɛɛ.

Ɔ̃sɔnang zang Laa

⁷ Ka ruu nɔngkɔ, naa ɓɔɔ Suru Laa kɔɔ ɓɛɛ, “Naa nɔɔ tãa yee Laa lɛ̀ɛ́kɔ,

⁸ nɔɔ bɛ̃ɛ shoo ɓaanang kpang, naa ɓɔɔ zang pálɛ́ ka ɓɔɔ ri lasɛ Laa yeti ɓɛɛ. Ka ɓɔɔ ri gãsɛ wu ka jĩngti ɓɛɛ.

⁹ Ka ɓɔɔ rɛɛ dabang manɛ ri gãsɛ m, a ri zi vuu ɓɔɔ n pálɛ́ ɓɛɛ, saa laa ziti ɓɛɛ.

¹⁰ Ka ruu nɔngkɔ, yeti mɛɛ lasɛ nɛɛ zɔ̃ng zang kaɓa. A n kɔɔyi nɛɛ, ‘Zang keɓe ri ɓaa shoo ka yee mɛɛ kpang diki diki. A ri dũng nyaa mɛɛ ɓɔɔ n dang ɓɛɛ kpang.’

¹¹ Ka ruu nɔngkɔ, gnvɔ shaa m, a n tũng vuu, n tɔɔ, ‘Ri àrɛ́, ri ɔ̃sɔ nɛɛ n ka nɔng ɓɔɔ bɛ̀ɛ́ n kagn kpang dòndòng.’ ”

¹² Rɛɛ manzung, nɔɔ palɛ waasɛ̃, zang gbete ka teteng manɛ, nɛɛ tá yeti ɓɔɔ vuu shi kpang kagn, a ti shing danggn ɓi kpang ɓɛɛ, yeti ɓɔɔ shing wu, wu ràa Laa ɓɔɔ ningkãari yuu knti ɓɛɛ.

¹³ Nɔɔ mã zɔɔ danggn katɔ kɔ jong diki diki, tɔɔ vuu shi kpang wu shing zang ɓɔɔ kaa tɔ̀ɔ́ ka teteng manɛ wu taarɛ yuu kpang, ka laa ɓɔɔ nɔɔ doo ningkãari kɔ, zang ɓaa nɛɛ “Lɛɛkɔ” ɓee.

¹⁴ Ka ruu ɓɔɔ, ruu ɓuru kaa zang ɓɔɔ ri walɛ vuu ka bii Kirisi ɓɛɛ. Ruu nɛɛ yaa gn ɓɔɔ ruu gaayu, ruu shingnɛ kpang, diki ɓɔɔ koo waa nyaa wu a nɛɛ mani ɓɛɛ.

¹⁵ Zang bee ka yeti labeenang Laa nɛɛ, “Naa nɔɔ tãa yee ɓiɓɛ lɛ̀ɛ́kɔ nɔɔ taarɛ yuu manɛ kpang naa ɓɔɔ zang palɛ ka ɓɔɔ ri lasɛ Laa yeti ɓɛɛ”.

¹⁶ Ɓu rɛɛ wi, ri tãa yee Laa, a ri lasɛ wu yeti wiya? Ɓi rɛɛ zang ɓɔɔ Musa nwangsɛ ri nɛɛ Masara kɔ nandon.

¹⁷ A gnvɔ shàa Laa nɛɛ rɛɛ wi, saa laa ziti wiya? Ɓi doo zang kaɓa ɓɔɔ ri palɛ vuu shi kpang, ri vɔlɔ ka jĩngti ɓɛɛ.

¹⁸ Laa tũng rɛɛ wi vuu nɛɛ ri a nɔng ɔ̃sɔnang ɓiɓɛ kpang wiya? Ɓi doo zang kaɓa ɓɔɔ ri ɓaa shoo ka nyaa ɓiɓɛ kpang ɓɛɛ.

¹⁹ Ka ruu nɔngkɔ, ruu zirɛ nɛɛ ri daa ɔ̃sɔ kpang, ka ruu ɓɔɔ, ri shing danggn kpang ɓɛɛ.