Titu 1 - Nyaa Shɔɔ Ɓɔɔ Laa a Ɓɛɛ

¹ Labeenang keɓe nɛɛ bii mɛɛ nkɔ Bulu, zang ɓɔɔ pàlɛ́ Laa shonang, n ti zang shonang Yeesɔ Kirisi ɓɛɛ. Laa zɔ̃ng m nɛɛ n nwang zang shonang ɓiɓɛ, a shong m nɛɛ n yi zang ɓɔɔ Laa zɔ̃ng ri katɔ naa ka bii, ri shing danggn gbãng gbãng. N ti shing ri, ri zi vuu ɓɔɔ niizang ɓɔɔ shingnɛ ri nwang nwannang ɓɔɔ Laa kasɛ ɓɛɛ.

² Tɔ̀ɔ, ri shing gn ka suru bii ɓɔɔ waa nyaa kpang, ɓɔɔ Laa ɓɔɔ suu sèé kpang a zang nyaa bɛ̀ɛ́ zang mãa koo gn kpang ɓɛɛ.

³ Ka ɓɔɔ diki a tɔ teetee Laa nwangsɛ rùu ruu suru bii keɓe, ka yeti yee ɓiɓɛ. Laa ɓɔɔ wukɔ ta yuu ɓuru, a m ruu keɓe, a kɔɔ m nɛɛ n kɔɔrɔ zang.

⁴ N bèé mɔkɔ Titu, ɓɔɔ ka gbalang danggn kɔ ruu shing nandon ɓee, mɔɔ ɓaa kaa jaa mɛɛ niizang ɓɛɛ. N gaa Laa ɓɔɔ wukɔ Daa ɓuru nɛɛ Yeesɔ Kirisi ɓɔɔ wukɔ ta yuu ɓuru, ri pàlɛ̀ mɔɔ tɔ̃ɔ, ri shingnɛ, mɔɔ nwang waasɛ̃.

Shonang ɓɔɔ Bulu nɛɛ Titu wu palɛ, ka Karita ɓɛɛ

⁵ N yaa mɔɔ ka tipi Karita n tɔɔ, mɔɔ hangsɛ vuu ɓɔɔ ruu palɛ, ruu yaa nyaa ka gbalang ɓɛɛ waasɛ̃. A mɔɔ ti zɔ̃ngkɔ zang bang ka Gãa Laa ka gari gari, naa ɓɔɔ n kɔɔ mɔɔ ɓɛɛ.

⁶ Zang bang zang ɓɔɔ ri dũng Laa, wu nwang ɓi zang ɓɔɔ shi kpang ka bii ɓiɓɛ kpang ɓɛɛ. Soro ɓiɓɛ gbete kɔ nwani. Wujɛ ɓiɓɛ nandon, ri shing danggn tɔ ka bii Laa. Ri wu wujɛ ɓɔɔ palɛ vuu shi kpang, kpang, a ri ti tá shoo pɛɛrɛ kpang ɓɛɛ.

⁷ Ka ruu ɓɔɔ, zang bang Gãa Laa gãng jĩng ɓi ka shonang Laa, wu nwang ɓi zang ɓɔɔ shi kpang ka bii ɓiɓɛ kpang ɓɛɛ. Wu tuu yuu kpang, wu ti ta yeti gbãngko kpang. Wu zang ɓɔɔ sàa si wu kpang, wu zang ɓɔɔ laa nyaa kpang. Wu ti zang ɓɔɔ shing jĩng ka saka kãanang ɓɛɛ kpang, a wu ti zang ɓɔɔ shaa varɛ dɔɔli kpang.

⁸ Ɓi zang ɓɔɔ ta zang zanti ka gãa ɓiɓɛ waasɛ̃ ɓɛɛ, zang ɓɔɔ kasɛ vuu tɔ̃ɔ palɛnang ɓɛɛ, zang ɓɔɔ palɛ vuu sãnsãnrãng kpang ɓɛɛ, palɛ ɓi vuu ɓɔɔ daa bii katɔ diki diki, ti palɛ ɓi vuu ɓɔɔ Laa kasɛ ɓɛɛ, zang ɓɔɔ yiti yuu ɓiɓɛ waasɛ̃ ɓɛɛ.

⁹ Wu ti yiti ruu niizang ɓɔɔ ka vuu ɓɔɔ zang ɓɔɔ ri dũng Laa ri tusu ɓɛɛ gbãng gbãng. Wu palɛ nɔngkɔ, wu mã̀ zang ɓɔɔ danggn nɛɛ vuu ɓɔɔ wu tusu ɓɛɛ. Wu ti tùsù zang ɓɔɔ ri bɛ̃ɛ rúu bìí katɔ, naa ɓɔɔ ri ning gbalang ɓɛɛ.

¹⁰ Ka ruu ɓɔɔ, zang dɔɔli nɛɛ zang ɓɔɔ ri yaa gbalang zang Yahudi dũnnang ri dũng kaa Laa, ri ta ruu niizang ɓɔɔ zang ɓɔɔ ri dũng Laa ri tusu ɓɛɛ kpang. Ri nwãarɛ zang ɓarɛ nɛɛ yee shoko ɓɔɔ ri rangkɛ ɓɛɛ.

¹¹ Zãa ri ruu shi kpang ɓɔɔ ri tusu zang ɓɛɛ katɔ. Ri kpantɛ danggn ɓɔɔ zang gaa gaa ri shing ɓɛɛ, nɛɛ vuu ɓɔɔ daa naa tusunang kpang ɓɛɛ. Ri palɛ vuu keɓe, ka ruu ɓɔɔ, ri shing jĩng ɓarɛ ka saka kãanang ɓɛɛ.

¹² Zang nyaa shonang ɓarɛ ɓɔɔ kagn, doo zang Karita kɔ, kɔ̀ɔ nɛɛ nyaa ɓiɓɛ nɛɛ, “Zang Karita ɓarɛ zang sèé, ri nwang naa yɔpɔ kpaasi, ri ɓarɛ zang ráng ɓɔɔ shaa vuu dɔɔli ɓɛɛ.”

¹³ Ruu kɔ yɔɔ kɔ̀ɔ ɓee, niizang kɔ nwani. Ka ruu nɔngkɔ, mangkɛ ri nabm, tɔ̀ɔ ri nwang zang ɓɔɔ ri shing danggn gbãng gbãng ɓɛɛ.

¹⁴ Ri yaa ruu gbãagbãa zang Yahudi ta, nɛɛ vuu ɓɔɔ shɔnzang ri kasɛ nɛɛ zang palɛ, ɓɔɔ zang ɓɔɔ ri bɛ̃ɛ Ruu Tɔ̃ɔ Laa katɔ, ri tusu zang ɓɛɛ.

¹⁵ Ka jĩng zang ɓɔɔ ri dũng Laa nɛɛ yeti gbete, vuu piti ɓi tɔ̃ɔ kɔ nandon. A zang ɓɔɔ vuu shi kpang palɛnang lasɛ ri tɔ, ɓɔɔ ri shing danggn ɓarɛ ka ruu ɓɔɔ niizang kpang, vuu ɓɔɔ tɔ̃ɔ ɓi kagn kpang. Ka ruu ɓɔɔ, vuu shi kpang ɓɔɔ ri palɛ lasɛ rɛ̃rɛnang ɓarɛ tɔ ɓɛɛ.

¹⁶ Ri kɔ̀ɔ́ ɓarɛ nɛɛ ri zi Laa tɔ, a vuu ɓɔɔ ri palɛ tusu kaa nɛɛ ri zi Laa nung kpang. Ri ɓarɛ vuu ɓɔɔ zang bɛ̃ɛ katɔ ɓɛɛ, ri ɓaa shoo ka nyaa zang kpang, ri daa naa vuu tɔ̃ɔ palɛnang ɓarɛ kpang tingkiring.