Yahudi 12 - Nyaa Shɔɔ Ɓɔɔ Laa a Ɓɛɛ

Ruu shing jĩng ka bii Yeesɔ

¹ Ka ruu nɔngkɔ, wee zang ɓɔɔ ri kɔ̀ɔ ruu rúu, ri shang nɔngkɔ, ri kiiri ruu nyaa ka teteng ɓee. Ruu vang nɔɔ vuu piti ɓɔɔ zãa ruu gbalang, nɛɛ vuu shi kpang ɓɔɔ kpãa ruu, ɓɔɔ ruu wii kagn ɓɛɛ. Ruu mã danggn, ruu yuu nɔɔ yunang kɔ zang shing ka tĩng ɓuru ɓee.

² Ruu shing nɔɔ jĩng ka bii Yeesɔ ɓɔɔ wukɔ tusu ruu naa ɓɔɔ ruu shing danggn, ti shingnɛ danggn shinnang ɓuru wu nwang nyaa kiiri ɓɛɛ. Zang ɓɔɔ, ka ruu tĩnang ɓɔɔ Laa naa a wu ka tĩng, mã danggn ka ɓɔɔ zang ɓaa wu naa ka laa ɓɛɛ. Yee laa ka yusɛ̃ɛ náa ɓɔɔ zang ɓaa wu ɓɛɛ kpang, a daa nwàng ka nakn laa nwannang Kpanti Laa.

³ Nɔɔ rɛ̃rɛ karɛ ka yuu Yeesɔ ɓɔɔ mã danggn ka jĩng ɓɔɔ wu dangnɛ ka ɓɔɔ zang bɛ̃ɛ wu ɓɛɛ, tɔ̀ɔ, nɔɔ lee kaa takpang, nɔɔ ti yaa gn naa kpang.

⁴ Ka ɓɔɔ nɔɔ táarɛ̀ yuu nɛɛ vuu shi kpang, nɔɔ shii bang gn daa naa ɓɔɔ zang nyɔ nɔɔ vɔrɔ ɓɛɛ kpang.

⁵ Danggn wu ning nɔɔ ruu gn mãnang ɓɔɔ Laa ɓáa nɔɔ nɛɛ wujɛ ɓiɓɛ ɓɛɛ kpang, kɔɔyi tɔɔ, “Jaa mɛɛ, mɔɔ risi shoo ɓɔɔ Laa gɔ̃̀ mɔɔ, wu nwang naa vuu pĩirinang kpang. Naa ti mangkɛ mɔɔ, mɔɔ yaa gn naa kpang.

⁶ Ka ruu ɓɔɔ, Laa gɔ̃ zang ɓɔɔ wu kasɛ ri katɔ kɔ shoo ɓɛɛ. Wu ti dang zang piti ɓɔɔ wu tarɛ nɛɛ jaa ɓiɓɛ ɓɛɛ jĩng.”

⁷ Mã danggn ka jĩng dannang, naa ɓɔɔ daa gɔ̃ jaa shoo ɓɛɛ. Ka ruu ɓɔɔ, ɓi jaa kiya daa ɓiɓɛ gɔ̃̀ wu shoo kpang wiya?

⁸ Naa zang gɔ̃̀ nɔɔ shoo, naa ɓɔɔ zang gɔ̃ wujɛ piti kpang, nɔɔ manɛ wujɛ gãa kpang, nɔɔ manɛ wujɛ nɔng zaakn.

⁹ Wu nɔngkɔ shɛ̃ɛning kpang, rɛɛ daa ɓuru ɓɔ̀ɔ́ bii shɔnzang kagn, ɓɔɔ ri gɔ̃ ruu shoo ɓɛɛ, a ruu seng ri katɔ. Naa ruu a Daa ɓuru ɓɔɔ ka lapa yuu ɓuru tɔ, ruu nwáng ningkãari, wukɔ daayi kpang ya?

¹⁰ Rɛɛ daa ɓuru ri gɔ̃ ruu shoo diki bee kpang, naa ɓɔɔ ri zirɛ daa ɓɛɛ. A shoo ɓɔɔ Laa gɔ̃ ruu nwǎng ɓi rukɔ tɔ̃ɔ, tɔ̀ɔ, ruu nwang kaa jong zang ɓɔɔ shi kpang ka bii ɓuru kpang naa wu.

¹¹ Ka laa ɓɔɔ zang gɔ̃ mɔɔ shoo, tĩng nyaa kpang, kɔng katɔ. Nɛɛ knti shoo kɔ zang kasɛ nɛɛ zang gɔ̃ zang ɓee, naa nwǎng zang kaɓa tɔ̃ɔ, wu ti shingnɛ ri palɛ zang tɔ̃ɔ, ri ti nwang ka nyaa zɔɔ.

Zang shaarɛ rɛɛ zang ɓɔɔ ri bɛ̃ɛ tɔ̃ɔ ɓɔɔ Laa palɛ ɓɛɛ nyaa

¹² Ka ruu nɔngkɔ, nɔɔ tuuru naa manɛ kɔ tɛ̃ɛ ɓotok ɓi ta ka lapa, nɔɔ ti shiiri gutu manɛ ɓɔɔ lakɛ naa bii kpang ɓɛɛ ka ruu jĩng ɓɔɔ nɔɔ dang ɓɛɛ.

¹³ Nɔɔ yaa shi kpang palɛnang, nɔɔ dũng gbalang Laa ta, tɔ̀ɔ, zang ɓɔɔ kàa katɔ, ka ruu shi kpang palɛnang wu lakɛ katɔ kɔ jong, wu kpaa sáa doo ɓiɓɛ sasak kpang.

¹⁴ Kãa gbalang mɔɔ nwang ka nyaa zɔɔ nɛɛ zang piti, mɔɔ ti nwang zang ɓɔɔ shi kpang, ka bii ɓaaɓɛ kpang ɓɛɛ. Naa mɔɔ nwàng zang ɓɔɔ shi kpang, ka bii ɓaaɓɛ kpang ɓɛɛ kpang, mɔɔ zi Laa kpang.

¹⁵ Nɔɔ gãng jĩng kagn, zang ɓɔɔ ka teteng manɛ nɛ̀ɛ́ wàlɛ̀ tɔ̃ɔ Laa kpang, a zang ɓɔɔ nɛ̀ɛ́ ta yeti ɓɔɔ la katɔ ɓɛɛ, ɓɔɔ shingnɛ, nyaa haanang seepaa, ɓɔɔ lasɛ zang dɔɔli ɓɛɛ.

¹⁶ Nɔɔ gãng jĩng kagn, zang ɓɔɔ ka teteng manɛ nɛ̀ɛ́ nwáng zang dũndũng, kɔ wu nwang zang ɓɔɔ yee laa ka vuu Laa kpang naa Isuwa, ɓɔɔ ka ruu vuu shaanang laa gbete, mã̀lɛ̀ bannang ɓiɓɛ, ɓɔɔ wukɔ zang bang, ka naa jaa nàá ɓiɓɛ.

¹⁷ Nɔɔ zi tɔ, nɛɛ knti, naa kasɛ nɛɛ daa ɓiɓɛ wu gàa wu Laa, Laa wu palɛ wu tɔ̃ɔ. A daa ɓiɓɛ bɛ̃ɛ wu. Gbalang ɓɔɔ wu kɔ̃sɔ vuu ɓɔɔ wu palɛ ɓɛɛ takpang, naa doo ɓɔɔ wu kãayi nɛɛ miiri ka jĩng ɓɛɛ.

¹⁸ Nɔɔ à, wu ka kɔpɔ ɓɔɔ zang lee nɛɛ naa kpang ɓɛɛ kpang, naa ɓɔɔ zang Isirela á ɓɛɛ kpang. Nɔɔ ti a, wu ka nyɛlɛ waa ɓɔɔ shaa nabm ɓɛɛ kpang, wu ka nɔng ɓɔɔ tɔ̀ɔ katɔ kɔngkɔng ɓɛɛ kpang, a wu ti ka nɔng jasung mii ɓɔɔ rãa ɓɛɛ kpang.

¹⁹ Nɔ̀ɔ à, wu ti ka nɔng gboo ɓɔɔ kaa nyaa ɓɛɛ kpang, wu ka nɔng yee ɓɔɔ zang ɓɔɔ ri tãa vuu ɓɔɔ kɔɔyi, ri gaayi nɛɛ ri kasɛ ri pàasɛ̀ tãanang takpang ɓɛɛ kpang.

²⁰ Ka ruu ɓɔɔ, ri zunung danggn mãnang ka yuu nyaa ɓɔɔ yee kaɓa dang kpang ɓɛɛ. Yee kɔɔyi nɛɛ, “Naa doo vuu vàa lee kɔpɔ keɓe, zang wu luku nɛɛ tari, wu vɔrɛ.”

²¹ Niizang, vuu ɓɔɔ ri zirɛ shing baabii dɔɔli, vuu bìí shingnɛ Musa kɔɔyi nɛɛ, “N kaa vɔrɔ dɔɔli, bii zaa m kagn.”

²² Nɔɔ à manɛ ka kɔpɔ Siyona, a ɓɔɔ ka gari bang ɓɔ̀ɔ́ Laa ɓɔɔ ɓi ningkãari ɓɛɛ. Gari keɓe wukɔ Urushalima ɓɔɔ ka lapa ɓɛɛ. Nɔɔ a manɛ ka nɔng ɓɔɔ rɛɛ zang nyaa shonang Laa ɓɔɔ ri ka lapa, ɓɔɔ ri ɓa naa ɓɔɔ zang gã katɔ, ri kpalɛ zɔɔ ri dɔ̀ɔ́ Laa, ri tãa tĩnang ɓɛɛ.

²³ Nɔɔ á manɛ tɔ, ka nɔng ɓɔɔ zang ɓɔɔ ri dũng Laa ɓɔɔ rikɔ jamari ɓiɓɛ, ɓɔɔ zang béeré nung ɓarɛ tɔ ka lapa, ri kpalɛ zɔɔ ɓɛɛ. Nɔɔ a ka bii Laa, ɓɔɔ wukɔ jɛ̃ɛ zang piti ruu ɓɛɛ, a ɓɔɔ ka bii rɛɛ suru zang tɔ̃ɔ ɓɔɔ zang shing ri tɔ, ri nwang tɔ nyaa kiiri ɓɛɛ.

²⁴ A ɓɔɔ ka bii Yeesɔ ɓɔɔ wukɔ shii ka teteng ɓuru nɛɛ Laa, ka nyaa shɔɔ kɔ Laa mã nɛɛ ruu ɓee. A nɔɔ ti a ka nɔng zĩi ɓɔɔ zang ɓisi katɔ, kaa nyavɔ, kɔɔ vuu tɔ̃ɔ, ɓa zĩi Habila katɔ ɓɛɛ.

²⁵ Nɔɔ palɛ waasɛ̃, nɔ́ɔ bɛ̃ɛ Laa kɔ rang yee ɓee kpang. Ka ruu ɓɔɔ, naa zang ɓɔɔ ri bɛ̃ɛ ruu ɓiɓɛ ɓɔɔ a nɛɛ bii Musa ɓɔɔ shàarɛ̀ ri nyaa ka koo keɓe ri wɔ kpang, a ruu nɛɛ bɛ̃ɛ ruu ɓiɓɛ ɓɔɔ a nɛɛ bii Yeesɔ ɓɔɔ a nɛɛ lapa, a shaarɛ ri nyaa ɓɛɛ, ruu palɛ biya ruu wɔ viya?

²⁶ Ka diki Musa kaɓa, yee ɓiɓɛ zĩiti koo katɔ. A kãntang, a nyaa tɔ nɛɛ, “Yaa dòo doo gbete kak, n naa zĩiti wu koo kɔ shɛ̃ɛning kpang, n naa zĩiti lapa jong.”

²⁷ Ruu kɔ zang kɔɔyi nɛɛ, “Yaa dòo doo gbete” tusu nɛɛ, zang naa zĩiti vuu ɓɔɔ Laa mãarɛ ɓɛɛ, zang rùkú, zang yaa nɔng. Tɔ̀ɔ, zang yaa kaa vuu ɓɔɔ zang zunung zĩitinang kpang kɔ shɛ̃ɛning.

²⁸ Ka ruu nɔngkɔ, rúu zã̀a nɔɔ Laa, ka ruu ɓɔɔ, a ruu nɔng kpanti roonang ɓɔɔ zang zĩiti ɓi kpang ɓɛɛ. Rúu zã̀a nɔɔ Laa ruu ti bang wu ka gbalang ɓɔɔ shing wu, wu tãa tĩnang. Ruu a wu bannang, ruu ti kaa vɔrɔ ɓiɓɛ.

²⁹ Ka ruu ɓɔɔ, naa ɓɔɔ waa shaarɛ vuu piti katɔ Laa dang zang ɓɔɔ ri ɓaa shoo ka yee ɓiɓɛ kpang jĩng doo nɔngkɔ, wu ningsi ri piti.