Yahudi 2 - Nyaa Shɔɔ Ɓɔɔ Laa a Ɓɛɛ

Naa ɓɔɔ zang ta yuu ɓuru, bang dɔɔli

¹ Ka ruu nɔngkɔ, ruu shing nɔɔ jĩng gbãng gbãng ka vuu ɓɔɔ ruu tãarɛ ɓɛɛ, vuu keɓe nɛɛ wɔ̀ ruu nɛɛ naa kpang ɓɛɛ.

² Naa rúu ɓɔɔ zang nyaa shonang Laa ɓɔɔ ri ka lapa kɔɔyi, nwang tɔ nɔngkɔ niizang. Zang ɓɔɔ nɛɛ tà kpang, nɛɛ ti dũ̀ng kpang, zang dang wu jĩng katɔ ka naa ɓɔɔ daa naa katɔ ɓɛɛ.

³ A naa ruu shing jĩng gbãng gbãng ka ruu naa ɓɔɔ zang ta yuu zang, ɓɔɔ bang katɔ naa weɓe kpang, ruu wɔ biya? Ka ruu ɓɔɔ, ɓi Kpanti Yeesɔ nɛɛ yuu ɓiɓɛ, wukɔ gaayu ruu keɓe kɔɔnang ɓɛɛ. A zang ɓɔɔ ri tãayi, rikɔ tusu ruu nɛɛ ruu keɓe niizang kɔ nwani.

⁴ Laa ti tusu jong nɛɛ ruu keɓe niizang naa ɓɔɔ ri tusu ɓɛɛ, ka ɓɔɔ wu palɛ vuu ɓɔɔ zang zirɛ zang mã naa ka danggn ka zɔ̃ng zɔ̃ng ɓɛɛ. A ti basɛ zang vuu ɓɔɔ Suru ɓiɓɛ a zang ka naa ɓɔɔ wu kasɛ ɓɛɛ.

Laa risi Yeesɔ wu nwang shɔnzang

⁵ Laa shing wu zang nyaa shonang ɓiɓɛ ɓɔɔ ri ka lapa, ri roo kpanti ka koo ɓɔɔ wu naa mãa ɓɛɛ kpang. Koo kɔ ruu rang yee ka yuu ɓiɓɛ ɓee.

⁶ A zang ɓɔɔ kɔɔ kagn ka nɔng ɓɔɔ, ka yeti labeenang Laa tɔɔ, “Shɔnzang ɓu viya? A mɔɔ rɛ̃rɛ ka yuu ɓiɓɛ wiya? A jaa shɔnzang ɓɔɔ mɔɔ gãng jĩng ka wu ɓɛɛ, ɓu viya?

⁷ Mɔɔ shing wu, zang nyaa shonang ɓaaɓɛ ɓɔɔ ri ka lapa ri ɓa wu, a diki bee kaa tɔ̀ɔ́ dɔɔli kpang. A mɔɔ a wu bannang nɛɛ dɔ̀ɔnang,

⁸ a mɔɔ shing vuu piti ka naa ɓiɓɛ.” Ka wee Laa shing vuu piti ka naa ɓiɓɛ ɓee, Laa yaa vuu ɓɔɔ kagn ɓɔɔ ka naa ɓiɓɛ kpang ɓɛɛ, kpang. A kãntang keɓe, ruu zi gň mɔɔ kɔɔ nɛɛ vuu piti ka naa ɓiɓɛ kɔ kpang.

⁹ A ruu zirɛ, Yeesɔ ɓɔɔ zang shíng wu zang nyaa shonang Laa ɓɔɔ ri ka lapa ri ɓá wu, a diki bee kaa takpang ɓee, zang a wu bannang nɛɛ dɔɔnang ka ruu jĩng ɓɔɔ wu dangnɛ a vɔrɛ ɓɛɛ. Vuu keɓe piti ɓi ka ruu tɔ̃ɔ ɓɔɔ Laa palɛ zang ɓɛɛ, shingnɛ Yeesɔ tãa naa ɓɔɔ vɔrɔ nwang ɓɛɛ ka nung zang piti.

¹⁰ Daa naa katɔ, Laa ɓɔɔ vuu piti nwang ka ruu ɓiɓɛ kɔ, a wukɔ ti mã̀a vuu piti ɓɛɛ, wu shing Yeesɔ wu nwang nyaa kiiri nɛɛ jĩng ɓɔɔ wu dang ɓɛɛ. Tɔ̀ɔ, wu atɛ wujɛ ɓiɓɛ ri wàlɛ̀ bannang, ka ruu ɓɔɔ Yeesɔ kɔ sɔɔ ri tĩng, zang daa ta yuu ɓarɛ ɓɛɛ.

¹¹ Zang ɓɔɔ shingnɛ zang nwang zang tɔ̃ɔ, nɛɛ zang ɓɔɔ zang shing ri, ri nwàng zang tɔ̃ɔ piti, Daa ɓarɛ gbete. Ka ruu nɔngkɔ, yusɛ̃ɛ tuu Yeesɔ ka ɓɔɔ wu ɓaa ri nɛɛ rɛɛ ɓeezung ɓɛɛ kpang.

¹² Kɔɔ Laa tɔɔ, “N kɔɔ rɛɛ manzung ruu bannang ɓaaɓɛ. N gáa soo, n dɔ̀ɔ mɔ̀ɔ ka tĩng zang dɔɔli ɓɔɔ ri kpalɛ zɔɔ, ri bang mɔɔ ɓɛɛ.”

¹³ A ti kɔ̀ɔ tɔkn nɛɛ, “N shing gn ka bii ɓaaɓɛ kɔ.” A kɔɔ tɔkn nɛɛ, “Wee n ɓee, nɛɛ wujɛ ɓɔɔ Laa a m ri ɓɛɛ.”

¹⁴ Wee wujɛ bìí ri ta bii shɔnzang ɓee, a tuu bii jong nɔngkɔ, tɔ̀ɔ, wu vɔrɛ, wu ningsi sheetang kati. Zang ɓɔɔ zang a wukɔ naa vɔrɔ ɓɛɛ.

¹⁵ A Yeesɔ yaa zang naa, zang ɓɔɔ ɓu doo ɓɔɔ ri nwangnɛ ɓɛɛ, ri nwang ɓarɛ naa jaafoo ka ruu ɓɔɔ ri kaa vɔrɔ, vɔrɔ ɓɛɛ.

¹⁶ Niizang, Yeesɔ yi wu rɛɛ zang nyaa shonang Laa ɓɔɔ ri ka lapa naa ka bii kpang ɓɛɛ, “Yi ɓi rɛɛ zɔ̃ng Ibirayi naa ka bii.”

¹⁷ Ka ruu nɔngkɔ, wu nwang naa rɛɛ ɓeezung kɔ gbãng gbãng ka vuu piti, tɔ̀ɔ, wu nwang kpanti zang ɓɔɔ ri dɔɔ vuu ka Gãa Laa kati. Ɓɔɔ gn zang kɔng wu katɔ, a ti zang ɓɔɔ zang shing gn katɔ ka bii ɓiɓɛ ɓɛɛ, ka shonang ɓɔɔ wu pàlɛ́ Laa ɓiɓɛ ɓɛɛ. Tɔ̀ɔ, wu a zang yuu ɓiɓɛ, zang nyɔ wu vɔrɔ, vuu keɓe wu shingnɛ, Laa wu kɔsɔ zang vuu shi kpang ɓarɛ kati.

¹⁸ A wee Yeesɔ nɛɛ yuu ɓiɓɛ dang jĩng tɔ, a zang ti gãsɛ wu tɔ ɓee, zunung ɓɔɔ wu yi zang ɓɔɔ zang gã̀sɛ́ ri kãntang naa katɔ ka bii.