Yahudi 11 - Nyaa Shɔɔ Ɓɔɔ Laa a Ɓɛɛ

Danggn shinnang rɛɛ dabang dabang ɓuru

¹ Danggn shinnang ɓi vuu ɓɔɔ ka yeti ɓuru ɓɔɔ tusu ruu nɛɛ ruu naa walɛ vuu ɓɔɔ ruu shing gn ɓiɓɛ katɔ. Wukɔ shingnɛ vuu ɓɔɔ ruu zi gn kãntang keɓe kpang, wu nwang naa ruu zi katɔ ɓɛɛ.

² Laa kɔɔ ruu tɔ̃ɔ ka yuu rɛɛ dabang dabang ɓuru, ka ruu danggn ɓɔɔ ri shing ɓɛɛ kɔ.

³ Danggn ɓɔɔ ruu shingnɛ, kɔ tusu ruu nɛɛ koo keɓe nwàng nɔngkɔ, ka doo ruu ɓɔɔ Laa kɔɔ ɓɛɛ. Ka ruu nɔngkɔ, vuu ɓɔɔ ruu zili keɓe, zang palɛ ɓi nɛɛ vuu ɓɔɔ zang zili kpang ɓɛɛ.

⁴ Danggn shinnang Habila shing wu, a á Laa vuu nɛɛ zang dɔɔyi, vuu ɓɔɔ Laa tãa tĩnang ɓa ɓɔɔ Kayinu katɔ ɓɛɛ. Danggn shinnang shingnɛ, Laa kɔɔyi nɛɛ, wu zang tɔ̃ɔ ka tĩng ɓiɓɛ, ka ɓɔɔ Laa kɔɔ ruu tɔ̃ɔ ka yuu vuu ɓɔɔ wu a ɓɛɛ. A danggn shinnang ɓiɓɛ kɔ shingnɛ, vɔ tɔ doo tɛ̃ɛ tɛ̃ɛ, zĩi ɓiɓɛ kaa doo naa, nɛɛ Laa wu waa wu pãng ta.

⁵ Danggn shinnang Ɛnɔk shingnɛ, Laa tuu wu nɛɛ koo keɓe ningkãari, daa nɛɛ wu ka lapa. A zang ĩi wu kaa takpang, ka ruu ɓɔɔ, Laa tuu wu tɔ ɓɛɛ. Ka ɓɔɔ bɛ̀ɛ́ zang tuu wu gn kpang, zang kɔɔ ruu tɔ̃ɔ ka yuu ɓiɓɛ nɛɛ Laa tãa tĩnang ɓiɓɛ katɔ.

⁶ Naa zang shing danggn ka bii Laa kpang, zang pálɛ̀ vuu ɓɔɔ Laa tãa tĩnang zang kpang. Ka ruu ɓɔɔ, zang piti ɓɔɔ a ka bii Laa, wu shíng danggn katɔ nɛɛ Laa kagn, wu ti shing danggn nɛɛ Laa a zang ɓɔɔ ri kãa wu vuu katɔ.

⁷ Danggn shinnang Nuhu kɔ shing wu, ɓaa shoo ka nyaa ɓɔɔ Laa shaarɛ wu ka yuu vuu ɓɔɔ naa a ka tĩng ɓɔɔ wu zi gn kpang ɓɛɛ. Ɓaa shoo ka nyaa Laa, a palɛ laana ɓɔɔ wu tá yuu zang ɓɔɔ ri ka gãa ɓiɓɛ ɓɛɛ. Túsú ka danggn ɓɔɔ wu shíng ɓɛɛ nɛɛ, zang koo keɓe ri palɛ ɓarɛ vuu shi kpang, a raa kaa zang ɓɔɔ Laa tɔɔ wu ɓi zang tɔ̃ɔ ɓɛɛ, ka ruu danggn ɓɔɔ wu shing ɓɛɛ.

⁸ Danggn shinnang Ibirayi shing wu ka ɓɔɔ zang ɓaa wu nyaa nɛɛ wu daa nɔng ɓɔɔ naa nwáng ɓɔɔ ɓiɓɛ ɓɛɛ, ɓaa shoo a daayi. Naa doo ka ɓɔɔ wu zi nɔng ɓɔɔ wu daa kpang ɓɛɛ.

⁹ Shíng danggn, a mãa gãa ɓiɓɛ ka tipi ɓɔɔ zang a wu nyaa ka yuu ɓiɓɛ ɓɛɛ, naa zang zanti ka tipi ɓɔɔgn. Nwang ka yeti rɛɛ putali, nɛɛ Ishaaku nɛɛ Yakubu ɓɔɔ Laa a ri nyaa keɓe jong nɛɛ wu ɓɛɛ.

¹⁰ Ka ruu ɓɔɔ, shing jĩng ɓi ka tĩng ka gari ka lapa ɓɔɔ zang loo doo ɓiɓɛ katɔ, ɓɔɔ ɓi Laa kɔ dĩi doo ɓiɓɛ, a mãayi ɓɛɛ.

¹¹ Danggn shinnang Saratu shingnɛ, Laa a wu naa, a tuu jaa ka ɓɔɔ bɛ̀ɛ́ saa ɓiɓɛ ɓa tɔ ɓɛɛ. Ka ruu ɓɔɔ, zi ɓi tɔ zang ɓɔɔ a nyaa, palɛ vuu ɓɔɔ wu a nyaa kagn katɔ ɓɛɛ.

¹² A ka ruu nɔngkɔ, nɛɛ bii zang gbete keɓe, ɓɔɔ ɓi kaa naa vɔrɔ dɔ̃ɔ gbete ɓɛɛ, zɔ̃̀ng ri nwangkɛ gaagaa, naa sang ka lapa. A ri ti ɓa ɓɔɔ zang gã ri katɔ naa seseele ɓɔɔ ka nyaa waapo ɓɛɛ.

¹³ Zang keɓe nandon, ri vɔlɔ, bɛ̀ɛ́ ri shing danggn doo katɔ. Ri walɛ vuu ɓɔɔ zang a ri nyaa ka yuu ɓiɓɛ kpang. Ri zili waati nɛɛ nɔng beebang, a ri kasɛ katɔ ka yeti ɓarɛ. A ri ti kasɛ tɔ nɛɛ, ri ɓarɛ zang zanti, a ri ti nwang ɓarɛ ka teteng zang ɓɔɔ ɓi zang ɓarɛ kpang ɓɛɛ ka koo.

¹⁴ Zang ɓɔɔ ri kɔɔ ruu naa weɓe, ri tusu ɓarɛ nɛɛ, ri kãa ɓarɛ dòo tipi ɓarɛ.

¹⁵ Naa ri nɛɛ rɛ̃rɛ ka yuu tipi ɓɔɔ ri yaa ɓɛɛ, ri nɛɛ walɛ gbalang ɓɔɔ ri gbãayu kagn tɔ.

¹⁶ A ri rɛ̃rɛ ɓarɛ ka yuu tipi ɓɔɔ tɔ̃ɔ ɓɛɛ, ɓɔɔ ka lapa ɓɛɛ. Ka ruu nɔngkɔ, yusɛ̃ɛ tuu Laa ka ɓɔɔ zang ɓaa wu nɛɛ wu Laa ɓarɛ ɓɛɛ kpang, ka ruu ɓɔɔ, gbarɛ ri gari tɔ ɓɛɛ.

¹⁷ Ka ɓɔɔ Laa gãsɛ Ibirayi, danggn shinnang ɓiɓɛ kɔ shing wu, a á Laa jaa ɓiɓɛ, Ishaaku, nàá vuu vàa ɓɔɔ zang dɔ̀ɔ́ Laa ɓɛɛ. Ibirayi ɓi zang ɓɔɔ tãa nyaa ɓɔɔ Laa álɛ wu tɔ, a kasɛ nɛɛ wu dɔ̀ɔ́ Laa jaa gbete ganggang ɓiɓɛ naa vuu vàa.

¹⁸ Bɛ̀ɛ́ Laa kɔɔ wu tɔ nɛɛ, “Zang naa ɓaa zɔ̃ng ɓaaɓɛ nɛɛ bii Ishaaku kɔ”

¹⁹ Ibirayi rɛ̃rɛ ka yeti ɓiɓɛ nɛɛ Laa zunung ɓɔɔ wu wisi Ishaaku paa nɛɛ vɔrɔ katɔ. Ɓɔɔ zang yàa wu Ishaaku ningkãari, nwáng kaa naa vɔ katɔ, a yupaa tɔkn.

²⁰ Danggn shinnang kɔ shing Ishaaku, shing naa ka yuu rɛɛ Yakubu nɛɛ Isuwa, a kɔ̀ɔrɔ̀ vuu tɔ̃ɔ ɓɔɔ naa a ka tĩng ka yuu zang ɓu ɓɛɛ.

²¹ Doo danggn shinnang kɔ shing Yakubu, ka ɓɔɔ bɛ̀ɛ́ tɔɔ wu vɔ kaa tɔ ɓɛɛ, shìng wujɛ Yusufu ɓu naa ka yuu, a gàa ri Laa. Ka laa kaɓa, tiki ka labalang ɓiɓɛ, bang Laa.

²² Danggn shinnang Yusufu shing wu, ka ɓɔɔ zi tɔ, diki ɓɔɔ wu vɔrɛ a naabm tɔ ɓɛɛ, kɔɔ ruu ka yuu diki ɓɔɔ zang Isirela ri nwangnɛ, ri yaa tipi Masara. Kɔɔ zang ruu ka yuu naa ɓɔɔ zang palɛ nɛɛ vɔrɔ ɓiɓɛ ɓɛɛ.

²³ Danggn shinnang rɛɛ zang ɓɔɔ ri yi Musa, shingnɛ, ri waasɛ wu shala taati ka knti ɓɔɔ zang yi wu ɓɛɛ. Ka ruu ɓɔɔ, ri zirɛ jaa bìí shi dɔɔli ɓɛɛ, ri kaa vɔrɔ ɓɔɔ ri ta nyaa ɓɔɔ kpanti tipi kaɓa dangnɛ ɓɛɛ kpang.

²⁴ Danggn shinnang Musa shing wu, ka ɓɔɔ wu bang tɔ, bɛ̃ɛyi nɛɛ zang ɓàa wu nɛɛ wu jaa, jaa Firawuna ɓɔɔ soro kpang.

²⁵ Zɔ̃ngnɛ, nɛɛ zang dang wu jĩng, nɛɛ rɛɛ zang Laa ka nung ɓɔɔ wu nɛɛ tãa tĩnang ɓɔɔ zang tãayi ka ɓɔɔ zang palɛ vuu shi kpang, a diki tĩnang bìí ti bee kpang ɓɛɛ.

²⁶ Risi vuu yusɛ̃ɛ ɓɔɔ zang pàlɛ́ zang, ka ruu Kirisi, nɛɛ nwǎng zang tɔ̃ɔ dɔɔli, ɓa vuu naa ɓɔɔ ka Masara nandon katɔ. Ka ruu ɓɔɔ shing jĩng ɓi ka tĩng ka vuu tɔ̃ɔ ɓɔɔ wu naa walɛ ɓɛɛ.

²⁷ Danggn shinnang shing wu a yaa Masara, kaa vɔrɔ gnvɔ ɓɔɔ naa shàá kpanti kpang. Mã danggn daayi, naa zang ɓɔɔ zi Laa ɓɔɔ shɔnzang ri zi wu ɓarɛ kpang ɓɛɛ.

²⁸ Danggn shinnang kɔ shing wu, gaayu diki nyaalaa borodi ɓɔɔ zang tɛ̃ɛ yisi kagn kpang ɓɛɛ. Kɔɔ zang Isirela nɛɛ ri nwãa zĩi ka nyaa gãa ɓarɛ. Tɔ̀ɔ, zang nyaa shonang Laa ɓɔɔ ka lapa ɓɔɔ naa nyɔ̀kɔ́ jamari zang Masara vɔrɔ, wu nyɔkɔ ɓɔɔ zang Isirela kpang.

²⁹ Danggn shinnang shing zang Isirela ri tɛɛ nɛɛ teteng waapo ɓɔɔ zang ɓaa nɛɛ, “Waapo ɓɔɔ Raa katɔ” ɓɛɛ, naa ri ra ka tipi. A ɓɔɔ zang Masara ri tɔɔ ri tɛɛ kaa jong, mii shaa ri.

³⁰ Danggn shinnang zang Isirela shingnɛ, vuu ɓɔɔ zang mãayi zang kiiri gari Jeriko nyaa nɛɛ mani ka teteng, jirɛ, ka knti ɓɔɔ ri jĩng doo ɓiɓɛ diki manziti ɓɛɛ.

³¹ Danggn shinnang Rahab, jaa soro ɓɔɔ rakɛ wàázaa ɓɛɛ, shingnɛ, zang nyɔ wu vɔrɔ, ɓi nɛɛ zang ɓɔɔ ri dũng nyaa Laa kpang ɓɛɛ kpang. Ka ruu ɓɔɔ, ta zang Isirela waasɛ̃ ka gãa ɓiɓɛ, ka ɓɔɔ ri daayi nɛɛ ri daa zili nwannang zang gari Jeriko ɓɛɛ.

³² A n kɔɔ ɓu vi tɔkn viya? Laa kpang, ɓɔɔ n kɔɔ ruu ka yuu Gidiyɔng, nɛɛ Barak, nɛɛ Samsong, nɛɛ Jafuta, nɛɛ Dawuda, nɛɛ Samayila, a ɓɔɔ rɛɛ zang nyaa shonang Laa ɓɛɛ.

³³ Ɓɔɔ ri, ka ruu danggn shinnang ɓarɛ, ri shaa rɛɛ tipi kpanti dɔɔli nɛɛ sĩiri ɓɛɛ. Ri dɔ̀ng zang ruu gn dang gbete kpang, a ri walɛ vuu ɓɔɔ zang a nyaa ka yuu ɓarɛ ɓɛɛ. Zang ɓɔɔ ri nɔɔ nyaa zing.

³⁴ Ri ningsi waa ɓɔɔ shaa nɛɛ gnvɔ ning ɓɛɛ, ri wɔ nɛɛ vɔrɔ yere bang. Zang ɓɔɔ bɛ̀ɛ́ ri lakɛ naa ka bii kpang, zang a ri kaka, a ri raa zang ɓɔɔ ri ta sĩiri nɛɛ kaka ɓɛɛ, ri shing zang sĩiri tipi ɓɔɔgn ri yuku.

³⁵ Zang soro ɓɔɔ zang ɓarɛ ɓɔɔ ri vɔlɔ katɔ, zang wisi ri paa tɔkn ningkãari. Zang ɓɔɔ zang tɔ̃̀ɔrɔ ri shoo, kasɛ katɔ nɛɛ zang dang ri jĩng katɔ kɔ jong, ka ɓɔɔ ri nɛɛ yaa danggn ɓɔɔ ri shing ɓɛɛ, a ri vɔlɔ ka ruu ɓɔɔ ri zi tɔ, nɛɛ Laa naa wisi ri paa ditɔ, ri nwang nwannang ɓɔɔ tɔ̃ɔ ka lapa.

³⁶ Zang ɓɔɔ zang kpaa ri, a zang nyɔ ri nɛɛ gbãa. A zang ɓɔɔ zang mã̀lɛ̀ ri nɛɛ saka, zang tɛ̃ɛ ri ka sãa.

³⁷ Zang luku rɛɛ zang ɓɔɔ nɛɛ tari, ri vɔlɔ, a zang ɓɔɔ zang basɛ ri doo paa ziti. Zang nyɔkɔ zang ɓɔɔ nɛɛ yere bang. Zang keɓe ri ɓarɛ zang ɓɔɔ vuu ka naa kpang, ri mã ɓarɛ koo jàa nɛɛ ɓɔɔ mɛ̀ɛrɛ́. Zang dang ri jĩng dɔɔli.

³⁸ Rɛɛ zang tɔ̃ɔ ɓɔɔ naa weɓe, koo keɓe daa ɓɔɔ ri nwang kagn ɓɛɛ kpang. Ri rakɛ ka jĩngti, nɛɛ yuu rɛɛ kɔpɔ. Ri nwálɛ́ ka yeng tari bang, a ɓɔɔ ka yeng puru.

³⁹ Zang keɓe nandon, Laa kɔɔ ruu tɔ̃ɔ ka yuu ɓarɛ ka ruu danggn ɓɔɔ ri shing ɓɛɛ. A zang ɓɔɔ kagn teteng ɓarɛ, ɓɔɔ walɛ vuu ɓɔɔ Laa a nyaa ka yuu ɓiɓɛ ɓɛɛ kaa takpang.

⁴⁰ Laa mang vuu ɓɔɔ tɔ̃ɔ tɔ̃ɔ kagn, ɓɔɔ wu shing rùu jong kagn ɓɛɛ. Naa rùu kagn kpang, nwang nyaa kiiri kpàng.