Rooma 7 - Nyaa Shɔɔ Ɓɔɔ Laa a ƁɛɛZang gã̀sɛ́ nwannang zang Laa, nɛɛ soro geenang 1 Manzung, nɔɔ zi vuu ɓɔɔ n kɔ̀ɔ́ kãntang keɓe tɔ, ka ruu ɓɔɔ, nɔɔ zi nyaa ɓɔɔ Laa dangnɛ tɔ ɓɛɛ. Nyaa kɔ Laa dang ɓee, kɔɔ zang vuu ɓɔɔ zang palɛ bɛ̀ɛ́ zang doo ningkãari kɔ shɛ̃ɛning. 2 Nyaa ɓɔɔ Laa dangnɛ kɔɔyi nɛɛ, soro ɓɔɔ zang gee tɔ, ri basɛ zɔɔ nɛɛ ɓeevɛ kpang, ɓeevɛ nɛɛ doo ningkãari ɓɛɛ. Ɓeevɛ nɛɛ vɔ tɔ, wɔ tɔ nɛɛ naa nyaa dannang ɓɔɔ ɓakɛ wu nɛɛ ɓeevɛ ɓɛɛ. 3 Naa yaa ɓeevɛ, daa gee zang ɓɔɔgn, bɛ̀ɛ́ ɓeevɛ doo ningkãari, zang ɓaa wu nɛɛ zang ɓɔɔ pálɛ̀ dũndũng ɓɛɛ. Naa ɓeevɛ nɛɛ vɔrɛ, zang yaa wu gbalang tɔ, wu daa gee zang ɓɔɔgn. Pálɛ̀ wu vuu dũndũng kpang, nɛɛ gee zang ɓɔɔgn ɓɛɛ. 4 Manzung, nɔɔ doo nɔngkɔ. Nyaa ɓɔɔ Laa dangnɛ, risi nɔɔ manɛ naa zang ɓɔɔ ri vɔlɔ katɔ ɓɛɛ, ka ruu ɓɔɔ, nɔɔ ɓakɛ bii tɔ nɛɛ Kirisi ɓɛɛ. Kãntang keɓe, nɔɔ manɛ kaa zang Kirisi ɓɔɔ Laa wisi wu paa nɛɛ saa ɓɛɛ, tɔ̀ɔ, ruu shòng Laa shonang ɓɔɔ tɔ̃ɔ kati. 5 Ka ɓɔɔ bɛ̀ɛ́ ruu nwàng doo nwannang naa shɔnzang waati ɓɛɛ, bii ɓuru ɓɔɔ kasɛ vuu shi kpang palɛnang, sèé paa kaa gbãng gbãng, ka ruu ɓɔɔ, nyaa dannang Laa shing wu ɓɛɛ. Vuu piti ɓɔɔ ruu palɛ nwang ruu ɓuru vɔrɔ kɔ shɛ̃ɛning. 6 Kãntang keɓe, Laa ta ruu tɔ nɛɛ naa nyaa dannang ɓiɓɛ, ka ruu ɓɔɔ, ruu nwalɛ ɓuru kaa naa zang ɓɔɔ vuu shi kpang roo kpanti tɔ̀ɔ́ yuu ɓarɛ kpang ɓɛɛ. Kãntang keɓe, ruu pàlɛ́ Laa shonang kaa tɔ, ka gbalang ɓɔɔgn, ka ɓɔɔ ruu ɓaa shoo ka nyaa Suru ɓiɓɛ ɓɛɛ. Wu ka gbalang gbaala, ka ɓɔɔ ruu dũng nyaa dannang Laa, ɓɔɔ zang bée nɛɛ naa ɓɛɛ kpang. Vuu ɓɔɔ nyaa ɓɔɔ Laa dangnɛ, tusu ɓɛɛ 7 Ruu kɔɔ ɓu kaa nɛɛ viya? Nɛɛ nyaa ɓɔɔ Laa dangnɛ vuu shi kpang ya? Kpang. Nyaa ɓɔɔ Laa dangnɛ kɔ tùsù m vuu ɓɔɔ zang ɓaa nɛɛ vuu shi kpang palɛnang ɓɛɛ. N nɛ̀ɛ́ zi vuu ɓɔɔ zang ɓaa nɛɛ zang shing jĩng ka vuu zang kpang, naa Laa nɛɛ dang nyaa nɛɛ, “Zang wu shing jĩng ka vuu zang kpang,” kpang ɓɛɛ. 8 Ɓi vuu shi kpang walɛ gbalang nɛɛ bii nyaa dannang Laa, a shing m, n shĩ̀lí jĩng ka vuu zang ka zɔ̃ng zɔ̃ng. Naa nyaa ɓɔɔ Laa dangnɛ, nɛɛ kpang, vuu shi kpang nɛɛ zunung vuu ɓɔɔ palɛnang kpang. 9 Ka ɓɔɔ bɛ̀ɛ́ n zi nyaa ɓɔɔ Laa dangnɛ gn kpang, bɛ̀ɛ́ n m ningkãari. Ɓu doo ɓɔɔ n tãa nyaa ɓɔɔ Laa dangnɛ hn, n kasɛ vuu shi kpang palɛnang kaa gbãng gbãng. 10 N nwang kaa naa zang ɓɔɔ vɔ katɔ ɓɛɛ. Nyaa dannang ɓɔɔ zang nɛɛ wu a zang suru, nyɔ m kaa vɔrɔ kɔ jong. 11 Vuu shi kpang walɛ gbalang nɛɛ bii nyaa ɓɔɔ Laa dangnɛ, a nwãarɛ m, a ti nyɔ m vɔrɔ. 12 Ka ruu nɔngkɔ, shi kpang ɓi kagn ka nyaa ɓɔɔ Laa dang ɓɛɛ kpang. Nyaa dannang Laa ɓu kɔɔ ɓi vuu ɓɔɔ waasɛ̃ ɓɛɛ, ti pàlɛ́ zang tɔ̃ɔ. 13 Wee nɔɔ kɔɔ ɓu kaa nɛɛ vuu tɔ̃ɔ keɓe kɔ nyɔ m vɔrɔ ya? Wu nɔngkɔ kpang. Ɓi vuu shi kpang, tuu vuu ɓɔɔ tɔ̃ɔ, a nyɔ m vɔrɔ nɛɛ mani, tɔɔ wu tusu bii ɓiɓɛ kaa tɔ̃ɔ tɔ̃ɔ. Ka ruu nɔngkɔ, nyaa dannang Laa kɔ shingnɛ vuu shi kpang tusu nɛɛ wu kaa shi kpang tingkiring. Vuu ɓɔɔ waa zɔɔ ka yeti ɓuru ɓɛɛ 14 Ruu zi ɓuru tɔ nɛɛ nyaa ɓɔɔ Laa dangnɛ ɓi vuu suru, a n m kaa shɔnzang. N raa m kaa naa jaafoo vuu shi kpang palɛnang. 15 N zi vuu ɓɔɔ n palɛ ɓɛɛ m kpang. Ka ruu ɓɔɔ, n palɛ wu vuu ɓɔɔ n kasɛ palɛnang kpang ɓɛɛ, n palɛ vuu ɓɔɔ n kasɛ kpang ɓɛɛ kɔ jong. 16 Naa n palɛ vuu ɓɔɔ n kasɛ kpang kɔ jong, n zi kaa wukɔ nɛɛ nyaa ɓɔɔ Laa dangnɛ ɓi tɔ̃ɔ. 17 Ka ruu nɔngkɔ, ɓi nkɔ palɛ vuu ɓɔɔ n palɛ nɛɛ yuu mɛɛ kpang, ɓi vuu shi kpang ɓɔɔ nwang ka yeti mɛɛ kɔ shing m. 18 N zi tɔ ka bii shɔnzang mɛɛ tɔ̃ɔ ɓi kagn kpang. Ka ruu ɓɔɔ, naa n kasɛ doo katɔ ka yeti mɛɛ, n pálɛ́ tɔ̃ɔ, a n zunung palɛnang kaa takpang ɓɛɛ. 19 N pálɛ̀ tɔ̃ɔ ɓɔɔ n kasɛ palɛnang kpang. N palɛ vuu shi kpang ɓɔɔ n kasɛ palɛnang kpang ɓɛɛ kɔ jong. 20 Naa n pálɛ̀ vuu ɓɔɔ n kasɛ palɛnang kpang, zang zi kaa wukɔ nɛɛ ɓi nkɔ palɛ vuu ɓɔɔ n palɛ keɓe nɛɛ yuu mɛɛ kpang. Ɓi vuu shi kpang ɓɔɔ nwang ka yeti mɛɛ kɔ jong, palɛ. 21 Ka ruu nɔngkɔ, vuu ɓɔɔ n zi ka bii mɛɛ keɓe. Naa n kasɛ n tɔɔ n palɛ tɔ̃ɔ, n palɛ m vuu ɓɔɔ shi kpang kɔ gbete. 22 Ka yeti mɛɛ, n tãa tĩnang nyaa ɓɔɔ Laa dang ɓɛɛ katɔ. 23 A n ti zirɛ, nyaa dannang ɓɔɔ kagn yeti mɛɛ, ɓɔɔ waa zɔɔ nɛɛ nyaa dannang ɓɔɔ yeti mɛɛ kasɛ ɓɛɛ. Nwang m kaa naa nyaa dannang vuu shi kpang ɓɔɔ ka bii mɛɛ, mã m ka sãa. 24 N m zang ɓɔɔ tãa tĩnang kpang ɓɛɛ. Wi ta m jong nɛɛ naa bii mɛɛ kɔ raa m vɔrɔ ɓee wiya? 25 N zãa Laa tɔ, ta m tɔ nɛɛ bii Kpanti ɓuru Yeesɔ Kirisi. Ka ruu nɔngkɔ, n pàlɛ́ nyaa dannang Laa shonang nɛɛ yeti mɛɛ, n pàlɛ́ nyaa ɓɔɔ vuu shi kpang dangnɛ shonang ɓi kaa nɛɛ bii shɔnzang mɛɛ. |
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust
Nigeria Bible Translation Trust