Titu 3 - Nyaa Shɔɔ Ɓɔɔ Laa a Ɓɛɛ

Nwannang zang ɓɔɔ ri dũng Laa ɓɛɛ

¹ Kɔɔ ri nɛɛ ri ɓaa shoo ka nyaa rɛɛ kpanti, nɛɛ rɛɛ zang bang tipi. Ri ti kpalɛ bii diki diki, ri pálɛ́ shonang ɓɔɔ tɔ̃ɔ ɓɛɛ.

² Kɔɔ ri nɛɛ ri rang yee shi kpang ka yuu zang ɓɔɔ kpang. Ri nwang ka nyaa zɔɔ nɛɛ zang, ri yi wusang nɛɛ zang piti. Ri pálɛ̀ hakaka kpang.

³ Ka ruu ɓɔɔ, ɓeleng ruu nɛɛ yuu ɓuru bɛ̀ɛ́ ruu palɛ vuu shoko, ruu ɓaa shoo ka nyaa Laa kpang, zang nwãarɛ ruu. Ruu nwang ɓuru jaafoo, vuu ɓɔɔ bii ɓuru kasɛ ɓɛɛ, nɛɛ vuu ɓɔɔ shingnɛ zang tãa tĩnang ɓɛɛ ka zɔ̃ng zɔ̃ng. Ruu sùúkãng ka nɔng vuu shi kpang palɛnang nɛɛ sũnyaa kaanang. Zang piti bɛ̃ɛ ruu katɔ, a ruu ti bɛ̃ɛ zang piti.

⁴ A ɓɔɔ Laa ɓɔɔ wukɔ ta yuu ɓuru, tusu tɔ̃ɔ ɓiɓɛ nɛɛ naa ɓɔɔ wu kasɛ zang piti ɓɛɛ.

⁵ Ta yuu ɓuru kati. Wu ka ruu vuu tɔ̃ɔ ɓɔɔ kagn ɓɔɔ ruu nɛɛ yuu ɓuru ruu palɛ ɓɛɛ kpang. Tà yuu ɓuru, ɓi ka ruu gn ɓuru ɓɔɔ kɔ̀ng wu ɓɛɛ. Tà yuu ɓuru ka bii ɓɔɔ Suru Laa sɔɔ ruu ɓɛɛ. Bii sɔɔnang ɓɔɔ risi ruu naa zang yi ruu kaa shɔɔ, a á ruu suru bii shɔɔ ɓɛɛ.

⁶ Laa a ruu suru ɓiɓɛ dɔ̃ɔ gbete nɛɛ bii Yeesɔ Kirisi, ɓɔɔ wukɔ ta yuu ɓuru ɓɛɛ.

⁷ Tɔ̀ɔ, ka ruu tɔ̃ɔ Yeesɔ Kirisi, ruu nwang zang tɔ̃ɔ kaa tĩng Laa, a ruu wàlɛ́ suru bii ɓɔɔ waa nyaa kpang ɓɔɔ ruu shing gn ɓiɓɛ kati.

⁸ Ruu kɔ zang kɔɔ ɓɛɛ, niizang kɔ nwani. N kasɛ mɔɔ yi tĩng ɓaa ka vuu kɔ n kɔɔrɔ ɓee tɔ̃ɔ tɔ̃ɔ. Tɔ̀ɔ, zang ɓɔɔ ri dũng Laa, ri dũng vuu keɓe, ri pálɛ́ shonang ɓɔɔ tɔ̃ɔ ɓɛɛ. Shonang keɓe, wukɔ tɔ̃ɔ ti yi zang piti naa katɔ ka bii.

⁹ Mɔɔ ɓaa shoo ɓáà ka nyaa shoko ɓɔɔ zang làáyi, nɛɛ rɛɛ dabang ɓarɛ ɓɔɔ ri gã̀kɛ́ ɓɛɛ kpang. Mɔɔ haarɛ nyaa nɛɛ zang kpang, nɔɔ ti basɛ zɔɔ ka yuu nyaa ɓɔɔ Musa dangnɛ ɓɛɛ kpang. Naa nɔɔ palɛ nɔngkɔ yì nɔɔ naa ɓi ka bii kpang, ti nwang nɔɔ vuu ɓɔɔ ɓi kpang.

¹⁰ Zang ɓɔɔ nɛɛ tɔɔ wu basɛ teteng zang, shàarɛ̀ wu nyaa doo ziti kɔ nwani. Ka knti weɓe, ruu ɓaaɓɛ wu hãa tɔ̀ɔ́ kagn nɛɛ wu kpang.

¹¹ Mɔɔ zi tɔ nɛɛ, zɔ̃ng zang keɓe, yaa gbalang tɔ̃ɔ tɔ, ti yi tĩng ɓi kaa nɛɛ vuu shi kpang palɛnang. Vuu shi kpang ɓɔɔ wu palɛ, dɔng wu ruu tɔ, nɛɛ pálɛ̀ vuu ɓɔɔ tɔ̃ɔ kpang.

Naa ɓɔɔ Bulu di nyaa ruu ɓɛɛ

¹² N nɛ́ɛ shong Aratima kpang, n shong Tikiku ditɔ ka bii ɓaaɓɛ. Nɛɛ a tɔ, mɔɔ palɛ pati mɔɔ a ka bii mɛɛ ka gari Nikopoli. Ka ruu ɓɔɔ, n tɔɔ, laa pũngku keɓe n nwang lɛ̀ɛ́ ka nɔngkɔ ɓɛɛ.

¹³ Yi Apolo nɛɛ Zeena yɔɔ ɓɔɔ zi nyaa dannang dɔɔli naa ka bii ri yupaa zanti ɓarɛ daanang. Mɔɔ yi ri naa kagn ri walɛ vuu ɓɔɔ ri kasɛ nandon.

¹⁴ Zang ɓuru ɓɔɔ ri dũng Laa, ri kpɛ̃ɛrɛ shonang ɓɔɔ tɔ̃ɔ palɛnang, tɔ̀ɔ, ri yi zang ɓɔɔ vuu ka naa ɓarɛ kpang naa jong ka bii. Ri nwàng nwannang waati kpang.

¹⁵ Zang ɓɔɔ ri nɛɛ n, ɓɔɔ ri dũng doo Laa kɔ, ri jee mɔɔ nyaa. Mɔɔ jèe ruu wusang ɓuru ɓɔɔ ri dũng doo Laa kɔ nyaa. Laa wu pàlɛ̀ nɔɔ tɔ̃ɔ nandon.