Yahudi 1 - Nyaa Shɔɔ Ɓɔɔ Laa a Ɓɛɛ

Laa ràng yee nɛɛ bii Jaa ɓiɓɛ

¹ Ka tĩng, Laa rang yee nɛɛ rɛɛ dabang ɓuru nɛɛ nyaa rɛɛ zang nyaa shonang ɓiɓɛ doo dɔɔli, a ka gbalang naabm naabm.

² A ka doo knti keɓe, Laa rang ruu yee ɓi kaa nɛɛ nyaa Jaa ɓiɓɛ. Jaa keɓe, Laa zɔ̃ng wu, nɛɛ vuu piti, wu naa nwang ɓɔɔ ɓiɓɛ, a Laa mã́a koo nɛɛ bii ɓiɓɛ ɓɛɛ kɔ.

³ Jaa keɓe, nɔng yakɛnang bannang Laa kagn bii ɓiɓɛ. Rùu ti zi naa ɓɔɔ Laa nwàng ɓɛɛ, ka bii ɓiɓɛ kɔ dɔ̃ɔ gbete. Wukɔ ti yiti koo nɛɛ naa vuu palɛnang ruu ɓiɓɛ. Ka knti ɓɔɔ wu sɔɔ zang vuu shi kpang ɓarɛ tɔ, daa nwàng ka nɔng nwannang ɓiɓɛ ka lapa, ka nakn Laa ɓɔɔ ɓa zang piti katɔ ɓɛɛ.

Jaa Laa ɓa zang nyaa shonang Laa ɓɔɔ ri ka lapa katɔ

⁴ Ka ruu nɔngkɔ, bannang Jaa Laa ɓa ɓɔɔ rɛɛ zang nyaa shonang Laa ɓɔɔ ri ka lapa kati, naa ɓɔɔ nung ɓɔɔ Laa a wu, ti ɓa ɓɔɔ ɓarɛ doo katɔ kɔ ɓɛɛ.

⁵ Ka ruu ɓɔɔ, Laa kɔ̀ɔ zang nyaa shonang ɓiɓɛ ɓɔɔ ri ka lapa ɓɔɔ gbete gngn kpang nɛɛ, “Mɔkɔ Jaa mɛɛ lɛ̀ɛ́kɔ n tusu tɔ nɛɛ n Daa ɓaaɓɛ”. Ti kɔ̀ɔ kpang tɔkn nɛɛ “N nwang daa ɓiɓɛ a wu nwang ɓi kaa Jaa mɛɛ.”

⁶ A kɔɔ tɔkn, ka ɓɔɔ Laa nwangsɛ jamari ɓiɓɛ ka koo, kɔɔyi tɔɔ, “Zang nyaa shonang Laa ɓɔɔ ri ka lapa nandon ri bang wu ta.”

⁷ Ka ɓɔɔ Laa rang yee ka yuu rɛɛ zang nyaa shonang ɓiɓɛ ɓɔɔ ri ka lapa kɔɔyi tɔɔ, “Rìsí rɛɛ zang nyaa shonang ɓiɓɛ ɓɔɔ ri ka lapa katɔ, ri nwang jasung, a ti rìsí zang ɓɔɔ ri pàlɛ́ wu shonang ri nwang nyɛlɛ waa.”

⁸ Ka yuu Jaa ɓiɓɛ, Laa kɔɔyi nɛɛ, “Mɔkɔ Laa, kpanti roonang ɓaaɓɛ ɓi ɓɔɔ gbinggbing ɓɛɛ. Vuu ɓɔɔ mɔɔ palɛ teetee, wukɔ nwang laa naa yitinang, ɓɔɔ mɔɔ roo kpanti nɛɛ mani ɓɛɛ.

⁹ Mɔɔ kasɛ ɓaa nɛɛ zang nwang zang tɔ̃ɔ ka tĩng Laa, mɔɔ bɛ̃ɛ shi kpang ɓaa katɔ. Ka ruu nɔngkɔ, nkɔ Laa, ɓɔɔ n Làá ɓaaɓɛ, n shing mɔɔ ka yuu rɛɛ sangvaa ɓaaɓɛ ka ɓɔɔ n nwàa mɔɔ nung, ɓɔɔ shing mɔɔ mɔ́ɔ tãa tĩnang ɓɛɛ.”

¹⁰ A ti kɔɔ tɔkn nɛɛ, “Kpanti, mɔkɔ loo doo koo keɓe ka tĩng, a mɔkɔ ti mãa lapa nɛɛ naa ɓaaɓɛ.

¹¹ Ri làsɛ́ katɔ nandon, a mɔɔ nwàng ɓaa dòndòng. Ri kàá katɔ naa fɔ̃ɔrɔ ɓɔɔ diki ɓiɓɛ bee tɔ ɓɛɛ.

¹² Mɔɔ leng ri katɔ naa fɔ̃ɔrɔ, zang kɔ̃̀sɔ́ ri katɔ naa ɓɔɔ zang kɔ̃sɔ fɔ̃ɔrɔ ɓɛɛ. A mɔɔ nwang ɓaa nɔ́ngkɔ̀ diki diki, a saa ɓaaɓɛ ti waa nyaa ɓi kpang.”

¹³ Laa kɔɔ zang nyaa shonang ɓiɓɛ ɓɔɔ ri ka lapa gbete gngn kpang nɛɛ, “Nwang ka nakn mɛɛ ka gbongkarɛ. Ń risi zang ɓɔɔ ri shing jĩng nɛɛ mɔɔ kpang, ri nwang laa ɓɔɔ mɔɔ naa doo kagn ɓɛɛ,” kpang.

¹⁴ Ka ruu nɔngkɔ zang nyaa shonang Laa ɓɔɔ ri ka lapa, ri ɓarɛ zang ɓɔɔ ri pàlɛ́ Laa shonang ɓɛɛ waati. Laa shong ri, nɛɛ ri yi rɛɛ zang ɓɔɔ wu naa ta yuu ɓarɛ naa ka bii.